Mən burada türk dövlətlərinə aid heç bir ifadə görmürəm. Təbii ki, türk respublikaları da SSRİ-ni yaradan respublikalar sırasında idi.

Butov.az Axar.az-a istinadən xəbər verir ki, bunu Türkiyə Prezidenti Rəcəb Tayyib Ərdoğan Rusiya Prezidenti Vladimir Putinin SSRİ barədə fikirləri haqda danışarkən deyib.

“Bu, tarixi faktdır. SSRİ dağılanda digər respublikalar kimi, onlar da müstəqilliklərini elan etdilər. Buradan 15 müstəqil dövlət yarandı. Bu, tarixi faktdır və hüquqi cəhətdən təsdiqlənmiş haldır. Rusiya da sovet respublikası kimi deyil, Rusiya Federasiyası kimi yoluna davam etdi. Ona görə də burada türk cümhuriyyətləri və ya başqa dövlətlərin nəzərdə tutulduğunu düşünmək istəmirik. Təşkilatımız türk dövlətləri arasında xüsusilə iqtisadi, ticarət, mədəni və insani mövzularda əməkdaşlığı və həmrəyliyi artırmağı hədəfləyir. Bu, heç bir ölkə və ya təşkilata qarşı bir cəhd deyil. Bunu cənab Putin də bilir. Cənab Putin bu bəyanatları Ukraynanın şərqindəki separatçıların qondarma rejimlərini tanıyan qərarını açıqladığı çıxışında verib. Təbii ki, Türkiyənin Krımda münasibəti necə oldusa, burada da münasibətimiz eyni idi. Əslində, verdiyimiz bəyanatla Ukraynanın ərazi bütövlüyü ilə bağlı mövqeyimizi ortaya qoyduq və Rusiyanın bu mövqeyini rədd etdiyimizi bildirdik”, - Ərdoğan bildirib.

Qeyd edək ki, fevralın 21-də Vladimir Putin respublikaların SSRİ-dən ayrılma hüququnu belə şərh edib: “Milliyyətçilik infeksiyasına qarşı dövlət immunitetini sarsıdan mina öz zamanını gözləyirdi. Belə bir mina, yenə deyirəm, SSRİ-dən ayrılmaq hüququ idi”.