“Azərbaycanla delimitasiya məsələləri üzərində işləyirik” - Mirzoyan

Türkiyə ilə münasibətlərin normallaşdırılması baxımından əhəmiyyətli nəticələrin şahidi olmağın vaxtı çatıb.
Bunu sentyabrın 10-da hökumət saatında Ermənistan Xarici İşlər Nazirliyinin rəhbəri Ararat Mirzoyan deyib.
“Biz kommunikasiyaların açılması üzərində işləyirik, güman edirik ki, Ermənistanın dəmir yolu və digər infrastrukturu baxımından hadisələri anlamaq üçün amerikalılarla əlaqə güclənəcək.
Daha əvvəl də qeyd etdiyimiz kimi, dərc olunanlardan başqa heç nə ilə bağlı razılığa gəlməmişik. Bir çox texniki məsələlərlə bağlı danışıqlara ehtiyac var. Kommunikasiyaların blokdan çıxarılmasına nail olmaq bizim maraqlarımıza uyğundur. İnsanlar davamlı olaraq Azərbaycandan Naxçıvana keçiddən danışırlar, lakin Ermənistan eyni dərəcədə və eyni şərtlərlə blokdan çıxarılacaq.
Məhz Ermənistan 30 il ərzində hər iki tərəfdən blokadada olub, ona görə də biz ABŞ prezidenti Trampın iştirakı ilə razılaşdırılmış və imzalanmış sənədlər çərçivəsində blokun tezliklə açılmasına nail olmaq üçün hər şeyi edəcəyik.
Biz həmçinin Azərbaycanla blokun açılması, o cümlədən delimitasiya və demarkasiya məsələləri üzərində işləyirik”, - Mirzoyan qeyd edib.