Oktyabrın 1-də Yaponiyada koronavirus pandemiyasına görə tətbiq edilən fövqəladə vəziyyət rejimi ləğv olunub. Bununla yanaşı, bütün ölkə ərazisində koronavirusa qarşı gücləndirilmiş tədbirlər də aradan qaldırılıb.

Bu barədə Yaponiyanın Baş naziri Yoşihide Suqa bir gün əvvəl keçirdiyi mətbuat konfransında bəyan edib.

Qeyd edək ki, Yaponiyada fövqəladə vəziyyət rejimi yayın əvvəllərində qüvvəyə minib və sentyabrdan bu rejim ölkənin 19 prefekturasına tətbiq edilirdi. Buraya paytaxt Tokio da daxil olmaqla qonşuluqda yerləşən Kanaqava, Saytama, Çiba və ölkənin qərbindəki Osaka, Kioto, şimalda Hokkaydo və cənubda Okinava prefekturaları daxil edilmişdi. Kaqoşima, Kumamoto və Fukuşima prefekturalarında isə qismən yumşaq məhdudiyyət tədbirləri tətbiq olunurdu.

İyulun sonları avqustun əvvəllərində, Tokioda Olimpiya Oyunları təşkil edilən zaman ölkədə yoluxma halında böyük sıçrayış baş verib. Paytaxtda hər gün yoluxma sayında antirekordlar qeydə alınırdı. Lakin son həftələr ərzində vəziyyət xeyli yaxşılaşıb. Belə ki, sentyabrın 30-da ölkə üzrə cəmi 1500 yeni yoluxma halı qeydə alınıb, 42 nəfər həyatını itirib. Həmçinin bildirilir ki, pandemiyanın davam etdiyi bütün dövr ərzində Yaponiyada 1,7 milyon yoluxma qeydə alınıb, 17,6 min nəfər isə həyatını itirib.

Hökumətin yaydığı məlumata görə, ölkə üzrə virusa qarşı vaksinasiya olunanların ümumi sayı 75 milyon nəfərə çatıb və bu ölkə əhalisinin 59,3 faizi deməkdir. Ümumilikdə ölkə üzrə 88,6 milyon nəfər isə (70 faiz) vaksinin bir dozasını qəbul edib.

Yaponiya hökuməti noyabrda vaksinasiya olunmaq istəyənlərin hamısının peyvəndin hər iki dozasını qəbul etməsini planlaşdırır.