Vidadi Mustafayev:

“Professor rütbəsinə malik İran “alimi”nin yalan və iftiraları”

İran saytlarından birində Tehran universitetinin qadın professoru ilə Zəngəzur dəhlizinin İran üçün təhlükələri haqqında iri həcmli müsahibə dərc edilmişdir. Qadın alim yalan və iftiralardan yola çıxaraq sübut etməyə çalışır ki, İran var gücü ilə Zəngəzur dəhlizinin açılmasına mane olmalı və həmin dəhlizin İranın milli təhlükəsizliyi üçün heç bir təhdid yaratmadığı haqqında danışan iranlı alimlərin sözlərinə əhəmiyyət verməməlidir.
Onun yalan və iftiralarına qısa nəzər salmaq olar.
Professor deyir ki, dəhliz məsələsi “ Britaniya-sionist birliyinin qədim planının bir hissəsidir”. Maraqlıdır ki, bu “alim” Britaniya-sionist planının tarixini nə vaxtdan hesablayır. Onun məntiqini davam etdirsək, yəqin ki, həmin plan İsrail dövləti yaranandan (1948 ) əvvəl cızılıbmış, yoxsa onu qədim adlandırmazdı.
Bu xanım, alim yox, ən bəsit etik qaydalara belə məhəl qoymadan həyasızlıq edərək dünyada öz müstəqil xarici siyasəti ilə seçilən Bakı və Ankaranı başqaları tərəfindən müəyyən edilmiş türk birliyi ideyasının memarlarının planlarını icra edən oyuncaq adlandırır.
O yazır :”Bakı və Ankara dünyanın türkdilli adlanan əhalisini birləşdirməyi hədəfləyən layihənin əsas marionetləri və icraçılarıdır”.
Bu alim Rəhbərin heç nəyə əsaslanmayan məlum fikrindən çıxış edərək hazırkı İran-Ermənistan sərhədi zonasının işğal edilməsi və bağlanmasının yolverilməz olduğunu vurğulayır. Məlum olduğu kimi, Rəhbər İranda Suriyada tənzimlənmə ilə bağlı üçtərəfli (İran, Rusiya, Türkiyə) zirvə görüşündə (28 tir 1401/19 iyul 2022) iştirak edən Türkiyə prezidenti R.T.Ərdoğanla görüşündə demişdir:”… Əgər İran-Ermənistan sərhədinin bağlanması siyasəti olarsa, İran buna qarşı çıxacaq. Ona görə ki, bu sərhəd bir neçə min illik əlaqə yoludur”.
İran- Ermənstan münasibətlərinin neçə min il davam etməsi haqqında Rəhbərə hansısa alimin məruzəsi olmuş və ya Rəhbərin özünün belə bir fikir söylədiyini deyə bilmərik. Təkcə onu deyə bilərik ki, son min ildə ermənilərin, 900 ildə farsların dövləti olmayıb ki, onların arasında hansısa dövlətlərarası əlaqədən və həmin əlaqədə vacib rol oynayan məntəqədən danışmaq mümkün olsun.
Son min ildə farslar və ermənilər ərəblərin, türklərin. monqoların və yenə türklərin/azərbaycanlıların təsis etdikləri dövlətlərin tərkibində yaşamışlar, ona görə eyni dövlətlərin tərkibində yaşayan etnik qrupların iki dövlət səviyyəsində əlaqələrindən danışmaq gülüncdür.
“Alim” Zəngəzur dəhlizi haqqında mövqeyini əsaslandırmaq üçün Rəhbərin fikrini təkrar edərək ondan çıxış etdiyini vurğulayır. Deməli, Rəhbərin dilindən çıxan istənilən doğru və yanlış fikir qeyd-şərtsiz istinad mənbəyinə çevrilməlidir.
Alimin yalan və iftiralarını saymaqla bitmir.
O, iftiradan çəkinmədən yazır ki, Azərbaycan ərazilərini İranın da qardaşcasına kömək etdiyi Ermənistan yox, Dağlıq Qarabağ separatçıları işğal etmişdilər.
Müəllif İranda və Turanda Zəngəzur dəhlizinin İran üçün heç bir təhlükə yaratmadığı, əksinə İrana böyük fayda gətirəcəyini deyənlərin fikirlərini böyük səhv hesab edərək yazır: “Turan dəhlizi İranın qonşuluğunda yerləşən Sünik vilayətini Ermənistandan ayırmaqla bu ölkəni İran yolundan, tarixi nəfəs keçidindən məhrum edir”.
“Alim” Birinci Qarabağ müharibəsi zamanı İranın Ermənistanı qəti məğlubiyyətdən xilas edərək hadisələrin istiqamətinin dəyişməsində məlum və ermənilər tərəfindən vurğulanan rolu haqqında fikri təkrarlayır. Ermənilər deyirdi ki, həmin illərdə Ermənistan çox tez boğulardı, yəni məğlub olardı, əgər İran ona “nəfəs” verməsəydi.
“Alim”i davakar siyasətçilər və şovinist ideoloqlar kimi narahat edən məsələlər sırasında Türkiyə ilə Azərbaycanın həmsərhəd və Naxçıvanın Azərbaycanın tərkib hissəsi olmasıdır.
Alim iki il düşündükdən sonra bu qənatə gəlir ki, demə, 2020-ci il ikinci Qarabağ müharibəsini Azərbaycan ermənilər tərəfindən işğal altında olan Qarabağı azad etmək üçün deyil, Zəngəzər dəhlizi yaratmaq üçün aparıb.
Ermənipərəstliyini nümayiş etdirmək üçün onların yalanlarını şüurlu şəkildə təkrar edərək son hadisələrlə bağlı deyir: “Azərbaycan Respublikasının Ermənistan ərazisinə daha çox irəliləməsi” İranı ciddi şəkidə narahat edir.
“Alim” hadisələrin obyektiv təsviri və təhlilini vermək əvəzinə, Ermənistanın Azərbaycan və Türkiyə ilə münasibətlərini normallaşdırması prosesinə mane olmağa çalışaraq, normal münasibətləri Ermənistan üçün təhlükə adlandırır. O yazır ki, Ermənistanın Azərbaycan və Türkiyə ilə normal münasibətləri erməni kimliyi üçün böyük təhlükədir. Münasibətlərin normalaşması nəticəsində “Cənubi Qafqazda erməni mədəniyyəti və kimliyi yox olacaq”.
Çox riyakar bir yanaşmadır. Çünki son yüz ildə qeyri-fars xalqlara qarşı rəsmi səviyyədə etnosid və linqvosid, yəni bir xalq kimi məhvetmə siyasəti yeridən bir ölkənin “alim” nümayəndəsi müstəqil dövlətin milli kimliyinin müdafiəçisi donunda görünməyə çalışır. Məgər Ermənistan həmin dövlətlərin tərkibindəmi olacaq ki, öz milli kimliyini özü təyin edə bilməsin.
İranın Azərbaycan-Ermənistan münasibətlərinin normalaşmasına qarşı çıxmasınn bir səbəbini alim gələcəkdə, nə vaxtsa, bəlkə….. Azərbaycanın NATO-ya üzv ola biləcəyi təhlükəsi ilə əlaqələndirməyə çalışır.
Başabəla alim İran İslam Respubliasının yarandığı gündən NATO-nun ən güclü ölkəsi olan qonşusu Türkiyə Respublikası ilə geniş, hərtərəfli, o cümlədən sıx iqtisadi əlaqələrə malik olmasını təhlükə hesab etmir, amma Azərbaycanın NATO-ya nə vaxtsa üzv ola biləcəyi ehtimalını indidən İran üçün təhlükə hesab edir.
“Alim” Zəngəzur dəhlizi məsələsini, artıq qeyd edildiyi kim, ingilis-sionist (yəhudi) layihəsi və pantürk arzusu adlandıraraq, bir davakar və populist siyasətçi kimi qəti şəkildə elan edir ki, İran həmin layihənin “həyata keçməsinə imkan verməyəcək”. Əlavə edir: “Turan dəhlizinin həyata keçirilməsinin zəruriliyi ilə bağlı Bakının və onun tərəfdarlarının heç bir əsaslandırması qəbul edilməməlidir”.
Bu alim Zəngəzur dəhlizinin İrana mənfi təsirinə diqqəti cəlb etmək üçün onun əhatə dairəsini az qala sonsuza qədər genişləndirir. O yazır ki, Zəngəzur dəhlizi adi tranzit marşrutunun bir həlqəsi deyil, tranzit və iqtisadi yoldan daha artıqdır, çünki” ölkəmizin geosiyasi, təhlükəsizlik, daha da önəmlisi şiə və iranlı kimliyini hədəf alır”.
Müəllif bir tranzit dəhlizinin guya ölkə əhalisinin siyasi/ərazi (iranlı) və din i(şiə) kimliyi üçün nə kimi təhlükə yarada biləcəyini açıqlamır. Amma güman etmək olar ki, “alim” gələcəkdə İranda millətçi, şovinist farsların və onların maraqlarına xidmət edən şiə məzhəbinin hakim mövqeyini itirəcəyindən narahatlığını ifadə etmək istəyir. Alimin qorxduğu təhlükə, əlbəttə dəhlizin açılması ilə deyil, İran hakim rejiminin antibəşəri, antixəlqi və ən əsası, anti tarixi və antitərəqqi mahyyəti ilə bağlıdır və tarix ona zorla qəbul etdirilmiş ədalətsiz və tərəqqiyə zidd olan qaydaları gec-tez dəyişir və cəmiyyət tarixin inkişafınn magistral yoluna qayıtmalı olur. İranda mövcud olan, bütün cəhətlərdən insanlığa zidd olan rejimin ömrünü yeni bir xarici düşmən obrazı icad etməklə uzatmaq cəhdi regionda müəyyən fəsadlara gətirsə də, şovinistlərin arzu etdikləri nəticə verə bilməz.
Qeyd etmək lazımdır ki, müsahibə aparan jurnalist alimdən daha sağlam düşəncəyə malik olduğunu göstərirdi. O, alimə belə bir sual verir ki, Ermənistanın neçə ildir ki, Qərb və xüsusən ABŞ-la yaxınlaşmaq siyasəti yeritdiyi bir zamanda hansısa məhdud maraqlar baxımından Ermənistanı dəstəkləmək perspektivdə İran üçün arzuolunmaz nəticələrə gətirib çıxara bilərmi?
Alim bildirir ki, ABŞ-a görə Ermənstan Azərbaycanın Qafan bölgəsinə təcavüzünün(?) qarşısını almaq üçün İrana rəsmən müraciət edə bilmədi.
Alim qoyulan suala birbaşa cavabdan qaçaraq, son vaxtlar səsləndirilən qırmızı xətt, geosiyasi dəyişikliyə imkan verməmək, region məsələlərinin 3+3 formatında həllinə tərəfdarlıq kimi qırıq-kəsik cümlələrlə kifaytlənməli olur.
Müsahibədə İran İslam Respublikasının hazırkı hakimiyyətinin - hakimiyyətin bütün qolları üzərində inhisara sahib olan, mühafizəkar adlandırılan cinahın Cənubi Qafqaz siyasəti regionda itirilmiş mövqelərini Ermənistanı dəstəkləmək və Azərbaycanla düşmənçilik yolu ilə bərpa etməyə hesablandığı elmi (?) cəhətdən əsaslandırılır.
İranın Ermənistanı dəstəkləməsi sözdə müttəfiqlik əlaqələri qurmaqda olduğu, hazırda Ukraynaya təcavüz edərək müharibə girdabına qərq olan və zəifləyən Rusiyanı Cənubi Qafqazda əvəz etmək kimi qeyri-real hədəfi ilə izah edilə bilər.
İranda qatı şovinist, panfarsist millətçi və dini qüvvələrin Azərbaycanla düşmənçiliyi genişləndirilməyə cəhd etməsi bir tərəfdən güclü, müstəqil və qalib Azərbaycanın 100 ildən çox müddətdə milli ayrı-sekiliyə, etnik və dil baxımdan hərtərəfli təzyiqə məruz qalan, bir xalq kimi yox edilməsinə çalışılan Cənubi azərbaycanlılara mənəvi təsirini azaltmağa, digər tərəfdən özünün ən əsas rəqibi saydığı Türkiyə və digər türk dövlətləri, həmçinin onların birləşdiyi Türk Dövlətləri Təşkilatının aparıcı və əsas birləşdirici həlqəsi olan Azərbaycanın müstəqilliyi və inkişafı yolunda maneələr yaratmaqla həmin təşkilatın güclənməsinə mane olmağa, region və qlobal məsələlərə təsir gücünü aradan qaldırmağa yönəlib.
İranın şovinist fars hakimiyyəti daxildə azərbaycanlılara qarşı düşmənçilik siyasətini xaricdə türk dövlətlərinə qarş düşmənçilik formasında davam etdirməyə çalışır ki, bu da son dərəcə perspektivsiz bir siyasətdir.
Bütün qalan iftira və böhtanlar, Ermənistan sevgisi və s. əsas məqsədi pərdələməyə xidmət edir.

ABŞ Ukraynaya görə İranı cəzalandırıb

Bir neçə gün öncə Ukrayna hökuməti İranın Kiyevdəki səfirinin akkreditasiyasını ləğv edib. Bununla da iki ölkə arasında diplomatik əlaqələr kəsilib, böyük qalmaqalın əsası qoyulub. İran səfirinin Kiyevdən qovulması təsadüfi deyil. Buna səbəb İranın Ukraynaya qarşı müharibədə istifadəsi üçün Rusiyaya kamikadze dronlarını verməsi olub. İki ölkəni üz-üzə qoyan dron qalmaqalı barədə danışan Orta Doğu Araşdıma Mərkəzinin rəhbəri Sədrəddin Soltan bildirib ki, İranın Rusiyaya PUA-lar verməsi Ukraynanın ərazi bütövlüyü və suverenliyi uğrunda apardığı müharibəyə müdaxilədir. Bunu İranın Kiyevə zərbəsi kimi qiymətləndirmək olar. Politoloqun sözlərinə görə, İrandan Ukraynaya birinci zərbəni ali dini lider Ayətullah Xamenei vurub. Belə ki, o, prezident Vladimir Putinlə görüşdə Rusiyanın Ukraynada apardığı müharibəyə dəstək verdiyini bəyan edib. S.Soltan vurğulayıb ki, İran lap əvvəldən Rusiyaya həm siyasi, həm də hərbi dəstək verir:"İran tərəfi bu dəstəyin adını ABŞ-a qarşı mübarizə adlandırır. İran bildirir ki, müharibənin başlamasının əsas səbəbi ABŞ və NATO-dur. Bunu özünə bəraət qazandımaq üçün edir. Buna görə də, Ukrayna İranla diplomatik əlaqələri kəsməyə məcbur olub. Ukrayna başqa cür etirazını bildirə bilməzdi”. Politoloq, həmçinin vurğulayıb ki, bu dəstəyə görə İran ABŞ tərəfindən cəzalandırılıb: “ABŞ Rusiyaya dəstək verdiyinə görə İrana açıq müdaxilə edə bilməz. Sadəcə olaraq ABŞ İran şirkətlərinə sanksiya tətbiq edə bilir. Rusiya ilə əməkdaşlıq edən İran şirkətlərinə, o cümlədən Rusiyaya hərbi yardım daşıyan İran aviaşirkətinə artıq sankisya tətbiq edilib. Bir sözlə, deyə bilərik ki, ABŞ tərəfindən İran cəzalandırılıb. İran bu əməlinə görə, beynəlxalq ictimaiyyətdə işğalçını, təcavüzkarı müdafiə edən, ona yardım göstərən ölkə kimi tanınır. Bu isə beynəlxalq ictimaiyyət tərəfindən yeni sanksiyaların tətbiq edilməsinə səbəb ola bilər”.

Prezident: “Yenə görürük ki, Ermənistan sülh istəmir”

"Aprel döyüşlərindən sonra Ermənistan qorxuya düşmüşdü və faktiki olaraq işğal edilmiş torpaqlardan qoşunları çıxarmağa hazır idi, hətta buna söz vermişdi. Ancaq ondan sonra sözünü tutmadı". Bunu Prezident İlham Əliyev sentyabrın 21-də Laçın şəhərində Azərbaycan Bayrağını ucaldan zaman çıxışında bildirib. Prezident qeyd edib ki, Aprel döyüşləri onlar üçün dərs olmadı: "Ondan iki il sonra Naxçıvanda “Günnüt” əməliyyatı keçirildi, strateji yüksəkliklər nəzarətə götürüldü. Bu da onlara dərs olmadı. Nəhayət İkinci Qarabağ müharibəsi Ermənistan ordusunun tamamilə darmadağın edilməsi ilə nəticələndi və müzəffər Azərbaycan Ordusu öz doğma torpaqlarını azad etdi. Biz hesab edirdik ki, nəhayət bu, onlara dərs olacaq. Çünki Ermənistan ordusu tamamilə dağılmış vəziyyətdədir. Müharibə dövründə 10 min fərarisi olan ölkə müharibə aparmaq iqtidarında deyil, nə fiziki cəhətdən, nə mənəvi cəhətdən. Biz müharibədən dərhal sonra onlara sülh təklif etdik. Bu da dünya hərb tarixində bəlkə də nadir hallardan biridir ki, 30 il ərzində torpağımız işğal altında olsun, insanlarımız əzab-əziyyət içində yaşasın, tarixi-dini abidələrimiz dağıdılsın, şəhərlərimiz dağıdılsın, milyondan çox mina döşənsin, buna baxmayaraq, biz sülh təklif etdik. Ancaq yenə də görürük ki, Ermənistan sülh istəmir, yenə də revanşist fikirlərlə yaşayır".

Pelosinin səsləndirdiyi fikirlər qəbuledilməzdir - Vitse-prezident

ABŞ Nümayəndələr Palatasının spikeri Nensi Pelosinin Ermənistan səfərində tarixi və aktual həqiqətlərlə əlaqəsi olmayan, xoş niyyətdən tam uzaq, qərəzli baxışı əks etdirən və diplomatik səyləri sabotaj edən açıqlamaları qəbuledilməzdir. Bunu Türkiyənin vitse-prezidenti Fuat Oktay deyib. Onun sözlərinə görə, Ağ Ev erməni diasporunun səslərinə göz qırpdığı açıqca bəlli olan Pelosi və lobbi tərəfindən dəstəklənən bir neçə siyasətçinin Qarabağ məsələsinə dair açıqlamalarının ABŞ-ın rəsmi mövqeyini əks etdirib-etdirmədiyinə aydınlıq gətirməlidir. "Regionda davamlı sülh və sabitliyə ehtiyac duyulan bir vaxtda bütün beynəlxalq aktorları soyuqqanlı, ədalətli və məsuliyyətli davranmağa dəvət edirəm. 30 ildir haqsız və hüquqsuz bir şəkildə işğal altında saxlanılan torpaqlarını azad etmək üçün mübarizə aparan Can Azərbaycanın yanında durmağa qətiyyətlə davam edəcəyik", - deyə F.Oktay əlavə edib.

Nensi Pelosinin İrəvandakı açıqlamaları separatizmə dəstəkdir

ABŞ Konqresinin Nümayəndələr Palatasının sədri Nensi Pelosinin belə həssas dövrdə Ermənistana səfəri, verdiyi açıqlamalar açıq-aydın separatizmə dəstəyin nümunəsidir. Bir müddət öncə Pelosi Tayvana səfər etməklə separatizmin dəstəkçisi olduğunu açıq nümayiş etdirmişdi. O növbəti belə səfəri Ermənistana edərək sülhü, xalqların birgəyaşayışını deyil, separatizmi dəstəklədiyini bir daha göstərdi. Heç şübhəsiz ki, bu səfərdə Pelosinin əsas məqsədi seçkiqabağı dövrdə erməni lobbisinin dəstəyini qazanmaqdır. Artıq 85 yaşı olan Pelosi təqaüdə çıxmaq barədə deyil, hələ də Konqresdə kürsüsünü qoruyub saxlamaq haqqında düşünür. Əslində reallıq, məsələnin mahiyyəti budur. Onun Ermənistanda verdiyi açıqlamalar bu fikri bir daha təsdiq edir. Qeyd etmək lazımdır ki, Pelosi hər zaman ənənəvi ermənipərəst mövqeyi ilə seçilib və onun Ermənistana səfər zamanı bütün diplomatik çərçivələri aşan açıqlama və iddiaları bir daha bunu göstərir. Ermənistanın ərazi bütövlüyünə belə təəssüb və dəstək nümayiş etdirən Pelosi bu qədər ədalətli və haqqın tərəfindədirsə, 30 illik Ermənistan işğalçılığı dövründə niyə səsini çıxartmadı, Azərbaycana səfər etmədi, ölkəmizə dəstək nümayiş etdirmədi, Azərbaycanlılara qarşı erməni vəhşiliyini pisləmədi? Əgər Pelosi haqqın və ədalətin tərəfdarıdırsa ermənilər işğal etdikləri ərazilərdə bütün yaşayış məskənlərini, infrastrukturu, qəbirləri, dini-tarixi abidələri dağıdarkən niyə bu vəhşiliyi pisləyən bəyanatlar vermədi? Azərbaycan 30 ilə yaxın müddətdə keçmiş Qarabağ münaqişənin sülh yolu ilə ədalətli həllinə çalışdı. Ancaq Ermənistan hər zaman bu cəhdləri pozdu. Nəhayət Azərbaycan özü BMT-nin Təhlükəsizlik Şurasının 4 qətnaməsini yetirərək torpaqlarını azad etdi. Həmin dövrdə biz Ermənistana qarşı hər hansı ittihamların səsləndirildiyinin şahidi olmadıq. Azərbaycan torpaqlarını azad etdikdən sonra ona qarşı bu cür ədalətsiz yanşamanın nümayiş etdirilməsinin səbəbi nədir? Sonda onu da qeyd edək ki, Pelosinin etdikləri səlibçi təfəkkürün parlaq nümunəsidir. Onun «timsah göz» yaşları isə bəsit auditoriyaya hesablanmış növbəti oyun və təxribatdır. Tarixdən hər kəsə məlumdur ki, tarix boyu türk xalqlarına qarşı soyqırımın; məhz ermənilər törədiblər. Ermənistanın soyqırımına məruz qalmasını iddia etmək ən azından saxtakarlıqdır. Bu kimi açıqlama və bəyanatlar bölgəyə sülhün gəlməsinə, təhlükəsizliyin təmin olunmasına ciddi mane olur.

Ceyhun Məmmədov,
Milli Məclisin deputatı

Ukraynalılar erməni təxribatına niyə susdular...

Ermənistan silahlı qüvvələrinin sərhəddə Azərbaycan Ordusuna qarşı törətdiyi genişmiqyaslı təxribatlara dünyanın müxtəlif ölkələrindən reaksiyalar gəlməkdədir. Azərbaycana dost və strateji tərəfdaş olan ölkələr Ermənistanın hərbi təxribatlarını pisləyərək, rəsmi Bakıya öz dəstəklərini nümayiş etdiriblər. Lakin Azərbaycan daim müttəfiq kimi dəstək olduğu, Rusiyaya qarşı savaşında açıq mövqe sərgilədiyi Ukrayna isə sərhəd olaylarına neytral münasibət bildirərək, tərəfləri sülhə çağırmaqla kifayətlənib.“Ukrayna sərhəddəki durumu diqqətlə izləyir. Biz tərəfləri beynəlxalq hüquq normalarına uyğun şəkildə gərginliyin siyasi-diplomatik yolla həllinə çağırırıq”, - deyə Ukrayna Xarici İşlər Nazirliyinin sözçüsü Oleq Nikolenko sərhəddəki təxribatlarla bağlı ölkəsinin mövqeyini ortaya qoyub. Təəssüflər olsun ki, Ukrayna vətəndaşlarından gözlədiyimiz mənəvi dəstəyi ala bilmədik. Doğrudur, hazırda hər bir ukraynalının başı ölkəsində davam edən qanlı müharibəyə qarışıb. Lakin ən azından haqsızlıqla üzləşən ölkənin nümayəndələri kimi Ermənistanın Azərbaycana qarşı xain hücumlarına səssiz qalmamalı idilər. Bu azmış kimi Bakıda konsert verməyə hazırlaşan ukraynalı müğənni Maks Barskixin ermənilərə açıq dəstəyi sosial şəbəkələrin Azərbaycan seqmentində etiraz doğurub. Onun dekabrın 10-da Bakıda keçirilməsi planlaşdırılan konsertinin ləğvi tələbi ilə çağırışlar edilib. Etirazlar fonunda Maks Barskixin konsertinə bilet satışı dayandırılıb. Dost Ukrayna vətəndaşlarının belə laqeyd münasibəti nədən irəli gəlir? Bu barədə danışan ukraynalı siyasətçi, hazırda döyüşlərdə iştirak edən Dmyotro Kulibaba ölkəsinin hər zaman Azərbaycanın yanında olduğunu söyləyib."Hazırda bizdə plüralizm var, insanlarda fikir ayrılıqları yaşanır. İnsanların fikirlərini bildirməsinə qadağa qoya bilmərik, amma həqiqətlər fərqlidir. Dövlətin məmurları var, onların dediklərini rəhbər tutmaq lazımdır. Tərəfdaşımız olan Azərbaycanın ərazi bütövlüyünü dəstəkləyirik. Bizim hakimiyyət hər zaman azad Azərbaycanın yanındadır. İnsanlar müxtəlif düşünə bilər, amma xalqımız da Azərbaycan xalqı ilə birdir", - deyə Kulibaba vurğulayıb. Xatırladaq ki, sentyabrın 12-si gecə və 13-ü səhər saatlarında Ermənistan silahlı qüvvələri tərəfindən Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində genişmiqyaslı təxribat törədilib. Genişmiqyaslı təxribatın qarşısı alınarkən Azərbaycan Silahlı Qüvvələrin 80 hərbi qulluqçusu şəhid olub. Baş verən silahlı toqquşmalardan sonra tərəflər arasında atəşkəs razılığı əldə edilib. Artıq 4 gündür ki, atəşkəs razılaşmasına riayət olunur. Bununla belə sərhəddə təhlükənin aradan qalxmadığı, vəziyyətin gərgin olduğu görünür.

Azərbaycanın dünyada artan nüfuzu Hindistanı narahat edir

Məlum olduğu kimi, Ermənistanın Birləşmiş Millətlər Təşkilatının (BMT) Təhlükəsizlik Şurasına ünvanladığı məktub əsasında sentyabrın 16-da şuranın toplantısı keçirilib. İclasda müzakirələr açıq rejimdə aparılıb və Azərbaycanın BMT yanında daimi nümayəndəsi Yaşar Əliyevin və Ermənistanın BMT-dəki daimi nümayəndəsi Mher Margaryanın çıxışları dinlənilib. Daha sonra toplantıda ayrı-ayrı ölkələrin təmsilçiləri çıxış ediblər. Bəzi ölkələrin nümayəndələrinin çıxışları onların əsl simasını ortaya qoyub. Bunlardan biri Fransa, digəri Hindistandır. Rəsmi Parisin mövqeyi əzəldən bəllidir. Fransa təmsilçisinin BMT iclasında Ermənistanı müdafiəyə qalxması təəccüb doğurmur. Hindistana gəldikcə isə, bu ölkə ikiüzlü siyasət yürütdüyünü bir daha ortaya qoydu. Belə ki, Təhlükəsizlik Şurasının toplantısında çıxış edən Hindistan nümayəndəsi sərhəddə baş verən hadisələrdən narahat olduğunu deyib və açıq-aşkar işğalçı Ermənistana dəstəyini ifadə edib.“Beynəlxalq ictimaiyyət Azərbaycan və Ermənistan sərhədində olan gərginliyi izləyir və hadisələrdən narahatdır. Biz təcavüzkar tərəfi (Hindistan nümayəndəsi təcavüzkar dedikdə Azərbaycanı nəzərdə tutur-red) hərbi əməliyyatları dayandırmağa çağırırıq. Hindistan beynəlxalq hüquqa və ölkələrin suverənliyinə hörmətlə yanaşır. Beynəlxalq səviyyədə tanınan sərhədləri tanıyır” - Hindistan rəsmisinin çıxışında qeyd olunub. Maraqlıdır, Hindistanın erməni sevgisi nədən qaynaqlanır? Dehlinin işğalçının yanında olmasının səbəbi nədir?



Bu barədə danışan Milli Məclisin deputatı Aydın Mirzəzadə bildirib ki, Hindistanın bu addımı təəccüb doğurmur:“Hindistan Qarabağ münaqişəsində heç vaxt ədalətli mövqe tutmayıb. Biz bir dəfə də olsun, dünyanın bu böyük dövlətinin Ermənistanın işğalını pisləməsini, BMT Təhlükəsizilik Şurasının qətnamələrinin yerinə yetirilməsini tələb etdiyini eşitməmişik. Azərbaycanla siyasi əlaqələr saxlasa da, Azərbaycan ərazi bütövlüyü məsələsi Hindistan tərəfindən heç vaxt dilə gətirilməyib. 2020-ci ilə qədər Hindistanın Ermənistana silah satması barəsində məlumatlar yayılmışdı. Belə faktlar var idi. Ona görə də Hindistanın BMT Təhlükəsizlik Şurasının iclasında Azərbaycana qarşı aqressiv mövqe sərgiləməsi gözlənilməz deyildi”. Deputatın sözlərinə görə, Hindistan tərəfinin sərgilədiyi siyasət təəssüf doğurur:“Hindistanın Azərbaycanın həqiqətləri barədə dolğun informasiya almaq üçün böyük imkanları var idi. Amma Hindistan bunun üçün çalışmadı. İndi biz Hindistanın bu hərəkətinə ancaq təəssüf edə bilirik”. A.Mirzəzadə bildirib ki, Hindistanın Ermənistana dəstəyi Azərbaycanı yolundan döndərə bilməz:“Bizim Hindistanla böyük iqtisadi əlaqələrimiz yoxdur. Eyni zamanda hərbi-texnolji sahədə də bu ölkə ilə əməkdaşlığımız mövcud deyil. Hindistanın bu addımı Azərbaycanı öz ərazi bütövlüyünü dəstəkləməkdən çəkindirə bilməz. Hindistanın Ermənistanı müdafiə etməsi onu gücləndirə bilməz. Bu gün Hindistanın sərgilədiyi mövqeyi onun Pakistanla gərgin münasibətlərinin əks-sədası kimi qiymətləndirmək lazımdır. Eyni zamanda Azərbaycan Kəşmir məsələsində Pakistanın mövqeyini dəstəkləyir və qardaş ölkənin yanındadır. İndi Azərbaycanın dünyada artan nüfuzu Hindistanı narahat edir. Azərbaycan Qoşulmama Hərəkatının gənc üzvü olmasına baxmayaraq, bir müddət sonra həmin hərəkatın rəhbəri oldu. Bundan sonra təşkilatın nüfuzu daha da artdı. Hərəkatın parlamenti yaradıldı. Daha sonra qadın qolları yaradıldı. Hindistan da vaxtilə bu təşkilata rəhbərlik edib. Ancaq onun aktivliyi olmayıb. Qoşulmama Hərəkatında Azərbaycanın nüfuzunun daha da artması özlüyündə Hindistanı narahat edir. Ancaq problem yoxdur. Bu, Hindistanın özünə ziyandır. Bütün dünyada ədalətsiz mövqe tutan tərəf kimi tanınacaq”.

Sərhəddə baş verənlərin gerçək səbəbləri...

“Ermənistan özü təxribatlara əl atır, atəşkəsi pozur, ardınca isə dərhal Rusiya, Fransa və digər ölkələrin rəhbərlərinə çağırış edib, atəşin dayandırılması üçün yalvarır”. Bu sözləri Ermənistanın sərhəddə törətdiyi təxribatlarla bağlı danışan Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Arzu Nağıyev deyib. O qeyd edib ki, Ermənistan mövqelərimizi ələ keçirməyə cəhd etsə də, onların atəş nöqtələri ordumuz tərəfindən məhv edilib: “Sentyabrın 13-ü 00:15-dən başlayaraq Ermənistan hərbçiləri Daşkəsən, Laçın, Kəlbəcər istiqamətində yüksəkliklərimizdə olan mövqelərimizi atəşə tutub. Eyni zamanda mövqelər arasında olan əraziləri minalayaraq, postlarımıza tərəf iriçaplı silahlardan, minomyotlardan atəş açıb. Bundan sonra Azərbaycan Ordusu adekvat cavab verməklə, düşmənin təxribat törətdiyi nöqtələri məhv edib, bir sıra yüksəklikləri ələ keçirib. Təəssüf ki, itkilərin, yaralıların olması istisna deyil. Allah bütün şəhidlərimizə rəhmət eləsin”. Deputat hazırda sərhəddə əməliyyatların davam etdiyini vurğulayıb. Onun sözlərinə görə, təxribatı başladan Ermənistan rəhbərliyi Rusiya prezidenti Vladimir Putinə və digər ölkə rəhbərlərinə zəng edərək, atəşin dayandırılması üçün çağırışlar edib. Maraqlısı budur ki, atəşkəsi pozan, təxribatlara cəhd edən də özləridir, müxtəlif dövlət rəhbərlərinə yalvarışlar edərək, dayandırılmasını istəyənlər də. “Ermənistanın sərhəddə təxribat törətməsində məqsəd delimitasiya, demarkasiya prosesləri üçün yaradılan komissiyanın işini pozmaqdır. Ermənilər nəyin bahasına olursa, olsun “status-kvo”nu saxlamaq istəyirlər. Onlar həm də Kollektiv Təhlükəsizlik Müqaviləsi Təşkilatının üzvlərini və müxtəlif ölkələri proseslərə cəlb etmək, artıq öz missiyasını başa vurmuş, ölü qüvvəyə çevrilmiş ATƏT-in Minsk qrupunu yenidən diriltmək niyyətindədirlər. Bu, ermənilərin xislətidir. Sülhdən yayınmaq üçün bütün vasitələrə əl atırlar. Həm daxili, həm də xarici proseslərdən irəli gələn addımlara məcburdurlar. Ermənistanın daxilində Nikol Paşinyanla hesablaşma yoxdur, “Qarabağ klanı” dirçəlməyə başlayır, hadisələrdə Paşinyanı günahlandırırlar. Bütün hallarda Azərbaycan Ordusu öz gücünü göstərdi və göstərməkdə davam edir”, - deputat sərhəd olayından danışıb. Xatırladaq ki, sentyabrın 13-də gecə saatlarında Ermənistan silahlı qüvvələrinin bölmələri Azərbaycan-Ermənistan dövlət sərhədinin müxtəlif hissələrində atəşkəsi davamlı olaraq pozub.

Erməni təxribatı Türkiyə ilə münasibətlərə də zərbə vuracaq

Ermənistan savaşı qazana bilməyəcəyini anlayır. Məqsəd bu cür təxribatlar törətməklə sülhə zərbə vurmaqdır. Bunu İstanbul Aydın Universitetinin müəllimi, türkiyəli siyasi şərhçi Alihan Limonçuoğlu Ermənistan ordusunun Daşkəsən, Kəlbəcər və Laçın istiqamətlərində genişmiqyaslı təxribatlarını şərh edərkən deyib. “Ermənistanın təxribatı Türkiyə ilə münasibətlərin normallaşmasına da zərbə vuracaq”, - deyə türkiyəli ekspert bildirib. Xatırladaq ki, sentyabrın 12-də gecə saatlarında Ermənistan silahlı qüvvələrinin bölmələri Azərbaycan-Ermənistan dövlət sərhədinin Daşkəsən, Kəlbəcər və Laçın istiqamətlərində genişmiqyaslı təxribat törədib.