Avropa İttifaqı ölkələri arasında Əfqanıstan qaçqınlarının qəbuluna dair konsensus mövcud deyil.

Hazırda Avropa İttifaqı Şurasına sədrlik edən Sloveniyanın Baş naziri Yanez Yanşa bu barədə öz “Twitter“ hesabında paylaşma edib. O qeyd edib ki, Aİ Əfqanıstan üçün Avropaya miqrasiya korridoru açmayacaq: “Biz 2015-ci ildə yol verilmiş strateji səhvin təkrar olunmasına icazə verməyəcəyik. Biz yalnız NATO əməliyyatları dövründə bizə kömək etmiş şəxslərə və eləcə də Avropa İttifaqının xarici sərhədlərini qoruyan ölkələrə tam şəkildə mühafizə üçün kömək etməliyik.”

Baş nazir mətbuata verdiyi açıqlamasında həmçinin bildirib ki, Aİ ölkələri yeni miqrasiya dalğasını istəyib-istəmədiklərinə dair qərar verməlidirlər. Hazırda isə Aİ Şurasında bu barədə nəinki konsensus, heç sadə səs çoxluğu da mövcud deyil.

Sloven siyasətçinin açıqlaması Avropada mühafizəkarlar tərəfindən rəğbətlə qarşılansa da, bu fikrə qarşı çıxanlar da az deyil. Avropa Parlamentinin Sədri David Sassoli bildirib ki, Avropa İttifaqının mühüm beynəlxalq məsələlərdə hansı mövqe tutacağı hazırki Aİ Şurasının sədrinin vəzifə səlahiyyətlərinə daxil deyil. Onun sözlərinə görə, Avropa Parlamenti də daxil olmaqla bütün Avropa qurumları təkcə əməkdaşlıq etmiş əfqanlarla münasibətdə deyil, eləcə də özünü təhlükədə hiss edən bütün insanlara qarşı həmrəyliyin bütün elementlərini tətbiq etməyə çalışırlar.