29-12-2024, 14:27
Tanınmış bəstəkara yeni vəzifə verildi
Tanınmış bəstəkar-pianoçu Pikə Axundovaya yeni vəzifə verilib.
Sənətşünaslıq üzrə fəlsəfə doktoru Azərbaycan Milli Konservatoriyasının Dirijorluq Kafedrasına müdir təyin olunub.
O, Konservatoriyanın Elmi Şurasında səsvermə yolu ilə bu vəzifəyə gətirilib.
Qeyd edək ki, Pikə Axundova 1984-cü ildə Bakı şəhərində anadan olub. O, prezident təqaüdçüsüdür.
29-12-2024, 14:08
Kadırov azərbaycanlıları hədələyib
Çeçenistanın rəhbəri Ramzan Kadırov AZAL-a məxsus təyyarənin Qroznı səmasında vurulmasına görə onu ittiham edən azərbaycanlıları hədələyib.
Bu ittihamlar ayrı-ayrı azərbaycanlılar tərəfindən Kadırovun Telegram kanalına yazılan şərhlərdə yer alıb.
Çeçenistanın rəhbəri həmin ittihamları belə cavablayıb:
“Əgər siz məni əsassız olaraq günahlandırır və təhqir edir, şərəf və ləyaqətimi alçaltmağa cəhd göstərirsinizsə, o zaman uca Allaha and olsun ki, mənim ailəmin şərəf və ləyaqətini qoruyacaq qanun yoxdur”.
Ramzan Kadırov daha sonra hədəsini belə davam etdirib:
“Hər şeydən istifadə edəcəm. Xalqımın, tayfamın, ailəmin və mənim şərəf və ləyaqətimi ləkələmək istəyənlərə heç vaxt təslim olmayacam. Mən hər şeyi edəcəyəm və sizə layiqli cavab verəcəyimə söz verirəm”.
Dekabrın 25-də Bakı-Qroznı reysi ilə uçan "Azərbaycan Hava Yolları”na məxsus "Embraer 190" təyyarəsi Çeçenistan səmasında Rusiyanın "Pantsir-S1" zenit-raket kompleksi tərəfindən hücuma məruz qalıb. Daha sonra ciddi zədə alan təyyarəmizin Qroznı və Mahaçqala aeroportlarına enməsinə icazə verilməyib.
Rusiya tərfi izin itirilməsi məqsədilə "Embraer 190" təyyarəsini Qazaxıstanın Aktau şəhərinə doğru yönəldib.
"Embraer 190"ın ekipajı böyük şücaət göstərərək, təyyarəni Xəzər dənizinə düşməkdən xilas edərək, onu Aktau şəhərinə çatdıra bilib.
Təəssüf ki, Aktau limanına 3 dəqiqəlik məsafə qalanda təyyarə qəza enişi etməyə məcbur olub. Qəza nəticəsində, ümumilikdə 67 nəfərdən 38-i həlak olub. Həlak olanlardan 25-i Azərbaycan vətəndaşıdır.
Məhz pilotların gərgin səyləri nəticəsində 29 nəfər olaydan sağ qurtula bilib.
29-12-2024, 13:50
Təyyarə qəzasında həlak olan ekipaj üzvləri dəfn edildi
Bakı-Qroznı reysini yerinə yetirən “Embraer-190” tipli sərnişin təyyarəsinin qəzaya uğraması nəticəsində həlak olan üç ekipaj üzvü - gəmi komandiri İqor Kşnyakin, pilot Aleksandr Kalyaninov və stüardessa Hökümə Əliyeva bu gün dekabrın 29-da II Fəxri xiyabanda dəfn olunub.
Dəfn mərasimində dövlət və hökumət rəsmiləri, ictimaiyyət nümayəndələri iştirak ediblər.
Xatırladaq ki, AZAL-a məxsus Bakı-Qroznı aviareysini həyata keçirən sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Təyyarənin göyərtəsindəki 67 nəfərdən 38-i həlak olub, 29-u sağ qalıb.
Hər iki pilot da daxil olmaqla, 3 ekipaj üzvü həlak olub, iki ekipaj üzvü isə sağ qalıb. Dekabrın 26-da Azərbaycana 14 yaralı və 4 nəfərin meyiti gətirilib. Dekabrın 29-da isə 3-ü ekipaj üzvü olmaqla, 24 nəfərin nəşi ölkəyə gətirilib.
Hadisədən sonra Prezident İlham Əliyevin tapşırığı ilə təyyarə qəzasının səbəblərinin araşdırılması üçün Baş nazir Əli Əsədovun rəhbərliyi ilə Dövlət Komissiyası yaradılıb.
Qeyd edək ki, dekabrın 25-də Bakı-Qroznı reysini yerinə yetirən “Embraer 190” tipli sərnişin təyyarəsinin Aktau şəhəri yaxınlığında qəzaya uğraması ilə əlaqədar Prezident İlham Əliyev dekabrın 26-sının Azərbaycanda matəm günü elan olunması barədə Sərəncam imzalayıb.
29-12-2024, 13:35
HƏMAS lideri necə öldürülüb? - Əməliyyatın təfərrüatı AÇIQLANDI
İsrail mətbuatı bu il iyulun 31-də Tehranda öldürülən HƏMAS İsmayıl Haniyənin aradan götürülməsi planının təfərrüatları haqda yeni məlumatlar dərc edib.
“Times of Israel” yazır ki, İsrailin İsmayıl Haniyəni öldürmək qərarı oktyabrın 7-dən az sonra, HƏMAS lideri yüksək rütbəli kəşfiyyat rəsmiləri tərəfindən tərtib edilən siyahının başında göründüyü zaman verilib. Yeganə sual bunun nə vaxt baş verəcəyi idi.
“Times of Israel” yazır ki, Haniyə Qətərdə yaşayırdı, lakin onun orada öldürülməsi Dohanın müharibə başlayandan bəri vasitəçilik etdiyi girovlarla bağlı danışıqları pozmaq təhlükəsi yaradıb.
Buna görə də Haniyənin öldürülməsi üçün mümkün yerlər kimi Türkiyə, Rusiya və İran seçilib – HƏMAs liderinin tez-tez səfər etdiyi üç ölkə.
Adı çəkilən KİV xəbər verir ki, İsrail Türkiyə prezidenti Rəcəb Tayyib Ərdoğanın şiddətli reaksiyasından qorxub və eyni şəkildə Rusiya prezidenti Vladimir Putini qəzəbləndirmək istəməyib, elə buna görə də Haniyənin aradan götürülməsi üçün İran ən uyğun variant olaraq seçilib.
İsrail mediası yazır ki, İsmayıl Haniyənin Tehranın şimalındakı dəbdəbəli Səadət Abad məhəlləsində bir neçə dəfə eyni SEPAH mehmanxanasında qalması əməliyyatın planlaşdırılmasını asanlaşdırıb.
Planlaşdırılan partlayışdan az əvvəl Haniyənin otağında kondisioner sıradan çıxıb və HƏMAS lideri kömək istəmək üçün otağını tərk edib. Onun geri qayıtması xeyli müddət uzandığından israilli əməliyyatçılar Haniyənin başqa binaya köçürüləcəyindən narahat olmağa başlayıblar. Çünki bu, bütün əməliyyatı poza bilərdi.
Lakin bir müddət sonra Haniyənin otağındakı kondisioner təmir olunub və HƏMAS lideri öz otağına qayıtdıb. İsrailli əməliyyatçılar yalnız bu zaman rahatlaşıblar. Yerli vaxtla gecə saat 01:30 radələrində əldəqayırma partlayıcı işə düşüb, zərbə Haniyyənin qaldığı otağın xarici divarını deşib və bütün SEPAH binasını silkələyib.
Bir neçə saniyədən sonra İran İnqilabı Keşikçiləri Korpusunun (SEPAH) təcili yardım komandası Haniyənin otağına gəlib. Gələnlər arasında İsmayıl Haniyənin müavini Xəlil əl-Həyya da olub və o, HƏMAS liderinin qanlı cəsədini gördükdən sonra göz yaşları içində diz çöküb. Bundan qısa müddət sonra SEPAH Haniyənin ölümünü elan etməyə məcbur olub.
Daha əvvəl Haniyənin oğlu Əbdül Salam atasının partlayıcı qurğu ilə öldürüldüyünü təkzib etmiş və onun mobil telefonu izləndikdən sonra atasının raket hücumuna məruz qaldığını demişdi.
29-12-2024, 13:15
Xorvatiyada prezident seçkiləri keçirilir
Bu gün Xorvatiyada prezident seçkiləri keçirilir.
Ölkə üzrə 3,7 milyondan çox seçici səsvermə üçün qeydiyyata alınıb.
Son sorğulara görə qeydiyyata alınmış səkkiz namizəd arasından hazırkı prezident Zoran Milanoviç və hakim Xorvatiya Demokratik İttifaqının dəstəklədiyi müstəqil namizəd Draqan Primorak müvafiq olaraq birinci və ikinci yerdə qərarlaşıb.
29-12-2024, 12:48
Sabahın hava proqnozu
Dekabrın 30-da gözlənilən hava şəraiti açıqlanıb.
Milli Hidrometeorologiya Xidmətindən verilən xəbərə görə, Bakıda və Abşeron yarımadasında dəyişkən buludlu olacağı, arabir tutulacağı, bəzi yerlərdə arabir yağıntılı olacağı gözlənilir. Şimal-qərb küləyi gündüz şimal-şərq küləyi ilə əvəz olunacaq.
Havanın temperaturu gecə 5-7° isti, gündüz 7-9° isti olacaq. Atmosfer təzyiqi normadan yüksək 769 mm civə sütunu olacaq. Nisbi rütubət 70-80 % olacaq.
Azərbaycanın rayonlarında əksər rayonlarda əsasən yağmursuz olacaq. Lakin bəzi şərq rayonlarında arabir yağıntılı olacağı, dağlıq rayonlarda qar yağacağı gözlənilir. Bəzi yerlərdə arabir duman olacaq. Mülayim qərb küləyi əsəcək.
Havanın temperaturu gecə 1-6° isti, gündüz 7-11° isti, dağlarda gecə 5-10° şaxta, gündüz 0-5° isti olacaq.
29-12-2024, 12:36
Kanadada təyyarə sərt eniş etdi
Sent-Cons şəhərindən Halifaksa daxili reys həyata keçirən Kanadanın “Pal Airlines” sərnişin təyyarəsi “Halifax Stanfield” hava limanına sərt eniş edib. Enərkən qanadı uçuş-eniş zolağına dəyən təyyarə alovlanıb.
Hava limanının məlumatına görə, hadisə yerli vaxtla saat 21:30-da baş verib. İlkin ehtimallara görə, hadisəyə təyyarənin şassisində baş verən nasazlıq səbəb olub. Qəza nəticəsində heç kimin xəsarət almadığı bildirilir.
Qəzadan sonra hava limanı bir müddət bağlanıb və problemlər aradan qaldırıldıqdan sonra fəaliyyətini bərpa edib.
Bir müddət öncə, Cənubi Koreyanın “Muan” hava limanında təyyarə eniş zamanı uçuş-enmə zolağının kənarına çıxaraq hasara çırpılıb. Qəza zamanı təyyarənin göyərtəsində ekipaj üzvləri də daxil 181 nəfər olub. Son məlumata görə, hadisə nəticəsində ölənlərin sayı 120 nəfərə çatıb.
29-12-2024, 12:26
“Mən Gürcüstanda hamının prezidenti olmaq niyyətindəyəm” - Kavelaşvili
"Gürcü xalqı əsrlər boyu müxtəlif etnik və ya dini mənsubiyyətə malik insanlarla harmoniya şəraitində yaşayıb".
Bunu Gürcüstan prezidenti Mixeil Kavelaşvili andiçmə mərasimində çıxışı zamanı bildirib.
Onun sözlərinə görə, gürcülərin həmişə xüsusi dostluğu olub və buna görə də müxtəlif etnik mənşəli insanlar Gürcüstanı çox keçmədən öz vətənləri hesab ediblər və lazım gələrsə, onu müdafiə etmək üçün gürcülərlə bərabər döyüşüblər.
Mixeil Kavelaşvili deyib ki, ölkəsi kənardan özünü əhatə edən cəmiyyətin süni qütbləşməsi ilə üz-üzədir.
“Fikirlərindən və siyasi mənsubiyyətindən asılı olmayaraq hər bir Gürcüstan vətəndaşı mənim üçün əzizdir. Məni kimin bəyənməsindən və ya bəyənməməsindən asılı olmayaraq, hamının prezidenti olmaq niyyətindəyəm”, - Gürcüstan prezidenti Mixail Kavelaşvili andiçmə mərasimində deyib.
Kavelaşvili qeyd edib ki, onun səyləri cəmiyyətin birləşməsinə yönələcək.
“Mənim bundan sonrakı səylərim cəmiyyətin birləşməsinə yönələcək. Bu və ya digər məsələyə baxış bucağından asılı olmayaraq, biz vətənimiz, dəyərlərimiz və qarşılıqlı hörmətə əsaslanan qaydalar ətrafında birləşməyi bacarmalıyıq ki, onları birlikdə qurmağa davam etməliyik”, - deyə dövlət başçısı vurğulayıb.
29-12-2024, 12:13
AZAL-ın təyyarəsinə üç xarici təsir olub - RƏSMİ - VİDEO
Təyyarəyə üç xarici təsir olub və nəticədə təyyarə qəzası baş verib.
Bunu "Azərbaycan Hava Yolları" QSC-nin (AZAL) vitse-prezidenti İlham Əmirov hava limanındakı vida mərasimində deyib.
O bildirib ki, qara qutu artıq açılıb oxunur:
"İlkin məlumatlar sübut edir ki, təyyarəmizə qeyri-qanuni xarici təsirlər olub. Heyət yerə "qəzaya uğrayıram" siqnalı göndərib, yaxınlıqda olan Mahaçqala və Qroznı hava limanları nədənsə təyyarəni qəbul etməyiblər. Heyət o vəziyyətdə idarəedilməz təyyarəni idarə edib, eniş ediblər. Bu, bizim pilotların yüksək keyfiyyətlərə cavab verməsinin nəticəsidir", - o deyib.
İlham Əmirov əlavə edib ki, qəzanın səbəbləri araşdırılacaq və ictimaiyyətə məlumat veriləcək.
Xatırladaq ki, AZAL-a məxsus Bakı-Qroznı aviareysini həyata keçirən sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Avialaynerin göyərtəsində olan 67 nəfərdən 42-si Azərbaycan, 16-sı Rusiya, 6-sı Qazaxıstan, 3-ü isə Qırğızıstan vətəndaşı olub. Onlardan 38-i həlak olub, 29-u sağ qalıb.
29-12-2024, 12:02
Xızıda direktorun meyiti işlədiyi məktəbdən tapıldı
29 dekabr 2024-cü il tarixində, səhər saatlarında Xızı şəhər tam orta məktəbin direktoru Fazil Məmmədov vəfat edib.
Bu barədə Abşeron-Xızı Regional Təhsil İdarəsindən məlumat verilib.
“Hadisə barədə dərhal aidiyyəti qurumlara məlumat verilib, hazırda hüquq-mühafizə orqanları məsələ ilə bağlı araşdırma aparır. Tibbi-ekspertiza yekunlaşdıqdan sonra ölümün dəqiq səbəbləri məlum olacaq.
Təhsil müəssisəsinin direktoru Fazil Məmmədovun vəfatı ilə bağlı ailəsi və yaxınlarına dərin hüznlə başsağlığı veririk”, - açıqlamada qeyd olunur.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!