Pezeşkian qonşulardan danışdı: Bunu Azərbaycanla da edə bilərik!

İran prezidenti Məsud Pazeşkian yaxın vaxtlarda Türkiyəyə səfər edəcəyini bəyan edərək, Türkiyənin dost və qardaş ölkə olduğunu bildirib.
Məsud Pazeşkian bu barədə sentyabrın 16-da Tehranda keçirdiyi mətbuat konfransında danışıb.
Pezeşkiyan yerli və xarici jurnalistlərin suallarını cavablandırıb.
''İslami birlik həftəsi çərçivəsində ilk mətbuat konfransımızı keçiririk. Düşünürəm ki, ölkədə yaşayan hər kəsin istedadı nəzərə alınmalı və etnik qrupundan, irqindən asılı olmayaraq layiq olduğu vəzifə verilməlidir. Bizim planlarımız da birliyə əsaslanır. Əlbəttə, bu çox çətin işdir”, - Pezeşkian deyib.
Prezident İranla müsəlman qonşuları arasındakı sərhədlərin aradan qaldırılması təklifinə toxunaraq bildirib:
“Bu ideya milli təhlükəsizlik və sərhədlərə məhəl qoymamaq demək deyil, ancaq səyahəti asanlaşdırır, konsensusu gücləndirir, ümumi bazarların yaradılmasına gətirib çıxarır. Müsəlmanların hüquqlarını müdafiə etmək üçün birləşməliyik. Müharibə və həddindən artıq ambisiyaları bir kənara qoysaq, bir yerdə ola bilərik və bütün müsəlmanlar bir cəmiyyətdə ola bilər”.
Xarici diplomatiyada prioritet olaraq qonşu dövlətlərlə əlaqələrin gücləndirilməsini vacib sayan Pezeşkian deyib:
“Bu çərçivədə İraqa səfər etdik və birgə layihələr həyata keçirmək qərarına gəldik. Eyni əməkdaşlığı Pakistan, Azərbaycan, Türkiyə və digər qonşu ölkələrlə də edə bilərik. İqtisadi inkişafın şərti azad bazar yaratmaq və xarici ticarəti inkişaf etdirməkdir.
Xarici diplomatiyamız şərəf, ləyaqət və maraq üzərində qurulacaq və biz bu yolla davam edəcəyik”.
Pezeşkian İran-Çin münasibətlərindən də danışıb: “Çinlə çox yaxşı münasibətlərimiz var. Ona görə də xarici ticarətin böyük hissəsi Çin, Rusiya və qonşu ölkələrlə aparılır”.
Pezeşkiyan İranın Yəmən qruplarına hipersəs ballistik raketlər verməsi ilə bağlı iddiaları təkzib edib və deyib:
''İranın hipersəs ballistik raketi var. Biz kosmosa peyklər göndəririk. Biz yəmənlilərə raket verməmişik, onlarda olan raketlər bizdə yoxdur. Yəmənlilərin raket texnologiyası var, onlar müharibədən əvvəl raket istehsal etməyi öyrəniblər və istehsal edirlər. Bizim Yəmənlə münasibətlərimiz, eyni baxışımız var, çünki biz İsrailin Fələstin xalqını məhv etməsini istəmirik”.