Təbrik

Dəyərli dostum, yorulmaz tədqiqatçı, onlarla kitabın müəllifi, tərtibçisi və redaktoru, “Laçın yurdu” jurnalının baş redaktor müavini, “Laçın və laçınlılar” qrupunun üzvü Araz Yaquboğlunu doğum günü münasibətilə səmimi qəlbdən təbrik edir, ona möhkəm cansağlığı, yaradıcı fəaliyyətində uğurlar arzulayıram! Əzizim Araz, sən həmişə, hər yerdə yeri görünən bir insansan. Səninlə tanışlığımın 5-6 illik tarixi var, amma mənə elə gəlir ki, uzun illərin dostuyuq. Sirr deyil ki, ən etibarlı dostların da mənfi cəhətləri olur. Hələ indiyədək sənin mənfi cəhətini görməmişəm, Bu, gəlişigözəl sözlər deyil. Çətinliklərlə ərsəyə gətirdiyimiz jurnalın əsas ağırlığı sənin üzərinə düşüb. İşlərinin çoxluğuna baxmayaraq hələ bir dəfə alnını turşutmadın, sifətinin bircə cizgisi ilə də narazılığını hiss etdirmədin. Yaxşı bilirəm ki, işi səndən keçənlərin hamısına qarşı beləsən, hətta bəzilərindən nankorluq görsən də... Doğru yoldasan, atalar əbəs yerə deməyib ki, kimsə pisliyindən əl çəkmirsə, sən niyə yaxşılığından əl çəkəsən?! Bir daha ad günün mübarək! Ailənlə, övladlarınla və bütün doğmalarınla bərabər xoşbəxt illər nəsibin olsun!
Yeri gəlmişkən, deyim ki, iki ildir sənin ad gününə ən qiymətli təbrik övladlarından gəlib. Keçən il oğlun Təhmasib yüksək bal toplayaraq İqtisadiyyat Universitetinə qəbul oldu və dəfələrlə intellektual yarışlarda xüsusilə fərqlənərək mükafatlandırıldı. Bu il isə qızın Firuzə 660 bal toplayaraq sizə ikiqat ad günü sevinci yaşatdı. “Laçın yurdu” jurnalının yaradıcı kollektivi adından da həmişə doğum gününü yeni uğurlarla qarşılamağını arzulayıram!

Hörmətlə: Arif Məmmədli