Türk lirəsi rekord səviyyədə ucuzlaşdı

Türk lirəsi ABŞ dollarına nisbətdə 34,88 civarında olub və rekord aşağı səviyyəyə düşüb.
Lirənin dəyərdən düşməsinin əsas səbəbləri arasında cari hesab balansındakı kəsir və özəl sektorun yüksək xarici borcu göstərilir. Qeyd edək ki, Türkiyə Mərkəzi Bankı noyabr ayında əsas faiz dərəcəsini səkkizinci dəfə ardıcıl olaraq 50%-də sabit saxladı. Bu arada, inflyasiya oktyabrda 48,58%-ə düşüb, sentyabrda isə 49,38% idi. Lakin inflyasiya həm sentyabr, həm də oktyabr aylarında bazar gözləntilərini üstələyib. Bu səbəbdən investorlar faiz endirimi ilə bağlı proqnozlarını gələn ilə qədər təxirə salıblar.
Ayın əvvəlində Mərkəzi Bank 2024-cü ilin sonu üçün inflyasiya proqnozunu 38%-dən 44%-ə, 2025-ci ilin sonu üçün isə 14%-dən 21%-ə yüksəltdi. Eyni zamanda, bəzi hesabatlar göstərir ki, dövlət banklarının zəif lirə səviyyələrində dollar satışı ilə müdaxilələrindən sonra bəzi ticarətçilər artıq “kerri ticarətini” dayandırmağa başlayıblar.
Türkiyə lirəsi 2029-cu ilə kimi Azərbaycan manatı qarşısında ucuzlaşmaqda davam edəcək.
"Economist Intelligence Unit"in (EIU) ölkə ilə bağlı proqnozuna görə lirə manat qarşısında 4 il ərzində 24% civarında ucuzlaşacaq. Türkiyə lirəsinin məzənnəsi 2024-cü il üzrə 0,050 AZN, 2025-ci ildə 0,042 AZN, 2026, 2027 və 2028-ci illərdə isə 0,038 AZN səviyyəsində formalaşacaq.