Qusar rayonunda “Azərbaycanda Multimədəni, Plüralistik Vətəndaş Cəmiyyətinin Perspektivləri” layihəsi üzrə elmi-praktik konfrans keçirilib.

“Elm Yurdu” Sosial Araşdırmalar İctimai Birliyi (EYSAİB) Gənclər evində Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə yeni layihə həyata keçirib.
Tədbiri Qusar RİH yanında Yetkinlik Yaşına Çatmayanların İşləri və Hüquqlarının Müdafiəsi üzrə komissiyanın məsləhətçi – psixoloqu Sədullayev Kamran Elman oğlu açaraq qonaqları salamladı sözü moderatora – layihə rəhbəri Kamran Babayevə verib.
Kamran Babayev təşkilatın fəaliyyəti və layihə haqqında məlumat vermiş, Dövlət Başçısının “Azәrbaycanda dini mәdәniyyәtin, tolerantlığın, dinlәrarası vә mәdәniyyәtlәrarası dialoqun tәbliğinin güclәndirilmәsinә dair әlavә tәdbirlәr haqqında” Sәrәncamının tələblərinə müvafiq olaraq tədbirin əhəmiyyət kəsb etdiyini bildirmişdir. O, Azərbaycanda tarixən formalaşan çoxmədəniyyətliliyin dünya siyasətinə dəyərli bir töhfə olduğunu bildirmiş və multikulturalizmin mahiyyətindən danışmışdır. Moderator problemin həlli yollarını müxtəlif aspektlərdə şərh etmək üçün ekspertləri təqdim edib.

Türkiyə Respublikasi İstanbul Universiteti Sosial Elmlər Institutu Doktorantı Sənan Əzimov “Çox mədəniyyətli ölkələrdə hüzur içində yaşamaq” mövzulu çıxışında bir neçə elmi tədqiqat və keçmiş nümunələrlə çox millətlilik - çox mədəniyyətlilik məfhumlarını izah etmiş və tərəflərin bir-birinə qarşı hörmətlə, xoşgörü halında, fərqliliyi bir zənginlik olaraq aşılamanın, qarşı tərəfin görüş, düşüncə əxlaq və davranışlarına öz sərhədlərini keçmədiyi təqdirdə hörmət və ehtiram olunmasının zərurətindən danışmışdır. Digər ekspert fəlsəfə üzrə fəlsəfə doktoru, Elvüsal Məmmədov “İslamda tolerantlıq məsələləri” adlı çıxışında İslam tarixinin tolerantlıq tarixi olduğunu konfrans iştirakçılarının nəzərinə çatdırıb. “Elm Yurdu” İB-nin sədri, ilahiyyat üzrə fəlsəfə doktoru Elşad Mahmudov “Müasir Müsəlman-intellektual şəxsiyyət və nümunəvi vətəndaş kimi” mövzulu çıxışında bir əxlaq sistemi kimi islamın dini müxtəlifliyi, digərlərinə hörməti qoruyub saxlamada xüsusi rolunu qeyd etmiş məhz bununla da müasir, intellektual şəxsiyyət və nümunəvi vətəndaş kimi formalaşmanın yollarını bəyan etmişdir. Çıxışlar dinlənildikdən sonra iştirakçılara “Elm Yurdu” İB-nin layihələrini əks etdirən kitabçalar paylanıb və müzakirələr aparılıb.


Layihə rəhbəri Kamran Babayev