Butov.az GünAz TV - yə istinadən xəbər verir ki, Güney Azərbaycanda ağır iqtisadi vəziyyətlə əlaqədar yüzlərlə istehsal müəssisəsi işini dayandıraraq uzun müddətdir istehsal dövriyyəsindən kənarda qalıblar. Bu proses işsizlər ordusunun sıralarının daha da genişlənməsinə səbəb olur.

Həmədan Əyaləti Ticarət, Mədən və Sənaye Təşkilatının rəisi Həmidrza Mətin avqustun 31-də jurnalistlərə təmsil etdiyi əyalətdə 170 sənaye müəssisəsinin bağlandığını deyib.

“Hal-hazırda Həmədan Əyalətində sənaye sahəsində fəaliyyət göstərən 1178 müəssisəyə lisenziya verilib, lakin onlardan 170-i fəaliyyətini dayandırıb. Bağlanan müəssisələrin bəziləri gələcəkdə fəaliyyətini yenidən bərpa edə bilər”- deyə o bəyan edib.

H.Mətin sözlərinin davamında deyib: “Fəaliyyətini dayandıran müəssisələrdən 146-ı rəsmən bağlanılıb, onların artıq işığı söndürülüb. 37 sənaye müəssisəsi isə müştəri olduqca, yəni mövsümi işləyir. Bunu da nəzərə almalıyıq ki, qarşıdan qış fəsli gəlir, soyuq havalarda sənaye müəssisələrinin fəaliyyəti daha da məhdudlaşır”- deyə o qeyd edib.

Həmədan Əyaləti Ticarət, Mədən və Sənaye Təşkilatının rəisi sənaye müəssisələrinin yerləşdiyi məntəqələrlə bağlı əlavə edib ki, “əyalətdəki müəssisələrdən sadəcə 400-ü sənaye şəhərciklərində, qalan 800-ü isə digər məntəqələrdə yerləşir. Ona görə də bütün sənaye şəhərcikləri sözügedən problemə görə bağlana bilməz.”

Qeyd edək ki, son illərdə Güney Azərbaycanın müxtəlif bölgələrində sənaye müəssisələrinin bağlanması və işçilərin ixtisarı faktları çoxalıb. İqtisadi vəziyyətin ildən ilə tənəzzülü nəticəsində çoxlu soydaşımız iş tapmaq məqsədilə İranın fars vilayətlərinə köçür. Bu isə Azərbaycanda demoqarik vəziyyətin dəyişməsinə gətirib çıxarır.