Sankt-Peterburq metrosunda baş vermiş partlayış zamanı zərərçəkənlər arasında Azərbaycan vətəndaşları yoxdur. Butov.az xəbər verir ki, bu barədə AZƏRTAC-ın müxbirinə Azərbaycanın Sankt-Peterburqdakı baş konsulu Sultan Qasımov məlumat verib. Konsulluğun şəhərin rəsmi orqanları ilə əlaqə saxladığını bildirən baş konsul deyib: “Metroda partlayış zamanı zərərçəkənlər arasında Azərbaycan vətəndaşları barədə məlumat hələlik yoxdur”.

Rusiyanın Milli Antiterror Komitəsindən (MAK) bildiriblər ki, Sankt-Peterburq metrosunun “Sennaya ploşad” və “Texnoloqiçeskiy institut” stansiyaları arasındakı məsafədə bir partlayış olub. Son məlumatlara görə, fövqəladə hadisə nəticəsində 9 nəfər həlak olub, təqribən 20 adam yaralanıb.

RF Baş Prokurorluğunda Sankt-Peterburq metrosunda partlayışı terror aktı adlandırıblar.

Ümumrusiya Sığortaçılar İttifaqının və Milli Məsuliyyət Sığortaçıları İttifaqının prezidenti İqor Yurgens bildirib ki, metroda partlayış zamanı həlak olanların hər birinin qohumlarına 2,025 milyon rubl ödəniş verilməsi nəzərdə tutulub.

Sankt-Peterburq metrosunda partlayışla əlaqədar şəhərin Pulkovo aeroportunda təhlükəsizlik tədbirləri gücləndirilib.