Prezident İlham Əliyev Rusiya Federasiyası Federal Məclisi Dövlət Dumasının deputatı, Rusiya Federasiyası Çeçenistanın başçısı Ramzan Kadırovun şəxsi nümayəndəsi Adam Delimxanovu qəbul edib.

Butov.az-ın AzərTAc-a istinadən məlumatına görə, Ramzan Kadırovun və bütün çeçen xalqının Azərbaycanda əldə olunan uğurlara görə Prezident İlham Əliyevə dərin hörmət bəslədiklərini deyən Adam Delimxanov Azərbaycanın nailiyyətlərinə sevindiklərini bildirib və Azərbaycanın Milli bayramı - Respublika Günü və Ramazan ayının başlanması münasibətilə təbriklərini də çatdırıb. Qonaq Bakıda gedən sürətli inkişaf proseslərinin onda dərin təəssürat yaratdığını deyib.
Dövlət başçısı Azərbaycan və çeçen xalqları arasında tarixi əlaqələrin mövcud olduğunu vurğulayaraq Çeçenistanda gedən böyük inkişaf proseslərinə toxunub və bu uğurlu inkişafın, sabitliyin və əmin-amanlığın önəmini qeyd edib.

Çeçenistandakı inkişafın Azərbaycanda maraqla izlənildiyini deyən prezident İlham Əliyev əldə edilən uğurlar münasibətilə çeçen xalqına və şəxsən Ramzan Kadırova təbriklərini çatdırıb və müqəddəs Ramazan ayının başlanması münasibəti ilə çeçen xalqını təbrik edib.
Azərbaycan ilə Rusiya arasında ikitərəfli münasibətlərin bütün sahələrdə uğurla inkişaf etdiyini vurğulayan dövlət başçısı bu münasibətlərin genişlənməsinə Çeçenistan arasında əməkdaşlığın da öz töhfəsini verdiyini qeyd edib.