Dekabrın 13-də Azərbaycan Respublikasının Prezidenti yanında Bilik Fondunda Qarabağ uğrunda döyüşlərdə şəhid olmuş batalyon komandiri, Azərbaycanın Milli Qəhrəmanı, mayor Əliyar Əliyevin xatirəsini anma mərasimi keçirilib.
AzərTAc xəbər verir ki, Müdafiə Nazirliyinin rəsmilərinin, Azərbaycanın Milli qəhrəmanlarının, şəhidin döyüş dostlarının və ailə üzvlərinin iştirak etdikləri tədbirdə Bilik Fondunun icraçı direktoru Oqtay Səmədov igid hərbçinin mənalı ömür yolundan, qəhrəmanlığından, torpaqlarımız uğrunda apardığı uğurlu əməliyyatlardan söhbət açıb.
O.Səmədov Prezident İlham Əliyevin şəhid ailələrinə diqqət və qayğısından danışıb, Milli qəhrəmanların həyat və döyüş yolunun gənc nəsil üçün örnək olduğunu vurğulayıb. Fondun icraçı direktoru rəhbərlik etdiyi qurumun bu istiqamətdə fəaliyyətinin əsas istiqamətlərini diqqətə çatdırıb.
İgid komandirin silahdaşları, Müdafiə Nazirliyinin şöbə müdirləri polkovnik Vaqif Dərgahlı, polkovnik-leytenant Sadiq Paşayev, Milli Qəhrəman Vahid Quliyev, Nərimanov Rayon İcra Hakimiyyəti başçısının müavini İradə Mahmudova, yazıçı-publisist Hacı Nərimanoğlu və başqaları respublikamızda yaradılmış ilk könüllü batalyonlarından birinin komandiri, cəsur partizan Ə.Əliyevin qəhrəmanlığından söz açıb, onunla bağlı xatirələrini bölüşüblər. Bildirilib ki, xalqımızın igid oğlu Ə.Əliyevin xatirəsi daim ürəklərdə yaşayacaq.
Əfsanəvi döyüşçü Ə.Əliyev Azərbaycan Dövlət Bədən Tərbiyəsi İnstitutunu (indiki Azərbaycan Dövlət Bədən Tərbiyəsi və İdman Akademiyası) fərqlənmə diplomu ilə bitirmişdi, hərbi xidmətdə Ordu çempionu olmuşdu, klassik güləş üzrə dəfələrlə Azərbaycan və SSRİ çempionu, “Məhsul” Kənd Könüllü İdman Cəmiyyətinin Qubadlı şöbəsinin sədri, respublikamızda Milli İdman Oyunlarının təşkilinin təşəbbüskarı və təşkilatçılarından olmuşdu, pəhləvanın səkkiz yetirməsi respublika və SSRİ, biri Olimpiya çempionudur.
Tədbirdə Ə.Əliyevin nəvəsi Cavidan babası haqqında yazılmış şeiri söyləyib.
Milli Qəhrəmanın oğlu, ön cəbhədəki hərbi hissələrdən birinin taqım komandiri, mayor Emil Əliyev atasının xatirəsinə göstərilən hörmət və ehtirama görə tədbirin təşkilatçılarına və iştirakçılarına təşəkkürünü bildirib.
Sonda Ə.Əliyevin döyüş şücaətini əks etdirən sənədli film nümayiş olunub.