İctimai dəyərlər cəmiyyət prioritetləri ilə həmahəngdir. Dövlətçiliyin xidmətində duran hər kəs bu prosesin daşıyıcısı hesab olunur. Açığı, parlaq istedadlı alim, texnika üzrə fəlsəfə doktoru Quliyev Ramin Adıgözəl oğlunun peşəkar fəaliyyəti də cəmiyyət resurslarını özündə müfəssəl ehtiva edir. Onun yaradıcılığınının elmi və ictimai predmeti şəxsiyyət faktorudur və bu müstəvidə o, məsuliyyət hissinin fövqündə durmağı bacarır...
Əvvəlcə, Quliyev Ramin Adgözəl oğlunun oxucu ilə təmasını qurmaq üçün qısa tərcümeyi-halı ilə tanış olaq:
Quliyev Ramin Adgözəl oğlu 5 may 1984-cü ildə Neftçala rayonunun Qoltuq kəndində anadan olub. 1991-ci ildə Neftçala rayonu 2 saylı orta məktəbin 1-ci sinfinə gedib. 1999-2000-ci illərdə təhsilini C.Naxçıvansiki adına Hərbi Litseydə davam etdirib. Litseydə oxuduğu müddətdə yüksək nizam-intizamı və təhsildə göstərdiyi nailiyyətlərinə görə litseyin rəhbərliyi tərəfindən iki dəfə Fəxri Fərmanla təltif edilib. 2002-ci ildə orta təhsilini başa vuraraq Azərbaycan Dövlət Neft Akademiyasının «Faydalı qazıntı yataqlarının işlənməsi» istiqaməti üzrə Qaz-Neft-Mədən fakültəsinə daxil olub. Təhsil aldığı müddətdə əlaçı təqaüdü ilə yanaşı, «Karat Holdinq» Şirkətlər Qrupunun təsis etdiyi təqaüdə layiq görülüb. 2005-2006-cı illərdə Azərbaycan Dövlət Neft Akademiyasında fəaliyyət göstərən Tələbə-Gənclər Təşkilatının sədr müavini vəzifəsində çalışıb, Gənclər və İdman Nazirliyinin təşkil etdiyi müxtəlif treninqlərdə iştirak edərək sertifikat və şəhadətnamələr alıb. Həmin illərdə Neft Mühəndisliyi Cəmiyyətinin üzvü olub, burada təşkil olunmuş simpoziumlarda iştirak edib, sertifikat alıb. Bununla yanaşı, 2005-ci ildə neftçalalı tələbə-gənclərin Respublikanın ictimai-siyasi həyatında fəallığını təmin etmək məqsədilə Qeyri-Hökumət Təşkilatı olan «Gələcəyin Gəncləri» İctimai Birliyini təsis edib və həmin təşkilatın sədri olub. 2006-cı ildə Azərbaycan Dövlət Neft Akademiyasını bitirərək «Neft və qaz yataqlarının işlənməsi və istismarı» ixtisasına yiyələnib. 2007-2009-cu illərdə «Neft və qaz yataqlarının işlənməsi və istismarı» ixtisası üzrə magistraturanı bitirib. 2013-1017-ci illərdə Azərbaycan Dövlət Neft və Sənaye Universitetinin doktorantura pilləsi üzrə təhsil alıb. 2018-ci ildə Azərbaycan Respublikası Prezidenti yanında Ali Attestasiya Komissiyası tərəfindən texnika üzrə fəlsəfə doktoru elmi dərəcəsi alıb.
Ramin Quliyev 2006-cı ildə müsabiqə yolu ilə «Anşad Petrol» Müştərək Müəssisəsinə işə qəbul edilib, orada əmək fəaliyyətinə neft-qazçıxarma ustası kimi başlayıb, sonra aparıcı mühəndis və NQÇİ-nin rəisi vəzifəsində işləyib. 2009-cu ilin oktyabr-noyabr aylarında «Neftçala Operatinq Kompani» LTD şirkətinin Azərbaycan filialında 1 saylı NQÇİ-də sex rəisi olub. Həmin ilin dekabr ayından 2012-ci ilin iyun ayına qədər «Azneft» İstehsalat Birliyi «Bibiheybətneft» NQÇİ-də 3 saylı NQÇİ-nin rəisi işləyib. 26 iyun 2012-ci ildən 15 yanvar 2020-ci ilədək «Azneft» İB-nin Ə.C. Əmirov adına NQÇİ-nin rəisi kimi çalışıb. 16 yanvar 2020-ci ildən «Azneft» İB-nin «Abşeronneft» NQÇİ-nin rəisi vəzifəsini icra edir.
Ailəlidir, 3 övladı var.

Əlbəttə, bu tanışlıqdan da bəlli olur ki, Ramin Quliyevin bir-birindən canlı və təravətli görünən peşə uğurlarında şəxsiyyət amili aparıcı xəttir. Bu prosesi onun ömür gündəliyi kimi də xarakterizə edə bilərik.
Tanıyanlar yaxşı bilir, biz də mübaliğəsiz deyirik ki, Ramin Quliyev işıqlı şəxsiyyət, nüfuzlu insandır; təəccübverici xüsusiyyətlərə malikdir, rəhbərlik etdiyi kollektivin, onu tanıyanların qəlbində özünə insanlıq məbədi qurmağı bacarır. Baxmayaraq ki, cavan kadrdır, aradan ötən illər, bəlkə də onun ömründən səssiz ötən xatirə köçü kimi gəlib-gedib; qayğılar qəlbinin qapısını nə vaxt tıqqıldadıb, gözlərini məchul bir nöqtəyə nə zaman zilləyib, ruhunu cəmiyyətlə necə qabaq-qənşər qoyub, xəbəri olmayıb... İndi baxır ki, saçlarına «qar» yağıb, çöhrəsinə şeh düşüb...
İnsan var ki, gözlərinə baxdığın an ruhun gen küçələrində xəyal qatarının səsini eşidirsən. Bu səs səni təmiz, saf ənginliklərə aparır. Yəqin oxucular səmimiyyətimizə inanar; elə bu mənada, Ramin Quliyevin təmiz, saf şəxsiyyəti bizi məmnun edir. Çünki onun insan surətindəki doğmalıq ruhunun işıqlı, qəlbinin geniş, vicdanının bütöv olmasını ifadə edir. Bir yandan iman əhli olması onu insanların gözündə ikiqat ucaldır.
Onunla qabaq-qənşər gələnlər onun içindəki ləngəri, çılğın harayı, dəlisov-düşüncəli məmnunluğu, bir də həqiqət hissini aydın hiss edə bilirlər. Bəzən bizə də elə gəlir ki, o, zülmətin işığından sıyrılmağa can atan sevdaların köçünə qoşulub. Çöhrəsindəki Allah eşqi saf qəlbinə işıq salır və bu, o, anlama gəlir ki, o, pak dualarının hənirində bir ömür cilalayır, varlığında təcəlla edən həyat duyğuları insanların yaddaş qapılarına parıltı səpir. Belə deyək, bu müdrik anın fəhmindəki dürüstlük tarixlərin yaddaşında çırpınan gerçəklərə çağırışdır.
Bu gün Ramin müəllim həm də Vətən eşqində təcəlla etdiyi üçün könül aləmini Vətən sevdaları ilə rəngləyib. Bu duyğusal hal onu uzaqdan görünən başı qarlı dağlar qədər uca və məğrur edir...
Ramin Quliyev zəhmət adamıdır və zəhmətkeş insanlara xüsusi diqqət yetirir. Bu səbəbdən o, bir rəhbər kimi deyir ki, neftçinin ən böyük sevinci quyularda neft hasilatını görməkdir: Bu, valideyn üçün övladının dərsdən beş alması kimi bir şeydir, yəni, əməyinin bəhrəsini görürsən.
Ramin Quliyev neft sektorunda təhlükəsizliyin ən prioritet məsələ olduğunu bildirir. Deyir ki, bir insanın, mütəxəssisin formalaşmasına xeyli vaxt sərf olunur, bir adamı itirmək tək bir ailənin faciəsi deyil, bu, həm də bütün neftçilər üçün itkidir. Bəli, belə bir qayğı, belə bir fikir yalnız halal nəsildən çıxmış, halallığı özünün ən ümdə vəzifəsi edən şəxsdə formalaşa bilər.
Ramin Quliyev özünü əsl dövlətsevər insan kimi cəmiyyətə təqdim edir. Onun musiqi və idmanla məşğul olduğunu, bədii ədəbiyyata marağını biləndə, tam əmin olduq ki, içindəki kövrəklik, insana məhəbbət haradan qaynaqlanır. Onun fortepianoda ifa etdiyi musiqi parçaları da hazırda rəis olduğu NQÇİ-dəki ab-hava qədər ləngərli və ürəkoxşayandır. Elə bu timsalda Ramin Quliyev gənc neftçilərə və neftçi olmaq istəyən şəxslərə peşələrinə böyük sevgi ilə yanaşmağı məsləhət görür.
Ramin Quliyev bir rəis kimi öz işinin atmosferini çox dəqiq təyin edir. Belə ki, o, hər gün neft hasilatının dinamikasında qalxmanı müşahidə edir, gündəlik neft hasilatı məsələlərinə ciddi nəzər salır, illik hasilatın ağır zəhmətdən qaynaqlandığını deyir, Abşeronneft" NQÇİ tərəfindən "Pirallahı adası", “Darvin bankası”, “Gürgan dəniz”, “Abşeron bankası” və “Qərbi Abşeron”da neft və qaz yataqlarının istismarını xüsusi diqqətdə saxlayır, “Abşeronneft” NQÇİ-nin gələcək üçün böyük perspektiv planlarına daha ciddi yanaşır, istismara yeni daxil olmuş yataqlarda təzə özüllərin tikilməsini, 115 ildir istismar edilən “Pirallahı” yatağının dayaz sulu hissəsində torpaq özüllərin salınmasını əsas prioritet məsələlərdən hesab edir. Bu da onun bir mütəxəssis kimi düzgün təyinatına işarədir.
Ramin Quliyevin dövlətə, dövlət başçısına, bayrağa, torpağa məhəbbəti könül verdiyi işində də bariz şəkil alıb. Sanki o, çalışdığı işlə nəfəs alır, özünü burada geniş əhatədə görür. Çoxlarına müəssər olmayan bu vacib nüans onun üçün həyat eşqidir.
Biz (əslində) işıqlı alim-insan Ramin Quliyevin Obrazı haqda çox şey deyə bilərik. Qısaca, demək istəyirik ki, o, aydın hücrədir, onun geniş təqdimata zərrə ehtiyacı yoxdur. Biz sadəcə, ruhsal yöndən onu xarakterizə edirik; vücudumuzda oyanan ləngərli çırpıntılar bizi gen vadilərdə üşüyən xatirələrinə sığal çəkən bu qətiyyət sahibinin vətəndaş əzmi ilə qarşılaşdırır...
Bəli, Ramin Quliyevi insanlıq zirvəsinə yüksəldən mə¬qam¬lar onu bizə bəzən də min illərin yorğun yolçusu kimi təqdim edir. Bu şərəfli ömür sahibinə Allahdan möhkəm can sağlığı, yeni uğurlar arzulayırıq.

Zahir Qalib