12-09-2024, 21:39
Stoltenberqin yeni vəzifəsi məlum oldu
Gələn ay NATO-nun baş katibi postunu tərk edən Yens Stoltenberq Münhen Təhlükəsizlik Konfransının sədri postunu tutacaq.
Bu barədə "Politico" qəzeti mənbələrə istinadən yazıb.
O, 2022-ci ildən konfransa sədrlik edən alman diplomat Kristof Heusqeni əvəz edəcək.
Nəşrin məlumatına görə, Yens Stoltenberq 2025-ci ilin fevralında baş tutacaq 61-ci Münhen Təhlükəsizlik Konfransından sonra yeni vəzifəyə keçəcək. Konfransın keçmiş rəhbəri Volfqanq İşinqer Münhen Təhlükəsizlik Konfransı Fondunun Şurasının prezidenti olaraq qalacaq.
Münhen Təhlükəsizlik Konfransı 1963-cü ilin fevralından hər il keçirilir. Tədbirdə siyasətçilər, qeyri-hökumət təşkilatları, hərbi qulluqçular, biznes nümayəndələri təhlükəsizlik və müdafiə sahəsindəki məsələləri müzakirə edirlər. Son konfrans 16-18 fevral 2024-cü il tarixlərində baş tutub. İştirakçılar Rusiya-Ukrayna münaqişəsini və Yaxın Şərqdə eskalasiyanı müzakirə ediblər.
Yens Stoltenberqin 65 yaşı var. 2000-ci illərdə Norveçin baş naziri, 2014-cü ildə isə NATO-ya rəhbərlik edib.
12-09-2024, 20:56
Maşın piyadanı vurdu, sıxlıq yarandı
Mətbuat prospekti ilə Akim Abbasov küçəsinin kəsişməsində piyada vurulması ilə nəticələnən yol-nəqliyyat hadisəsi baş verib.
Bu barədə Daxili İşlər Nazirliyi Nəqliyyatı İntelektual İdarəetmə Mərkəzindən məlumat verilib.
Qəza səbəbindən Musabəyov parkı istiqamətində sıxlıq yaranıb. Yolda hərəkət intensivliyini artırmaq və sıxlığın aradan qaldırılması məqsədilə DİN-in Nəqliyyatı İntellektual İdarəetmə Mərkəzinin əməkdaşları tərəfindən qeyd olunan istiqamətdə svetoforlara “yaşıl dalğa” rejimi tətbiq edilib.
12-09-2024, 16:21
Ağcəbədidə 26 yaşlı qız özünü güllələdi
Ötən gün Ağcabədi rayonunda intihar hadisəsi baş verib.
Laçın rayon Qarakeçdi kənd sakini, 1998-ci il təvəllüdlü Ülviyyə Baxşəlizadə yaşadığı Taxtakörpü qəsəbəsidəki evdə ov tüfəngindən atəş açaraq özünə xəsarət yetirib.
Ü.Baxşəlizadə xəstəxanaya çatdırılsa da, orada ölüb.
Faktla bağlı Laçın Rayon Prokurorluğunda araşdırma aparılır.
12-09-2024, 16:16
MSK Natiq Cəfərlinin şikayətini təmin etmədi
Sentyabr 1-də keçirilmiş növbədənkənar parlament seçkilərində 33 saylı Xətai 1-ci Seçki Dairəsinin bəzi seçki məntəqələrində pozuntularla bağlı iddialar araşdırılıb.
Bu barədə Mərkəzi Seçki Komissiyasının (MSK) bu gün keçirilən iclasında məsələ müzakirə edilib.
MSK-nın Ekspert qrupunun üzvü Ramiz İbrahimovun təqdimatına əsasən, bu barədə deputatlığa namizədliyi qeydə alınmış Cəfərov Natiq Mehman oğlu MSK-ya müraciət edib.
Namizəd iddia edib ki, dairənin 10, 21, 11, 18, 23, 32, 20, 38 saylı seçki məntəqələrində pozuntular qeydə alınıb.
Araşdırma zamanı iddia edilən pozuntuların əsasını tapmadığı müəyyən edilib. Namizədə seçki məntəqəsindən 10 videogörüntü təqdim edilib. Videolarda 1, 24 və 25 saylı seçki məntəqələrində səsvermə kabinlərindən iki nəfərin eyni anda çıxdığı görünüb. Məlum olub ki, həmin şəxslərin biri seçici, digəri isə ona kömək edən şəxsdir. Ona görə bu, qanun pozuntusu hesab edilməyib.
Müəyyən edilib ki, şikayətin təmin edilməsi üçün hüquqi əsaslar yoxdur.
R.İbrahimov əlavə edib ki, videoda əks olunan üç seçicidən biri gözdən əlil, digərləri də eyni şəkildə köməyə ehtiyacı olan şəxslər olub. Buna görə, həmin seçicilərin özəl durumu ilə bağlı seçici siyahısında qeyd aparılıb.
Qərar səsverməyə çıxarılaraq qəbul edilib.
12-09-2024, 16:08
Yol qəzasında ölən piyada Qarabağ qazisidir
Bakı şəhəri Sabunçu rayonu Bakıxanov qəsəbəsində piyadanın ölümünə səbəb olan yol qəzası ilə bağlı yeni xəbər var.
Sentyabrın 10-da Bakıxanov qəsəbəsinin Sakit Qocayev küçəsində “Daewoo” markalı avtobusla vurulan və nəticədə vəfat edən piyada Qarabağ qazisi imiş.
Hadisə yerində aldığı ağır xəsarətlərdən vəfat edən 1971-ci il təvəllüdlü Elmidar Kazım oğlu Xudiyev Cəbrayıl rayonundandır, o Qarabağ müharibəsinin döyüşcüsü olub.
Mərhum E.Xudiyev cəbhənin Cəbrayıl, Zəngilan, Fizuli, Qubadlı, Ağdam istiqamətində gedən döyüşlərdə fəal iştirak edib.
Onun qardaşı Eldar Kazım oğlu Xudiyev də I Qarabağ döyüşlərinin iştirakçısı olub.
Xatırladaq ki, hadisəni 46 saylı marşrut xətti üzrə hərəkət edən “Daewoo” markalı avtobusun sürücüsü, 1962-ci il təvəllüdlü Akif Ələkbərli törədib.
Faktla bağlı Sabunçu RPİ-də cinayət işi açılıb, araşdırma aparılır.
12-09-2024, 15:53
Formula 1-ə saxta bilet satan şəxs saxlanıldı
DİN Kibercinayətkarlıqla Mübarizə Baş İdarəsi tərəfindən “Formula 1 Azərbaycan Qran-Prisi”nə saxta bilet satan şəxs saxlanılıb.
Bu barədə DİN-dən bildirilib.
Məlumata görə, DİN Kibercinayətkarlıqla Mübarizə Baş İdarəsinin əməkdaşları tərəfindən həyata keçirilən əməliyyat nəticəsində “2024 Formula 1 Azərbaycan Qran-Prisi” yarışlarına saxta biletlər hazırlayaraq satışını təşkil edən əvvəllər məhkum olunmuş Elmar İsrafilov saxlanılıb.
Müəyyən edilib ki, bu şəxs “Instagram” sosial şəbəkəsində yaratdığı profillərdə onlayn qaydada məlumatları dəyişdirilmiş saxta biletlər yerləşdirərək satışı ilə məşğul olub. E.İsrafilov bu yolla 30 nəfərdən artıq şəxsə saxta bilet sataraq maddi gəlir əldə edib. Aparılan əməliyyat-texniki tədbirlər zamanı saxlanılan şəxsin törətdiyi hüquqazidd əməllər tam sübuta yetirilib.
Faktla bağlı Baş İdarədə araşdırmalar davam etdirilir. Sonda bir daha qeyd edək ki, “Formula 1 Azərbaycan Qran-Prisi”ni canlı izləmək istəyən şəxslərə biletləri yalnız yarışın rəsmi internet ünvanı, digər partnyor sayt və satış məntəqələrindən əldə etmələri tövsiyə olunur.
12-09-2024, 15:45
Qazaxıstanda elektromobillər üçün parkinq pulsuz olacaq
Qazaxıstanda elektrik avtomobilləri üçün pulsuz parkinqi nəzərdə tutan qanun sentyabrın 18-dən qüvvəyə minir.
Bu barədə "Kazinform" agentliyi məlumat yayıb.
Bununla belə, elektromobil sahibləri xüsusi reyestrdə qeydiyyatdan keçməlidirlər.
Belə ki, Almatı rəhbərliyi bildirib ki, elektrikli nəqliyyat vasitələrinin sahibləri təsdiqedici sənədi olduqda ictimai dayanacaqlardan pulsuz istifadə edə bilərlər.
Bunun üçün isə xüsusi reyestrdə qeydiyyatdan keçmək mütləqdir.
12-09-2024, 15:29
Papikyan çinli həmkarı ilə regionu müzakirə etdi
Ermənistanın müdafiə naziri Suren Papikyan Çin Xalq Respublikasına səfəri çərçivəsində bu ölkənin müdafiə naziri admiral Donq Jun ilə görüşüb.
Görüş zamanı həmsöhbətlər iki ölkə arasında müxtəlif sahələrdə, o cümlədən müdafiə sahəsində "yüksək səviyyəli əlaqələrin əhəmiyyətini" qeyd ediblər.
"Tərəflər, həmçinin hərbi əməkdaşlığın son illərdə, o cümlədən yeni sahələrdə mühüm irəliləyiş əldə etdiyini vurğulayıblar", - məlumatda deyilir.
Nazirlər Ermənistan-Çin əməkdaşlığını, o cümlədən iki ölkənin Silahlı Qüvvələri arasında yüksək səviyyəli təmasları daha da inkişaf etdirməyə hazır olduqlarını bildiriblər.
Beynəlxalq və regional təhlükəsizliklə bağlı bir sıra məsələlər də müzakirə olunub.
12-09-2024, 15:13
Kursk cəbhəsindəki son durum: Rusiya kəndləri alır, Ukrayna geri çəkilmir
Rusiya ordusuna yaxın hərbi teleqram kanallarında Rusiya ordusunun Kursk vilayətində Ukraynaya qarşı əks-hücum əməliyyatın başlaması barədə xəbərlər yayılıb.
ABŞ-da yerləşən Müharibələrin Tədqiqatı İnstitutu (ISW) Kursk bölgəsində son 2 gündə Rusiya qüvvələrinin aktivləşməsini qiymətləndirib.
İnstitutu mütəxəssisləri bu əməliyyatın tərəqqisi ilə bağlı müəyyən nəticə çıxarmaq üçün çox erkən olduğunu düşünürlər.
Onlar Rusiya ordusunun Ukraynanın idarə etdiyi əraziləri daha da böyük bir hücumdan əvvəl "kəsməyə" cəhd edə biləcəyi qənaətindədirlər.
İnstitutun xülasəsində deyilir ki, sentyabrın 11-dək Rusiya hərbçiləri Korenevo kəndi yaxınlığında bəzi mövqeləri götürə biliblər. Bundan əlavə, sentyabrın 10-da 106-cı hava qüvvələri bölmələri Snaqost kəndinin şimal və şimal-şərqində irəliləməyi bacarıb.
Mütəxəssislər qeyd edir ki, Rusiya Federasiyası ordusu Kursk bölgəsindəki bir neçə yaşayış məntəqəsində nəzarəti bərpa edə bilib. Buna cavab olaraq, Ukrayna qoşunları qərbdə yeni hücumlara davam edir.
ISW-nin məlumatına görə, "Rusiya qüvvələri Kurskda Ukrayna irəliləməsini kəsmək niyyətində ola bilər və sonra Ukrayna qoşunlarını Rusiya ərazisindən kənarlaşdırmağa cəhdləri üçün daha mütəşəkkil və incə addımlara başlamaq niyyətindədir".
"Bu ilkin əks hücumlar zamanı Rusiya hərbi komandanlığının 155-ci dəniz briqadası və 51-ci paraşüt-sərnişin alayının bir hissəsinə etibar edilməsi ehtimalı var, lakin çox güman ki, digər bölmələr döyüşə girəcək", - mütəxəssislər deyirlər.
Bu ərazidə fəaliyyət göstərən Rusiya qüvvələrinin Ukrayna silahlı qüvvələrini yerindən kənarlaşdıra bilməməsi ilə bağlı hələ proqnoz verməyə hazır deyillər.
Qeyd edək ki, Ukraynanın Kursk vilayətində hərbi əməliyyatları avqustun 6-da başlayıb. Volodimir Zelenski bildirib ki, Ukrayna Silahlı Qüvvələri artıq yüzdən çox yaşayış məntəqəsinin daxil olduğu 1300 km Rusiya ərazisinə nəzarət edir. TASS agentliyi ötən gün Rusiya Silahlı Qüvvələrinin Baş Hərbi-Siyasi idarəsinin rəisinin müavini, “Axmat” xüsusi təyinatlılarının komandiri Aptı Alaudinova istinadən əməliyyatla bağlı bir sıra detalları açıqlayıb.
Alaudinov deyib ki, Rusiya ordusu Kursk vilayətində 10-a yaxın yaşayış məntəqəsini geri alıb. "Ukrayna Silahlı Qüvvələri Kursk vilayətində çox ağır itkilər verir və başa düşməyə başlayıblar ki, bu ərazini tutmaq onlar üçün çətindir", - o qeyd edib.
Ukrayna tərəfi açıqlamalara münasibət bildirməyib. Rusiya Müdafiə Nazirliyi də əks-hücum barədə məlumat verməyib.
12-09-2024, 14:47
Serbiya Prezidenti Muxtar Babayevi qəbul edib
Serbiya Prezidenti Aleksandar Vuçiç Belqradda Azərbaycanın ekologiya və təbii sərvətlər naziri, COP29 prezidenti Muxtar Babayevlə görüşüb.
Bu barədə Serbiya dövlət başçısı sosial şəbəkələrdəki hesabında paylaşım edib.
Serbiya Prezidenti qeyd edib ki, M.Babayevlə məhsuldar danışıqlar zamanı iki ölkə üçün vacib olan mövzuları, o cümlədən COP29-a hazırlıqları müzakirə edib:
“Serbiyanın davamlı inkişaf tədbirlərinə və iqlim dəyişikliyi ilə mübarizəyə töhfə verəcək ekoloji təşəbbüslərə sadiqliyini vurğulamaq istərdim. Söhbət zamanı Serbiyanın COP29 gündəliyinin əsas mövzusu olan iqlimin maliyyələşdirilməsi təşəbbüsünü dəstəklədiyini də vurğuladım”.
A.Vuçiç bildirib ki, COP29 prezidenti ilə danışıqlar zamanı “yaşıl keçid”ə qlobal investisiyanın vacibliyi vurğulanıb: “Serbiya qlobal iqlim məqsədlərinə nail olmaq üçün birgə töhfə vermək naminə sıx əməkdaşlığa və təcrübə mübadiləsinə hazırdır”.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!