Azərbaycan Dövlət Pedaqoji Universitetində (ADPU) “Ali təhsilin informatlaşmasının aktual problemləri. Elektron universitet: reallıqlar və perspektivlər” mövzusunda “dəyirmi masa” keçirilib.

Butov.az AZƏRTAC-a istinadən xəbər verir ki, ADPU-nun rektoru, professor Cəfər Cəfərov “Azərbaycan Respublikasının milli iqtisadiyyat perspektivi üzrə Strateji Yol Xəritəsi”ndə ali təhsil sisteminin inkişafı çərçivəsində universitetlərdə təhsilin informatlaşması sahəsində bir sıra tədbirlərin həyata keçiriləcəyini bildirib. Rektor deyib ki, Azərbaycanın təhsil sahəsində qoşulduğu Boloniya prosesində informasiya-kommunikasiya texnologiyalarının tədris prosesinə geniş tətbiqi, təhsil müəssisələrinin elektron idarə edilməsi, elektron universitet, distant təhsil kimi vacib məqamlar əksini tapıb. Təhsil Nazirliyi bir çox universitetlərdə, o cümlədən ADPU-da e-universitetin yaradılması istiqamətində məqsədyönlü fəaliyyət həyata keçirir.

Tədbirdə “Ali təhsilin informatlaşmasının əsas istiqamətləri”, “Elektron universitetin yaradılmasının aktual problemləri”, “Universitetin elektron təlim sisteminin yaradılmasına kompleks yanaşma”, “AzTU-da “Elektron universitet” layihəsinin tətbiqi təcrübəsi” mövzularında çıxışlar edilib.

Ali təhsilin informatlaşmasının əsas istiqamətləri, universitetin elektron təlim sisteminin yaradılmasına kompleks yanaşma, elektron universitetin yaradılmasının aktual problemləri və texniki-texnoloji aspektləri ilə bağlı maraqlı və səmərəli müzakirələr aparılıb, təkliflər səsləndirilib.