Tramp İstanbul danışıqlarına onları göndərir

ABŞ prezidenti Donald Trampın xüsusi nümayəndələri Stiv Vitkoff və Keyt Kelloq mayın 15-də Rusiya-Ukrayna danışıqlarının keçiriləcəyi İstanbula səfər edəcək.
Bu barədə üç mənbəyə istinadən Reuters agentliyi məlumat yayıb.
Agentlik başqa heç bir təfərrüat açıqlamayıb.
Bir gün əvvəl Donald Tramp Rusiya-Ukrayna danışıqları üçün mayın 15-də İstanbula gələ biləcəyini etiraf etmişdi.
"Mən uçmağı düşünürdüm. Cümə axşamı harda olacağımı bilmirəm. Çoxlu görüşlərim var, amma əslində ora uçmağı düşünürdüm", - ABŞ prezidenti deyib.
Mayın 11-də Ukrayna prezidenti Vladimir Zelenski İstanbulda danışıqlar üçün Rusiya prezidenti Vladimir Putinlə görüşməyə hazır olduğunu bildirib. Kreml hələlik Putinin İstanbula gəlib-gəlməyəcəyini açıqlamayıb. Bu danışıqlarda Moskvanı konkret kimin təmsil edəcəyi ilə bağlı suala prezidentin mətbuat katibi Dmitri Peskov belə cavab verib: “Prezident lazım bildiyi kimi, biz bunu elan edəcəyik”.
O əlavə edib ki, “Rusiya tərəfi cümə axşamı baş tutması planlaşdırılan danışıqlara hazırlaşmağa davam edir”.
Son məlumata görə, Rusiyadan İstanbula xarici işlər naziri Sergey Lavrov və prezidentin köməkçisi Yuri Uşakovun gedəcəyi gözlənilir.