21-03-2024, 13:16
Birləşmiş Millərlər Təşkilatı Azərbaycanın xəritəsini yenilədi
Birləşmiş Millərlər Təşkilatı (BMT) Azərbaycanın xəritəsini yeniləyib.
BMT-nin 2024-cü il tarixli, 3761 nömrəli yenilənmiş xəritəsində Azərbaycandakı coğrafi adlar da təzələnib.
Bu xəritəninin təsvirini Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev “X” sosial şəbəkəsində paylaşıb.
Qeyd edək ki, xəritədə Xankəndi, Xocavənd şəhərləri Azərbaycan toponimləri ilə qeyd edilib. Əvvəlki xəritədə isə Xankəndi "Stepanakert", Xocavənd "Martuni" kimi qeyd olunmuşdu.
Bundan başqa, xəritədə Azərbaycanın hazırda Ermənistanın işğalı altında olan 8 kəndi də göstərilib. Söhbət Qazaxın 7 kəndindən və Naxçıvanın Sədərək rayonunun 1 yaşayış məntəqəsindən gedir.
Xatırladaq ki, Qazaxın işğal altındakı Bağanis Ayrım, Aşağı Əskipara, Xeyrimli və Qızılhacılı kəndləri Azərbaycan ərazisinə bitişikdir, qalan 3 kənd - Yuxarı Əskipara, Sofulu və Barxudarlı isə esklavdır (hər tərəfdən Ermənistan ərazisilə əhatələnib).
Həmçinin Naxçıvanın Kərki kəndi də hər tərəfdən Ermənistan ərazisilə əhatələnmiş esklav yaşayış məntəqəsidir.
21-03-2024, 12:43
Sabahın hava proqnozu
Sabaha gözlənilən hava şəraitinin proqnozu açıqlanıb.
ETSN Milli Hidrometeorologiya Xidmətindən verilən xəbərə görə, martın 22-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Lakin gecə və səhər bəzi yerlərdə çiskinli olacağı, gecəyə doğru isə arabir yağış yağacağı ehtimalı var. Axşam bəzi yerlərdə duman olacaq. Cənub-şərq küləyi əsəcək.
Havanın temperaturu gecə 5-7° isti, gündüz 8-12° isti olacaq. Atmosfer təzyiqi 764 mm civə sütunundan 759 mm civə sütununa enəcək. Nisbi rütubət 70-80 % olacaq.
Azərbaycanın rayonlarında sabah bəzi yerlərdə arabir yağıntılı olacağı, dağlıq ərazilərdə qar yağacağı gözlənilir. Ayrı-ayrı yerlərdə intensiv olacağı, şimşək çaxacağı, dolu düşəcəyi ehtimalı var. Bəzi yerlərdə arabir duman olacaq. Mülayim şərq küləyi əsəcək.
Havanın temperaturu gecə 1-6° isti, gündüz 8-13° isti, dağlarda gecə 0-5° şaxta, gündüz 2° şaxtadan 3°-dək isti olacaq.
21-03-2024, 12:24
Türkiyədə Konstitusiya Məhkəməsinə yeni sədr seçildi
Türkiyə Respublikasının Konstitusiya Məhkəməsinə yeni sədr seçilib.
Türkiyə Konstitusiya Məhkəməsinin Kadir Özkaya sədrlik edəcək.
Türkiyə Konstitusiya Məhkəməsinin hazırki sədri Zühtü Arslanın vəzifə səlahiyyətlərinin müddəti bu il aprelin 20-də bitir.
21-03-2024, 12:12
Kəlbəcərdə silah-sursat aşkarlandı
Kəlbəcərdə silah-sursat aşkarlanıb.
Bu barədə Daxili İşlər Nazirliyindən məlumat verilib.
Qeyd olunub ki, Kəlbəcər Rayon Polis Şöbəsinin əməkdaşlarının keçirdikləri tədbirlərlə rayon ərazisindən 2 avtomat, 1 ədəd “Karabin”, 1 ədəd tank əleyhinə raket, 12 ədəd minaatan mərmisinin başlığı, 1 ədəd əl qumbarası və çoxlu sayda müxtəlif çaplı patron aşkar olunub.
21-03-2024, 12:05
Bu il 20 min keçmiş köçkün öz doğma yurduna qayıdacaq
İşğaldan azad olunmuş ərazilərə Böyük Qayıdış proqramı çərçivəsində bu günədək neçə yaşayış məntəqəsinə köç olduğu və 2024-cü ilin sonunadək nə qədər əhali köçürüləcəyi açıqlanıb.
Qaçqınların və Məcburi Köçkünlərin İşləri üzrə Dövlət Komitəsindən APA-ya bildirilib ki, Azərbaycan Respublikasının Prezidenti İlham Əliyevin 16 noyabr 2022-ci il tarixli Sərəncamı ilə təsdiq edilmiş “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nın Tədbirlər Planında komitə 5 bənd üzrə əsas, 12 bənd üzrə digər icraçı qurum kimi müəyyən edilib.
Qeyd edilib ki, işğaldan azad edilmiş ərazilərdə genişmiqyaslı bərpa-quruculuq işləri aparılır, ilk növbədə, müasir infrastruktur formalaşdırılır, dayanıqlı məskunlaşma və iqtisadi reinteqrasiya üçün zəruri şərait yaradılır. Azərbaycan Respublikasının işğaldan azad edilmiş ərazilərinə Böyük Qayıdışa Dair I Dövlət Proqramına əsasən tərtib edilmiş planlar üzrə bərpa-tikinti qrafikinə uyğun olaraq mərhələli formada inşa edilmiş evlərə ailələrin köçürülməsi həyata keçirilir. Bu günədək 5 yaşayış məntəqəsi – Zəngilan rayonunun Ağalı kəndi, Tərtər rayonunun Talış kəndi, Laçın şəhəri və rayonun Zabux kəndi, Füzuli şəhərinə keçmiş məcburi köçkünlərin köçürülməsi icra edilib.
Bu ilin sonunadək ən azı 20 yaşayış məntəqəsi olmaqla, 5 şəhərə və 15 kəndə 20 min keçmiş köçkünün qayıdışının həyata keçirilməsi planlaşdırılıb. Hazırda yüzdən çox şəhər və kəndin baş planı təsdiqlənib və bir çox şəhər və kənddə inşaat işləri aparılır.
21-03-2024, 11:06
Paşinyan kəndlərin Azərbaycana məxsus olduğunu parlamentdə də təsdiqlədi
“Müxalifətçilər deyirlər ki, Ermənistan hökuməti Tavuş rayonunun 4 kəndini Azərbaycana təslim etməyə hazırlaşır, o zaman onlardan soruşmaq lazımdır ki, söhbət Tavuş rayonunun hansı kəndlərindən gedir?”.
Bunu Ermənistanın baş naziri Nikol Paşinyan martın 20-də parlamentdə keçirilən “hökumət saatı”nda delimitasiya nəticəsində Azərbaycana qaytarılacaq ərazilərdən təfərrüatlı söz açarkən deyib.
Paşinyan bildirib: “Biz delimitasiyaya haradan başlayacağımızdan danışarkən söhbət kəndlərdən yox, ərazilərdən gedir”.
“Bu çox mühüm məsələdir. Özünüzü çaşdırmayın. Biz sözügedən kəndlərin qarşısından keçəcək sərhəddən danışırıq. Ermənistanın Bağanis kəndi və Azərbaycanın Bağanis Ayrım kəndi. Bunu yadda saxlayaq ki, bunlar eyni kənd deyil”.
Baş nazir əlavə edib ki, Azərbaycanın istədiyi kəndlər qeyri-anklav kəndləridir, yəni Azərbaycan ərazisindədir:
“Kirants inzibati ərazi dairəsinin başçısı Xremli kəndinin adını çəkdi və mən cavab olaraq soruşdum: Tavuş vilayətində Xremli kəndi varmı? İndi fürsətdən istifadə edərək, mövqeyimizi və nəyə hazır olduğumuzu bildirmək istəyirəm”.
Paşinyan Ermənistan hakimiyyətinin nəyə hazır olduğunu təqdim edib.
“Biz deyirik ki, Ermənistan hökuməti Ermənistan Respublikası ilə Azərbaycan Respublikası arasında delimitasiyaya aşağıdakı bölmədə başlamağa hazırdır:
Ermənistan Respublikası tərəfdən Bağanis, Azərbaycan tərəfdən Bağanis Ayrım.
Daha sonra Ermənistan tərəfdən Voskepar kəndi və Voskeparın qarşısındakı sərhəd Azərbaycanın Aşağı Əskipara yaşayış məntəqəsinə uyğun gəlir.
Bundan başqa, Ermənistan tərəfdə Kirants kəndi və onunla üzbəüz yerləşən azərbaycanlıların Xeyrimli kəndi.
Berkaber kəndi Ermənistan tərəfdə və onun qarşısındakı sərhədin bir hissəsi Azərbaycan tərəfdən Qızıl Hacılı kəndi ilə üst-üstə düşəcək. Eyni zamanda, Qızıl Hacılı kəndi bu gün də, dünən də, 20 il əvvəl də Azərbaycanın hakimiyyəti altında olub”, - Paşinyan bildirib.
Paşinyanın sözlərinə görə, Bağanis kəndi Ermənistanın xəritəsində yerləşir, Bağanis Ayrım isə xəritədən kənarda olub, yəni Azərbaycanındır.
“Bağanis buradadır və həmişə bu xəritədə qalacaq, Voskepar, Kirants, Berkaber kəndləri də burada qalacaq. Başqa bir məsələ odur ki, sərhədin delimitasiyası ilə əlaqədar Voskeparın təhlükəsizliyi ilə bağlı suallar yaranır və kənd sakinlərinin qaldırdıqları bütün suallar qanunidir”.
Baş nazir onu Tavuş rayonunun kəndlərini Azərbaycana vermək niyyətində olmaqda ittiham edən keçmiş hakimiyyəti günahlandırıb. O deyib ki, əvvəlki hakimiyyət Kirants-Bağanis magistralında heç bir tikinti işi aparmayıb:
“Yüz dəfə bu yoldan keçmişəm, amma yüz birinci dəfə fikir vermişəm ki, Kirantsdan Bağanisə qədər olan yolda mağazalar, kafe və qonaq evləri yoxdur. Axı niyə? Bu ki dövlətlətarası yoldur...”.
Paşinyan əlavə edib ki, Ermənistan Azərbaycanın 4 kəndini qaytarmaqla dövlət sərhədi əldə etmiş olacaq.
Qeyd edək ki, hazırda Qazax rayonunun erməni işğalı altında 7 kəndi var: Bağanis Ayrım, Aşağı Əskipara, Xeyrimli, Qızılhacılı, Yuxarı Əskipara, Sofulu, Barxudarlı.
Ermənilər 1990-92-ci illərdə işğal etdikləri bu kəndləri qanunsuz olaraq Ermənistanın Tavuş rayonu ərazisinə daxil ediblər.
Azərbaycan Baş nazirinin müavini Şahin Mustafayevin Ermənistan Baş nazirinin müavini Mher Qriqoryanla bu ilin martında keçirdiyi görüşdən sonra rəsmi Bakı işğal edilmiş 4 eksklav olmayan kəndin (Bağanis Ayrım, Aşağı Əskipara, Xeyrimli və Qızılhacılı) mübahisəsiz və dərhal azad edilməsini istəyib.
“Delimitasiya prosesi çərçivəsində Azərbaycanın Ermənistanın işğalı altında olan 4 eksklav kəndinin (Yuxarı Əskipara, Sofulu, Barxudarlı və Kərki) azad edilməsi məsələsi də həll olunacaq", - deyə rəsmi Bakının bəyanatında vurğulanıb.
Ötən həftə Tavuş rayonunda məskunlaşmış ermənilərlə görüşən Ermənistanın baş naziri Nikol Paşinyan Qazaxın işğal altında olan 4 kəndinin (Bağanis Ayrım, Aşağı Əskipara, Xeyrimli və Qızılhacılı) Azərbaycana qaytarmağa məcbur olacaqlarını bildirib. Əks halda, o, müharibə olacağını istisna etməyib.
21-03-2024, 10:37
Goranboyda ferma qəsdən yandırıldı - 230 heyvan öldü
Goranboyda yerləşən fermalardan birini qəsdən yandıran şəxslər saxlanılıblar.
Bu barədə Daxili İşlər Nazirliyinin (DİN) Mətbuat Xidmətindən bildirilib.
Məlumata əsasən, Goranboy Rayon Polis Şöbəsinə (RPŞ) fermalardan birində yanğın hadisəsinin baş verməsi barədə məlumat daxil olub. Hadisə nəticəsində 230 baş xırdabuynuzlu heyvan yanaraq tələf olub.
Araşdırmalarla yanğının qəsdən törədildiyi müəyyən edilib.
Polis əməkdaşlarının keçirdikləri tədbirlərlə yanğın hadisəsinin Gəncə şəhər sakini Məmmədpur Bəhruzun sifarişi əsasında həmyerliləri Allahverdiyev Cavid və Vəliyev Erik tərəfindən qəsdən törədildiyi məlum olub. B.Məmmədpur, C.Allahverdiyev və E.Vəliyev saxlanılaraq istintaqa təhvil veriliblər.
Əməliyyat-istintaq tədbirləri davam etdirilir.
21-03-2024, 09:43
4 qüvvə Paşinyana qarşıdır
Ermənistanın Baş naziri Nikol Paşinyana qarşı - Kreml, Onun yaratdığı erməni müxalifəti, tərksilah edilmiş separatçıların tör-töküntüləri və kilsə birləşib.
Nikol Paşinyanın Qazaxın anklav olmayan 4 kəndi ilə bağlı mövqeyini açıqlaması erməniləri və Qafqazda sabitlik istəməyənləri silkələyib.
N.Paşinyanın 4 kəndi (Bağanis Ayrım, Qızıl Hacılı, Aşağı Əskipara və Xeyrimli) Azərbaycana geri qaytarması qərarı bu qüvvələri radikallaşdırmaqla yanaşı, hökumətə qarşı öz aralarında qeyri-rəsmi ittifaqa sövq edəcək.
21-03-2024, 08:48
Ürəklərdə yaşayan Yengibar müəllim
Böyük ədibimiz M.F.Axundovun bir kəlamı var: “Dünyada insan üçün ən böyük ləzzət yaxşı ad qoyub getməkdir ki, belə bir adı ancaq yaxşı əməllərin müqabilində əldə etmək olar”. C.Məmmədquluzadə də yazırdı: “Elə yaşayasan ki, öləndən sonra da ölməyəsən”... Bu nöqteyi-nəzərdən mərhum Yengibar müəllimin mənalı ömrü nəsillərə nümunə olacaq bir dastana bənzədiləcək.
Yengibar müəllim 1939-cu il noyabrın 14-də Şirvanın Konservatoriyası adlanan Cəyirli kəndində dünyaya göz açmışdır. Körpəliyi Böyük Vətən müharibəsinə təsadüf etmişdir. Atası mərhum Hüseyn əmi 1941-1943-cü illərdə orduda xidmət etmişdir. 1943-cü ildə II qrup müharibə əlili kimi ordudan tərxis olunmuşdur. O, səkkizillik məktəbi Cəyirli, IX-X-cu sinifləri isə Nərimankənd kəndində bitirmişdir. Azərbaycan dilinə, ədəbiyyata, humanitar fənlərə olan həvəsi onu o vaxtkı Azərbaycan Dövlət Universitetinə aparıb çıxarmış, yüksək qiymətlərlə ora qəbul olmuşdur. Universitetdən qabaq Şamaxıda Sabir adına texnikumun İbtidai sinif müəllimi ixtisasına yiyələnmişdir. Uzun illər kənd məktəbində ibtidai sinif müəllimi və ali təhsili başa vurandan sonra Azərbaycan dili və ədəbiyyat müəllimi kimi fəaliyyət göstərmişdir.
Bir gün Filarmoniyada tədbirdə iştirak edirdim. Məşhur bədii qiraət ustası, Xalq artisti Əminə Yusifqızı da həmin tədbirin aparıcılarından biri idi. Təsadüfən fasilədə onunla tanış oldum. Ədəbiyyatşünas alim olduğumu bildirdim. Hansı bölgədən olduğumu soruşdu. Şamaxıdan olduğumu dedikdə o, məndən bir nəfəri soruşdu. Dedi ki, oradan bir tələbə yoldaşım var idi. Adı Yengibar idi. Dedim ki, doğma əmim oğludur. Çox sevindi. Dedi,- çox güclü dilçi və ədəbiyyatçı idi. Aspiranturaya gəlsə idi, elmimiz bir filoloq-alim qazanardı.
20-25 il bundan qabaq Neftçalada bir toy məclisində Tədbir Mahmudov adlı maarif xadimi ilə görüşdüm. O da mənim Cəyirli kəndindən olduğumu biləndə Yengibar müəllimin tələbə yoldaşı olduğunu söylədi və dedi ki, əgər o, elmi fəaliyyətini davam etdirsəydi, böyük ədəbiyyatşünas alim olardı.
Yengibar müəllim məktəb direktoru olana qədər məktəbimiz səkkizillik təhsil ocağı idi. Onun təşəbbüsü, nüfuzu, rayondakı məsul vəzifəli dostlarının köməkliyi ilə 70-ci illərdə məktəbimiz onillik məktəbə çevirildi. Camaatımız bu işdən olduqca sevindi və ona həmişə dua etdilər. Çünki onillik məktəb olmayan vaxtlarda şagirdlər texnikanın azlığından təhsillərini davam etdirə bilmirdilər. Bəziləri kəndimizdən neçə kilometrlərlə uzaqda olan Nərimankənd kəndində və başqa yerlərdə təhsillərini davam edirirdilər.
Yengibar müəllim bilikli, savadlı müəllimləri rəhbərlik etdiyi məktəbə dəvət edərdi, onlara kənddə mənzil tapardı, onlar üçün şərait yaradardı.
Bir sovetlikdə yerləşən qonşu Çalov kəndinin IX və X sinif şagirdləri də bizimlə bir yerdə təhsil alırdılar. Camatımız Yengibar müəllimi indi də xoş xatirələrlə xatırlayırlar.
H.B.Zərdabi demişdir: “El üçün çalışan həmişə yaşayar”... Yaxşı yadımdadır, biz məktəbdə oxuyanda kasıb və ya atası-anası olmayan uşaqlara ildə bir dəfə dövlət tərəfindən geyim verilərdi. Yengibar müəllim ədalət pirinsipini əsas götürüb ailə vəziyyəti acınacaqlı olan şagirdlərə qayğı göstərib, onları sevindirər, paltarı geyindirəndə “mübarəkdir” də deyərdi. Yengibar müəllim ürəyiyumşaq, insanpərvər, xeyirxah şəxs idi. Bu xeyirxahlıq, nəciblik ona mərhum əmim Hüseyn kişidən keçmişdi. Vaxtı ilə nərimankəndli mərhum müəllim Davud Orucov deyərdi ki, Hüseyn kişini xeyirxahlar cəmiyyətinin sədri qoymaq lazımdır. Onunla söhbətim olanda yaxşılıqdan söz açılanda o saat Nizamidən, Söhrab Tahirdən və başqalarından misal çəkərdi. Bəzən də mənə deyərdi ki, ay əmioğlu, yaxşılıq elə möhtəşəm, uca ağacdır ki, hər yerdən görünür. Hərdən əmioğlunu yada salanda bir bənd şeir də yadıma düşür:
Yaxşı insanların sorağındayıq,
Yaxşılar saxlayır yer kürəsini.
Yaxşılar olmasa, hardan bilərik
Bu qoca dünyanın yaxşı, pisini?!
Yengibar müəllim bu dünyaya elə bil yaxşılıq etmək üçün gəlmişdi. O, bilirdi ki, yaxşılıq bütün sevinclərin əsasını təşkil edir. O, insanı düşüncəli, diqqətli, uzaqgörən, müdrik, mərd, safürəkli, xoşbəxt və tərifəlayiq edir, yaxşılıq insanın kiçik dünyasının günəşidir, təmiz vicdan isə onun göy qübbəsidir. Belə insanları həm uca Allah, həm də insanlar sevir. Yaxşı insanlar dünyasını dəyişəndən sonra da anılır, yada salınır və çox hörmətlə xatırlanır. Söhrab Tahir demişkən:
Sədaqətdən, səxavətdən ucadır,
Yer üzündə bəsər kimi qocadır,
Dünya boyda, cəmi üçcə hecadır,
İnsan gedər, adı qalar - “Yaxşılıq”.
Gedənləri yada salar yaxşılıq.
Yengibar müəllimin ömür yolu maraqlı hadisələrlə zəngin, rəngarəng həyat səhifələrindən ibarət olan fəsillərə bölünüb. Onun üzündə həmişə işıqlı bir təbəssüm görünərdi. Ömrünü xalqının mənəvi inkişafına və maariflənməsinə həsr edən Yengibar kimi vətənpərvər ziyalılar dünyanın bəzəyidirlər. O, mülayim təbiətli, xoş sifətli, səmimi, öz halal zəhməti ilə yaşayan, vətənini, xalqını qəlbən sevən xeyirxah, nəcib, sadə və mehirban insan idi. Məktəbimizin məzunları Yengibar müəllimin rəhbərlik etdiyi müəllim kollektivinin nümunəvi tədrisinin nəticəsində ali və orta-ixtisas məktəblərinə qəbul olardılar. Ona görə də məktəbimizin adı, həmişə hər yerdə nümunə kimi göstərilərdi. Elimiz, obamız, camaatımız qədirbiləndir. Sizi unutmaq olarmı?
Yengibar müəllim haqsızlığa, ədalətsizliyə dözməzdi. O qədər vətənpərvər, millətini sevən bir insan idi ki, 37-ci il repressiyasının qurbanları olan H.Caviddən, M.Müsfiqdən, Y.V.Çəmənzəminlidən və bu kimi ədiblərdən söhbət düşəndə qəhərlənərdi və sovet hökumətinin qılıncının qabağının, dalının kəsdiyi bir vaxda deyərdi ki, vallah, bu saxta hökumət vaxt gələcək dağılacaq. Dostları, həmyaşıdları ona deyərdi ki, ehtiyyatlı ol, səndən “danos” yazarlar, vəzifədən çıxararlar. O, həmin an gülə-gülə həyatı qədər sevdiyi M.Ə.Sabirdən bir şeir deyərdi:
Mən belə əsrarı qana bilmirəm,
Qanmaz olub da dayana bilmirəm!
Derlər utan, heç kəsə bir söz demə,
Həq sözü derkən utana bilmirəm!
Siz ömrünüz boyu Allahın adına layiq yaşadınız, Yengibar müəllim. Şair R.Məmmədzadə demiş:
Bir ömrün işığı sənə bəs eylər,
Allahın adına layiq yaşasan...
Yengibar müəllimin ən üstün cəhətlərindən biri də dostluqda sədaqəti, qonaqpərvərliyi idi. Vaxtı ilə Şamaxı şəhərində böyük nüfuz sahibləri olan, xalq arasında hörmət, izzət qazanmış, keçmiş rayon Partiya Komitəsinin məsul işçisi şair Qurbət Əziz, Maarif şöbəsinin müdiri Əkrəm Hüseynov, rayon Maliyyə şöbəsinin müdiri Qulam müəllim, Qəleybuğurd kəndinin məktəb direktoru Şahbaz müəllim, Nərimankənd kənd məktəbinin direktoru Davud Orucov onun yaxın dostları idi. Orta məktəb yoldaşı akademik Mirabbas Qasımov da onun xətrini çox istəyirdi.
Bir maraqlı tarix də heç yadımdan çıxmaz; orta məktəbin IX ya da X siniflərində oxuduğum zaman Yengibar müəllimin evinə iki qonaq gəlmişdi. Biri həmyerlimiz, mərhum akademik Sədi İmanov, biri də bədii qiraət ustası, diktor, Xalq artisti Soltan Nəcəfov idi (sonralar bildim ki, Soltan Nəcəfov vaxtı ilə kəndimizdə müəllim işləmişdir, arzusu bu olub ki, müəllim işlədiyi kəndi ziyarət etsin). Yengibar müəllim necə qonaqpərvərlik etdisə, hər ikisi heyran qaldı. O, belə qonaqpərvərliyinə görə həmişə xatırlanır.
Fikrimcə, biz valideynlərimizdən çox, bizə dərs deyən müəllimlərimizə borcluyuq, Çünki atamız bizi göydən yerə endirmişsə, müəllimlərimiz bizi yerdən göyə qaldırmışdır. Bunu da böyük yunan filosofu Sokrat demişdir.
Aprel ayında Yengibar müəllim dünyasını dəyişdi. Həmin gün elimiz, obamız, onu sevən dostları, qohumları kədər içində idilər...
“Gəlimli, gedimli, son ucu ölümlü dünya, əcəl aldı, torpaq yedi, fani dünya kimə qaldı...”. Yengibar müəllim bunu da orta məktəbdə “Dədə Qorqud” dastanını keçəndə deyərdi. O, indi Cəyirli kənd qəbirsanlığında uyuyur. Gözəl insanların, işıqlı, nurlu ziyalıların, sevimli müəllimlərin məzarı bir ziyarətgah yeridir. Onların müqqəddəs məzarlarını ziyarət etmək, müəllimlərə müqqəddəs bir şəxs kimi səcdə etmək hər birimizin mənəvi borcudur.
Şəhriyar yazırdı:
Bir insan köçürsə dünyadan əgər,
Sən elə bilmə ki, tək bir can gedir.
Hər sönən baxışda saysız diləklər,
Hər kiçik tabutda bir cahan gedir.
Sizin yeriniz həmişə görünəcək, Yengibar müəllim.
R.Rza demişkən:
Elə yaşa, elə yarat,
Bir gün hamıya aydın görünsün
Yerində qalan boşluq...
Ruhun şad olsun, Əziz Yengibar müəllim!
Tahir ŞİRVANLI,
Filologiya üzrə fəlsəfə doktoru
21-03-2024, 08:26
Məryəm Gəncəliyeva yazır: "Hikmətli kəlamı zaman silə bilmir."
Dünyanın bəzəyi insandır. İnsan oğlu dünyaya gəlişi ilə bəşəriyyətə bir düzən verir. Bu düzəndə xoşbəxtlik də var, firavanlıq da, sevinc də. Ən önəmlisi elinə, obasına, Vətəninə bağlı olmaq, onu sevərək yaşamaqdır. Tamxil Ziyəddinoğlu isə harasa tələsən dünyanın şütüyən qatarı kimi mətin addımlarla, saf duyğularla bütövləşmək arzusunda olan böyük bir xalqı mənzil başına çatdıra biləcək bir generala bənzəyir.
Zəngəzurun dəyərli qələm sahibi "Bütöv Azərbaycan" qatarı ilə dünyanı dolaşır, çətin yollar keçir, şehli düzləri aşır, bəzən də gülümsər gözlərlə qarşılaşır. Vətənin isti qucağında yüksək duyğularınızla, yurdu bütövləşdirmək istəyinizlə hər zaman yeriniz vardır. Siz hünər meydanında dərin zəkanın, ümmana dönən ağılın sayəsində eniş- yoxuşdan keçirsiniz. Qələm əhlinin, söz sahibinin yeri həmişə zirvədir. M.Füzuli yazmışdır: “Hər şeydən yüksəkdir sözün məqamı, Hər yerdə sevərlər sahib- kəlamı.”
Tamxil Hacıyev başqalaşan dünyaya güzgü tutur, dərd qarşısında diz çökmür, o, analı dünyanın dərd- qəmini qovan vətən oğludur, günəş kimi qara buludları söz topuna tutur, yorulub yolda qalmır, seçdiyi mənzil başına zəfərlə çatır. Doğum gününüz mübarək, Allah sizə bərəkətli , sağlam ömür versin, ömrünüz tufan görməsin, Tamxil müəllim. Elin layiqli övladlarına vətən borclu qalmır, qiymətli incini, hikmətli kəlamı zaman silə bilmir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!