“Rusiya vətəndaşını öldürməkdə günahlandırılan azərbaycanlı ilə vəhşicəsinə rəftar edirlər və heç bir ölkədə belə işlər aparılmır”. Bu sözləri Modern.az saytına açıqlamasında Azərbaycan Kinematoqrafçılar İttifaqının rəhbəri, Milli Şuranın sədri və hazırda Moskvada işləyən Rüstəm İbrahimbəyov deyib. O qeyd edib ki, ortada real fakt olmadan azərbaycanlının adının hallandırılması çox pisdir.

“Yaxşı deyil ki, Azərbaycan nümayəndəsinin adı belə işlərdə hallanır. Bu çox pisdir, indi çalışmaq lazımdır ki, həqiqət ortaya çıxsın, böhtan olmasın. Hökümətimiz, səfirliyimiz çalışmalıdır ki, həqiqət udsun, soydaşımız əsassız cinayətdə günahlandırılmasın”.

R.İbrahimbəyov qeyd edib ki, Rusiyadakı nəinki azərbaycanlılara, eyni zamanda başqa millətlərə də münasibət yaxşı deyil.

“Hadisələr başlayanda bilmirdilər ki, bu azərbaycanlıdır, ya başqa millətdəndir. Moskva əhalisi də miqrantlardan çox narazıdır. Burada da əsas günah rus administrasiyasındadır. Bu işləri elə görürlər ki, ölkəyə işləməyə gələnlər çox çətin vəziyyətə düşürlər, onlara yaxşı imkanlar yaradılmır, şəraitləri qeyri-normaldır və nəticədə belə cinayətlər olur. İndidən bu məsələlərlə bağlı ciddi iş görülməsə, axırı pis olacaq. Bir tərəfdən Rusiyaya bu adamlar lazımdır, işləri kimsə görməlidir, digər tərəfdən bunu lazımi səviyyədə təşkil etmirlər və çox vaxt da cinayətlərin başvermə səbəbləri bununla bağlı olur”.