Butov.az GünAz TV - yə istinadən xəbər verir ki, Güney Azərbaycanda bəzi istehsal müəssisələri bazara buraxdıqları məhsulların üzərində bilərək və ya bilməyərəkdən uydurma “Kürdistan” ifadəsindən istifadə edirlər.


Bu müəssisələrdən biri Arıbal adlı təbii bal istehsalı şirkətidir. Həmin şirkət Şərqi Azərbaycanın Şəbistər şəhərində fəaliyyət göstərir və məhsulunu Ələmdar və Mişov dağlarından əldə edir. Buna baxmayaraq bazara buraxdığı məhsulların üzərində uydurma “Böyük Kürdistan” sözü dərc edir.

Əslində Güney Azərbaycan balı daxili və xarici bazarlarda hər zaman etibarlı brendlər arasında yer alır. Ona görə də, hətta adı türkcə olan Arıbal (Arı + bal) məhsulunun üzərində “Böyük Kürdistan” ifadəsinin yazılmasını heç bir ticarət qaydası ilə izah etmək mümkün deyil.

Son illərdə Azərbaycan türklərinə mədəni, tarixi, ictimai və iqtisadi zərbə vurmak üçün bölgədə bir çox çirkli planlar həyata keçirilir. Kürd terror qruplaşmaları nə qədər gülünc olsa belə, Qərbi Azərbaycan Əyalətini Kürdistan adlandırır və bunun əsasında müxtəlif işlər görür və terror aktları törədirlər. Onların təbliğatı bəzən Güney Azərbaycanın digər vilayətlərinə də sıçrayır. Ona görə də bütün sahələrdə fəaliyyət göstərən Azərbaycan türklərinin belə bir vəziyyətdə ayıq-sayıq olması olduqca vacib məsələdir.