27-10-2023, 15:27
Tezliklə 3-cü Dünya müharibəsi başlaya bilər - Lukaşenko
Tezliklə 3-cü Dünya müharibəsi başlaya bilər.
Bunu Belarusun prezidenti Aleksandr Lukaşenko jurnalistlərə deyib.
Onun sözlərinə görə, İsrail-Fələstin münaqişəsinin gərginləşməsinin qarşısı alınmazsa, Yaxın Şərqdən 3-cü Dünya müharibəsi başlaya bilər.
Lukaşenko həmçinin bildirib ki, münaqişə tərəflərinin bu və ya digər ölkədə istehsal olunan silahlardan istifadə etməsi hələ heç nəyi sübut etmir. Bu, silah ticarətidir və qanunidir.
"Ola bilsin, kimsə hansısa yolla bu silahları alıb, HƏMAS bu raketləri alıb", - Belarus prezidenti deyib.
Qeyd edək ki, oktyabrın 7-də İsrailə hücumlar olunub. Əvvəlcə Qəzza bölgəsindən reaktiv mərmilərlə kütləvi atəş açılıb, daha sonra döyüşçülər əraziyə qurudan, havadan və sudan daxil olublar.
İsrail müharibə vəziyyəti elan edib. Bundan başqa, İsrailin müdafiə naziri Yoav Qallant ehtiyatda olan hərbçilərin kütləvi çağırışını elan edib.
27-10-2023, 15:11
Zelenski Britaniyanın Baş naziriylə danışıqlar apardı
Ukrayna Prezidenti Vladimir Zelenski və Böyük Britaniya Baş naziri Rişi Sunak arasında telefon danışığı olub.
Bu barədə Prezident Zelenski "X" hesabında bildirib.
"Böyük Britaniyanın Ukraynaya dəstəyi sarsılmaz olaraq qalır və mən bunu yüksək qiymətləndirirəm", - Zelenski qeyd edib.
Zelenski bildirib ki, telefon danışığı zamanı o, Böyük Britaniya Baş nazirini Avdiivka ətrafında döyüşlər barədə məlumatlandırıb:
"Biz gələcək müdafiə əməkdaşlığını, xüsusən də Ukraynanın hava hücumundan müdafiəsi üçün daha çox raket və dron əleyhinə imkanları müzakirə etdik. Mən Baş nazir Rişi Sunakı Rusiyanın Qara dənizdə mülki naviqasiyanı riskə atan hərəkətləri barədə məlumatlandırdım. Ukraynanın taxıl dəhlizi bütün çətinliklərə baxmayaraq işləməyə davam edəcək".
Tərəflər, həmçinin Yaxın Şərqdəki vəziyyətlə bağlı fikir mübadiləsi aparıb.
"Biz gərginliyin dayandırılmasının qlobal birliyin maraqlarına uyğun olduğu barədə razılaşdıq", - Zelenski əlavə edib.
27-10-2023, 14:12
İsrail HƏMAS komandirlərindən daha birini məhv etdi
İsrail Silahlı Qüvvələri HƏMAS batalyonlarından birinin komandirinin məhv edildiyini açıqlayıb.
Bu barədə İsrail Silahlı Qüvvələrinin teleqram kanalında dərc olunan bəyanatda deyilir.
“İsrail Müdafiə Qüvvələri “HƏMAS batalyonunun komandiri Madhat Mübaşir gecə saatlarında öldürülüb”, - bəyanatda bildirilib.
Bundan əvvəl verilən məlumatda Fələstinin “İslami Cihad” təşkilatının yerli qruplarından birinin səhra komandiri Ayser Mohammad Al-Amerin də öldürüldüyü qeyd edilmişdi.
27-10-2023, 13:33
Fələstin-İsrail bütün regionda gərginliyə səbəb olur - Peskov
"Fələstin-İsrail münaqişəsi bütün regionda gərginliyə səbəb olur".
Bunu Kremlin sözçüsü Dmitri Peskov deyib.
O, HƏMAS təmsilçilərinin Rusiyaya səfərini şərh edib: "HƏMAS nümayəndə heyətinin Moskvada nə “Kreml proqramı” var, nə də Kremllə əlaqəsi. Terrorizmin heç bir təzahürünə haqq qazandırmaq olmaz".
Peskov bəyan edib ki, ABŞ Hərbi Hava Qüvvələri İranın silah anbarlarına zərbələr endirdikdən sonra Rusiya ordusunun Suriyadakı münaqişəyə cəlb olunma ehtimalı ilə bağlı heç bir narahatlıq yoxdur: "Rusiya Federasiyası Fələstin-İsrail münaqişəsinin bütün tərəfləri, o cümlədən İsraillə təmasları davam etdirməyi zəruri hesab edir".
Peskov Krımda Ali Radanın keçmiş deputatı Oleq Tsarevə qarşı sui-qəsd cəhdini şərh etməyib və bu barədə hələ ki, məlumatının olmadığını bildirib.
"Putin oktyabrın 27-də Təhlükəsizlik Şurasının daimi üzvləri ilə operativ görüş keçirəcək", - deyə sözçü məlumat verib.
27-10-2023, 13:05
Avropa İttifaqından Qəzzaya 50 milyon avroluq yardım
Avropa İttifaqı Qəzza zolağına 50 milyon avro dəyərində əlavə humanitar yardım ayıracaq.
Bu barədə Avropa Komissiyasının sədri Ursula fon der Leyen bildirib.
Leyen mətbuat konfransında Qəzza zolağına ilk yardımın artıq çatdırıldığını deyib: "Biz Yaxın Şərqdəki vəziyyətlə bağlı uzun və gərgin müzakirə apardıq. Ümumi mövqe çox aydın idi. İsrail HƏMAS terror təşkilatının hücumuna məruz qalıb. İsrail beynəlxalq hüquq və beynəlxalq humanitar hüquq çərçivəsində özünümüdafiə hüququna malikdir. Liderlərdən HƏMAS-ın heç bir ilkin şərt olmadan bütün girovları dərhal azad etməsinə dair güclü çağırış olub. Eyni zamanda, HƏMAS-ın terror fəaliyyətləri ilə Fələstin xalqına zərər verdiyi də məlum olub. Qəzzada humanitar böhranı həll etmək üçün səylərimizi davam etdirməyimiz Komissiya üçün çox vacibdir. Yardım Qəzza zolağına rəvan və sürətlə çatmalıdır".
27-10-2023, 12:21
Sabahın havası
Bakıda və Abşeron yarımadasında oktyabrın 28-də hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Milli Hidrometeorologiya Xidmətindən verilən məlumata görə, gecə və səhər bəzi yerlərdə duman olacaq.
Mülayim şimal-qərb küləyi gündüz cənub-şərq küləyi ilə əvəz olunacaq.
Havanın temperaturu gecə 15-18° isti, gündüz 21-26° isti olacaq. Atmosfer təzyiqi 760 mm civə sütunu olacaq. Nisbi rütubət 60-70% olacaq.
Azərbaycanın rayonlarında havanın əsasən yağmursuz keçəcəyi gözlənilir. Gecə və səhər bəzi rayonlarda duman olacaq. Şərq küləyi əsəcək.
Havanın temperaturu gecə 14-19° isti, gündüz 24-29° isti, dağlarda gecə 6-11° isti, gündüz 15-20° isti olacaq.
26-10-2023, 23:49
İsrail ordusu HƏMAS rəsmisini öldürdü
İsrail ordusu oktyabarın 7-də başlayan hücumun planlaşdırılmasına görə məsuliyyət daşıyan HƏMAS rəsmisini zərərsizləşdirib.
Ordu HƏMAS-ın qərargah rəisinin müavini Şadi Barudun öldürüldüyünü açıqlayıb.
Bildirilir ki, əməliyyat ölkənin Kosmik Agentliyi ilə birlikdə keçirilib. İsrail qırıcıları Şadi Barudun olduğu yerə zərbələr endirib.
Məlumata görə, HƏMAS-ın kəşfiyyat rəhbərinin müavini Şadi Barud başqa bir hərbi komandir Yəhya Sinvarla birlikdə 7 oktyabr hücumunun planlaşdırılmasına cavabdeh olub. Bundan əvvəl Şadi Barud Xan Yunisdəki HƏMAS batalyonuna komandanlıq edib və hücumların planlaşdırılması, informasiya təhlükəsizliyi və hərəkatın kəşfiyyatına görə məsuliyyət daşıyıb.
26-10-2023, 23:14
XİN Fransa nazirinin fikirləriylə bağlı sualı cavabladı
Xarici İşlər Nazirliyinin mətbuat katibi Ayxan Hacızadə Fransanın mədəniyyət naziri Rima Əbdül Mələkin Ermənistanda səsləndirdiyi fikirlərlə bağlı yerli mətbuatın sualını cavablandırıb.
A.Hacızadə Fransanın mədəniyyət naziri Rima Əbdül Mələyin Ermənistana səfəri zamanı Qarabağ bölgəsindəki tarixi və mədəni abidələrin təhlükə altına düşməsi ilə bağlı iddialar qaldırması və onları qorumaq üçün müxtəlif mexanizmlərin yaradılmasına çağırış etməsi ilə bağlı deyib: “Sözügedən səfər və Azərbaycanın Qarabağ bölgəsində mədəni irslə bağlı iddialar Fransa tərəfinin növbəti zəifliyi və qərəzinin nümunəsidir.
Azərbaycan öz ərazilərindəki bütün mədəni və tarixi abidələrin mühafizəsinin vacibliyini və bu xüsusda, öhdəliklərini çox gözəl dərk edir. Fransanın başqa xalqlara məxsus tarixi və mədəniyyət sərvətlərini müsadirə etmiş ölkə kimi belə iddialar qaldırmağa heç bir mənəvi haqqı yoxdur.
Azərbaycanın antiterror tədbirlərindən sonra mədəniyyət və tarixi abidələrin təhlükə altında olması ilə bağlı iddialar əsassızdır və bu, BMT-nin regiona reallaşdırılan iki missiyası tərəfindən də təsdiqlənib.
Təəssüflər olsun ki, Fransa nə keçmiş Ermənistan-Azərbaycan münaqişəsində vasitəçi kimi, nə də UNESCO çərçivəsində nüfuzlu ölkə kimi heç vaxt Ermənistan tərəfindən istər Azərbaycan, istərsə də Ermənistan ərazilərində mövcud tarixi, mədəni və dini abidələrin tamamilə dağıdılmasından narahatlığını ifadə etməyib.
Bundan başqa, məhz Azərbaycan 30 ilə yaxındır ki, Azərbaycanın keçmiş işğal olunmuş ərazilərində və Ermənistanda mədəni irsimizin qəsdən dağıdılması, mənimsənilməsi, dəyişdirilməsi, habelə qanunsuz başqa yerə aparılması ilə bağlı qiymətləndirmə missiyalarının reallaşdırılması çağırışları ilə beynəlxalq təşkilatlara israrla müraciət edib. Təəssüf ki, bu Ermənistan tərəfinin əngəlləri nəticəsində mümkün olmayıb. UNESCO-nun özü də 2005-ci il hesabatında bu faktı təsdiqləyib.
Azərbaycan Respublikasının ərazisində yerləşən mədəni irs mənşəyindən, dünyəvi və ya dini mənsubiyyətindən asılı olmayaraq Azərbaycanın dəyər verdiyi və qoruduğu Azərbaycan xalqının mədəni müxtəlifliyini təcəssüm etdirir.
Bir daha Fransa tərəfini Azərbaycanın daxili işlərinə qarışmamağa və bu cür təxribat xarakterli bəyanatlara son qoymağa çağırırıq”.
26-10-2023, 22:44
İsveçdə Quranı yandıran iraqəsilli şəxs ölkədən qovulur
İsveçdə bir neçə dəfə müqəddəs Quranın yandırılması ilə müşayiət olunan aksiyalar təşkil edən iraqəsilli miqrant Salvan Momika ölkədən deportasiya ediləcək.
Bu barədə İsveç Miqrasiya Agentliyi məlumat yayıb.
Məlumatda deyilir ki, onun yaşayış icazəsi uzadılmayacaq və İsveçə qayıtması beş il müddətinə qadağan ediləcək.
26-10-2023, 22:12
DİN bu rayonlara rəis təyin etdi
Daxili işlər orqanlarında yeni təyinatlar olub.
Daxili işlər naziri general-polkovnik Vilayət Eyvazovun imzaladığı əmrlə Zərdab Rayon Polis Şöbəsinin rəisi, polis polkovnik-leytenantı Azər Əfəndiyev vəzifədən azad edilib. Digər əmrlə o, Qusar Rayon Polis Şöbəsinin rəisi təyin edilib.
Bundan başqa, Qaradağ RPİ-nin 10-cu Polis Şöbəsinin rəisi Ramil Salayev Zərdab RPŞ-nin rəisi təyin edilib.
Həmçinin Qusar RPŞ-nin rəisi, polis polkovniki Eldar İlyasov yaş həddi ilə əlaqədar təqaüdə göndərilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!