Türkiyə baş naziri Rəcəb Tayyib Ərdoğan telekanalların birində canlı efirdə ağlayıb. ANS PRESS-in “Haberler.com” saytına istinadən verdiyi məlumata görə, “Ülke” TV-də birbaşa yayım zamanı, proqramda “Müsəlman qardaşları” təşkilatının liderlərindən olan Məhəmməd əl Biltecinin Misirdəki olaylar zamanı ölən qızı Əsma üçün yazdığı vida məktubu səsləndirilib. Rəcəb Tayyib Ərdoğan yayımlanan verilişdə Əsma üçün yazılan məktubu göz yaşları içərisində dinləyib.

Məktubda isə ən təsiredici məqamlardan biri dinləyən hər kəsi, o cümlədən baş naziri qəhərə boğub.

“Səni şəhid olmadan iki gün əvvəl yuxumda gördüm. Ağ gəlinlik paltarında idin. Üzün nur saçırdı və gözəlliyinin tayı-bərabəri yox idi. Gəlinlik paltarında səssizcə gəlib yanımda oturdun. “Bu gecə ərə gedirsənmi?”, - deyə soruşdum. “Toyum axşam deyil, günorta olacaq” , - deyə cavab verdin. 2 gün sonra günorta vaxtı şəhid olduğunu eşitdim. Yuxuda mənə nə dediyini indi anladım. Allaha səni hüzuruna şəhid kimi qəbul etməsi üçün yalvarıram. Sən necə xoşbəxtsən ki, şəhidlik zirvəsi sənə qismət oldu. Sən bizə dərs keçdin.

Ruhun şad olsun sevimli qızım və dəyərli müəllimim”.