14-06-2025, 12:42
Bazar günü 29 dərəcə isti olacaq
Sabah Bakıda və Abşeron yarımadasında hava şəraitinin dəyişkən buludlu olacağı, əsasən yağmursuz keçəcəyi gözlənilir.
Bu barədə Milli Hidrometeorologiya Xidməti məlumat yayıb.
Mülayim şimal-qərb küləyi səhər saatlarından başlayaraq arabir güclənəcək.
Havanın temperaturu gecə 20-22° isti, gündüz 25-28° isti olacaq. Atmosfer təzyiqi normadan aşağı 755 mm civə sütunu olacaq. Nisbi rütubət gecə 70-75 %, gündüz 60-65 % olacaq.
Azərbaycanın şimal və qərb rayonlarından başlayaraq bəzi yerlərdə arabir yağış yağacağı, şimşək çaxacağı gözlənilir. Ayrı-ayrı yerlərdə leysan xarakterli intensiv və güclü olacağı, dolu düşəcəyi ehtimalı var. Gecə və səhər bəzi dağlıq ərazilərdə arabir duman olacaq. Qərb küləyi ayrı-ayrı yerlərdə arabir güclənəcək.
Havanın temperaturu gecə 18-23° isti, gündüz 29-34° isti, dağlarda gecə 8-13° isti, gündüz 15-18° isti olacaq.
14-06-2025, 12:26
Azərbaycan “Orta Dəhliz”ə mədəniyyətlərarası dialoq kimi yanaşır
Azərbaycan “Orta Dəhliz”ə sadəcə nəqliyyat marşrutu kimi deyil, daha geniş mənada mədəniyyətlərarası dialoqun bir forması kimi baxır.
Bu fikirləri Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Praqa şəhərində keçirilən “GLOBSEC Forum 2025” çərçivəsində təşkil olunmuş “Orta Dəhliz: Yeni Geosiyasi və Geoiqtisadi Həyat Xətti”( The Middle Corridor: A New Geopolitical and Economic Lifeline?) adlı paneldə çıxışı zamanı bildirib.
Hikmət Hacıyev qeyd edib ki, yollar Azərbaycanın qədimdən gələn mədəniyyət və sivilizasiya anlayışının bir hissəsidir və ölkəmiz tarixən İpək Yolunun üzərində yerləşərək bu dialoqun fəal iştirakçısı olub. O vurğulayıb ki, coğrafi mövqe olaraq şərq-qərb və şimal-cənub kəsişməsində yerləşməyimiz vacib olsa da, Azərbaycanın müstəqillik əldə etdikdən sonra bu potensialı reallaşdırmaq üçün praktiki addımlar atması əsas məsələ olub: “Biz quru ilə əhatələnmiş ölkə olaraq bu məhdudiyyəti üstünlüyə çevirməyə çalışmışıq”.
Hikmət Hacıyev bildirib ki, Azərbaycanın bununla bağlı gördüyü işlər bir neçə əsas istiqaməti əhatə edir. İlk olaraq enerji sahəsində Bakı-Tbilisi-Ceyhan və digər boru kəmərləri vasitəsilə Xəzər dənizini Qara və Aralıq dənizləri ilə birləşdirən enerji dəhlizləri yaradılıb. Daha sonra ölkə daxilində avtomobil yolları və magistrallar inşa edilib və bunlar qonşu ölkələrlə də əlaqələndirilib.
O, həmçinin Xəzər dənizinin ayırıcı deyil, birləşdirici faktor kimi dəyərləndirildiyini, Mərkəzi Asiya ölkələri ilə dəniz nəqliyyatı vasitəsilə əməkdaşlıq qurulduğunu bildirib. Bununla yanaşı, hava nəqliyyatı sahəsində “hava İpək yolu” anlayışı formalaşdırılıb, Azərbaycanda hazırda 9 hava limanı fəaliyyət göstərir.
Hikmət Hacıyev çıxışında “rəqəmsal İpək yolu” təşəbbüsündən də danışıb. O bildirib ki, Azərbaycan hazırda qazaxıstanlı tərəfdaşlarla birlikdə Avrasiya qitəsi boyunca, Xəzər dənizi vasitəsilə yüksəksürətli internet bağlantısı qurur. Eyni zamanda, Xəzər dənizi regionunun bərpaolunan enerji potensialının Qara dəniz üzərindən Avropaya daşınması istiqamətində “bərpaolunan enerji dəhlizi” üzərində iş aparıldığını deyib.
“Bütün bu təşəbbüslər Azərbaycanın Şərq-Qərb bağlantısı və ümumilikdə əlaqəlilik konsepsiyasına verdiyi strateji töhfənin tərkib hissəsidir”, – deyə Hikmət Hacıyev vurğulayıb.
14-06-2025, 12:15
Qarabağda 58 şagird məzun oldu
Bu gün respublikamızın hər yerində olduğu kimi Qarabağ bölgəsindəki ümumi təhsil müəssisələrində də “Son zəng” tədbirləri keçirilib.
2024-2025-ci tədris ilində Qarabağ Regional Təhsil İdarəsi üzrə 7 013, işğaldan azad olunmuş ərazilərdə fəaliyyət göstərən ümumi təhsil müəssisələrindən isə 58 şagird məzun olub.
Bu tədris ilində 7 838 şagird birinci sinfi bitirib, ümumi təhsil müəssisələrinin məktəbəhazırlıq qruplarında 6 173 uşaq təhsil alıb.
14-06-2025, 00:58
İrandan atılan 100 raket vuruldu
İran İsrailə doğru ən azı 100 raket atıb, onların əksəriyyəti vurulub və ya hədəfə çatmayıb, lakin bir neçə zərbə də olub.
Bunu İsrail ordusunun sözçüsü Efi Defrin deyib.
"Son bir saatda İrandan İsrailə doğru iki yer-yer raket dalğası olub. Onların əksəriyyəti vurulub, ya da hədəfə çatmayıb. Bəziləri havada vurulduqdan sonra qalıqlarının düşməsi nəticəsində dağıntılara səbəb olub", - deyə o bildirib.
14-06-2025, 00:19
"İran qırmızı xətləri keçdi"
İran İsrailin mülki yaşayış məntəqələrinə raket atmağa cəsarət etməklə qırmızı xətləri keçdi.
Bunu İsrailin müdafiə naziri İsrael Katz deyib.
“Biz İranın öz cinayətkar əməllərinə görə çox yüksək cəzasını ödəməsindən əmin olana qədər İsrail vətəndaşlarını qorumağa davam edəcəyik”, - o bildirib.
Qeyd edək ki, İsrailin baş naziri Benyamin Netanyahu hazırda güc strukturları ilə görüş keçirib.
13-06-2025, 23:40
Natanzda radioloji çirklənmə aşkarlandı
İranın Natanz şəhərindəki nüvə obyektlərində radioloji və kimyəvi çirklənmə aşkar edilib.
Bu barədə Beynəlxalq Atom Enerjisi Agentliyinin rəhbəri Rafael Qrossi bildirib.
O qeyd edib ki, nüvə obyektlərinin tam mühafizəsini və dinc məqsədlər üçün istifadəni davam etdirmək üçün İrana ekspertlər göndərməyə hazırdır. Agentlik rəhbəri bildirib ki, nüvə obyektlərinə heç vaxt hücum edilməməlidir.
Qrossi vəziyyəti qiymətləndirmək və təhlükəsizliyi təmin etmək üçün mümkün qədər tez İrana səfər etməyə hazır olduğunu bildirib.
13-06-2025, 23:26
İsrail qırıcıları vuruldu - Qadın pilot əsir götürüldü
İran İsrailin iki qırıcısını vurub.
Bu barədə İranın “Tasnim” informasiya agentliyi məlumat yayıb.
Bildirilib ki, qırıcılardan birinin qadın pilotu əsir götürülüb.
“Fars” agentliyi bildirir ki, İranın HHM vasitələri bir neçə İsrail hərbi təyyarəsini, o cümlədən iki F-35 qırıcısını vurub.
13-06-2025, 23:17
Türkiyə rəsmiləri İrana görə toplaşdı
İsraillə İran arasında artan gərginlik ilə bağlı Türkiyənin diplomatik və təhlükəsizlik qüvvələrinin rəhbərlərinin birgə iclası keçirilib.
Ölkənin xarici işlər naziri Hakan Fidan, milli müdafiə naziri Yaşar Güler, Silahlı Qüvvələrin Baş qərargah rəisi, ordu generalı Metin Gürak və Milli Kəşfiyyat Təşkilatının rəhbəri İbrahim Kalının iştirakı ilə keçirilən toplantıda iki ölkə arasındakı gərginliyin mümkün nəticələri müzakirə edilib.
Görüşlə bağlı açıqlama verən Hakan Fidan bildirib ki, Türkiyə Prezidenti ilk andan etibarən hadisələri yaxından izləyir və mütəmadi məlumatlandırılır. Ölkənin aidiyyəti qurumları dövlət başçısının tapşırıqları əsasında Türkiyəni maraqlandıra biləcək ehtimal ssenarilərə uyğun olaraq bütün zəruri tədbirləri görür.
Nazir Hakan Fidan daha sonra əlavə edib: “Hadisələrin əvvəlindən bəri İran, İraq, İordaniya və ABŞ kimi bir çox ölkə ilə sıx təmasdayıq. Bölgəmizdə artan gərginliyə imkan verməməliyik. ABŞ Prezidenti Donald Trampın nüvə danışıqlarına dair başladığı prosesin davam etdirilməsi nüvə mübahisəsinin doğurduğu qarşıdurmanın aradan qaldırılması üçün yeganə yoldur. Diplomatiya müharibənin tək alternatividir”
13-06-2025, 23:08
İsrail İranın nüvə obyektini vurdu
İsrail Hərbi Hava Qüvvələri İranın İsfahan şəhərindəki nüvə obyektinə hücum edib.
Bu barədə ordunun mətbuat xidməti məlumat yayıb.
Qeyd olunub ki, bu zərbə nəticəsində orada yerləşən uranın istehsalı və zənginləşdirilməsi obyektləri, laboratoriyalar və digər infrastruktur obyektləri dağıdılıb.
13-06-2025, 22:44
Xamenei xalqa müraciət etdi - Əsas mesajlar
İran ordusu “bütün gücü ilə” İsrailə hücum edəcək və onu “məhv edəcək”.
Bunu İranın ali dini lideri Ayətullah Əli Xamenei xalqa müraciətində deyib.
"İranın silahlı qüvvələri var güclə hərəkət edəcək və alçaq sionist rejimini məhv edəcək. Sionist rejim bu cinayətdən sağ-salamat xilas olmayacaq. İran xalqı əmin ola bilər ki, bu məsələdə heç bir güzəşt olmayacaq", - Xamenei deyib.
Xamenei xalqa müraciətində İsrailin İrana hücumlarını da cinayət kimi qiymətləndirib və yəhudi dövlətinin “acı və dəhşətli taleyi”ni proqnozlaşdırıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!