Şoyqu İran Təhlükəsizlik Şurasının katibiylə danışıqlar apardı

Tehranda səfərdə olan Rusiyanın müdafiə naziri Sergey Şoyqu çərşənbə günü İranın Ali Milli Təhlükəsizlik Şurasının katibi Əli Əkbər Əhmədianla görüşərək iki ölkə arasında əməkdaşlığın genişləndirilməsi ilə bağlı danışıqlar aparıb.
Görüş zamanı tərəflər ikitərəfli, regional və beynəlxalq məsələləri, xüsusilə də Qafqaz regionunda baş verənləri müzakirə ediblər.
Tehran və Moskva arasında hərtərəfli əlaqələrin genişləndirilməsini və mütəşəkkil terrorizmlə qəti mübarizəni vurğulayan Əhmədian və Şoyqu regiondan kənar ölkələrin bu işə qarışmasını regionda təhlükəsizlik və qeyri-sabitliyə ən böyük maneə adlandırıblar.
Tərəflər həmçinin kollektiv təhlükəsizliyə nail olmaq üçün regional əməkdaşlığın genişləndirilməsini xarici müdaxilələrə son qoymağın təsirli yollarından biri kimi qiymətləndiriblər.
Yüksək rütbəli hərbi nümayəndə heyətinə başçılıq edən Şoyqu çərşənbə axşamı İran Silahlı Qüvvələrinin Baş Qərargah rəisi general-mayor Məhəmməd Baqirinin rəsmi dəvəti ilə Tehrana səfər edib.
Görüşdən sonra Baqeri bildirib ki, Tehran və Moskva yaxın vaxtlarda uzunmüddətli hərbi əməkdaşlıq sazişinin hazırlanması üzərində işləyirlər.
Çərşənbə günü səhər Şoyqu iranlı həmkarı briqada generalı Məhəmməd Rza Aştiani ilə görüşündə deyib ki, Qərbin hər iki ölkəni hədəf alan təzyiq kampaniyasına zidd olaraq İranla münasibətlər “yeni zirvələrə çatır”.
Nazir vurğulayıb ki, Rusiya və İran ABŞ və onun Qərb müttəfiqlərinin müqavimətinə baxmayaraq, planlı fəaliyyətlər həyata keçirməkdə qərarlıdır.