5-02-2025, 14:05
Rəsmi Tehrandan Tramp-Pezeşkian görüşünə reaksiya
İranın birinci vitse-prezidenti Məhəmməd Rza Arif ABŞ prezidenti Donald Trampın bu ölkə barədə açıqlamalarına cavab verib.
Məhəmməd Rza Arif jurnalistlərə açıqlamasında deyib ki, İranın nüvə strategiyası dəyişməyib.
"İran İslam Respublikasının strategiyası həmişə sabit olub. Biz inanırıq ki, bütün ölkələr dinc nüvə fəaliyyətlərindən maksimum dərəcədə faydalanmalıdır. Bununla belə, nüvə silahının istifadəsi ilə bağlı dini fətvamız var və bu fətva tamamilə məcburidir, xüsusən də şiə müsəlmanlar üçün. İran nüvə silahı istehsal etməyəcək".
Arif həmçinin bildirib ki, İran yüksək texnologiyalı layihələrə üstünlük verməkdə davam edir, hazırda müdafiə və enerji sektorlarında yeni layihələr həyata keçirir.
Məhəmməd Rza Arif ABŞ prezidenti Donald Trampla İran prezidenti Məsud Pezeşkian arasında görüş ola biləcəyi ilə bağlı iddialara da toxunub. İranın bu mövzuda rəsmi gündəminin olmadığını deyən Arif "belə bir görüş gündəmdə deyil. Ancaq sonda iki şəxsin bir araya gəlməsi mümkündür" deyə, bu mövzuda imkanları açıq qoyub.
5-02-2025, 13:47
Elman Paşayev həbsdə qaldı
Rusiyanın ikinci Qərb Dairə Hərbi Məhkəməsi dələduzluqda təqsirləndirilən keçmiş vəkil Elman Paşayevi həbsdə saxlayıb.
Bu barədə TASS məlumat yayıb.
Məhkəmə onun həbs müddətini martın ortalarına qədər uzadan Moskva Qarnizonu Hərbi Məhkəməsinin qərarını qüvvədə saxlayıb.
"Moskva Qarnizonu Hərbi Məhkəməsinin 13 yanvar tarixli qərarı qanuni sayılır", - hakim elan edib.
Paşayevin müdafiəçisi bildirib ki, vəkil ona qarşı irəli sürülən ittihamların heç birində təqsirli olduğunu etiraf etmir.
5-02-2025, 12:45
Qar yağacaq, 14 dərəcə şaxta olacaq - Sabahın havası
Fevralın 6-da gözlənilən hava şəraiti açıqlanıb.
Milli Hidrometeorologiya Xidmətindən verilən xəbərə görə, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
Günün birinci yarısında bəzi yerlərdə çiskinli yağış yağacağı ehtimalı var. Arabir güclənən şimal-qərb küləyi əsəcək.
Havanın temperaturu gecə 3-5° isti, gündüz 6-8° isti olacaq. Atmosfer təzyiqi normadan yüksək 765 mm civə sütunu olacaq. Nisbi rütubət 70-80 % olacaq.
Azərbaycanın rayonlarında bəzi yerlərdə arabir yağıntılı olacağı, dağlıq və dağətəyi rayonlarda qar yağacağı gözlənilir. Ayrı-ayrı yerlərdə intensivləşəcəyi ehtimalı var. Bəzi yerlərdə arabir duman. Qərb küləyi ayrı-ayrı yerlərdə arabir güclənəcək.
Havanın temperaturu gecə 0-4° isti, gündüz 5-9° isti, dağlarda gecə 3-8° şaxta, yüksək dağlıq ərazilərdə 9-14° şaxta, gündüz 0-5° şaxta olacaq.
5-02-2025, 12:29
Tramp İran prezidenti ilə görüşə razılıq verdi
ABŞ prezidenti Donald Tramp İran prezidenti Məsud Pezeşkianla görüşə razılıq verib.
Tramp bu barədə çərşənbə axşamı Ağ Evdə jurnalistlərlə söhbəti zamanı müvafiq bəyanatla çıxış edib.
ABŞ-ın İrana maksimum təzyiqini bərpa etmək üçün sərəncam imzaladıqdan sonra Tramp ümid etdiyini bildirib ki, o, bu vasitədən tez-tez istifadə etmək məcburiyyətində qalmayacaq.
"İran prezidenti ilə görüş və ya birbaşa əlaqə barədə düşünəcəkmi" sualına Tramp “hə” cavabını verib.
“Baxacağıq ki, İranla razılığa gələ bilərik, yoxsa sövdələşəcəyik”, - Amerika lideri qeyd edib.
Mümkün razılaşmanın təfərrüatları ilə bağlı aydınlaşdırıcı suala cavab olaraq Tramp vurğulayıb ki, İranın nüvə silahı əldə etməsinə icazə verilə bilməz.
“Biz İrana və ya başqasına qarşı sərt mövqe tutmaq istəmirik, lakin onlar nüvə silahına malik ola bilməzlər”, - ABŞ prezidenti bildirib.
Trampdan ona və ya komandasının üzvlərinə qarşı sui-qəsd olarsa, İranın hansı nəticələrlə üzləşə biləcəyi də soruşulub.
“Bunu etsələr, məhv olacaqlar. Mən göstərişlər vermişəm, onlar bunu etsələr, məhv ediləcəklər, heç nə qalmayacaq”, - Amerika lideri vurğilayıb.
5-02-2025, 12:13
İtkin düşən daha 3 şəhid dəfn ediləcək
Birinci Qarabağ müharibəsində itkin düşən daha üç hərbçinin kimliyi eyniləşdirilib.
Bu barədə Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyası itkin-şəhidlərin dəfn mərasimlərinə dair məlumatında deyilir.
Məlumata görə, itkin düşən hərbçilərin qalıqları fevralın 7-də dəfn olunacaq.
5-02-2025, 00:46
Təcili yardım maşınları ilə meyit daşına bilər? - AÇIQLAMA
Təcili tibbi yardım ilkin tibbi yardımın göstərilməsi və lazım gəldikdə isə xəstənin hospitalizasiya üçündür.
Bunu Respublika Təcili və Təxirəsalınmaz Tibbi Yardım Mərkəzinin mətbuat katibi Nəzrin Adıgözəlzadə deyib.
O bildirib ki, meyit daşınması təcili tibbi yardım avtomobillərinin fəaliyyət profilinə aid deyil.
N.Adıgözəlzadə hansı hallarda meyitin təcili yardım maşını ilə daşındığına aydınlıq gətirib:
"Ölüm hadisəsi yaşayış yerində (kənd və qəsəbə istisna olmaqla) baş veribsə Təcili və Təxirəsalınmaz Tibbi Yardım Stansiyasının (TTTYS) həkimi ölüm hadisəsini təsdiq edir. Bu barədə çağırış vərəqəsində qeydiyyat aparmaqla vəfat edənin şəxsiyyətini təsdiq edən sənəd əsasında "Xəbərdarlıq vərəqəsi"ni bu qaydanın 4.1-ci bəndində qeyd olunan tibb müəssisələrinə təqdim etmək üçün doldurur (2 nömrəli əlavə) və ölüm hadisəsi barədə ərazi üzrə polis və ya prokurorluq orqanına məlumat verir", - mətbuat katibi bildirib.
Onun sözlərinə görə, ölüm hadisəsi kənd yerində baş veribsə, kənd sahə xəstəxanasının həkimi və ya tibb məntəqəsinin feldşeri ölüm hadisəsini təsdiq edir və hadisə barədə hüquq-mühafizə orqanına məlumat verir.
"Zorakı ölümə şübhə olduğu hallarda, həmçinin ölüm hadisəsi qeyri yaşayış sahələri və ümumi istifadədə olan ərazilərdə baş veribsə, TTTYS-in həkimi və ya kənd sahə xəstəxanasının həkimi, eləcə də feldşeri hüquq-mühafizə orqanlarının nümayəndəsi gələnə qədər meyitin yanında gözləməlidir", - deyə N.Adıgözəlzadə bildirib.
5-02-2025, 00:30
İnsan beynində mikroplastik aşkarlandı - İLK DƏFƏ
Elm adamları ilk dəfə olaraq insan beyin toxumasında mikroplastiklərin olduğunu müəyyən ediblər. Bu, plastikin insan sağlamlığına təsiri ilə bağlı ciddi narahatlıq doğurub.
Bu barədə CNN telekanalı yeni araşdırmaya istinadla məlumat yayıb.
"Bu kəşf mikroplastiklərin orqanizmə necə daxil olması və bunun sinir sistemində hansı nəticələrə səbəb ola biləcəyi ilə bağlı elmi ictimaiyyət qarşısında yeni suallar yaradır", - tədqiqatın müəllifləri hesab edirlər. Onların məlumatlarına görə, tədqiqatda iştirak edən onlarla insanın beyin toxuması nümunələrində plastik hissəciklər aşkarlanıb. Hər bir insanda tapılan bu mikroplastikin miqdarı bir çay qaşığı doldurmağa kifayət edər.
Ölçüsü 5 mm-dən az olan kiçik plastik parçaları olan mikroplastiklər çoxdan havada, suda və qidada tapılıb. Lakin onun beyində olması alimlər üçün sürpriz olub. Hissəciklərin tənəffüs yolları və ya mədə-bağırsaq sistemindən bədənə daxil ola biləcəyi və daha sonra qan dövranı ilə yayıldığı bildirilir.
Mütəxəssislər xəbərdarlıq edirlər ki, mikroplastiklərin beyinə uzunmüddətli təsirləri hələ də lazımi səviyyədə öyrənilməyib. "Biz bunun idrak funksiyasına, neyrodegenerativ xəstəliklərin inkişaf riskinə və ya ümumi sağlamlığa necə təsir etdiyini bilmirik", – deyə tədqiqat müəlliflərindən biri qeyd edib.
Ümumdünya Səhiyyə Təşkilatı əvvəllər plastik çirklənmənin təsirləri ilə bağlı daha çox araşdırma aparmağa çağırıb. Telekanal qeyd edir ki, yeni araşdırma plastikdən istifadəni azaltmaq və ekosistemləri qorumaq üçün təcili tədbirlərin görülməsi zərurəti ilə bağlı narahatlığı artırır.
4-02-2025, 23:45
İsveçrədə məktəbə hücum: 10 nəfər öldü
İsveçrənin Örebro şəhərində yerləşən orta məktəbə silahlı hücum edilib.
Bu barədə "Expressen" nəşri yazıb.
Hadisə nəticəsində on nəfər həyatını itirir. Xəsarət alanların dəqiq sayı məlum olmasa da, son məlumatlara görə, altı nəfərdən artıqdır.
İlkin məlumata görə, atəş açan şəxs intihar edib.
İsveçin baş naziri Ulf Kristersson həlak olanların yaxınlarına başsağlığı verib. O, "bütün İsveç üçün çox ağrılı bir gün" olduğunu söyləyib.
Hadisə barədə polisə məlumat saat 12:30 radələrində daxil olub. Qatilin motivləri məlum deyil. Onun 35 yaşı var, polisin dediyinə görə, heç bir dəstə ilə əlaqəsi yoxdur və cinayəti yoxdur. Onun təkbaşına hərəkət etdiyi güman edilir. Polis artıq atəş açan şəxsin evində axtarış aparıb və bina tamamilə mühasirəyə alınıb.
Örebro İsveç paytaxtından 200 km aralıda yerləşir və 2000-ə yaxın əhalisi var. Atışmadan sonra məktəb boşaldılıb.
4-02-2025, 23:30
Azərbaycanda meyitlər yandırılacaq? - RƏSMİ
Hazırda müvafiq dövlət qurumları arasında kremasiya mərkəzlərinin açılması məsələsi ilə bağlı müzakirələr aparılmır.
Bunu Dini Qurumlarla İş Üzrə Dövlət Komitəsindən bildiriblər.
Qeyd edilib ki, məsələnin hüquqi, praktiki və dini-sosial tərəfləri var.
Bildirilib ki, “Dini etiqad azadlığı haqqında” Azərbaycan Respublikasının Qanununa əsasən, ölkəmizdə yaşayan hər kəsin hər hansı dinə təkbaşına və ya başqaları ilə birlikdə etiqad etmək, dinə münasibəti ilə bağlı əqidəsini ifadə etmək və yaymaq hüququ vardır.
“Şəxsin dini etiqadını ifadə etməsinə, ibadətlərdə, dini ayin və mərasimlərdə iştirak etməsinə və ya dini öyrənməsinə hər hansı maneə törədilə bilməz. Eyni zamanda, Azərbaycan Respublikası Nazirlər Kabinetinin 2018-ci il 4 dekabr tarixli 522 nömrəli Qərarı ilə təsdiq edilmiş “Qəbiristanlıqların salınması və idarə olunması qaydaları”nda ölmüş şəxsin dini mənsubiyyəti və inancına uyğun olaraq kremasiya olunması prosesini tənzimləyən müddəalar öz əksini tapıb. İndiyədək Dövlət Komitəsinə ümumi məlumat əldə etmək niyyəti daşıyan bəzi istisna hallardan başqa, konkret faktlarla əlaqədar müraciətlər daxil olmayıb. Hazırda müvafiq dövlət qurumları arasında kremasiya mərkəzlərinin açılması məsələsi ilə bağlı müzakirələr aparılmır", - məlumatda bildirilib.
Qeyd edək ki, son günlər mətbuatda ölkədə kremasiya (meyitlərin yandırılması) mərkəzlərinin açılacağı barədə xəbərlər yayılıb.
4-02-2025, 22:44
Kadi yenidən "Qarabağ"da
“Qarabağ” sabiq futbolçusu Kadi Borxesin yenidən heyətinə qatıb.
Braziliyalı oyunçu artıq Bakıdadır.
Qeyd edək ki, Kadi ötən ilin yayında Macarıstanın “Ferensvaroş” klubuna keçmişdi. O, 2021-ci ilin yayından 2022-ci ilin sonuna qədər “Qarabağ”ın formasını geyinib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!