25-11-2025, 17:41
Kəlbəcərdə təhsil kompleksi tikilir
Kəlbəcərdə tikintisi davam etdirilən təhsil kompleksinin gələn il təhvil verilməsi gözlənilir.
Bunu Kəlbəcərdə Azərbaycan Prezidentinin xüsusi nümayəndəsi Bəşir Hacıyev Şəhər Günü münasibətilə təşkil olunan konsert proqramı öncəsi çıxışında deyib.
Onun sözlərinə görə, şəhər parkı, İşğal və Zəfər muzeyləri kompleksinin, habelə İstisu qəsəbəsinin layihələndirmə işləri aparılır.
“Bölgənin sağlamlıq və turizm potensialının artırılmasında mühüm əhəmiyyət daşıyan İstisu Müalicə İstirahət Kompleksinin də 2026-cı ildə təhvil verilməsi gözlənilir”.
24-11-2025, 16:43
Tuğda məktəb və bağça yenilənir – 3.2 milyon manatlıq layihə
Ağdam, Füzuli və Xocavənddə tikinti və bərpa xidmətləri üçün 3.2 milyon manatlıq müsabiqə elan edildi.
Ağdam, Füzuli və Xocavənd rayonlarında Bərpa, Tikinti və İdarəetmə Xidməti PHŞ Xocəvənd rayonunun Tuğ qəsəbəsi üzrə bir sıra obyektlərin bərpası ilə bağlı yeni satınalma elan edib.
2025/AT/00680/V1 nömrəsi ilə keçirilən müsabiqə məktəb, uşaq bağçası və qazanxana kimi qeyri-yaşayış binalarının təmir-bərpası, həmçinin kommunikasiya, yaşıllıq və abadlıq işlərinin satın alınmasını əhatə edir.
Layihənin ehtimal olunan dəyəri 3 225 963,20 AZN təşkil edir.
21-11-2025, 00:20
Azərbaycanda sadəcə müəllimlər saathesabı işləyir - Nazir
“Bu gün ölkədə sadəcə müəllimlər saathesabı işləyir, digər iş yerlərində insanlar bu və ya digər formada tam ştatda işləyirlər. Digər işlərdə bununla bağlı problem yoxdursa, məktəblərdə də tənzimləmər olacaq. Təbii ki, müvafiq yoxlamalarla bunu həmişə müəyyən etmək mümkündür”.
Bunu elm və təhsil naziri Emin Əmrullayev "İTV"də yayımlanan “Diqqət mərkəzi” proqramında deyib.
Nazir qeyd edib ki, müəllimlərin tamştatlı modelə keşməsi hələ ki pilot layihə kimi həyata keçirilir:
“Biz az sayılardan başlayırıq, hələ 20 minə 2030-cu ilə çatmaq istəyirik. Biz 2027-də bir neçə mindən, hansısa pilot layihələrlə başlayırıq. Yəni bu adı çəkilən məktəblərdə bunun nəzarət mexanizminin də pilotu olmalıdır. Təbii ki, müəllimin fəaliyyətinin qiymətləndirilməsi də olmalıdır”.
Emin Əmrullayev, həmçinin bu prosesə nəzarət mexanizmalarından da danışıb:
“Müəllimin illik saat norması müəyyən olunur ki, sən tamştatlı müəllimsən, bu qədər saatda bu işi görəcəksən, dərs deyəcəksən. Bundan başqa sənin bu, bu, bu işlərin var. Onların nəticələri,- şərti olaraq summativ testlər yazmaq lazımdır, summativ testlər göstərilir. Valideynlərlə görüşlər keçirilməlidir, nə qədər görüş keçirirsən o görüşlərin sayı rəsmiləşdirilə bilər və yaxud şərti olaraq tədbirlərin təşkili və s. və ilaxır.
“Yəni düşünürəm ki, hər bir işə bir nəzarət mexanizmi tapmaq olar. Bunu belə böyük bir risk kimi görmək lazım deyil ki, guya qiymətləndirilmir”- deyə nazir sonda qeyd edib.
21-11-2025, 00:13
Şagirdlərə universitetə məktəbin özündə hazırlaşacaq - Nazir detalları açıqladı
“Bu ildən tam orta məktəb modelini tətbiq etmişik və növbəti ildən onun əhatəliliyi artırılacaq”.
Bu fikirləri elm və təhsil naziri Emin Əmrullayev İTV-nin “Diqqət mərkəzi” proqramında səsləndirib.
Nazir bildirib ki, burada məqsəd məktəbin daxilində şagirdlərin dövlət hesabına ali təhsil müəssisələrinə hazırlaşdırılmasıdır: “Müəyyən bölgələrdə, qəsəbələrdə hazırlıqlı müəllimlərdən ibarət qruplar yaradacağıq. Onların əməkhaqlarını artırmaq şərti ilə şagirdlərə məktəbdə dövlət hesabına ali təhsil müəssisələrinə hazırlıq təşkil ediləcək. Valideyn “yox, mən sizə inanmıram, övladım hansısa başqa evdə, başqa müəllimdə hazırlaşsın”, deyirsə, bu halda seçim onundur, övladını başqa yerdə hazırlaşdıra bilər”.
Nazirin sözlərinə görə, işin mahiyyəti odur ki, müəllim iş yerindən ayrılıb haradasa repetitorluqla məşğul olmasın: “Əgər biz bu şəkildə davam etsək, millət olaraq düşüncəmiz dəyişməsə və hələ də bütün diqqətimizi yalnız ali təhsilə qəbul üzərində qurmağa davam etsək, yaxşı yerə gedə bilməyəcəyik. Bu, səhv təfəkkür tərzidir.
Biz ali təhsilə qapıları daha da geniş açmağa davam edirik, çünki inanırıq ki, ali təhsil “defisit”, əlçatmaz bir şey olmamalıdır. Ali təhsil normal bir sosial standart kimi qəbul olunmalıdır. Bu baxımdan da 2027–2030 strategiyası çərçivəsində bu mövzuda daha çox məsələlər müzakirə ediləcək. Qısa müddətdə isə sosial sifarişi nəzərə alaraq dövlət tərəfindən maliyyələşən, həmin bölgənin və həmin qəsəbənin ən yaxşı müəllimləri tərəfindən tədris olunan, 10-11-ci siniflər üçün hazırlıq xarakterli təmayül siniflərini yaradıb cəmiyyətə təqdim edəcəyik”.
20-11-2025, 23:25
Müəllimlərin bir çoxu məktəbdə oturmağa yer tapa bilmir - Nazir
Müəllimlərin bir çoxu məktəbdə oturmağa yer tapa bilmir.
Bunu elm və təhsil naziri Emin Əmrullayev İTV-nin “Diqqət mərkəzi” proqramında səsləndirib.
Nazir bildirib ki, “müəllim otağı” anlayışı əksər hallarda formal xarakter daşıyır.
“Qış aylarında məktəbə erkən gələn müəllimlər üst geyimlərini harasa qoymaqda çətinlik çəkir. Ən yaxşı halda yalnız öz sinfi olan müəllimlər var, lakin onların əksəriyyətinin dərs saatları çoxdur. Həftədə 10–12–14 saat işləyən bir müəllimin öz iş otağı demək olar ki, yoxdur”.
E.Əmrullayevin fikrincə, işçinin, yəni müəllimin əsas ehtiyaclarından biri ona aid olan iş otağı və iş masasının mövcudluğudur.
“Bu, müəllimlərin dərsə hazırlıq, şagird işlərini yoxlama və valideynlə görüşlər üçün vacibdir. Bu baxımdan, müəllimlərin rifahını və motivasiyasını artırmaq üçün yalnız əməkhaqqının yüksəldilməsi kifayət etmir. Əsas diqqət, habelə, onların iş şəraitinin yaxşılaşdırılması və işə aid məkanın, yerinin təmin edilməsinə də yönəlməlidir”,-deyə nazir əlavə edib.
20-11-2025, 23:12
20 min tamştatlı müəllim - İlk bu məktəblərdə olacaq
Tam ştata keçən müəllimin aylıq əməkhaqqısı orta əməkhaqqıdan 2 dəfə çox olarsa və 20 min müəllim bu əməkhaqqını alarsa, təhsildə köklü islahatların başlanğıcı qoyulacaq.
Bu fikirləri elm və təhsil naziri Emin Əmrullayev İTV-nin “Diqqət mərkəzi” verilişində söyləyib.
Nazirin sözlərinə görə, tam ştatlı müəllim həftəlik 30-36 saat işləyəcək, onun 18-24 saatında tədrislə məşğul olacaq: “Təbii ki, bu, bütün müəllimlərin bir hissəsidir, qalan müəllimlər yenə də saathesabı dərs deməyə davam edəcəklər. Çünki biz kiçik məktəbləri bu sistemə keçirə bilməyəcəyik, söhbət böyük məktəblərdən gedir”.
Emin Əmrullayev bildirib ki, bu proses üçün infrastruktur imkanları da mövcuddur, yeni infrastruktur da yaradılacaq: “Müəllim öz iş yeri ilə qürur duymalıdır, həvəslə iş yerinə gəlməlidir. Müəllim dərsdən əlavə olaraq, başqa müəllimin dərsini dinləyib tövsiyələr verə bilər. Şagirdlər üçün metodoloji tövsiyələr hazırlaya bilər”.
20-11-2025, 22:59
Azərbaycanda 10-dan az şagirdi olan 94 məktəb var
Ölkəmizdə 1-10 şagirdi olan 94, 10-20 şagirdi olan 153 məktəb fəaliyyət göstərir. Bəzi kənd məktəblərində isə ümumilikdə cəmi 20–25 şagird müxtəlif siniflər üzrə parçalanmış şəkildə oxuyur.
Bu fikirləri elm və təhsil naziri Emin Əmrullayev İTV-nin “Diqqət mərkəzi” proqramında səsləndirib.
Nazir bildirib ki, belə məktəblərdə müəllim çatışmazlığını aradan qaldırmaq çətindir:
“Bir məktəbdə 4-6 şagird üçün müəllim göndərmək real deyil. Ali təhsilli, yüksək bal toplamış müəllimi bu şəraitdə uzun müddət saxlamaq mümkün olmur”.
E.Əmrullayev qeyd edib ki, bu tip məktəblərdə müəllimlərin dərs yükü də çox məhduddur:
“Mövcud qaydalara görə, məsələn, kimya müəlliminə maksimum 6 saat dərs verilə bilir. Hətta digər fənnlər əlavə olunsa belə, ümumi saat çox az olur və bu da əməkhaqqını aşağı salır”.
Nazir optimallaşdırmanın qaçılmaz olduğunu da vurğulayıb:
“Sinifdə 1 şagird də olsa, 25 min manat xərc çəkilir. 25 şagird olsa da eyni məbləğ. Bu model səmərəli deyil. Bir neçə şagirdi bir məktəbdə birləşdirmək və müəllimə daha yaxşı şərait yaratmaq daha məqsədəuyğundur”.
Emin Əmrullayev həmçinin bildirib ki, dəyişikliklər çətin qəbul edilsə də, təhsilin keyfiyyəti üçün vacibdir:
“Cəmiyyət bu prosesin səbəblərini anlamalıdır. Məqsədimiz təhsilin keyfiyyətini yüksəltmək və resursların səmərəli istifadəsidir”,- deyə nazir qeyd edib.
20-11-2025, 22:50
Tamştatlı müəllim axşam 6-ya kimi məktəbdə qalacaq? - Nazir AÇIQLADI
“Yeni mexanizmin məqsədi müəllimin saat 6-ya qədər məktəbdə qalması demək deyil”.
Bunu elm və təhsil naziri Emin Əmrullayev "İTV"də yayımlanan “Diqqət mərkəzi” proqramında deyib.
O bildirib ki, məqsəd həm də müəllimin daha geniş fəaliyyət imkanlarının olmasıdır: "Hazırda “tam ştat müəllim” anlayışı yalnız 30–36 saatlıq həftəlik iş yükü kimi tənzimlənir, amma konkret mexanizm yoxdur. Biz isə bu işi real 30–36 saatlıq iş modeli kimi görürük. Bu model müəllimə hansı imkanları yaradır? Müəllim yalnız 18–24 saat dərs deməklə kifayətlənməməlidir. Bu dərs yükündən əlavə o, şagirdlər, məktəb və təhsilin keyfiyyəti üçün əlavə fəaliyyət göstərə bilər. Başqa bir müəllimin dərsinə daxil olub müşahidə apara, həmkarına metodik tövsiyələr verə bilər. Çox yaxşı müəllimdirsə, gənc müəllimlərə mentorluq edə, şagirdlərin əlavə fəaliyyətləri ilə bağlı metodik təkliflər verə, sinifdənkənar işlər təşkil edə, müxtəlif müsabiqələr, olimpiadalar üçün şagird hazırlaya bilər. İdman müəllimidirsə, məktəb turnirləri təşkil edə bilər. Bu fəaliyyətlər hazırda faktiki olaraq edilir, amma ödənişsiz edilir. Məsələn, idman müəllimi məktəbdə turnir keçirir. Amma biz bu işə maaş vermirik. Niyə? Çünki onun iş saatı yalnız dərs yükünə hesablanır. Yeni modeldə isə bu fəaliyyətlərə görə ödəniş ediləcək".
Nazir hesab edir ki, müəllimin məktəbdə daha çox vaxt keçirməsi və gördüyü əlavə işlərin ödənməsi Azərbaycanın təhsilinə yalnız müsbət təsir göstərəcək: "Məsələn, idman müəllimi istedadlı uşaqlarla daha çox işləyə biləcək, əlavə məşğələ və sınaqlar təşkil edəcək, onların inkişafına real töhfə verəcək".
20-11-2025, 22:40
Müəllimin məktəbə “müştəri gözü” ilə baxması yolverilməzdir - Emin Əmrullayev
Müəllimlik böyük anlam və məsuliyyət daşıyan peşədir. Bəli, müəllim sertifikatlaşdırmada yüksək bal yığa bilər, fənnini dərindən bilə bilər, lakin bizim üçün ən vacib məsələ onun məktəbə və şagirdlərə olan münasibətidir.
Bu fikirləri elm və təhsil naziri Emin Əmrullayev İTV-nin “Diqqət mərkəzi” proqramında səsləndirib.
Nazir qeyd edib ki, müəllimin məktəbə “müştəri gözü” ilə baxması, şəxsi qazancını əsas hədəfə çevirməsi yolverilməzdir:
“Əgər müəllim düşünürsə ki, “mən altı sinfə dərs deyirəm, hər sinifdən 10-15 şagird mənə əlavə qazanc gətirə bilər”, bu adam müəllim deyil. Müəllim məktəbə gəlirsə, aldığı əməkhaqqının qarşılığını dərs otağında verməlidir. Boş vaxtında özəl sektorda işləmək istəyi isə hər kəsin təbii hüququdur”.
E.Əmrullayev vurğulayıb ki, müəllimlik peşəsi vicdan və münasibət üzərində qurulmalıdır:
“Biz heç vaxt demirik ki, müəllim mütləq 60 bal toplamalıdır və ya imtahanda yüksək nəticə göstərməyən müəllim, müəllim deyil. İnsan hər imtahanda eyni nəticə göstərə bilməz. Amma məktəb müəllimindən gözləntimiz odur ki, o, uşağa münasibətdə nümunə olsun”.
Nazirin sözlərinə görə, hazırda ölkədə şagirdini, məktəbini sevən, peşəsinə bağlı çoxlu fədakar müəllimlər var:
“Biz məhz bu cür müəllimləri tapmaq və onları məktəb mühitinə cəlb etmək istəyirik. Bu bizim üçün prioritet məsələdir”,- deyə o fikrini tamamlayıb.
20-11-2025, 22:17
Hər 10 müəllimdən yalnız biri işdən çıxarılıb - RƏSMİ
Ölkədə aparılan sertifikatlaşdırma prosesində indiyədək 80 mindən artıq müəllim iştirak edib. Nəticələrə əsasən, təxminən 50 min müəllimin əməkhaqqısına 10 faiz, 24 mindən çox müəllimin əməkhaqqısına isə 35 faizdən artıq artım tətbiq olunub.
Bunu elm və təhsil naziri Emin Əmrullayev İTV-nin “Diqqət mərkəzi” proqramında səsləndirib.
Nazir bildirib ki, proses zamanı 8 minə yaxın müəllim isə xüsusilə 2022-2025-ci illər üzrə qiymətləndirmələr nəticəsində vəzifə və peşə funksiyalarını lazımi səviyyədə yerinə yetirmədiyi üçün işdən azad edilib:
“Ümumi göstəricilərə görə, müəllimlərin 9 faizi işdən çıxarılıb, 30 faizi yüksək nəticə göstərərək əlavə ödəniş alıb, 61 faizi isə stabil və qənaətbəxş nəticə nümayiş etdirib”.
Nazir əlavə edib ki, sertifikatlaşdırmadan keçən hər 10 müəllimdən 9-nun əməkhaqqı artırılıb, yalnız 1 nəfər qeyri-kafi göstəricilər səbəbindən işdən azad edilib:
“Bu proses təhsildə keyfiyyətin yüksəldilməsinə xidmət edir və müəllimlərin peşəkarlığının artırılması Azərbaycan təhsilinin ümumi inkişafına müsbət təsir göstərir”,-deyə E.Əmrullayev qeyd edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!