25-02-2026, 23:08
Prezident: "Bir daha xalqımızın başına belə fəlakətlər gəlməyəcək"
"Dövlət sizin üçün şərait yaradıb. Evlərin bəziləri bərpa edilib, yenidən qurulub. Bu proses davam etdiriləcək. Onminlərlə Azərbaycan vətəndaşı artıq azad edilmiş torpaqlarda yaşayır və onlardan təqribən 30 minə yaxını keçmiş köçkünlərdir. Bildiyiniz kimi, biz əsas bu son 4-5 il ərzində infrastruktur layihələrinə vəsait ayırırdıq. Çünki yaşamaq üçün əsas ilkin şərtlər olmalıdır - elektrik, qaz, su, yollar, körpülər, tunellər. İndi isə daha çox yaşayış evlərinin tikintisi, bərpası məsələlərinə vəsait ayrılacaq. Ona görə "Böyük Qayıdış" prosesi daha sürətlə gedəcək".
Bu sözləri Prezident İlham Əliyev Xocavənd şəhər və Xocavənd kənd sakinləri ilə görüşü zamanı deyib.
"Burada iş yerləri də yaradılır, həm dövlət xətti ilə, həm ictimai təşkilatların xətti ilə və əlbəttə ki, özəl sektor. Burada yaşayan insanların əksəriyyəti vaxtilə kənd təsərrüfatı ilə məşğul idi. Siz yaxşı bilirsiniz ki, bu bölgənin çox gözəl təbiəti var, münbit torpağı var, suyu var, bulaqları var, hər şey var. Əsas odur ki, insanlar artıq burada rahat yaşasınlar və tam əmin olsunlar ki, bir daha xalqımızın başına belə fəlakətlər gəlməyəcək. Bunun üçün də hər zaman güclü olmalıyıq, ayıq olmalıyıq, keçmişi unutmamalıyıq və gələcəyə inamla baxmalıyıq. Necə ki, inamla baxırıq və yaşayırıq. Sizi ürəkdən təbrik edirəm. Sizə cansağlığı arzu edirəm", - deyə dövlətimizin başçısı vurğulayıb.
25-02-2026, 22:52
İlham Əliyev Xocalının Xanabad kəndində - YENİLƏNİB
Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Arzu Əliyeva fevralın 25-də Xocalı rayonunun Xanabad kəndində görülmüş işlərlə tanış olublar.
Xankəndi şəhərində, Ağdərə və Xocalı rayonlarında Prezidentin xüsusi nümayəndəsi Elçin Yusubov dövlətimizin başçısına və birinci xanıma kənddə görülmüş işlər barədə məlumat verib.
Xanabad Xocalı rayonunun eyniadlı inzibati ərazi dairəsinə daxildir. Kənd Silahlı Qüvvələrimizin 2023-cü ildə həyata keçirdikləri antiterror əməliyyatı nəticəsində işğaldan azad edilib.
İşğaldan əvvəl kənddə orta məktəb, mədəniyyət evi, kitabxana və tibb məntəqəsi fəaliyyət göstərib. Burada ölkə əhəmiyyətli XIII əsrə aid kilsə və IX əsrə aid "Aslan qalası" memarlıq abidələri var.
Kənddə ümumilikdə 276 ev var ki, onlardan da 115-i yararsız, 161-i isə qismən yararlıdır. İndiyədək 120 ev təmir olunub. Bu ilin sonunadək daha 41 ev istismara hazır olacaq. Bir neçə gün əvvəl 38 ailə - 154 nəfər kəndə qayıdıb.
Xanabadda bir sıra sosial layihələr icra olunub. Belə ki, mövcud 3 transformator məntəqəsi, elektrik və qaz xətləri bərpa edilib, eyni zamanda, yeni elektrik, qaz və optik xətlər çəkilib, subartezian quyularında və su anbarında təmir işləri aparılıb, 2 yeni su anbarının qurulması işlərinə başlanılıb. Kəndin su təminatı üçün Əsgəran qəsəbəsinin ərazisində nasos stansiyası inşa edilib, kənddaxili yollar bərpa olunub. Kəndin girişində "Xanabad" kompozisiyası quraşdırılıb, Xanabad gölünün sahilində park salınıb, estakada inşa edilib və Dövlət Bayrağı ucaldılıb.
Sonra Prezident İlham Əliyev, birinci xanım Mehriban Əliyeva və qızları Arzu Əliyeva kəndə köçmüş Əmrah Sahiblinin evində oldular.
Prezident İlham Əliyev: Salam.
Qadın sakin: Salam, xoş gördük.
Nümayəndə: Cənab Prezident, kənd buradan görünür elə. Arxasında yardımçı sahələr də var.
Prezident İlham Əliyev: Necə yerləşmisiniz burada?
Sakin: Çox gözəl, Allah Sizdən razı olsun.
Prezident İlham Əliyev: Gəlin, gəlin, uşaqlar. Ev necədir?
Sakin: Çox gözəl, Allah razı olsun.
Prezident İlham Əliyev: Neçə gündür buradasınız, 5 gündür?
Sakin: 5 gün olar.
Prezident İlham Əliyev: Adın nədir?
Uşaq sakin: Duyğu.
Prezident İlham Əliyev: Duyğu? Gəl, gəl, Mehriban xanımla görüş.
Birinci xanım Mehriban Əliyeva: Gəl buraya, görüşək.
Sakin: Xoş gəlmisiniz.
Birinci xanım Mehriban Əliyeva: Harada yaşayırsan, göstər, hanı sənin otağın?
Prezident İlham Əliyev: Şəraitiniz necədir?
Sakin: Salam. Çox yaxşıdır.
Prezident İlham Əliyev: İşin var?
Sakin: Təmin ediblər.
Prezident İlham Əliyev: Gəlin. İşlə təmin etmək üçün təkliflər verərsiniz.
Nümayəndə: Bəli, cənab Prezident İlham Əliyev. Artıq müraciət edib. Sürücü işləyir. Ümumiyyətlə, çalışırıq məşğulluqla bağlı Sizin tapşırığınızı yerinə yetirək.
Prezident İlham Əliyev: Bəli, əlbəttə.
Nümayəndə: Xocalıya köçən əhalinin 4100 nəfərindən 1230 nəfəri daimi işlə təmin olunub. Müəssisələr də çoxdur. Açılışlarında Siz də iştirak edirsiniz.
Prezident İlham Əliyev: Bəli, müəssisələr çoxdur. Məktəb də var. Müəllimlər necədir?
Digər nümayəndə: Biz 110 ailəni köçürəndən sonra müəllim kontingenti buraya yığılacaq. Çünki az əhali ilə aça bilmirik. Novruz bayramına qədər buraya 110 ailəni köçürəcəyik. Evlər hamısı hazırdır.
Prezident İlham Əliyev: Sənin neçə yaşın var?
Kişi sakin: Otuz iki.
Prezident İlham Əliyev: Sən işğaldan sonra anadan olmusan?
Kişi sakin: Bəli.
Prezident İlham Əliyev: Valideynlərin sağdır?
Kişi sakin: Bəli.
Prezident İlham Əliyev: Harada yaşayırlar?
Kişi sakin: Xanabad kəndində.
Prezident İlham Əliyev: Bir daha təbrik edirəm.
Sakin: Çox sağ olun.
Prezident İlham Əliyev: Gedək, bayırda şəkil çəkdirək. Əlini ver.
Sakin: İlham dayıya əlini ver. Afərin.
Prezident İlham Əliyev: Sözəbaxan uşaqdır.
Sakin: Çox yaxşı uşaqdır, çox ağıllı oğlandır.
Prezident İlham Əliyev: Təbrik edirəm.
Sakin: Çox sağ olun.
Uşaq sakin: Mən Sizi televizorda görəndə çox sevinirəm.
Prezident İlham Əliyev: Sağ olun.
Sakin: Sağ olun.
16:31
Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Arzu Əliyeva fevralın 25-də Xocalı rayonunun Xanabad kəndində görülmüş işlərlə tanış olublar.
Bu barədə Prezidentin Mətbuat Xidməti məlumat yayıb.
25-02-2026, 22:04
Əraqçi: İran nüvə proqramında hərbi yol yoxdur
İranın xarici işlər naziri Abbas Əraqçi bildirib ki, ölkənin dinc nüvə proqramı ilə bağlı hərbi həll mövcud deyil.
Əraqçi bu açıqlamanı ABŞ-la Cenevrədə keçiriləcək üçüncü danışıqlar raundu ərəfəsində "India Today" telekanalına müsahibəsində verib.
Nazir qeyd edib ki, Tehran hər hansı narahatlıq və suallara cavab verməyə hazırdır, lakin dinc məqsədli nüvə texnologiyalarından istifadə hüququndan imtina etməyəcək.
Əraqçi əlavə edib: “Bu dəfə daha ehtiyatlıyıq və müəyyən narahatlıqlarımız var. Amma ABŞ tərəfi ciddi şəkildə həll yolu tapmaq niyyətindədirsə, razılaşma mümkündür”.
25-02-2026, 21:20
OpenAI ChatGPT-nin sui-istifadəsini açıqladı
OpenAI yeni hesabatında ChatGPT texnologiyasının sui-istifadə hallarını açıqlayıb.
Şirkət Çin hüquq-mühafizə orqanları ilə əlaqəli, romantik fırıldaqçılıq və təsir əməliyyatları aparan hesabları, o cümlədən Yaponiyanın ilk qadın baş naziri Sənə Takaichi əleyhinə gizli kampaniyaları dayandırdıqlarını deyib.
Hesabata görə, bəzi hesablar ChatGPT-dən və digər alətlərdən istifadə edərək saxta tanışlıq agentliyi, vəkillik firmaları və ABŞ rəsmiləri adı altında kiberfırıldaqlar həyata keçirib.
OpenAI, xüsusilə İndoneziyalı kişiləri hədəf alan saxta tanışlıq fırıldaqlarında yüzlərlə insanın zərər gördüyünü, eləcə də bəzi hesabların real vəkilləri və hüquq-mühafizə orqanlarını təqlid etdiyini bildirib.
Qeyd olunur ki, bu sui-istifadələr reklam və saxta mətnlər hazırlamaq üçün ChatGPT-dən istifadə olunub.
25-02-2026, 19:27
Xocalı həqiqətləri və
tarixi zəfər
26 Fevral – Xocalı soyqırımı günü Azərbaycan xalqının yaddaşına qanla yazılmış ən ağır tarixlərdən biridir. Bu gün təkcə bir şəhərin deyil, bütövlükdə xalqımızın taleyinə vurulmuş dərin yaradır. 1992-ci ilin fevralın 25-dən 26-na keçən gecə baş verən Xocalı soyqırımı insanlığa qarşı törədilmiş ən ağır cinayətlərdən biri kimi tarixə düşüb.
Ümummilli Lider Heydər Əliyev Xocalı faciəsini “bütün bəşəriyyətə qarşı tarixi cinayət” adlandıraraq bu qətliamın hüquqi-siyasi qiymətinin verilməsinin əsasını qoydu. Onun təşəbbüsü ilə 1994-cü il fevralın 24-də Milli Məclis “Xocalı soyqırımı günü haqqında” qərar qəbul etdi və 26 fevral faciə qurbanlarının anım günü elan olundu. 1997-ci il 25 fevral tarixli sərəncama əsasən isə hər il saat 17:00-da ölkə ərazisində bir dəqiqəlik sükut elan edilir.
Faciə gecəsi Ermənistan silahlı qüvvələri keçmiş sovet ordusunun 366-cı alayının iştirakı ilə şəhərə hücum etdi. Rəsmi məlumatlara görə, 613 nəfər qətlə yetirildi. Onlardan 63-ü uşaq, 106-sı qadın, 70-i isə ahıl idi. 8 ailə tamamilə məhv edildi, yüzlərlə insan yaralandı, 1275 nəfər əsir götürüldü, 150 nəfərin taleyi isə bu günədək məlum deyil. Qətlə yetirilənlərin bir qismi xüsusi qəddarlıqla öldürüldü. Xocalı şəhəri yerlə-yeksan edildi, tarixi və mədəni abidələr dağıdıldı.
Bu hadisə beynəlxalq hüquqa görə soyqırımı cinayətinin bütün elementlərini özündə ehtiva edir. “Soyqırımı cinayətinin qarşısının alınması və ona görə cəzalar haqqında” 1948-ci il Konvensiyasına uyğun olaraq milli və etnik qrupa qarşı qəsdən məhvetmə niyyəti ilə törədilən əməllər Xocalıda açıq şəkildə müşahidə olunub.
Bu gün Xocalı soyqırımı bir sıra ölkələrin parlamentləri tərəfindən tanınıb. 2012-ci ildə İslam Əməkdaşlıq Təşkilatı Xarici İşlər Nazirləri Şurasının sessiyasında Xocalıda törədilmiş cinayətlər soyqırımı kimi qiymətləndirilib. 2008-ci ildən etibarən Heydər Əliyev Fondunun vitse-prezidenti Leyla Əliyevanın təşəbbüsü ilə “Xocalıya ədalət” beynəlxalq maarifləndirmə kampaniyası həyata keçirilir və dünya ictimaiyyətinin məlumatlandırılması istiqamətində mühüm işlər görülür.
Şəhid ailəsi olaraq bildiririk ki, Xocalı bizim üçün sadəcə tarix deyil – itirilmiş övlad, ata, ana, bacı, qardaş deməkdir. Bu faciə hər birimizin yaddaşında sağalmayan yaradır. Lakin illər sonra 2020-ci ildə Müzəffər Ali Baş Komandan, Azərbaycan Respublikasının Prezidenti İlham Əliyevin rəhbərliyi ilə 44 günlük Vətən müharibəsində torpaqlarımızın azad olunması və 2023-cü ilin sentyabrında Xocalının separatçılardan təmizlənməsi şəhidlərimizin qanının yerdə qalmadığını göstərdi. 2023-cü il oktyabrın 15-də Xocalı şəhərində Azərbaycan Bayrağının ucaldılması hər bir şəhid ailəsi üçün həm qürur, həm də təsəlli oldu.
2025-ci il fevralın 25-də Prezident tərəfindən Xocalı şəhərində Xocalı Soyqırımı Memorial Kompleksinin yaradılması haqqında sərəncam imzalandı. Bu kompleks gələcək nəsillərə həqiqətlərin çatdırılması, faciə qurbanlarının xatirəsinin əbədiləşdirilməsi baxımından mühüm əhəmiyyət daşıyır.
Bu gün Xocalı şəhəri və kəndlərinə mərhələli şəkildə köç prosesi davam edir. Artıq yüzlərlə ailə doğma yurduna qayıdıb, həyat yenidən canlanır. Bu qayıdış həm də tarixi ədalətin təntənəsidir.
Biz - Xocalıdan olan şəhid ailələri bir daha bəyan edirik ki, 26 Fevral yalnız matəm günü deyil, həm də yaddaş günüdür. Şəhidlərimizin ruhu qarşısında baş əyir, onların xatirəsini qəlbimizdə əbədi yaşadacağıq. Xocalı faciəsi unudulmayacaq.
Brilyant Hacıyeva,
Abşeron rayonunda məskunlaşmış Xocalıdan olan şəhid ailəsi
25-02-2026, 19:12
Bakı metropoliteni gücləndirilmiş iş rejimində fəaliyyət göstərəcək
Xocalı soyqırımının 34-cü ildönümü ilə əlaqədar "Bakı Metropoliteni" QSC gücləndirilmiş iş rejimində fəaliyyət göstərəcək.
Bu barədə səhmdar cəmiyyətindən məlumat verilib.
Bildirilib ki, "Ana harayı" abidəsinin yaxınlığında yerləşən "Xətai", eləcə də "Cəfər Cabbarlı" və "28 May" stansiyalarında nəzarət tədbirləri artırılacaq.
Stansiyalara əlavə işçi qüvvəsi cəlb ediləcək, ehtiyat qatarlar hazır vəziyyətdə saxlanılacaq. Qatarların hərəkəti gün ərzində payız-qış mövsümünün iş günü qrafikinə uyğun təşkil olunacaq.
25-02-2026, 19:00
Vaşinqtondan Azərbaycanla bağlı VACİB MESAJ
Donald Tramp administrasiyası əvvəlki hakimiyyətlərdən fərqli olaraq Mərkəzi Asiya və Cənubi Qafqaz ölkələri ilə münasibətlərə daha çox diqqət ayırır.
Bu barədə ABŞ Dövlət katibinin iqtisadi məsələlər üzrə müavini Yakob Helberq Konqresdə keçirilən dinləmələrdə bildirib.
Onun sözlərinə görə, Vaşinqton tarixi olaraq diqqətdən kənarda qalan ölkələrlə fəal əməkdaşlıq xətti götürüb. Bu yanaşmanın nəticəsi kimi Azərbaycan, Qazaxıstan Ermənistan ilə ikitərəfli sazişlərin imzalandığı vurğulanıb.
Helberq çıxışını ABŞ Konqresinin Nümayəndələr Palatasının Xarici Əlaqələr Komitəsində “Kommersiya diplomatiyası vasitəsilə milli təhlükəsizliyin təşviqi” mövzusunda keçirilən dinləmələr zamanı səsləndirib. O qeyd edib ki, yeni administrasiya iqtisadi əməkdaşlıq alətlərini milli təhlükəsizlik strategiyasının mühüm elementi kimi qiymətləndirir.
25-02-2026, 18:46
Xameneinin iqamətgahı yaxınlığında atışma - ÖLƏNLƏR VAR
Tehranda İranın ali rəhbəri Ayətullah Əli Xameneinin qərargahı yaxınlığında silahlı toqquşma baş verib.
Bu barədə yerli teleqram kanalları məlumat yayıb.
Məlumata görə, toqquşmalar zamanı İran İnqilab Keşikçiləri Korpusu (SEPAH) ilə marksist “Mücəhidin-e Xalq” (MEK) təşkilatının üzvləri arasında qarşıdurma yaranıb. MEK-in açıqlamasında azı 100 nəfərin öldürüldüyü və ya saxlanıldığı iddia olunur. Təşkilat həmçinin 150-dən çox üzvünün bazalarına qayıtdığını iddia edib.
Hadisənin əsasən Tehrandakı Mötəhərrı kompleksi ərazisində, ali rəhbərin qərargahı, Mühafizəçilər Şurası, Ekspertlər Assambleyası və digər strateji qurumların yerləşdiyi zonada baş verdiyi qeyd olunur. SEPAH-a yaxın “Tasnim” agentliyi və “Al Akhbar” nəşri də toqquşmaları təsdiqləyib. “Al Akhbar” hadisəni MEK-in “xarici xüsusi xidmət orqanlarının dəstəyi ilə həyata keçirməyə çalışdığı əməliyyat” kimi qiymətləndirib və planın ilkin mərhələdə qarşısının alındığını yazıb.
Qeyd edək ki, “Mücəhidin-e Xalq” təşkilatı İran hakimiyyəti tərəfindən terror təşkilatı kimi tanınır. Qrup 1980-ci illərdə İran-İraq müharibəsi zamanı Səddam Hüseyni dəstəkləyib. ABŞ və Avropa İttifaqı isə sonradan təşkilatı terror siyahısından çıxarıb.
25-02-2026, 18:45
Trampdan İrana hücum siqnalı
ABŞ Prezidenti Donald Tramp Konqresdə etdiyi “Ölkənin vəziyyəti” çıxışı zamanı İrana qarşı mümkün hərbi əməliyyat ehtimalını əsaslandırmağa çalışıb. O bildirib ki, ABŞ “dünyanın ən böyük terror sponsoru”nun nüvə silahına sahib olmasına imkan verməyəcək.
Tramp çıxışında Tehranın silahlı qruplara dəstək verməsini, etirazçıların öldürülməsini, həmçinin raket və nüvə proqramlarını region və ABŞ üçün təhdid kimi qiymətləndirib.
O, İranı nüvə proqramını yenidən aktivləşdirməkdə və yaxın zamanda ABŞ-a çata biləcək raketlər hazırlamaqda ittiham edib.
ABŞ lideri İranla nüvə proqramı üzrə razılaşmanın əldə olunmamasından narazılığını ifadə edib və rəsmi Tehranın nüvə silahı əldə etməyəcəyinə dair açıq öhdəlik vermədiyini vurğulayıb.
İran isə nüvə tədqiqatlarının yalnız mülki enerji məqsədləri daşıdığını bildirir.
Qeyd edək ki, Trampın çıxışı fonunda Yaxın Şərqdə ABŞ hərbi qüvvələrinin artırılması diqqət çəkir və mümkün qarşıdurma ehtimalı müzakirə olunur.
25-02-2026, 18:22
Toliklə Elgizin verilişinin bağlanması təklifinə RƏSMİ REAKSİYA
Son günlər Audiovizual Şuranın rəsmi veb-saytı, elektron poçtu və digər əlaqə vasitələri ilə vətəndaşlardan, eyni zamanda media nümayəndələrindən şikayət və sorğular daxil olur. Həmin müraciətlərin mövzusu bir sıra televiziya proqramları ("Tarixin bir günü", "Elgizlə izlə" və sairə), onların aparıcıları və ora dəvət olunan qonaqların tənqid olunması ilə bağlıdır. Bəzi müraciətlərdə həmin televiziya proqramlarının və ya ümumən kanalların bağlanması tələb olunur.
Bu barədə Şuradan bildirilib.
Açıqlamada bildirilir ki, Audiovizual Şura audiovizual media sahəsində tənzimləməni həyata keçirən dövlət orqanıdır. Audiovizual Şuranın fəaliyyəti və ümumiyyətlə, audiovizual media sahəsinin tənzimlənməsi "Media haqqında" Azərbaycan Respublikası Qanunu və digər müvafiq qanunlar əsasında aparılır. "Media haqqında" Qanunun 5.4-cü maddəsində təsbit olunmuşdur ki, media sahəsində fəaliyyət yaradıcılıq və redaksiya müstəqilliyi əsasında həyata keçirilir.
"Qeyd olunanlara əsasən bildiririk ki, hər hansı bir proqramın fəaliyyətə başlaması və ya bağlanması, habelə hər hansı bir aparıcının və ya redaksiya əməkdaşının işə götürülməsi və ya işdən çıxarılması, dəvət olunan qonaqların, müzakirə olunan mövzuların müəyyən edilməsi sırf redaksiya siyasəti çərçivəsinə daxil olub Audiovizual Şuranın səlahiyyətlərinə aid deyildir. Audiovizual Şura hər hansı bir kanala (redaksiyaya) qarşı sanksiya və ya inzibati tənbeh tədbiri tətbiq edərkən "Media haqqında" Qanuna və bu sahəni tənzimləyən digər qanunlara əsaslanaraq qərar qəbul edir. Buna görə də, müraciətlərdə bəzi vətəndaşlar tərəfindən istənilən kimi hər hansı proqramın bağlanmasını və ya aparıcının efirdən uzaqlaşdırılmasını Audiovizual Şura yerinə yetirə bilməz.
Bununla bərabər qeyd olunmalıdır ki, Audiovizual Şura mütəmadi olaraq yayımçıların rəhbərləri ilə, redaksiya üzrə məsul şəxsləri ilə müxtəlif formatlarda görüşlər keçirir. Görüşlərdə televiziya kanalları ilə bağlı ictimaiyyətin haqlı narazılığına səbəb olan məsələlərə dair Audiovizual Şuranın səlahiyyətləri çərçivəsində zəruri tövsiyələrin verilməsi təmin olunur.
Bir daha audiovizual yayımçılardan qanunvericiliyin tələblərinə ciddi əməl etmələri, peşə etikası qaydaları çərçivəsində fəaliyyət göstərmələrinin təmin etmələri tələb olunur", - açıqlamada qeyd olunub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!