ABŞ Silahlı Qüvvələrinin Baş Qərargah rəisi, general Martin Dempsi İsrailə növbəti dəfə səfər edib.M. Dempsi səfər çərçivəsində İsrailin baş naziri Benyamin Natanyahu, müdafiə naziri Moşe Yalon, İsrail Silahlı Qüvvələrinin Baş Qərargah rəisi, general Beni Qantz və digər rəsmilərlə görüşüb.

Görüşlərdə İranın nüvə proqramı, Suriya və Misirdəki vəziyyət əsas müzakirə mövzusu olub. Görüşlərin detalları barədə ətraflı məlumat verilməsə də, İsrail mətbuatı bəzi detalları açıqlayıb.

Yerli mətbuatın yazdığına görə B. Netanyahu hazırda Yaxın Şərq regionu bir çox təhdidlərlə üzləşdiyini, ancaq İranın nüvə silahına yiyələnməsi riski ilə müqayisədə bu təhdidlərin heç bir şey olduğunu bildirib: “Biz İranın öz hədəfinə nail ola bilməməsi üçün birgə çalışacağıq”.

Görüşdə İsrailin baş naziri və digər rəsmilər həmçinin bir daha İranın yeni prezidenti Həsən Ruhaninin “mülayimliyinə” inanılmamasını və bu ölkənin dünyanın qarşı olduğu nüvə proqramı ilə bağlı güzəştə gedilməməsini istəyiblər.

M. Yalon isə İranı Yaxın Şərqdə qeyri-stabil vəziyyət yaratmaqda günahlandırıb: “Suriyadakı uzunmüddətli münaqişə və qeyri-stabil vəziyyət hazırlanmışdı. Çünki Tehran-Dəməşq-Beyrut ittifaqı bu böhrandan qazanclı çıxdı. Mən İran-Suriya-“Hizbullah” ittifaqını nəzərdə tuturam”.

B. Qantzla görüşdə isə iki ölkə arasında müvəffəqiyyətli əməkdaşlıq olduğu vurğulanıb.

Mətbuat M.Dempsinin görüşlərdə İsrail rəsmilərindən gələcəkdə İranın nüvə obyektlərinə hücum etməyəcəyinə əmin olmaq istədiyini yazıb. ABŞ rəsmisi buna səbəb kimi İranın nüvə məsələsinin diplomatik yolla həlli üçün Tehranla “altılıq” ölkələri arasında nüvə müzakirələrinin davam etdiriləcəyini göstərib.

Mənbə: apa.az