15-11-2024, 23:03
Leyla Əliyeva “Ecumene” Qlobal Forumunun plenar iclasında
Heydər Əliyev Fondunun vitse-prezidenti, IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin təsisçisi və rəhbəri Leyla Əliyeva noyabrın 15-də “Ecumene” Qlobal Forumu tərəfindən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində təşkil olunan plenar iclasda çıxış edib.
Ölkəmizin ev sahibliyi etdiyi COP29-un qlobal ekoloji problemlərin həllində rolu barədə danışan Leyla Əliyeva, qəbul ediləcək qərarların dayanıqlı gələcək naminə beynəlxalq həmrəyliyin möhkəmləndirilməsinə töhfə verəcəyinə inamını ifadə edib.
Leyla Əliyeva çıxışında Azərbaycanda su resurslarının dayanıqlı idarə edilməsinə dair bir sıra məqamlara toxunub. Ölkəmiz tərəfindən həyata keçirilən bir sıra tədbirlər, o cümlədən yaxın illər ərzində yaradılması nəzərdə tutulan 10 su anbarı barədə plenar iclas iştirakçılarına məlumat verilib.
Xəzər dənizində su səviyyəsinin son illər ərzində endiyini qeyd edən IDEA İctimai Birliyinin təsisçisi və rəhbəri Xəzərdə biomüxtəlifliyin qorunmasının əhəmiyyətini vurğulayıb. Eyni zamanda, Xəzər suitilərinin populyasiyasının XX əsrin əvvəli ilə müqayisədə 6 dəfədən çox endiyi bildirilib. Leyla Əliyeva qeyd edib ki, “Blue Marine Foundation” təşkilatı ilə əməkdaşlıq çərçivəsində Qızılağac Milli Parkı Xəzər dənizində ilk dənizkənarı mühafizə olunan ərazi kimi seçilib.
Bununla yanaşı, Leyla Əliyeva çıxışında IDEA İctimai Birliyi tərəfindən su resurslarının mühafizəsi istiqamətində görülən tədbirlərə toxunub. Bildirilib ki, “Zəngin hövzələr” layihəsi çərçivəsində müxtəlif növ milyonlarla balıq körpəsi ölkə ərazisində yerləşən bir sıra su hövzələrinə buraxılıb. “Bir damcı” layihəsinin nəticəsi olaraq ictimaiyyətə suyun səmərəli istifadəsinin əhəmiyyəti barədə geniş məlumat verilib.
Qeyd edək ki, plenar iclasda həmçinin BMT Baş katibinin iqlim fəaliyyəti və ədalətli keçid üzrə xüsusi müşaviri Selvin Çarlz Hart, Dünya İqtisadiyyatının Təhlili Mərkəzinin direktoru Ramon Piks-Madruqa, BMT-nin Ətraf Mühit Proqramının keçmiş icraçı direktoru Erik Solheym, Rusiya prezidentinin köməkçisi, prezidentin iqlim məsələləri üzrə xüsusi nümayəndəsi Ruslan Edelgeriyev, Çeçenistan başçısının və hökumətinin administrasiyası rəhbərinin birinci müavini – Çeçenistanın naziri Xədicat Kadırova və Ümumrusiya təbiətin mühafizəsi cəmiyyətinin Mərkəzi Şurasının sədri Vyaçeslav Fetisov iştirak ediblər.
15-11-2024, 22:54
Gənc şair dəm qazından öldü
Gənc şair Rauf Ra vəfat edib.
Bu barədə onun yaxınlar məlumat verib.
Məlumata görə gənc şair dəm qazından boğularaq dünyasını dəyişib.
Qeyd edək ki, Rauf Ranın şeirləri və yazıları dövri mətbuatda mütəmadi şəkildə çap olunub.
15-11-2024, 22:28
Nazir BMT rəsmisi ilə vacib danışıqlar apardı
Azərbaycan Respublikasının xarici işlər naziri Ceyhun Bayramov BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası çərçivəsində BMT-nin Narkotiklər və Cinayətkarlıq üzrə idarəsinin icraçı direktoru Qada Vali ilə görüşüb.
Xarici İşlər Nazirliyindən verilən məlumata görə, görüşdə transmilli cinayətkarlıq, xüsusilə narkotik vasitələrin qanunsuz dövriyyəsi ilə mübarizə istiqamətində əməkdaşlıq məsələləri, habelə ölkəmizin COP29 sədrliyi çərçivəsində mümkün əməkdaşlıq perspektivləri müzakirə olunub.
Ceyhun Bayramov ölkəmizin müvafiq qurumları ilə BMT-nin Narkotiklər və Cinayətkarlıq üzrə idarəsi arasında əməkdaşlığın, habelə COP29 çərçivəsində həyata keçirilən birgə tədbirlərdən bəhs edib.
Transmilli cinayətlərlə mübarizə üzrə təlim-tədris məsələlərinin əhəmiyyəti diqqətə çatdırılıb, bu istiqamətdə müxtəlif qurumların əməkdaşları üçün birgə layihələrin faydalı ola biləcəyi bildirilib.
Ölkəmizin COP29 sədrliyi çərçivəsində bir sıra əhəmiyyətli təşəbbüslərlə çıxış etdiyi, bu istiqamətdə iqlim dəyişikliyi və beynəlxalq sülh arasında əlaqəyə vurğu edən “Atəşkəs çağırışı”nın xüsusilə təqdirəlayiq olduğu vurğulanıb.
Görüş zamanı, həmçinin qarşılıqlı maraq doğuran digər məsələlər ətrafında fikir mübadiləsi aparılıb.
15-11-2024, 22:01
Leyla Əliyeva film təqdimatında
Heydər Əliyev Fondunun vitse-prezidenti, IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin təsisçisi və rəhbəri Leyla Əliyeva BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində “Fighting for International Nautical Species” (FINS) təşəbbüsünün pavilyonunu ziyarət edib. Pavilyon dəniz canlılarının qorunması, eləcə də bu sahədə beynəlxalq səylərin artırılmasının əhəmiyyətinə həsr olunub.
FINS pavilyonunda həyata keçirilən silsilə tədbirlər çərçivəsində Leyla Əliyeva “Seaspiracy” sənədli filminin nümayişində iştirak edib.
Filmdə balıqçılıq sənayesinin ətraf mühitə, ekosistemlərə və dəniz heyvanlarına təsirinə dair məlumat verilir və dayanıqlı balıqçılığın yaratdığı imkanlar qeyd olunur.
Tədbirin yekununda “Seaspiracy” layihəsinin rəhbəri İzabella Kavalletti iştirakçıları maraqlandıran sualları cavablandırıb.
15-11-2024, 21:32
Azərbaycanla NATO arasında danışıqlar
Azərbaycan Respublikasının xarici işlər naziri Ceyhun Bayramov BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində NATO baş katibinin innovasiya, hibrid və kiber məsələlər üzrə köməkçisi Jan-Şarl Ellermann-Kinqomb ilə görüşüb.
Xarici İşlər Nazirliyindən verilən məlumata görə, görüşdə Azərbaycan və NATO arasında mövcud tərəfdaşlıq məsələləri, COP29 sədrliyimiz çərçivəsində əməkdaşlıq perspektivləri müzakirə olunub.
Ceyhun Bayramov bu il ölkəmizlə NATO arasında əməkdaşlığın əsasını qoyan “Sülh naminə Tərəfdaşlıq” Proqramının 30 illiyinin qeyd edildiyini, bu çərçivədə qarşılıqlı əməkdaşlıq şəraitində bir sıra birgə layihələrin həyata keçirildiyini məmnunluqla qeyd edib.
Tərəfdaşlığımızın 30 ili müddətində Azərbaycanın NATO-nun sülhməramlı əməliyyatlarında nümunəvi iştirakı, habelə NATO çərçivəsində qarşılıqlı faydalı əməkdaşlıqda aktiv iştirakının ölkəmizin inamlı tərəfdaş kimi tanınmasına gətirib çıxardığı bildirilib.
COP29 sədrliyimiz çərçivəsində, həmçinin iqlim fəaliyyətinin irəlilədilməsi istiqamətində NATO ilə əməkdaşlıq etməyə hazır olduğumuz diqqətə çatdırılıb.
Görüş zamanı, həmçinin qarşılıqlı maraq doğuran digər məsələlər ətrafında fikir mübadiləsi aparılıb.
15-11-2024, 20:55
Fidan Əlizadə Avropada qızıl medal qazandı
Azərbaycan təmsilçisi Fidan Əlizadə Polşanın Pila şəhərində 23 yaşadək cüdoçular arasında keçirilən Avropa çempionatında qızıl medal qazanıb.
O, 57 kq çəki dərəcəsində fəxri kürsünün ən yüksək pilləsinə qalxıb.
Qeyd edək ki, bu gün Azərbaycan cüdoçusu Hüseyn Allahyarov (60 kq) da qızıl medal qazanıb. Aydan Vəliyeva (52 kq) həlledici mərhələdə uduzaraq gümüş medalla kifayətlənib. Rüfət Şövlətov (73 kq) isə bürünc medal uğrunda qarşılaşmadan qalib ayrılıb.
15-11-2024, 20:43
COP29-da növbəti dəyirmi masa
COP29 çərçivəsində “Beynəlxalq iqlim təşəbbüslərinin tamamlayıcılığı və davamlılığı” mövzusunda dəyirmi masa təşkil olunub.
Dəyirmi masa COP29 Sədrliyi, İsveç və Dünya Resursları İnstitutu ilə birgə əməkdaşlıq çərçivəsində baş tutub.
COP29-un baş danışıqçısı Yalçın Rəfiyev bildirib ki, iqlim dəyişmələri milli sərhədləri aşır, onun yaratdığı problemlər qlobal və kollektiv şəkildə həll olunmalıdır. Bu sahədə beynəlxalq əməkdaşlıq mühüm rol oynayır. Diqqətə çatdırılıb ki, Paris Sazişinin qəbulundan bəri təşəbbüslərin sayı əhəmiyyətli dərəcədə artıb. Bununla belə təşəbbüslərin bəyan edilmiş məqsədlərə doğru irəliləyişini, eləcə də gələcəkdə təşəbbüslərin təsirini daha da artırmaq imkanlarını dəyərləndirmək də vacibdir: “Səylərimizdə davamlılığı, səmərəliliyi və uyğunluğu təmin etmək vacibdir. Bu, daha böyük fəaliyyət üçün əhəmiyyətli impuls yaratmaq və bu təşəbbüslərin həyata keçirilməsinə dəstəyi artırmaq üçün vacib olacaq”.
Baş danışıqçı İsveç və Dünya Resursları İnstitutuna tərəfdaşlığa görə minnətdarlıq edib.
COP29 Sədrliyinin Fəaliyyət Gündəliyinin Qlobal və Regional Təşəbbüslər Komandasının həmrəhbəri, Xarici İşlər Nazirliyinin İqtisadi Əməkdaşlıq İdarəsinin rəisi Elmar Məmmədov da dəyirmi masanın mövzusunun əhəmiyyətindən danışıb. Bildirib ki, COP29 Sədrliyinin təşəbbüslərinin hazırlanması prosesində çoxsaylı maraqlı tərəflərlə məsləhətləşmələr aparılıb və bu zaman bir çox COP sədrlikləri tərəfindən təqdim olunan təşəbbüslərin davamlılıq və tamamlayıcılıq baxımından çatışmazlıqlarının olduğu barədə narahatlığa rast gəlinib. Buna görə də COP29 Sədrliyinin təşəbbüsləri çərçivəsində davamlılıq və tamamlayıcılıq komponentlərinin inteqrasiya edilməsi diqqət mərkəzində saxlanılıb.
COP29 Sədrliyinin təşəbbüslərindən bəhs edilərkən diqqətə çatdırılıb ki, noyabrın 14-də Bakı İqlim Maliyyəsi, İnvestisiya və Ticarət Dialoqu (BICFIT) təşəbbüsünə start verilib: “Bu təşəbbüs vasitəsilə biz iqlim maliyyəsi, investisiya və ticarət mövzusunda COP sədrliklərinin koalisiyasını yaratmaq istəyirik”.
Qeyd edilib ki, COP22-dən etibarən iqlim və inkişaf mövzusu digər COP-larda davam etdirilir və bu prosesin davamı olaraq Bakıda ilk dəfə maliyyə, investisiya və ticarət günü təşkil edilib: “BICFIT dialoqu vasitəsilə biz iqlim maliyyəsi, investisiya və ticarət mövzusunda tamamlayıcılığı və davamlılığı təmin etmək istəyirik”.
Elmar Məmmədov COP29 Sədrliyinin digər təşəbbüsləri barədə də tədbir iştirakçılarına məlumat verib. Bildirilib ki, sədrlik iqlim və sağlamlıq, urbanizasiya, kənd təsərrüfatı, su və iqlim mövzularında təşəbbüslər hazırlayıb və qeyd edilən bütün bu təşəbbüslərdə məqsəd birbaşa olaraq davamlılıq və tamamlayıcılıq məsələlərinin həllinə yönəlib.
Dünya Resursları İnstitutunun direktoru Ani Dasquptanın moderatorluğu ilə keçən dəyirmi masada Ümumdünya Səhiyyə Təşkilatının (ÜST) Ətraf mühit, iqlim dəyişikliyi və səhiyyə departamentinin direktoru Maria Neira, BMT-nin Məskunlaşma Proqramının (UN-HABITAT) məskunlaşma üzrə rəsmisi Lea Ranalder, Təmiz Hava və İqlim Koalisiyası katibliyinin rəhbəri Martina Otto, İsveçin iqlim üzrə səfiri Mattias Frumerie, Braziliya Xarici İşlər Nazirliyində İqlim Fəaliyyət bölməsinin rəhbəri Mario Mottin, Beynəlxalq İqlim Siyasətləri Habının direktoru Kat Abreu çıxış ediblər.
Dəyirmi masada müxtəlif qlobal iqlim təşəbbüslərinin bir-birini necə tamamlaya biləcəyi, səylərin davamlılığı, səmərəliliyi və tutarlılığını necə təmin ediləcəyi ətrafında fikir mübadiləsi aparılıb.
Natiqlər iqlim dəyişmələri kontekstində müxtəlif sahələr üzrə, xüsusilə də sağlamlıq, urbanizasiya və ətraf mühitin qorunması təşəbbüslərinin bir-birini necə tamamlaya biləcəyi, səylərin davamlılığı, səməliliyi və tutarlılığının necə təmin ediləcəyi ətrafında fikir mübadiləsi aparıblar. Müxtəlif illərdə qəbul edilmiş təşəbbüslərin tamamlayıcılığı və davamlılığını təmin etmək məqsədilə COP29 Sədrliyinin səyləri və yanaşması təqdir olunub.
15-11-2024, 20:11
Leyla Əliyeva Çin pavilyonunda - FOTO
Heydər Əliyev Fondunun vitse-prezidenti, IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin təsisçisi və rəhbəri Leyla Əliyeva noyabrın 15-də Kəmər və Yol Təşəbbüsü Yaşıl İnkişaf Koalisiyası (KYTYİK), Çin Ətraf Mühit və İnkişaf üzrə Beynəlxalq Əməkdaşlıq Şurası və Çin Qitələrarası Kommunikasiya Mərkəzinin birgə təşkilatçılığı ilə baş tutan “İqlim dəyişikliyi üzrə Cənub-Cənub əməkdaşlığı və yaşıl inkişaf: keyslər və təcrübələr” panel müzakirəsində iştirak edib.
BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində keçirilən tədbirin açılışında çıxış edən Leyla Əliyeva Qlobal Cənub bölgəsi ölkələri arasında dayanıqlı inkişaf və ətraf mühitin mühafizəsi kimi sahələrdə əməkdaşlığın əhəmiyyətini və mövcud imkanları qeyd edib. Leyla Əliyeva, eyni zamanda, vurğulayıb ki, Azərbaycan Respublikası bərpaolunan enerji mənbələrindən istifadənin genişləndirilməsi istiqamətində mühüm addımlar atır.
Sonra Leyla Əliyeva tədbir iştirakçılarına IDEA İctimai Birliyi tərəfindən ətraf mühitin mühafizəsi, ekoloji balansın təmin olunması, eləcə də iqlim dəyişmələri ilə mübarizə sahəsində görülən işlər barədə ətraflı məlumat verib. IDEA İctimai Birliyinin təsisçisi və rəhbəri həyata keçirilən ağacəkmə və təmizlik aksiyaları, vəhşi təbiətin bərpası və mühafizəsi, eləcə də bir sıra digər layihə və tədbirlərin nəticələrinə toxunub.
Yekunda Leyla Əliyeva iqlim dəyişmələri ilə mübarizə və yaşıl inkişaf naminə qlobal həmrəylik və əməkdaşlığın rolunu xüsusi vurğulayıb.
Qeyd edək ki, tədbir çərçivəsində Çinin ekologiya və ətraf mühit nazirinin müavini Jao Yinqmin, KYTYİK-nin həmsədri, Bezos Yer Fondunun prezidenti və baş icraçı direktoru Endryu Stir, KYTYİK İdarə heyətinin vitse-prezidenti Erik Solheym, ABŞ-ın Kolumbiya Universitetinin professoru Cefri Saks və digər rəsmi nümayəndə, ekspert və özəl sektor təmsilçiləri iştirak edib.
15-11-2024, 20:03
Cüdoçumuz Avropa çempionu oldu
Azərbaycan təmsilçisi Hüseyn Allahyarov Polşanın Pila şəhərində keçirilən 23 yaşadək cüdoçular arasında Avropa çempionatının qızıl medalını qazanıb.
73 kq çəki dərəcəsində mübarizə aparan tatamı ustası finalda polşalı Yakub Krovskidən güclü olub.
Qeyd edək ki, Azərbaycanın qadın cüdoçularından Aydan Vəliyeva (52 kq) və Fidan Əlizadə (63 kq) də finala vəsiqə qazanıblar.
15-11-2024, 19:36
Zimbabve parlamentinin spikeri Bakıdadır - FOTO
Zimbabve Respublikası Milli Assambleyasının spikeri Jakob Francis Mudenda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində Azərbaycan Respublikası Milli Məclisi və Parlamentlərarası İttifaqın birgə təşkilatçılığı ilə keçiriləcək Parlament Görüşündə iştirak etmək üçün ölkəmizə səfərə gəlib.
Heydər Əliyev Beynəlxalq Hava Limanında qonağı Milli Məclisin komitə sədri Şahin İsmayılov və Zimbabve ilə parlamentlərarası əlaqələr üzrə işçi qrupunun rəhbəri Mahir Süleymanlı qarşılayıblar.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!