24-05-2025, 20:42
Ərdoğanla Əhməd əl-Şaraa 1 saat yarım nələrdən danışdılar...
Türkiyə Prezidenti Rəcəb Tayyib Ərdoğanla suriyalı həmkarı Əhməd əş-Şaraanın müzakirə etdiyi məsələlər açıqlanıb.
Liderin 1,5 saat davam edən söhbəti zamanı ikitərəfli, regional və qlobal məsələlər barədə fikir mübadiləsi aparılıb.
Ərdoğan Türkiyənin bu günə qədər olduğu kimi, bundan sonra da Suriyanın yanında olmağa davam edəcəyini vurğulayıb.
Görüşdə həmçinin Suriyanın ərazi bütövlüyü məsələsinə də toxunulub və bu amilin qorunmasının, eləcə də ordunun vahid mərkəzdən idarə olunmasının zəruriliyinə diqqət çəkilib.
Ərdoğan Türkiyə ilə Suriya arasında ikitərəfli münasibətlərin və əməkdaşlığın enerji, müdafiə, nəqliyyat başda olmaqda bütün sahələrdə inkişafa davam edəcəyini qeyd edib.
Suriya Prezidenti də Ərdoğana sanksiyaların aradan qaldırılmasında göstərdiyi dəstəyə və səylərə görə təşəkkür edib.
24-05-2025, 20:13
Şuşada “Xarıbülbül” Festivalının açılışı - FOTO
Mayın 24-də Heydər Əliyev Fondu və Mədəniyyət Nazirliyinin təşkilatçılığı ilə Şuşada “Xarıbülbül” VIII Beynəlxalq Musiqi Festivalı öz işinə başlayıb.
Azərbaycan Prezidenti İlham Əliyevin “Üzeyir Hacıbəylinin 140 illiyinin qeyd edilməsi haqqında” Sərəncamından irəli gələrək builki festival dahi bəstəkar Üzeyir Hacıbəylinin anadan olmasının 140-cı ildönümünə həsr olunub.
Festivala Cıdır düzündəki açılış konsertində Üzeyir Hacıbəylinin “Ey Vətən” əsəri ilə start verilib. Konsertdə Üzeyir Hacıbəyli ilə, Arif Məlikov, Asəf Zeynallı, Əfrasiyab Bədəlbəyli, Fikrət Əmirov, Qara Qarayev, Müslüm Maqomayev, Niyazi, Oqtay Zülfüqarov, Tofiq Quliyevin əsərləri səslənib.
Bu il də “Xarıbülbül”ə yerli incəsənət xadimləri ilə yanaşı, digər ölkələrdən də musiqi kollektivləri və solo ifaçılar gəlib. Elə festivalın əsas məqsədlərindən biri də mədəni dialoqun inkişafına töhfə vermək, mütəxəssislər arasında fikir mübadiləsini təşviq etmək və gənc musiqiçilərin yaradıcılığını dəstəkləməkdir.
Açılış konsertində səhnəyə Azərbaycan, Qazaxıstan, Qırğızıstan və Türkiyənin incəsənət xadimləri çıxıb: Azərbaycandan Afaq Abbasova, Cahangir Novruzov, Əkrəm Poladov, Fatimə Cəfərzadə, Fərhad Bədəlbəyli, Fərid Əliyev, İlahə Rüstəmova, İnara Babayeva, Orxan Hüseynov, Mahir Tağızadə, Murad Adıgözəlzadə, Polad Bülbüloğlu, Yusif Eyvazov,Qazaxıstandan Azamat Jeltırquzov, Türkiyədən Ferda Yetişər, eləcə də rəqqaslar Berfu Elmas (Türkiyə), Dayna Kıdıralıyeva (Qırğızıstan), Ebru Elmas (Türkiyə), Eldiyar Marat oğlu (Qırğızıstan), Mustafa Çagatay Ozmen (Türkiyə), Nurjamal Moldoqaziyeva (Qırğızıstan), həmçinin Azərbaycan Dövlət Rəqs Ansamblı, Azərbaycan Dövlət Akademik Opera və Balet Teatrının Simfonik Orkestri və teatrın Balet truppası, Azərbaycan Dövlət Xor Kapellası.
Bu gün Şuşa yenidən dirçəlir. Küçələrində musiqi səslənir, festivallar keçirilir, tarixi binalar bərpa olunur. “Xarıbülbül” Beynəlxalq Musiqi Festivalı kimi tədbirlər şəhərin ruhuna yenidən can verir.
Festivalın coşqusu qonaqların baxışlarında, təbəssümlərində hiss olunur.
Azərbaycanın Xalq artisti, Üzeyir Hacıbəyli adına Bakı Musiqi Akademiyasının rektoru Fərhad Bədəlbəyli “Xarıbülbül” Beynəlxalq Musiqi Festivalına ailələrin, həmçinin uşaqların da gəlməsindən məmnun olduğunu deyib. Qeyd edib ki, festivalda dahi Üzeyir Hacıbəyli, Qara Qarayev, Fikrət Əmirov və digər böyük sənətkarlarımızın səsləndirilən əsərlərini dinləyirlər və bu, böyük sərvətdir.
"Düşünürəm ki, hamı bu gözəl festivaldan razı qaldı. İstərdim ki, xaricdən daha çox insan, tanınmış simalar buraya gəlsinlər, Şuşa ilə tanış olsunlar və görsünlər ki, bura necə bir behiştdir", - deyə F.Bədəlbəyli vurğulayıb.
Azərbaycanın Xalq artisti, Milli Məclisin deputatı Polad Bülbüloğlu bildirib ki, Prezident İlham Əliyev və Birinci vitse-prezident Mehriban Əliyevanın qayğısı və tapşırığı ilə bu möhtəşəm festival keçirilir və o, bundan çox xoşbəxtdir.
Polad Bülbüloğlu Üzeyir Hacıbəylinin 140 illiyi münasibətilə Şuşada, Cıdır düzündə keçirilən festivalda “Sevgili Canan” romansını ifa etdiyini bildirərək deyib: "Mən indi elə hiss edirəm ki, Bülbülün, Üzeyir Hacıbəylinin və digər böyük sənətkarlarımızın ruhları şad olmalıdır. Onların ruhu 30 il narahat qaldı. Artıq sevinirlər ki, “Xarıbülbül” Festivalı yaşayır və bundan sonra da yaşayacaq”.
Festivalın birinci günü axşam saatlarında isə Şuşanın digər gözəl memarlıq incilərindən biri – Xan qızı Natəvanın sarayının qarşısında Azərbaycan Dövlət Mədəniyyət və İncəsənət Universitetinin tələbələrinin ifasında “Üzeyir bəy belə deyərdi...” adlı teatr tamaşası nümayiş olunacaq. Tamaşa Üzeyir Hacıbəylinin felyetonlarından ilhamlanaraq hazırlanıb.
Qeyd edək ki, mayın 25-də - festivalın ikinci günü Cıdır düzündə Ü.Hacıbəyli adına Azərbaycan Dövlət Simfonik Orkestrinin müşayiəti ilə Polad Bülbüloğlunun konserti olacaq. Orkestrə Murtuza Bülbül dirijorluq edəcək.
Həmin gün Cıdır düzündə Qarabağ Universitetinin İncəsənət fakültəsinin tələbələrinin ifasında Azərbaycan və xarici bəstəkarların əsərlərindən ibarət konsert də təqdim olunacaq.
Şuşanın rəmzi olan gülün adını daşıyan “Xarıbülbül” Musiqi Festivalı 1989-cu ildən keçirilir. Qarabağ münaqişəsi dövründə əsas konsertlər Ağdamda, Bərdə və Ağcabədidə təşkil edilib. Vətən müharibəsindəki tarixi zəfərimizdən sonra festival yenidən Şuşaya qayıdıb.
24-05-2025, 19:30
Cüdoçularımız erməni rəqiblərini məğlub etdi
Azərbaycan idmançıları Rusiyanın paytaxtı Moskvada hüquq-mühafizə və hərbi qurumlar arasında keçirilən XIX beynəlxalq cüdo turnirində uğurla çıxış edirlər.
9 ölkədən 100-dən çox cüdoçunun iştirak etdiyi nüfuzlu yarışda ölkəmiz iki komanda - Sərhəd Qoşunlarının və Fövqəladə Hallar Nazirliyinin cüdoçuları ilə təmsil olunur.
Azərbaycan turnirdə ümumilikdə 13 idmançı ilə mübarizə aparır.
Sərhəd Qoşunları komandasının heyətində çıxış edən idmançılar arasında “Judo Club 2012”nin üç üzvü - Eldar Qasımov (81 kiloqram), Rövşən Bağırov (90 kiloqram) və Zaur Bağırov (+100 kiloqram) da yer alıb.
Millimizin üzvü, “Judo Club 2012”nin təmsilçisi Eldar Qasımovun verdiyi məlumata görə, komandamız turnirə 1/8 final mərhələsindən start verib və ilk qarşılaşmada Qazaxıstan təmsilçilərinə 4:1 hesabı ilə qalib gəlib.
Növbəti mərhələdə cüdoçularımız Ermənistan yığması ilə üz-üzə gəlib. Azərbaycan cüdoçuları tatamidə əsl döyüş ruhu nümayiş etdirərək erməni rəqiblərinə heç bir şans verməyiblər. Bu dəfə də eyni hesabla (4:1) qələbə qazanan cüdoçularımız adını yarımfinala yazdırıblar. Qeyd edək ki, ötən il keçirilən analoji turnirdə də Azərbaycan komandası erməni rəqibləri üzərində qələbə qazanmışdı.
Komandamız yarımfinalda Özbəkistan cüdoçularına məğlub olub, idmançılarımız üçüncü yer uğrunda yarışacaq.
Qeyd edək ki, Sərhəd Qoşunları komandasının heyətində Sadıq Məhərrəmov (66 kiloqram), Nadir Babayev (73 kiloqram), Eldar Qasımov, Mehman Sadıqov (hər ikisi 81 kiloqram), Afiq Səfərli, Rövşən Bağırov (hər ikisi 90 kiloqram) və Zaur Bağırov (+100 kiloqram) çıxış edirlər.
Turnir “Polis, Ordu və Digər Güc Strukturları arasında beynəlxalq cüdo turniri” adı ilə tanınır. Hər il Moskvada keçirilən yarış hüquq-mühafizə orqanları arasında idman əlaqələrinin möhkəmləndirilməsini, eləcə də cüdonun bu strukturlarda inkişafı məqsədini daşıyır.
Qeyd edək ki, baş məşqçi Mübariz Cəfərovun rəhbərliyi altında yarışda iştirak edən komandamızın nümayəndəsi Moskvada ölkəmizi təmsil edən Əli Əlibəylidir.
24-05-2025, 19:00
İsrail-Azərbaycan əlaqələrində 4 vacib amil - SƏFİR AÇIQLADI
İsrailin Azərbaycan arasında əlaqələr son illərdə tarixi şəkildə dərinləşib.
Bunu İsrailin Azərbaycandakı səfiri Corc Diik “The Jerusalem Post”a müsahibəsində deyib.
Onun sözlərinə görə, Azərbaycan İsrailin Yaxın Şərqdəki ən etibarlı və strateji tərəfdaşlarından birinə çevrilib.
“Biz bu əlaqələri strateji tərəfdaşlıq kimi dəyərləndiririk. Daxili sorğu aparmışıq və bu sorğu göstərir ki, Azərbaycan ictimaiyyətinin 80 faizindən çoxu İsraili dost ölkə kimi görür. Azərbaycanın bütün ictimaiyyətində İsrail yaxın dost kimi qəbul olunur,” – deyə Dik bildirib.
Səfir 2019-cu ilin noyabrında Bakıya gəlib və artıq beş ildir bu vəzifədə çalışır. “Gəldiyim vaxt mənə deyirdilər ki, bura sabit, mehriban ölkədir. Bu illər ərzində Azərbaycan COVID pandemiyasından, Qarabağ müharibələrindən və regional gərginliklərdən keçdi”, – səfir deyib.
İsrail səfiri qeyd edib ki, bu mürəkkəb dövrdə Azərbaycan regional balansı qoruyaraq həm Rusiya, həm İran, həm də Türkiyə ilə münasibətlərini tənzimləyə bilib. “Azərbaycan təkcə Ermənistanla münasibətləri deyil, həm də şimalda Rusiya, cənubda isə İranla əlaqələrini balanslaşdırmalı olub”, – deyə Dik bildirib.
Corc Dik ikitərəfli münasibətlərin dörd əsas sütuna söykəndiyini qeyd edib:
1. Dostluq və multikulturalizm:
Səfir Azərbaycandakı yəhudi icmasının təhlükəsiz və hörmətli şəraitdə yaşadığını bildirib. “800 ildir burada antisemitizm qeydə alınmayıb. Qarabağ müharibəsində şəhid olmuş yəhudi tank komandiri Albert Aqaronovun Bakıda abidəsi var. Onu "yəhudi şəhid" adlandırırlar”, – Dik vurğulayıb.
2. Enerji əməkdaşlığı:
İsrailə idxal edilən neftin təxminən 30-40 faizi Azərbaycandan gəlir. Bir hissəsi isə Qazaxıstandan Bakı-Tbilisi-Ceyhan boru kəməri ilə nəql olunur.
3. Müdafiə və təhlükəsizlik sahəsində tərəfdaşlıq:
İsrailin müdafiə sənayesi şirkətləri uzun illərdir Azərbaycanda fəaliyyət göstərir. Azərbaycanın İsraildən dron və raket sistemləri aldığı bildirilir. Həmçinin terrorizmlə mübarizə sahəsində əməkdaşlıq da vurğulanıb.
4. Sivil əməkdaşlıq və texnologiya transferi:
Su təchizatı (Mekorot), kənd təsərrüfatı, kibertəhlükəsizlik və kosmos texnologiyaları sahəsində əməkdaşlıq genişlənir. İsrailin Technion universiteti Bakıda kibertəhlükəsizlik mərkəzi açıb. Azərbaycanın dövlət neft şirkəti SOCAR isə İsrailin “Tamar” qaz yatağında iri investisiyalar yatırıb.
Səfir Azərbaycanın yerləşdiyi bölgəni “mürəkkəb qonşuluq” adlandırıb. O qeyd edib ki, Azərbaycan eyni vaxtda Rusiya və İranla sərhədi olan yeganə ölkədir və NATO üçün əhəmiyyətli logistik körpüdür. Dikə görə, Bakı regionda körpü rolunu oynayaraq İsrail-Türkiyə münasibətlərində də vasitəçilik edə bilər.
Corc Dikin diplomatik missiyası başa çatmaq üzrədir. Lakin o, iki ölkə arasında münasibətlərin daha da dərinləşəcəyinə inanır. O, Azərbaycanın COP29 sammitinə ev sahibliyi etməsini və UFC turniri kimi beynəlxalq tədbirləri keçirməsini ölkənin artan beynəlxalq nüfuzunun göstəricisi kimi qiymətləndirib.
“Azərbaycan hamı ilə yaxın, amma heç kimdən asılı olmayan siyasət yürüdür. Bu balans onun uğurudur”, – səfir deyib.
24-05-2025, 18:17
Döyülən direktor işdən çıxarıldı
Goranboy Rayon Mərkəzi Xəstəxanasının direktoru Yahyayev Rauf Ruzvay oğlu işdən çıxarılıb.
Onun vəzifəsi hələlik xəstəxananın baş həkimi Aruz Teymurovaya həvalə edilib.
Bildirilib ki, Rauf Yahyayev öz ərizəsi ilə işdən çıxıb. O bu vəzifəyə 2022-ci ildə təyin edilmişdi.
Qeyd edək ki, Rauf Yəhyayev bir neçə dəfə qalmaqalla gündəmə gəlib. Ötən il onun pasiyenti döyməsi barədə video yayılmışdı, daha sonra sərxoş vəziyyətə toyda mahnı oxuması ilə gündəmə gəlmişdi.
2024-cü ilin fevral ayında isə onun özünün xəstəxanada bir neçə şəxs tərəfindən döyülməsi barədə məlumat yayılıb.
Həmin ilin oktyabr ayında isə barəsində vəzifə saxtakarlığı maddəsi ilə ittiham irəli sürülərək cinayət işi açılmışdı.
24-05-2025, 17:22
Röya Ayaz Salayevi hədələdi: Özünüzə gəlin!
Xalq artisti Röya Ayxan Fransada keçirlən Kann Film Festivalına qatılıb. Qırmızı xalçaya çıxan estrada ifaçısı “I Success Top 100 Awards Gala” tədbirində iştirak edib və orada “Azərbaycan musiqisinin mədəniyyət səfiri” mükafatı ilə təltif olunub. Sosial şəbəkələrdə Röyanın həmin tədbirdən videogörüntüsü paylaşılıb.
Röyanın Kann Festivalına qatılması kinorejissor, kinoşünas və senarist, “Azərbaycanfilm” kinostudiyasının baş redaktoru Ayaz Salayev tərəfindən birmənalı qarşılanmayıb.
Kinorejissor qeyd edib ki, istənilən şəxs həmin festivala qatıla bilər:
“Kim istəsə, qeydiyyatdan keçib, viza alaraq festivala gedə bilər. Çətin bir şey deyil. Mən ora yüz dəfə getmişəm, amma heç ağlıma da gəlməzdi ki, həmin yerdən keçərkən bunu çəkib sosial şəbəkələrdə paylaşım. Bizdə ictimai savadsızlıq çox yayılıb. Bundan əlavə, ictimai şüur da geridə qalıb”.
Röya Ayxanın “Azərbaycan musiqisinin mədəniyyət səfiri” mükafatı ilə təltif olunmasına gəlincə, Ayaz Salayev bildirib ki, bu mükafatın Kann Film Festivalı ilə heç bir əlaqəsi yoxdur.
Müğənni Röya Ayxan Ayaz Salayevə sərt cavab verib. O, bununla bağlı sosial şəbəkə hesabında paylaşım edib.
"Ay qaşqın, deyirlər rəhmətliklər diriliblər yenidən. Enerjiyə gəlmisiniz? Elə bilirsiniz gəlib mənə çatmır? Ayaz Salayev, başlayıram sizdən. Görəndə, salamlaşırsınız hüdüdü... (yamsılayır-red). Özünüzə gəlin! Mən öyrəşmişəm, ölənləri diriltməyə. Amma siz elə ölü qalın. Ay mən olmuşam, mən belə getdim. Bəli, birinci mənəm. Bəli, hər şeyin ən gözəlini layiqli şəkildə edən mənəm. Çünki oxuduğum kimi də ürəyim var. Bildin, hadi ordan!".
24-05-2025, 17:03
2026-2028-ci illərdə Avropa liderləri bu ölkələrdə toplaşacaq - SİYAHI
Növbəti 3 ildə Avropa Siyasi Birliyinin sammitinin hansı ölkələrdə keçirləcəyinə aydınlıq gətirlib.
Bu barədə Avropa İttifaqı Şurasının Prezidenti Antonio Koşta açıqlamasında bildirib. O, 2026–2028-ci illər üçün müəyyən edilmiş ev sahibi ölkələrinin adlarını açıqlayıb.
Avropa Siyasi Birliyinin 2026-cı ildəki sammitləri Ermənistan və İrlandiyada, 2027-ci ildə İsveçrə və Yunanıstanda, 2028-ci ilin birinci yarısında Azərbaycanda, ikinci yarısında da Latviyada keçiriləcək.
Qeyd olunub ki, bu tədbirlər Avropa qitəsində siyasi dialoqun təşviq olunması və əməkdaşlığın genişləndirilməsi baxımından xüsusi əhəmiyyət daşıyır.
Avropa Siyasi Birliyinin ilk zirvə toplantısı 2022-ci ilin oktyabrında Çexiyanın paytaxtı Praqada keçirilib.
24-05-2025, 16:51
Qarabağ və Şərqi Zəngəzur üçün yeni qanun layihəsi olacaq? - Deputatlar danışdı
Qarabağ və Şərqi Zəngəzurda aparılan bərpa və quruculuq işləri postmüharibə dövrünün ən önəmli strateji istiqamətlərindən biridir. Prezident İlham Əliyevin rəhbərliyi ilə bu ərazilərdə genişmiqyaslı infrastruktur layihələri, şəhərsalma işləri və sosial-iqtisadi proqramlar həyata keçirilir. Bu fonda işğaldan azad olunmuş ərazilərdə fəaliyyət göstərən sahibkarlar və müəssisələr üçün vergi güzəştləri və dövlət dəstəyi məsələsi də aktuallaşır. Müzakirələr zamanı bəzi deputatlar mümkün vergi azadolmalarından danışır, bəziləri isə əlavə qanunlara ehtiyac olmadığını vurğulayırlar. Mövcud qanunvericilik çərçivəsində artıq bir sıra təşviq mexanizmləri nəzərdə tutulsa da, ictimai maraq bu məsələlərin daha da dərindən izah edilməsini zəruri edir.
Milli Məclisin Qarabağdan olan deputatı Aqil Abbas bildirib ki, bir müddət Qarabağda və Şərqi Zəngəzurda vergi alınmaya bilər:
“Nə qanun layihəsi qəbul olunacaq ki?! Prezidentin sərəncamı ilə müəyyən quruculuq-tikinti işləri gedir. Qarabağın bütün dağılmış ərazilərində şəhərlər tikilir, kəndlər salınır. Lakin bir müddət vergi alınmaya bilər. Bu cür addımaların atılması mümkündür”.
Füzulinin deputatı Vüqar Bayramov isə söyləyib ki, növbəti mərhələdə ehtiyac yaranarsa, xüsusi olaraq hansısa qanun layihəsi müzakirə oluna bilər:
“Əslində Vergi Məcəlləsində və digər qanunlarda Qarabağ və Şərqi Zəngəzurla bağlı ayrıca fəaliyyətlər nəzərdə tutulub. Çünki İkinci Qarabağ müharibəsindən sonra "işğaldan azad edilmiş ərazilər" anlayışı gündəmə gəlib. Qaydalar, meyarlar qanunvericilikdə əksini tapıb. Ona görə də bu gün Qarabağ və Şərqi Zəngəzurla bağlı istər dövlət təşviq mexanizmi, istər digər alətlər qanunvericilikdə öz əksini tapır. Xüsusən bu ərazilərimzidə 10 illik vergi güzəştləri, təşviq alətləri tətbiq olunur. Amma sözsüz ki, növbəti mərhələdə ayrıca, xüsusi olaraq hansısa qanunun qəbuluna ehtiyac yaranarsa, məsələ müzakirə oluna bilər. Mövcud qanunvericilikdə işğaldan azad olunmuş ərazilərlə bağlı bütün fəaliyyətlər öz əksini tapıb, qanunvericilik bu istiqamətdə dəyişidirlib”.
Cəbrayıl və Qubadlının deputatı Ceyhun Məmmədov isə bunları deyib:
“Hesab edirəm ki, Qarabağ və Şərqi Zəngəzurda ardıcıl, sistemli işlər görülür, tədbirlər həyata keçirilir. Yəni ayrıca qanun qəbuluna zərurət və ehtiyac görmürəm. Belə təşəbbüs haradan gəlir bilmirəm. Bu məsələ qanunla tənzimlənə biləcək məsələ deyil. Hər məsələni qanuniləşdirməyə ehtiyac yoxdur. Cənab Prezident tərəfindən nə lazımdırsa edilir, layihələr uğurla həyata keçirilir, lazımi işlər görülür. Əlavəyə ehtiyac yoxdur. Hesab edirəm ki, biz digər tədbirləri öyrənib diqqətimizi quruculuq-abadlıq işlərinə yönləndirməliyik”.
Parlamentin Xocalıdan olan deputatı Elman Məmmədov da Milli Məclisdə hər hansı ayrıca qanun layihəsinin qəbul edilməsinə ehtiyac görmür:
“Bütün bərpa-quruculuq işləri cənab Prezidentin rəhbərliyi altında müvafiq dövlət proqramı əsasında aparılır. Müvafiq qurumlar burada iştirak edir. Bu məsələlərə rəhbərlik etmək üçün respublika üzrə qərargah yaradılıb. Həmin qərargaha başçılığı da Prezident Administrasiyasnın rəhbəri cənab Samir Nuriyev edir. Təmir-tikinti, bərpa işləri, qayıdışla bağlı nə lazımdırsa, hamısı o proqram üzrə müvafiq qurumlar tərəfindən lazımi qaydada həyata keçirilir. Bütün məsələlər cənab Prezidentin nəzarətindədir. Hamımızın müaşhidə etdiyi kimi, il ərzində həmin ərazilərə saysız-hesabsız səfərlər edilir. Hər hansı ayrı qanun layihəsi qəbul edilməsinə ehtiyac yoxdur.
Milli Məclisdə bu məsələlərlə bağlı deputat həmkarlarımız vaxtaşırı öz fikirlərini bildirirlər”.
24-05-2025, 16:33
Ərdoğan Əhməd əl-Şaraa ilə görüşdü
Türkiyə prezidenti Rəcəb Tayyib Ərdoğan Suriya prezidenti Əhməd əl-Şaraa ilə görüşüb.
Bu barədə Türkiyə KİV-i məlumat yayıb.
Türkiyəyə gələn Suriya nümayəndə heyətinə xarici işlər naziri, müdafiə naziri və kəşfiyyat təşkilatının rəhbəri də daxildir.
Görüş İstanbulda baş tutub.
24-05-2025, 16:10
Cəfər Xəndanın Şah İsmayılla bağlı yazısı üzə çıxdı - Təbrizdə çap olunub
Səfəvişünas alim Elnur Nəciyev görkəmli ədəbiyyatşünas Cəfər Xəndanın Şah İsmayılla bağlı məqaləsini üzə çıxararaq, onu əski əlifbadan latın qrafikalı əlifbaya transliterasiya edib.
Bu məqalə Təbrizdə çıxan “Vətən yolunda” qəzetinin 1945-ci il 2 sentyabr tarixli nömrəsində dərc olunub.
Cəfər Xəndanın məqaləsini ixtisarla oxuculara təqdim edirik:
“Azərbaycan xalqının siyasi-ictimai tarixində görkəmli mövqe tutan dövlət xadimi Şah İsmayıl, eyni zamanda, Xətai təxəllüsü ilə məşhur olmuş bir şairdir. XV qərinənin (əsrin - E.N.) axırları - XVI qərinənin əvvəllərində yaşamış bu böyük sənətkar təxminən 1486-cı miladi ilində (1487 - E.N.) Ərdəbil şəhərində anadan olmuşdur. Şərq tarixində ona Səfəvi dəxi (də - E.N.) deyilir. Çünki o, məşhur sufi Səfiəddin İshaqın nəslindəndir.
Hələ 15 yaşında ikən sərkərdəliyə başlayan Şah İsmayıl Şirvanı, Bakını, Ərdəbili, Naxçıvanı ələ keçirərək, nəhayət 1502-ci miladi ilində (1501 - E.N.) Təbrizə daxil olur və burada özünü Azərbaycan şahı elan edir.
Cəmi 38 il ömür sürən Xətai Azərbaycan ədəbiyyatı və mədəniyyətinə böyük xidmət etmişdir. O, hakimi olduğu sarayda Azərbaycan dilini rəsmi dövlət dili elan edərək, hətta Türkiyə (Osmanlı - E.N.) sultanı Süleymanın məktubuna azərbaycanca cavab vermişdir.
Xətai öz dövrünün Həbibi, Şahi, Sərvəri kimi şair, alim, rəssam və nəqqaşlarını ətrafına - saraya toplamışdı. Onun dövründə saray, eyni zamanda, mədəni bir mərkəzə çevrilmişdi.
Xətainin Azərbaycan dilində dörd böyük əsəri vardır: “Divan-e Dəhnamə”, “Nəsihətnamə”, “Mənaqib əl-əsrar” və “Behcət əl-əhrar”. Xətainin şeirləri əksərən sadə, xalqın anlayacağı bir tərzdə yazılmışdır. Məşhur Azərbaycan alimi və tarixçisi Abbasqulu Ağa Bakıxanov bu sözləri heç də təsadüfi söyləməmişdir: “Xətainin türk dilində yazdığı şeirlər indi də xalqın əzbərində yaşayır”. Milli fəxrimiz olan Şah İsmayıl Xətaini Azərbaycan xalqı hər zaman yad edəcəkdir”.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!