17-06-2024, 23:10
"Gələcək nəsillərə ekoloji təmiz ölkə ötürmək niyyətindəyik"
Türkiyə səlahiyyətliləri gələcək nəsillərə ekoloji cəhətdən təmiz ölkə ötürmək üçün ətraf mühitin mühafizəsinə dair tədbirləri davam etdirir.
Bu barədə Türkiyə Prezidenti Rəcəb Tayyib Ərdoğanın 17 İyun - Ümumdünya Quraqlıq və Səhralaşma ilə Mübarizə Günü ilə əlaqədar sosial şəbəkələrdə dərc olunmuş paylaşımında deyilir.
Türkiyə lideri bildirib ki, təkcə son 21 ildə ölkədə 7 milyard ting əkilib.
“Ətraf mühitin qorunması üçün qəti addımlar davam etdiriləcək”, - deyə Ərdoğan əmin edib.
Bu arada Türkiyənin Kənd Təsərrüfatı və Meşə Təsərrüfatı Nazirliyində bildirilib ki, torpaq eroziyasına qarşı mübarizə ilə bağlı səylər təkcə ölkə ərazisini əhatə etmir, həm də beynəlxalq təcrübə mübadiləsi aparılır. Son illər türkiyəli ekspertlər tərəfindən dünyanın 108 ölkəsindən 1170 ekspert və aqronomun iştirakı ilə kurslar təşkil olunub.
17-06-2024, 22:17
Putin qohumuna yüksək vəzifə verdi
Rusiya Prezidenti Vladimir Putin əvvəllər maliyyə nazirinin müavini vəzifəsini tutan Leonid Qornini müdafiə nazirinin birinci müavini təyin edib.
Bu barədə Kremlin mətbuat xidməti məlumat yayıb.
Anna Tsivileva və Pavel Fradkov da müdafiə nazirinin müavinləri təyin edilib.
Tsivileva Rusiyanın energetika naziri Sergey Tsivilevin həyat yoldaşıdır. O, Vladimir Putinin uzaq qohumudur.
Pavel Fradkov keçmiş hökumət başçısı və SVR-nin direktoru Mixail Fradkovun oğludur.
Oleq Savelyev isə müdafiə nazirinin müavini - idarənin aparat rəhbəri təyin edilib.
Müdafiə nazirinin birinci müavini Ruslan Tsalikov, nazir müavinləri Nikolay Pankov və Tatyana Şevtsova vəzifələrindən azad ediliblər.
17-06-2024, 12:41
İrəvandakı mitinqə qoşulan 12 nəfərə cinayət işi açılıb
Keşiş Baqrat Qalstanyanın rəhbərlik etdiyi "Vətən uğrunda Tavuş" hərəkatının İrəvanın Baqramyan prospektindəki 12 iyun tarixli mitinqində iştirak edən 12 nəfərə cinayət işi açılıb.
Bu barədə məlumatı Ermənistanın İstintaq Komitəsi yayıb.
Məlumata görə, onlardan 8 nəfəri barəsində həbs, 4 nəfərlə bağlı isə ev həbsi ilə bağlı qətimkan tədbiri seçilib. Bir nəfər isə paytaxt ərazisini tərk etməmək şərti ilə sərbəst buraxılıb.
Həmçinin adı açıqlanmayan digər bir nəfərin isə axtarışa verildiyi qeyd edilib.
17-06-2024, 11:47
Ukrayna Rusiyanı sülh sammitinə dəvət edəcək - Nazir
Ukraynanın xarici işlər naziri Dmitri Kuleba Rusiyanı Ukraynaya həsr olunmuş növbəti beynəlxalq sammitə dəvət etmək niyyətində olduğunu açıqlayıb.
Kuleba “Strana” nəşrinə açıqlamasında sammitin məqsədinin münaqişəni dayandırmaq olduğunu vurğulayıb.
“İdeya ondan ibarətdir ki, növbəti sammit münaqişənin sonu olacaq. Və təbii ki, bizə qarşı tərəfin danışıqlar masasında olması lazımdır. Münaqişəni dayandırmaq üçün hər iki tərəfə ehtiyac olduğu aydındır”, - deyə nazir vurğulayıb.
O qeyd edib ki, Kiyev hakimiyyəti Rusiya ilə danışıq aparmaq lazım gələcəksə, bunu edəcək.
Xatırladaq ki, iyunun 15-16-da İsveçrənin Bürgenstok şəhərində Ukraynaya həsr olunmuş konfrans keçirilib və nəticədə Ukrayna ilə bağlı kommünike imzalanıb.
Sənədi sammitdə iştirak edən 80 ölkə dəstəkləyib.
İraq və İordaniya daha sonra kommünikenin mətnindən öz imzalarını geri götürüb. Hindistan sənədi imzalamayıb. İsveçrə XİN növbəti görüşün ABŞ-da noyabrda keçiriləcək prezident seçkilərindən sonra keçiriləcəyini istisna etməyib.
17-06-2024, 11:22
İranda prezidentliyə ən gənc namizəd kimdir?
İranın Konstitusiya Keşikçiləri Şurası (12 üzvü var) iyunun 28-də keçiriləcək prezident seçkilərində 6 namizədin iştirakına icazə verib:
Mustafa Purməhəmmədi - prokuror və keçmiş ədliyyə naziri;
Məsud Pezeşkian - parlamentin deputatı, keçmiş səhiyyə naziri;
Əlirza Zakani - Tehran meri;
Səid Cəlili - İran ali rəhbərinin Təhlükəsizlik Şurasındakı nümayəndəsi;
Məhəmməd Baqir Qalibaf - parlamentin hazırkı sədri;
Seyid Əmir Hüseyin Qazizadə Haşimi - parlament sədrinin keçmiş müavini.
Sabiq millət vəkili Seyid Əmir Hüseyn Qazizadə Haşimi kimdir?
Əmir Hüseyn Qazizadə Haşimi 14-cü prezident seçkilərinə buraxılmış ən gənc namizəddir.
O, 1971-ci ildə Rəzəvi Xorasan əyalətinin şimal-şərqindəki Fəriman şəhərində anadan olub. İxtisasca çörəkçi olan atasının daha iki oğlu və dörd qızı var.
Dindar və inqilabçı bir ailədə böyüyən Qazizadə Haşiminin babası Qərbin dəstəklədiyi Pəhləvi rejiminin anti-İslam siyasət və əməllərinin güclü əleyhdarı idi.
Onun kiçik qardaşı Seyid İhsan Qazizadə Haşimi parlamentdə Feriman və Sərəxs seçki dairəsini təmsil edən siyasətçidir.
Qazizadə Haşimi eks-prezident Həsən Ruhani hökumətində səhiyyə naziri vəzifəsində çalışmış Seyyid Həsən Qazizadə Haşiminin əmisi oğludur.
İran-İraq müharibəsinin son illərində cəbhəyə gedən Qazizadə Haşimi ayağından yaralanıb.
Müharibədən qayıtdıqdan sonra Məşhəd Tibb Elmləri Universitetində tibb təhsili alıb. 1997-ci ildə ailə quran Qazizadə Haşiminin iki övladı var.
Qazizadə Haşimi 2002-ci ildə Xorasan Qaziləri və Şəhidləri Fondunun vitse-prezidenti seçilib və Məşhəd Tibb Elmləri Universitetinin qəyyumlar şurasının üzvü olub.
O, Şəhid Beheşti Tibb Elmləri Universitetində dosent vəzifəsində çalışıb və millət vəkili olana qədər Simnan Tibb Elmləri Universitetinin rektoru vəzifəsində çalışıb.
Qazizadə Haşimi 2008-ci ildə Məşhəd və Kələt seçki dairələrini təmsil edərək 8-ci parlamentə daxil olub. Həmçinin 2021-ci ilə qədər 9, 10 və 11-ci dövr parlamentlərdə iştirak edib.
Mühafizəkar siyasi xadim Qazizadə Haşimi Paydari Cəbhəsi Mərkəzi Şurasının üzvüdür və 2013-2014-cü illərdə partiyanın sözçüsü vəzifəsində çalışıb.
O, 2021-ci ildə Şəhidlər Fondunun prezidenti təyin edilib. Həmin il ölkədə keçirilən prezident seçkilərinə qatılıb və mərhum İbrahim Rəisinin namizədliyini dəstəkləyən namizədlər arasında dördüncü olub.
Bu il iyunun 3-də Daxili İşlər Nazirliyinə gələn və 14-cü prezident seçkilərində iştirak etmək üçün qeydiyyatdan keçən Qazizadə Haşimi mətbuat konfransında İbrahim Rəisi hökumətinin siyasətini dəstəkləyib və mərhum prezidentin xalqın problemlərinin həlli istiqamətində göstərdiyi səyləri yüksək qiymətləndirib.
Qazizadə Haşimi dövlət televiziyasına verdiyi açıqlamada deyib ki, prezident seçilərsə, quracağı hökumət “xalq hökuməti, ailə hökuməti” olacaq.
Siyadi ekspertlər Seyid Əmir Hüseyn Qazizadə Haşiminin prezident seçilmək şanslarının aşağı olduğunu deyərək, onun kiminsə xeyrinə geri çəkilə biləcəyini proqnozlaşdırıblar.
İranda növbədənkənar prezident seçkiləri iyunun 28-nə planlaşdırılıb.
Namizədlərdən heç biri lazımi miqdarda səs yığa bilməsə, iyulun 5-də ən çox səs toplayan iki namizədin iştirakı ilə seçkilərin ikinci turu keçiriləcək.
İran qanunvericiliyinə əsasən, prezident birbaşa ümumi səsvermə yolu ilə dörd il müddətinə seçilir. Eyni şəxs ardıcıl iki müddətdən çox dövlət başçısı seçilə bilməz. Prezident postuna namizəd olmaq istəyən şəxs 40-75 yaşlarında, dövlət qurumlarında rəhbər vəzifələrdə iş təcrübəsinə malik İran vətəndaşı olmalıdır.
Mayın 19-da İranın şimalındakı Şərqi Azərbaycan əyalətində göyərtəsində ölkə prezidenti İbrahim Rəisinin və xarici işlər naziri Hüseyn Əmir Abdullahianın olduğu helikopter qəzaya uğrayıb. Helikopterdə olan 9 nəfərin hamısı həlak olub. Bu səbəbdən də növbədənkənar prezident seçkiləri gündəmə gəlib.
17-06-2024, 10:31
Xamenei 2654 məhkumun əfv olunmasına “hə” dedi
İran İslam Respublikasının ali rəhbəri Ayətullah Xamenei 2654 məhkumun əfv edilməsi və onların azadlığa buraxılması və ya cəzalarının yüngülləşdirilməsi təklifini qəbul edib.
Xamenei Qurban və Qədir Xum bayramları ilə əlaqədar hərbi və müxtəlif mülki məhkəmələrdə mühakimə olunmuş 2654 məhkumun əfv edilməsi, azadlığa buraxılması və ya cəzalarının yüngülləşdirilməsi təklifinə “hə” deyib.
Təklifi Xameneiyə İranın ədliyyə naziri Qulam Hüseyn Möhsini təqdim etmişdi.
16-06-2024, 17:49
ABŞ-də konsertdə atışma - 2 nəfər öldü
ABŞ-nin Texas ştatının Round-Rok şəhərində konsert zamanı atışma baş verib, iki nəfər ölüb, bir neçə nəfər yaralanıb.
Konsertdə iki tamaşaçı qrupu arasında dava düşüb və kimsə atəş açıb. Nəticədə bu mübahisədə iştirak etməyən şəxslər həlak olub.
Həkimlər yaralılara ilkin tibbi yardım göstəriblər və onlar xəstəxanalara aparılıblar.
Polis hələ şübhəli şəxsi saxlamayıb. Faktla bağlı araşdırma aparılır.
16-06-2024, 17:36
Həcc ziyarətində 6 zəvvar istidən öldü
Məkkədə Həcc ziyarəti zamanı 6 zəvvar istidən ölüb.
Bu barədə İordaniyanın Xarici İşlər Nazirliyi məlumat yayıb.
Qeyd olunub ki, ölənlərin hamısı İordaniya vətəndaşıdır, hazırda nazirlik onların nəşilərinin vətənlərinə qaytarılması üçün Səudiyyə Ərəbistanının səlahiyyətli orqanları ilə danışıqlar aparılır.
Səudiyyə Ərəbistanı Baş Statistika İdarəsinin məlumatına görə, bu il həcc ziyarətində 1,8 milyondan çox insan iştirak edəcək.
Səudiyyə rəsmiləri daha əvvəl xəbərdarlıq ediblər ki, builki rituallar zamanı temperatur 48 dərəcə istiyə çata bilər.
16-06-2024, 17:17
Ukrayna döyüşü dayandırsa sonu gələcək - Sloveniya prezidenti
Ukraynada müharibə davam edir və əgər Ukrayna dövləti Rusiyaya qarşı mübarizəni dayandırsa, o zaman bu onların sonu olacaq, bu, həm də dünyada qanunun aliliyinə də zərbə vuracaq.
Bunu Sloveniya prezidenti Nataşa Pirts-Musar Ukraynadakı müharibə ilə bağlı Qlobal Sülh Sammitində deyib.
“Rusiya döyüşü dayandırsa, o zaman müharibə dayanacaq. Yalnız Ukrayna döyüşü dayandırsa, o zaman Ukraynanın sonu gələcək, amma bu, həm də qanunun aliliyinin sonu olacaq”.
Onun sözlərinə görə, sammitdə çoxlu sayda ölkə liderlərinin iştirakı onu göstərir ki, beynəlxalq ictimaiyyət Ukraynada baş verən bütün qlobal hüquq normalarının “dəhşətli pozulmasına” son qoymağın tərəfdarıdır.
15-06-2024, 17:53
Daha bir ölkə quş qripinə qarşı vaksin alır
Avropa Səhiyyə Təşkilatı (Hera) Böyük Britaniyanın “CSL Seqirus” şirkəti ilə hazırda dünyanın bəzi yerlərində yayılan quş qripinə qarşı 665 min doza peyvəndin alınmasına dair müqavilə imzalayıb.
Dörd il müddətinə nəzərdə tutulan razılaşmaya əsasən, 15 ölkə əlavə olaraq 40 milyon doza peyvənd ala biləcək. “CSL Seqirus” artıq bir neçə ölkəyə tədarük hazırlayır. Bunlardan birincisi vaksini kənd təsərrüfatı işçilərinə təklif etməyi planlaşdıran Finlandiya olacaq.
“Quş qripinin ictimaiyyət üçün təhlükəsi az olsa da, biz fermerlər və baytarlar kimi ən çox risk altında olanları qorumalıyıq”, -deyə Aİ komissarı Stella Kiriakides öz hesabatında bildirib.
Avropa Xəstəliklərin Qarşısının Alınması və Nəzarəti Mərkəzinin (ECDC) məlumatına görə, iyunun əvvəlində Avropada insanlar və ev heyvanları arasında quş qripinin aktiv epidemiyası qeydə alınmayıb.
Ən çox quş qripi virusuna yoluxma halı son aylarda bir neçə süd fermasında inəklərin yoluxduğu Şimali Amerikada qeydə alınıb. Ən azı üç nəfər xəstə heyvanlarla təmasdan sonra virusa yoluxub ki, bu da quş qripinin inəklərdən insanlara ötürüldüyü ilk haldır. Virusun insandan insana keçməsi halları hələ aşkarlanmayıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!