7-01-2023, 15:22
Azad olunmuş ərazilərdə silah-sursat aşkarlandı
İşğaldan azad edilmiş ərazilərdə polis əməkdaşları tərəfindən silah-sursatların aşkar edilməsi məqsədi ilə profilaktiki tədbirlər davam etdirilir. DİN-in Mətbuat Xidmətinin Bərdə regional qrupundan verilən məlumata görə, Qubadlı Rayon Polis Şöbəsinin əməkdaşları tərəfindən keçirilmiş tədbirlər zamanı rayon ərazisindəki tərk edilmiş hərbi mövqelərdən 8 tank əleyhinə idarə olunan raket sistemi, 5 qumbaraatan, 35 qumbara, 66 ədəd müxtəlif növ mərmilər və digər sursatlar aşkar edilib. Tapılan silah-sursat aidiyyəti üzrə təhvil verilib.
7-01-2023, 15:16
Keçmiş müşavir prezidentliyə namizədliyini irəli sürəcək
Ağ Evin keçmiş milli təhlükəsizlik müşaviri Con Bolton 2024-cü ildə prezidentliyə namizədliyini irəli sürə biləcəyini təsdiqləyib və əlavə edib ki, keçmiş rəhbəri, eks-prezident Donald Trampa qalib gələ bilər. 74 yaşlı Bolton “Mən boş-boş danışmıram. Bunu ciddi şəkildə edə biləcəyimi düşünməsəydim, iddialı olmazdım” deyib. Əvvəlki dörd respublikaçı prezidentin administrasiyasında çalışmış Bolton "Mən namizədliyi qazanardım və bunu ilk növbədə daha güclü xarici siyasətə ehtiyacımız olduğu üçün edərdim" söyləyib. Bolton Britaniya televiziyasına deyib ki, Respublikaçılar Partiyasının daxilində Trampa etimad azalıb. Tramp Boltonu Şimali Koreya və Əfqanıstanla bağlı məsələlərdə fikir ayrılıqlarından sonra 2019-cu ilin sentyabrında istefaya göndərmişdi. Bolton indi onun sərt xarici siyasət mövqeyinin ona mümkün prezidentlik yarışında üstünlük verəcəyinə inanır. Qeyd edək ki, Donald Tramp 2024-cü ildə prezidentliyə namizəd olacağını indidən bəyan edib.
7-01-2023, 15:14
İran daha iki nəfərin edamını həyata keçirdi
İranda son iğtişaşlar zamanı hüquq-mühafizə orqanının əməkdaşını öldürməkdə təqsirləndirilən iki nəfər edam edilib. Yarımhərbi “Bəsic” təşkilatının əməkdaşı Seyid Ruhullah Əcəmianın ölümünə səbəb olan etiraz aksiyasının iki iştirakçısı bu gün səhər saatlarında asılıb. Bunlar Məhəmməd Mehdi Kərəmi və Seyid Məhəmməd Hüseyni adlı şəxslərdir. Dekabrın əvvəlində bildirilmişdi ki, İran məhkəməsi “Bəsic” (İslam İnqilabı Keşikçiləri Korpusunun yarımhərbi qolu) əməkdaşının qətli işi üzrə 16 müttəhimə hökm çıxarıb, onlardan beşinə ölüm çəzası kəsilib. Sentyabrın ortalarından etibarən İranda hicabın səhv taxılmasına görə polis tərəfindən saxlanılan gənc qadın Məhsa Əmininin ölümü ilə bağlı kütləvi iğtişaşlar başlayıb.
7-01-2023, 15:11
Ukrayna bir gündə 500-ə yaxın rus hərbçisini öldürüb
Ukrayna Silahlı Qüvvələri daha 500-ə yaxın rus işğalçısını zərərsizləşdirib. Bununla da fevralın 24-dən yanvarın 7-dək rus hərbçilərinin itkiləri təxminən 110 min 740 (gündə +490) nəfərə çatıb. Bu barədə Ukrayna Silahlı Qüvvələri Baş Qərargahı məlumat yayıb. Rusiyanın digər itkiləri aşağıdakı kimidir:
Tank- 3 min 66 (+2) ;
Zirehli döyüş maşını-6 min 125 (+1);
Artilleriya sistemi-2 min 62 (+3);
Reaktiv yaylım atəş sistemi-431;
Hava hücumundan müdafiə sistemi 217 (+2);
Təyyarəs-285;
Helikopter-272;
Xüsusi texnika-182.
Baş Qərargah məlumatların dəqiqləşdirildiyini əlavə edib.
7-01-2023, 00:08
ABŞ-dan Ukraynaya yüksək məbləğli hərbi yardım paketi
ABŞ Ukrayna üçün yeni hərbi yardım paketini açıqlayıb. Bu barədə Ağ Evin mətbuat katibi Karin Jen-Pyer məlumat yayıb. İlkin məlumata görə, yeni hərbi yardım paketinə "Bradley" piyada döyüş maşınları və özüyeriyən artilleriya qurğuları daxildir. Həmçinin, Ukrayna Silahlı Qüvvələrinin uzunmüddətli hərbi potensialının gücləndirilməsi və modernləşdirilməsi üçün 225 milyon dollar nəzərdə tutulub. Yardım çərçivəsində NATO-nun şərq cinahındakı Amerika müttəfiqlərinə silah alınması üçün 682 milyon dollar göndəriləcək. Hərbi yardımın ümumi məbləği 3 milyard dollar təşkil edəcək. "Birləşmiş Ştatlar 3 milyard dollardan çox yeni hərbi yardım elan etməklə Ukraynanın özünü müdafiə qabiliyyətini təmin etmək üçün davamlı öhdəliyini nümayiş etdirəcək", - deyə o qeyd edib. Ağ Ev rəsmisi bildirib ki, 2,8 milyard dollar vəsait birbaşa Pentaqonun ehtiyatlarından təmin ediləcək.
6-01-2023, 23:59
ABŞ İrana yeni sanksiya tətbiq etdi
ABŞ Rusiyaya pilotsuz uçuş aparatları (PUA) tədarük edən İran müəssisələrinə sanksiya tətbiq edib. Bu barədə ABŞ Maliyyə Nazirliyi məlumat yayıb. Bildirilir ki, ABŞ Ukraynada mülki hədəfləri vurmaqda istifadə edilən PUA-ları istehsal edən "Qods Aviation Industries" (QAI) şirkətinin icraçılarının və idarə heyətinin üzvlərini "qara siyahı"ya salıb. Qeyd edək ki, Rusiya İrandan PUA aldığını inkar edir. Lakin İran isə müharibədən bir müddət əvvəl Rusiyaya PUA verildiyini açıqlayıb.
6-01-2023, 23:44
Akar Yunanıstana çağırış etdi
"Belə bəyanatların heç bir mənası yoxdur. Mövcud statusu pozan və adaları silahlandıran, ölkəmizin sərhədlərinə qədər gəlib təxribatlar həyata keçirən Yunanıstandır. Dünən balıqçı gəmisinə atəş açan da məhz Yunanıstandır". Bunu Türkiyənin milli müdafiə naziri Hulusi Akar Aralıq və Egey dənizlərindəki gərginliyi şərh edərkən deyib. Nazir Yunanıstan tərəfi ilə keçirilən görüşlərin, aparılan dialoqların nəticə vermədiyini söyləyib. “Biz təxribat törətmirik, hücum və təqib etmirik. Eyni zamanda, bizə edilən hər hansı təqibi cavabsız qoymayacağımızı da deyirik. Bütün qoşunlarımız da bununla bağlı təlimatlandırılıb. Biz bu məsələdə qətiyyətli və qərarlıyıq. Güvəndiyiniz dağlara qar yağmadan ağlınızı başınıza yığın, ayaqlarınızı yerə qoyun. Biz həqiqətən də səmimi qəlbdən dostluq əlimizi uzadırıq, bu dostluq əlini tutmaqda gecikməyin, çəkinməyin”, - deyə Akar Yunanıstana çağırış edib.
6-01-2023, 23:40
Ukraynaya ilk dəfə “Sea Sparrow” zenit raketləri göndəriləcək
ABŞ ilk dəfə Ukraynaya "Sea Sparrow" zenit raketləri göndərəcək. Bu barədə "Politico" nəşri məlumat yayıb. Bildirilir ki, raketlər ABŞ tərəfindən bu gün elan olunacaq yardım paketinə daxildir. Yardım paketinə, həmçinin "Bradley" piyada döyüş maşınları və "Patriot" hava hücumundan müdafiə sistemlərinin daxil edildiyi bildirilir. Radarla idarə olunan RIM-7 "Sea Sparrow" raket sistemləri Amerika gəmilərində raketdən müdafiə üçün istifadə olunur. Lakin Ukrayna hərbçiləri bu raketləri qurudan buraxa biləcəklər.
6-01-2023, 23:14
Bu ölkələr arasında hava daşımaları başladı
Türkiyə ilə Ermənistan arasında birbaşa hava daşımaları başlayıb. Bu barədə diplomatik mənbələrdən bildirilib. Məlumata görə, 2023-cü il yanvarın 1-dən etibarən iki ölkə arasında hava yolu ilə daşınmalara başlanılıb. Daşınmalar ticarət məqsədlidir. Qeyd edək ki, Türkiyə Azərbaycan torpaqlarının işğalına etiraz olaraq 1993-cü ildən Ermənistanla sərhədlərini bağlayıb və İrəvanla bütün əlaqələrini kəsib. İkinci Qarabağ müharibəsindən, Azərbaycan torpaqları erməni tapdağından azad olunandan sonra rəsmi Ankara və İrəvan arasında münasibətlərin normallaşması istiqamətində addımlar atılıb.
6-01-2023, 16:50
Prezident yeni məkanın açılışında iştirak etdi
Azərbaycan Respublikasının Prezidenti İlham Əliyev “Bakı KOB evi”nin açılışında iştirak edib. Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov paytaxtın Nərimanov rayonunda yerləşən “Bakı KOB evi” barədə dövlətimizin başçısına məlumat verdi. Bildirildi ki, sayca 3-cü olan “Bakı KOB evi”nin ümumi sahəsi 11 min 262 kvadratmetrdir. Üçmərtəbəli binanın ilk iki mərtəbəsi sahibkarlara xidmət göstərilməsi, üçüncü mərtəbə isə işçi heyət üçün nəzərdə tutulub. “Bakı KOB evi” gün ərzində beş min sahibkara xidmət göstərmək potensialına malikdir. Binada yaradılmış görüş, təlim, startap, mediasiya otaqları və konfrans zalı da sahibkarların xidmətində olacaq. “Bakı KOB evi”ndə sahibkarlara 29 dövlət qurumu tərəfindən 150-dən çox, 20 özəl qurum tərəfindən isə 100-dən çox adda xidmətlər göstəriləcək. Sahibkarlar fəaliyyət üçün zəruri olan biznesin qeydiyyatı, lisenziya və icazələrin alınması, biznes planın hazırlanması, güzəştli maliyyə vəsaitlərinə çıxış, vergi, gömrük, kommunal xidmətlərə qoşulma, bank, sığorta və digər məsələlərlə bağlı “Bakı KOB evi”nə müraciət edə bilərlər. Bununla yanaşı, “Bakı KOB evi”ndə yaradılmış Beynəlxalq Ticarət, İnkişaf və Logistika Zonasında gömrük və idxal-ixrac əməliyyatları ilə bağlı geniş spektrli xidmətlər də təqdim ediləcək. Diqqətə çatdırıldı ki, KOB evləri sahibkarlara dövlət və biznes xidmətlərinin mərkəzləşdirilmiş qaydada təqdim edildiyi vahid məkandır. Burada xidmətlər operativlik, şəffaflıq, nəzakətlilik və rahatlıq prinsipləri əsasında həyata keçirilir. Biznes xidmətlərinin bir məkanda toplanması, vaxta və xərclərə qənaət, operativlik KOB evlərinin əsas üstünlükləridir. Hazırda fəaliyyətdə olan Xaçmaz və Yevlax KOB evlərində indiyədək sahibkarlara 170 mindən çox xidmət göstərilib ki, bu xidmətlərin 165 mindən çoxu dövlət-biznes (G2B), 9 minə yaxını isə biznes-biznes (B2B) xidmətləridir. Sahibkarların KOB evlərinin xidmətlərindən məmnunluq göstəricisi 98 faizdir. Qeyd edək ki, Azərbaycanın davamlı iqtisadi inkişafının təmin edilməsində sahibkarlığın, xüsusilə kiçik və orta biznesin rolunun artırılması Prezident İlham Əliyevin rəhbərliyi ilə həyata keçirilən sosial-iqtisadi siyasətin prioritet istiqamətlərindəndir. Ölkəmizdə özəl sektorun inkişafı sahəsində həyata keçirilən sistemli tədbirlərin davamı olaraq dövlətimizin başçısının 2017-ci il 28 dekabr tarixli Fərmanı ilə İqtisadiyyat Nazirliyinin tabeliyində Kiçik və Orta Biznesin İnkişafı Agentliyi (KOBİA) yaradılıb. KOBİA tərəfindən sahibkarlara informasiya, məsləhət, təlim-tədris, maraqların müdafiəsi, bazarlara və maliyyə resurslarına çıxışın yaxşılaşdırılması, dövlət və özəl qurumlarla əlaqələndirmə və digər istiqamətlərdə dəstək və xidmətlər göstərilir. Bu dəstək və xidmətlər KOBİA-nın ölkənin müxtəlif şəhər və rayonlarını əhatə edən geniş infrastruktur şəbəkəsi - KOB dostları, KOB inkişaf mərkəzləri və KOB evləri vasitəsilə həyata keçirilir. Belə ki, KOB inkişaf mərkəzləri KOB-ların biznes biliklərini artırmaq üçün ödənişsiz olaraq informasiya, məsləhət, təlim və biznes planın hazırlanması xidmətlərini təklif edir. Ölkənin regionlarında KOB-ların maraqlarının müdafiəsi, lazımi dəstək və xidmətlərə çıxışı 38 şəhər və rayonda fəaliyyət göstərən “KOB dostu” şəbəkəsi vasitəsilə reallaşdırılır. Bundan başqa, KOBİA tərəfindən mikro və kiçik sahibkarlıq subyektlərinə onları innovasiya fəaliyyətindən əldə etdikləri gəlirlər üzrə mənfəət və gəlir vergisindən 3 il müddətinə azad edən “Startap” şəhadətnaməsi verilir, daxili bazar araşdırmasının aparılmasına, təhsil, elm, tədqiqat və dəstək layihələrinə maliyyə dəstəyi göstərilir, onların ödənişsiz olaraq sərgilərdə iştirakına və ticarət şəbəkələrinə çıxışına dəstək təmin olunur.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!