25-03-2024, 21:21
Albaniyanın qaz şəbəkəsinin qurulmasında Azərbaycanın iştirakı gözlənilir
Xəbər verdiyimiz kimi, Albaniya Azərbaycandan təbii qaz idxal etmək istəyir. Bu məqsədlə ölkədə zəruri qazpaylayıcı infrastrukturun inkişafı üçün planlar hazırlanır.
Azərbaycan qazının Albaniyaya illik tədarükü təxminən 200 milyon kubmetr həcmində gözlənilir.
İqtisadçı ekspert Eldəniz Əmirov bildirib ki, bu istək təzə deyil. Hələ 16 il əvvəl Albaniya bu istəyini 2008-ci ildə Xorvatiyanın paytaxtı Zaqrebdə keçirilmiş zirvə görüşündə bildirib.
"Bunun üçün əla fürsət var. Çünki, Yunanıstanın Türkiyə ilə sərhədində yerləşən Kipoi kəndindən başlayan TAP-ın ümumi uzunluğu 878 km-dir ki, bunun da 215 km-i Albaniya ərazisindən keçir. Başqa sözlə Albaniya TAP-ın keçdiyi 3 ölkədən biridir. Yəni Albaniyaya Azərbaycan qazından istifadə üçün digər ölkələr kimi hansısa tranzit ölkədən istifadə etməyə ehtiyac yoxdur.
550 km Yunanıstan ərazisindən, 105 km isə Adriatik dənizindən keçən TAP ən yüksək hündürlüyü olan 1800 metlik yüksəkliyə də məhz Albaniya ərazisində qalxır (Adriatik dənizdə 820 metrlik dərinliyə düşür)
Azərbaycan tərəfi bu fürsətdən istifadə edərək, təkcə ixracatçı kimi deyil, eyni zamanda Albaniyanın qaz şəbəkəsinin qurulmasında ciddi investor kimi çıxış edə bilər. Belə ki, Albaniya elektrik enerjisi istehsalının 97%-i dağ rayonlarındakı kiçik SES-lərdən alır. Lakin inkişaf edən sənayesi qaz təsərrüfatının yaradılmasını tələb edir. Orada isə qaz ehtiyatları olsa da, lakin bu günə qədər qaz şəbəkəsi yaradılmamışdır. Odur ki, Azərbaycan nəzərdə tutulan həcmdə qaz ixracı ilə yanaşı orada şəbəkənin qurulmasında investor kimi iştirak edə bilər", - o qeyd edib.
25-03-2024, 20:17
Terror aktıyla əlaqədar daha üç nəfər saxlanıldı
«Crocus City Hall» mərkəzində törədilmiş terror aktı ilə əlaqədar daha üç nəfər saxlanılıb.
Amincon, Dilovar və İsroil İslamovlar məhkəməyə gətirilib. Rusiya məhkəməsi onlar barəsində həbs qətimkan tədbiri seçib.
Dilovar İslamov terrorçuların istifadə etdikləri «Renault» markalı avtomobilin sahibi olub. İstintaq digər saxlanılanlar — Amincon və İsroil İslamovların da cinayətkar qrupun tərkibində olduqlarını ehtimal edir.
25-03-2024, 20:02
İrəvanda Gürcüstan səfirliyinin yeni binasının açılışı oldu - FOTO
İrəvanda Gürcüstanın Ermənistandakı səfirliyinin yeni binasının açılış olub.
Martın 25-də Ermənistan və Gürcüstanın baş nazirləri Nikol Paşinyan və İrakli Kobaxidze səfirlik binasına baş çəkiblər.
Hökumət başçıları səfirliyin binasını gəzib, mövcud şəraitlə tanış olublar.
Paşinyan gürcüstanlı həmkarını və Gürcüstanın Ermənistandakı səfirliyinin əməkdaşlarını yeni binanın açılışı münasibətilə təbrik edib və ona gələcək fəaliyyətində uğurlar arzulayıb.
25-03-2024, 19:53
BMT Qəzzayla bağlı yeni qətnamə qəbul etdi
BMT Təhlükəsizlik Şurası Ramazan ayı ərzində Qəzza zolağında dərhal atəşkəsin bərqərar olmasını tələb edib.
Bu barədə Şura qətnamə qəbul edib.
ABŞ səsvermə zamanı bitərəf qalıb və sənədin qəbuluna veto qoymayıb.
25-03-2024, 19:15
Məşhur aktyor ürəyindən əməliyyat oldu
Amerikalı aktyor və Kaliforniya ştatının keçmiş qubernatoru Arnold Şvartsenegger ürəyindən əməliyyat olunub.
Bu barədə aktyor özü açıqlamasında deyib.
Şvartseneggerin sözlərinə görə, onun bədəninə kardiostimulyator yerləşdirilib. Sənətçi əməliyyatdan sonra maşın olmağa daha da yaxınlaşdığını zarafat edib.
Aktyorun sözlərinə görə, kardiostimulyator ona görə lazım olub ki, onun əvvəlki əməliyyatlarından sonra ürək döyüntüsündə pozuntular yaranıb.
25-03-2024, 17:50
“Kürəkənimin 40 mərasimində evə nəvəmin meyiti gəldi” - Gövhər Rzayeva
“Qızım Ülkərin həyat yoldaşını mal-mülkə görə qardaşının oğlu qətlə yetirdi. Səbəb isə əmisinin sahib olduqlarını ələ keçirmək idi. Elə oldu ki, bu məsələdən 6 ay sonra onu da öldürdülər. Onlar Ukraynanın cənub-şərq hissəsində, Zaporojye şəhərində qalırdılar. Qətlə yetirdikdən sonra isə meyitini Dnepr çayına atmışdılar. Hərdən görürsən ki, dünya malı da insanın özünə düşmən olur”.
Bu sözləri Əməkdar artist Gövhər Rzayeva qonaq olduğu verilişlərin birində deyib.
Qarmon ifaçısı kürəkəninin qətlə yetirilməsindən danışıb:
“Qızım Ülkər qətlə yetirilən ərindən dünyaya uşaq gətirdi. Onun bir oğlan övladı oldu. Amma bağırsaq keçməzliyi var idi. O bir müddət xəstəxanada qaldı. Uşaq bir müddət sonra vəfat etdi. Elə bil ki, kürəkənimin 40 mərasimi keçirilən gün nəvəmin çantanın içində meyitini evə gətirdilər.
Kifir ol, amma bəxtin olsun. Gözəllik də hər zaman insana xoşbəxtlik gətirmir. Deyirlər ki, gözəl qızın və ya qadının başı hər zaman tüstülü olar. Qızım Ülkər ər və uşağının itkisindən dərin sarsıntı keçirdi. Onu bu vəziyyətdən çıxarmaq üçün pirlərə, məscidlərə apardım. Qızımı 17 yaşında ərə verdim. O uşaq ikən ailə qurub. Evdə birinci gəlin o olub. Həyatdır, nə yatdı ki, nə də yuxu görsün”.
25-03-2024, 17:20
Bu rayonlara qar yağıb
Martın 25-i saat 16:00-a olan məlumata əsasən bölgələrə yağış və qar yağıb.
Bu barədə Milli Hidrometeorologiya Xidmətindən məlumat verilib.
Bildirilib ki, Naxçıvan, Şərur, Şahbuz, Culfa, Ordubad, Göygöl, Naftalan, Şəmkir, Tovuz, Ağdam, Ağstafa, Balakən, Oğuz, Qəbələ, Zaqatala, İsmayıllı, Qobustan, Altıağac, Quba, Xaltan, Şabran, Mingəçevir, Yevlax, Göyçay, Zərdab, Kürdəmir, Yardımlıda yağış, Qrız, Şahdağ, Daşkəsən, Gədəbəy, Şəki, Qax, Qusarda qar yağıb.
Şamal-qərb küləyi Bakıda və Abşeron yarımadasında arabir 17 m/s-dək güclənib.
Neft Daşları stansiyasının məlumatına əsasən dağlanın hündürlüyü 2.6 metrə çatıb.
Həmçinin Daşkəsən, Göygöl, Naftalan, Şəmkir, Balakən, Zaqatala, Şamaxı, Qobustan, Quba, Qusar, Qrız, Yevlax, Lerik, Sumqayıtda duman müşahidə olunub.
Havanın temperaturu Bakıda və Abşeron yarımadasında və Naxçıvan MR-da 8, Aran rayonlarında 10 dərəcəyədək isti, dağlıq rayonlarda 2 dərəcəyədək şaxta olub.
25-03-2024, 16:42
Sahibə Qafarova serbiyalı həmkarıyla görüşdü
Milli Məclisin sədri Sahibə Qafarova İsveçrənin Cenevrə şəhərində keçirilən Parlamentlərarası İttifaqın 148-ci Assambleyası çərçivəsində Serbiya Milli Assambleyasının sədri Ana Brnabiç ilə görüşüb.
Görüşdə ölkələrimiz arasında yüksək səviyyəli münasibətlərin mövcud vəziyyətindən məmnunluq ifadə olunub, siyasi və iqtisadi, eləcə də bir sıra digər sahələrdə əməkdaşlığın inkişaf etdiyi diqqətə çatdırılıb.
Sahibə Qafarova qeyd edib ki, dövlət başçıları arasında yüksək səviyyəli münasibətlər ölkələrimiz və xalqlarımız arasında dostluğun gücləndirilməsinə mühüm töhfələr verir. O, bu münasibətlərin iki ölkənin parlamentləri arasında da uğurla davam etdirildiyini vurğulayıb. Özünün Serbiyaya rəsmi səfərini məmnunluqla xatırlayan S.Qafarova səfər zamanı keçirilən görüşlər və aparılan müzakirələrin qanunverici orqanlar arasında münasibətlərin daha da genişlənməsinə imkan yaratdığını bildirib. Tərəflər dostluq qrupları və parlament komitələri arasında əməkdaşlığın genişləndirilməsi imkanları barədə də fikir mübadiləsi aparıblar.
Serbiya parlamentinin sədri Azərbaycanda keçirilmiş növbədənkənar prezident seçkilərində Prezident İlham Əliyevin inamlı qələbəsi münasibətilə təbriklərini çatdırıb və Serbiyanın parlament müşahidə missiyası ilə azad və demokratik şəraitdə keçən seçkiləri izlədiyini diqqətə çatdırıb. Ölkəsinin Azərbaycanla əlaqələrin müxtəlif sahələrdə daha da genişlənməsində maraqlı olduğunu vurğulayan Serbiya parlamentinin spikeri bildirib ki, qanunverici orqanlar arasında əlaqələr dövlətlərimiz arasında münasibətlərin daha da dərinləşməsində mühüm rol oynayır.
Tərəflər beynəlxalq münasibətlər sistemində, o cümlədən beynəlxalq təşkilatlarda, xüsusən də AŞPA-da müşahidə olunan ikili standartları tənqid edərək bildiriblər ki, bu, qurumun üzərinə götürdüyü vəzifələrlə və ya missiyası ilə ziddiyyət təşkil edir.
Görüşdə, həmçinin BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının (COP29) əhəmiyyəti qeyd olunub və Serbiya tərəfi bu mühüm beynəlxalq tədbirə ev sahibliyi etdiyinə görə Azərbaycanı təbrik edib.
Bildirilib ki, AŞPA-da Azərbaycan nümayəndə heyətinin etimadnaməsinin təsdiqlənməməsinə etiraz olaraq Serbiya parlamenti təşkilata müraciət ünvanlayıb və bu qərarın ləğv edilməsinə çağırış edib. Sahibə Qafarova bu addıma görə Serbiya tərəfinə minnətdarlığını ifadə edib.
Görüşdə qarşılıqlı maraq doğuran digər mövzular ətrafında fikir mübadiləsi aparılıb.
25-03-2024, 15:58
Tbilisi regionda sülhün bərqərar olmasına töhfə verməyə hazırdır
"Rəsmi Tbilisi Cənubi Qafqaz regionunda sülh və sabitliyin bərqərar olmasına töhfə verməyə hazırdır".
Bu sözləri İrəvanda rəsmi səfərdə olan Gürcüstanın Baş naziri İrakli Kobaxidze erməni həmkarı Nikol Paşinyan ilə görüşdən sonra keçirilən brifinqdə söyləyib.
İ. Kobaxidze bildirib ki, tərəflər görüşdə ikitərəfli münasibətlərlə bərabər regional hadisələri müzakirə ediblər, çağırışlara qarşı birgə səylərin vacibliyini vurğulayıblar.
İrakli Kobaxidze deyib ki, Gürcüstan Cənubi Qafqazda sülh və sabitliyə kömək edir və Ermənistan ilə Azərbaycan arasında sülh müqaviləsi imzalanacağına ümid edir: “Ümid edirəm ki, Ermənistan və Azərbaycan arasında sülh sazişi prosesi uğurla nəticələnəcək. Gürcüstan regionda sülhün və sabitliyin təmin olunmasında öz müsbət rolunu oynamağa hazırdır”.
25-03-2024, 15:24
Ermənistan parlamentində qapalı toplantı keçilir
Ermənistan parlamentinin müdafiə və təhlükəsizlik məsələləri üzrə komissiyasında qapalı iclas keçirilir.
Ermənistanın güc strukturlarının rəhbərləri də iclasda iştirak edir.
Görüşə müdafiə naziri Suren Papikyan, Silahlı Qüvvələrin Baş Qərargah rəisi Edvard Asryan, Milli Təhlükəsizlik Xidmətinin direktoru Armen Abazyan və daxili işlər naziri Vahe Qazaryan qatılıb.
Sessiya açıq başlasa da, müdafiə naziri Papikyan məlumatların tam məxfi olduğunu bildirib və sessiyanın qapalı rejimdə davam etdirilməsini istəyib.
Parlamentin müdafiə və təhlükəsizlik məsələləri komitəsinin sədri Andranik Köçəryan jurnalistləri anlayışla yanaşmağa və zalı tərk etməyə çağırıb.
Papikyanın çıxışından əvvəl deputatların və təhlükəsizlik qüvvələrinin nümayəndələrinin telefonları dinlənmənin qarşısının alınması məqsədilə yığılaraq xüsusi seyfdə gizlədilib.
Qapalı iclas başlamazdan əvvəl Papikyan qısa giriş nitqi ilə çıxış edərək bildirib ki, 2023-cü ildə Müdafiə Nazirliyinin beş proqramı üzrə dövlət büdcəsindən 526,47 milyard dram (1,3 milyard dollar ABŞ dolları) ayrılıb, büdcədən maliyyələşmənin icrası 99,8 faiz təşkil edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!