Sentyabrın 1-də Yaponiyanın Baş naziri Yoşihide Suqa jurnalistlərə deyib ki, hazırkı şəraitdə parlamentin aşağı palatasının buraxılması mümkün deyil.

Ölkədə mövcud vəziyyəti şərh edən Y.Suqa deyib: “Bizim əsas vəzifəmiz koronavirusa qarşı mübarizədir və indiki şərait aşağı palatanın buraxılmasına imkan vermir”. Baş nazir, həmçinin bildirib ki, o, hakim Liberal Demokratik Partiyanın (LDP) sədrinin seçkilərini də daha sonraya saxlamaq niyyətindədir.

Xəbər verdiyimiz ki, LDP sədrinin seçkiləri sentyabrın 29-a təyin edilib. Aşağı palatanın deputatlarının səlahiyyətləri isə oktyabrın 21-də başa çatır. Bununla yanaşı, qeyd edək ki, Yaponiyada parlament vaxtından əvvəl buraxılmadan deputatların səlahiyyətlərinin başa çatması ilə əlaqədar son seçkilər 1976-cı ildə keçirilib.

Əgər LDP-nin daxili seçkilərində Y.Suqa yenidən partiyanın lideri seçilməzsə, bu zaman onun səlahiyyətləri sələfinə keçəcək. Həmin şəxs yeni kabineti formalaşdıracaq. Lakin onun bunu oktyabrın 5-dək, aşağı palataya seçki kampaniyası başlayanadək başa çatdırması mümkün deyil.

Qeyd edək ki, hazırda LDP və onun koalisiya tərəfdaşı olan “Komeyto” partiyası aşağı palatada sabit üstünlüyə malikdir. Yəni palatadakı 465 yerdən 305-i bu partiyaların əlindədir.

Bununla yanaşı, aparılmış son sosial sorğuların nəticələrinə görə, əhalinin vaksinasiyanın sürətindən və koronavirusa qarşı tədbirlərdən narazılığı nəticəsində hökumətin reytinqi 30 faizdən aşağı düşüb.