4-05-2024, 12:19
Müsavat Partiyası parlament seçkilərində iştirak edəcək
“Bilirsiniz ki, Azərbaycanda yaxın vaxtlarda parlament seçkiləri olacaq. Bu seçkilər bizim üçün çox mühümdür”.
Bu fikirləri Müsavat Partiyasının XI qurultayında partiyanın hazırkı başqanı Arif Hacılı deyib.
“Müsavat Partiyası bu seçkilərdə iştirak etmək əzmindədir. Bu seçkilərdən imtina etmək niyyətində deyilik. Bütün seçki dairələri üzrə seçkilərdə iştirak edəcəyik. Seçki komandaları hazırlanmalıdır, maliyyə fondlarının yaradılması barədə düşünməliyik. Seçkilərlə bağlı platforma layihəsi hazırdır. Seçkilərdə “Azadlıq, Ədalət, Hüquqi dövlət” şüarı ilə iştirak edəcəyik”, - deyə o bildirib.
4-05-2024, 12:05
Sumqayıtda ana iki azyaşlı övladı ilə itkin düşüb
Sumqayıtda ana və övladları itkin düşüb.
1991-ci il təvəllüdlü Alıyeva Şəbnəm Sahib qızı övladları, 2013-cü il təvəllüdlü Alıyev Ayxan Nəsrəddin oğlunu və 2012-ci il təvəllüdlü Alıyeva Ayan Nəsrəddin qızını da götürərərək 4-cü mikrorayonda yaşadığı evdən çıxıb gedib və geri qayıtmayıb.
Faktla bağlı polisə məlumat verilib.
4-05-2024, 11:58
Yeni ixtisaslarla bağlı meyarlar müəyyənləşdi
Yeni təhsil proqramları əsasında təsnifata yeni ixtisasın əlavə olunması halları müəyyənləşib.
Elm və Təhsil Nazirliyinin kollegiyasının təsdiqlədiyi qərarla əmək bazarının dəyişən tələblərinə uyğun yeni təhsil proqramları əsasında ixtisaslı kadrların hazırlanması məqsədi ilə təsnifata yeni ixtisaslar əlavə oluna bilər.
Təsnifata yeni ixtisasın əlavə olunması maraqlı tərəflərin (assosiasiyalar, ittifaqlar, işəgötürənlər, işəgötürən birlikləri, dövlət orqan və qurumları, sahibkarlar, təhsili müəssisələrinin elmi-pedaqoji heyəti/mühəndis-pedaqoji heyət və sair) təşəbbüsü əsasında həyata keçirilir.
Təsnifata yeni ixtisasın əlavə olunması təşəbbüsü ilə çıxış edən maraqlı tərəflər əsaslandırıcı müraciətlərini müvafiq təhsil müəssisəsinə təqdim edirlər.
Müvafiq təhsil müəssisəsi təsnifata yeni ixtisasın əlavə olunması barədə müraciətə 1 (bir) ay müddətində müəssisənin Elmi Şurasında/Pedaqoji Şurasında baxır və müraciəti əsaslandırıcı hesab etdiyi halda, maraqlı tərəflərin, eləcə də mütəxəssislərin və ekspertlərin iştirakı ilə İşçi Qrupunun yaradılması barədə qərar qəbul edir.
İşçi Qrupu 3 ay müddətində təklif olunan yeni ixtisasın bu Qaydaların 2-ci hissəsi ilə müəyyən edilmiş ümumi tələblərə uyğunluğunu araşdırır, yeni ixtisas üzrə əmək bazarının mövcud vəziyyətini və gələcək prespektivlərini təhlil edir və qiymətləndirir, işəgötürənlərin (işəgötürən birliklərinin) rəyini alır, beynəlxalq təcrübəni öyrənir, əmək bazarının yeni ixtisas üzrə kadrlara olan potensial tələbatını müəyyən edir və bununla bağlı hazırlanmış sənədləri və materialları (hesabatlar, arayışlar, təqdimatlar, təhlillər, araşdırmalar, sorğular və s.) təhsil müəssisəsinin Elmi Şurasına/Pedaqoji Şurasına təqdim edir.
İşçi Qrupu müvafiq sənədlərin hazırlanmasını 3 ay müddətinə tamamlaya bilməzsə, təhsil müəssisəsinin Elmi/Pedaqoji Şurası qarşısında müddətin artırılması barədə vəsatət qaldırır. Vəsatət məqsədəuyğun hesab edildiyi halda təhsil müəssisəsinin Elmi/Pedaqoji Şurası müddətin ən çoxu bir ay müddətinə artırılması barədə qərar qəbul edir.
Təhsil müəssisəsinin Elmi Şurası/Pedaqoji Şurası İşçi Qrupunun təqdim etdiyi sənədlər əsasında təsnifata yeni ixtisasın əlavə olunması təklifinə baxır və müvafiq qərar qəbul edir. Şura yeni ixtisasın açılması barədə müsbət qərar qəbul etdiyi halda, İşçi Qrupuna 1 ay müddətində aşağıdakı sənədlərin hazırlanması barədə tapşırıqlar verir:
- təsnifata yeni ixtisasın əlavə olunması barədə əsaslandırma (yeni ixtisasın bu Qaydaların 2-ci hissəsinə uyğunluğu göstərilməklə);
- müvafiq pillə və səviyyə üzrə yeni ixtisasın təhsil proqramının layihəsi;
- təhsil proqramının (ixtisasın) təlim nəticələrinin peşə və kvalifikasiya standartlarına uyğunluğu cədvəli;
- təhsil proqramının (ixtisasın) təlim nəticələrinə uyğun peşələr üzrə orta müddətli dövr üçün kadrlara olan tələbat barədə məlumat.
Bu Qaydanın 3.6-cı bəndinə əsasən hazırlanmış sənədlər və materiallar təhsil müəssisəsinin Elmi Şurasında/Pedaqoji Şurasında müzakirəyə çıxarılır və Şuranın müsbət qərarı olduqda təsnifata yeni ixtisasın əlavə olunması barədə Elm və Təhsil Nazirliyi qarşısında vəsatət qaldırılır.
Təsnifata yeni ixtisasın əlavə olunması barədə Nazirliyə təqdim olunan vəsatət məktubuna aşağıdakı sənədlər əlavə edilir:
- təsnifata yeni ixtisasın əlavə olunması barədə maraqlı tərəflərin təhsil müəssisəsinə rəsmi müraciəti ( maraqlı tərəf təhsil müəssisələrinin elmi-pedaqoji/mühəndis-pedaqoji heyəti olduqda onların təhsil müəssisəsinin rəhbərliyinə ünvanlanmış yazılı müraciəti);
- təsnifata yeni ixtisasın əlavə olunması barədə İşçi Qrupunun yaradılmasına dair təhsil müəssisəsinin Elmi Şurasının/Pedaqoji Şurasının qərarı;
- yeni ixtisas üzrə İşçi Qrupunun bu Qaydaların 3.5-ci bəndinə uyğun hazırladığı sənədlər və materiallar (hesabatlar, arayışlar, təqdimatlar, təhlillər, araşdırmalar, sorğular və s.);
Nazirlik tərəfindən təhsil müəssisəsinin təqdim etdiyi sənədlər və məsələ ilə bağlı Təhsildə Keyfiyyət Təminatı Agentliyinin və Elm v Ali Təhsil üzrə Dövlət Agentliyinin/ Peşə Təhsili üzrə Dövlət Agentliyinin (bundan sonra- Agentliklər) rəy və təklifləri əsasında təsnifata yeni ixtisasın əlavə olunması barədə vəsatətin bu Qaydaların 2-ci hissəsinə uyğunluğu 1 ay müddətində yoxlanılır.
Təsnifata yeni ixtisasın əlavə olunması barədə təhsil müəssisəsinin vəsatətinin bu Qaydaların 2-ci hissəsinə uyğun olmadığı Nazirlik tərəfindən müəyyən edildiyi halda, bu barədə təhsil müəssisəsinə səbəbi göstərilməklə məlumat verilir.
Nazirlik tərəfindən təsnifata yeni ixtisasın əlavə olunması barədə təhsil müəssisəsinin vəsatəti məqsədəuyğun hesab edildiyi halda, bununla bağlı “Normativ hüquqi aktlar haqqında” Azərbaycan Respublikasının Konstitusiya Qanununa uyğun olaraq müvafiq normativ hüquqi aktın layihəsi hazırlanır və Azərbaycan Respublikasının Nazirlər Kabinetinə təqdim edilir.
Təhsil müəssisəsi bu Qaydaların 3.10-cu bəndində göstərilən məlumatı aldıqdan ən azı 3 ay sonra məlumatda qeyd olunan səbəbləri aradan qaldırılmaqla Nazirlik qarşısında təkrar vəsatət qaldıra bilər.
4-05-2024, 11:22
Qərbi Azərbaycan İcmasında yeni komissiya yaradıldı
Qərbi Azərbaycan İcmasında hüquq komissiyası yaradılıb.
Bu barədə İcmanın sədri Əziz Ələkbərli “Qərbi Azərbaycana qayıdışın beynəlxalq-hüquqi əsasları” adlı beynəlxalq elmi konfransda çıxışı zamanı məlumat verib.
O bildirib ki, həmin komissiyaya hüquqşünaslar cəlb olunub: “Onlar Qərbi azərbaycanlıların beynəlxalq hüquqi kontekstdə öz doğma yurdlarına necə qayıda biləcəkləri barədə araşdırmalar aparacaqlar”.
Qeyd edək ki, Hüquq Komissiyasının sədri hüquq elmləri doktoru, professor Zahid Cəfərovdur.
4-05-2024, 10:59
Müsavat Partiyasının qurultayı keçirilir
Müsavat Partiyasının XI qurultayı keçirilir.
Müsavat Partiyasının başqanlığına yeganə namizəd İsa Qəmbərdir.
Müsavat başqanının müavini, Divan üzvü Osman Kazımov və Müsavatın Səbail təşkilatının üzvü Natiq Ulubəy başqanlığa namizədliklərini açıqlasalar da, İsa Qəmbər namizədliyini irəli sürdükdən sonra qurultaydan öncə onlar geri çəkiliblər.
Qurultayda partiyanın Məclis üzvləri də seçiləcək.
4-05-2024, 10:40
Qızdırması olan 41 yaşlı qadın xəstəxanada öldü
Sumqayıtda 41 yaşlı qadın xəstəxanada ölüb.
Hadisə Sumqayıt şəhər Təcili Tibbi Yardım Xəstəxanasında qeydə alınıb.
1983-cü il təvəllüdlü Turanə Lebey qızı Hacıyeva 2 gün öncə Qax rayonundan qızdırması olduğu üçün xəstəxanaya gətirilibmiş.
Faktla bağlı araşdırma aparılır.
4-05-2024, 10:21
Azərbaycan neftinin qiyməti 85 dollara düşüb
"Azeri Light" markalı Azərbaycan neftinin qiyməti 85 dollara düşüb.
Dünya bazarında "Azeri Light" markalı Azərbaycan neftinin 1 barelinin qiyməti 0,69 ABŞ dolları, yaxud 0,80 % azalaraq 85,27 ABŞ dolları təşkil edib.
Azərbaycanın builki dövlət büdcəsində bir barel neftin orta qiyməti 60 ABŞ dollarından hesablanıb.
Xatırladaq ki, "Azeri Light" neftinin ən aşağı qiyməti 2020-ci il aprelin 21-də (15,81 ABŞ dolları), maksimal qiyməti isə 2008-ci ilin iyulunda (149,66 ABŞ dolları) qeydə alınıb.
4-05-2024, 07:50
İSMAYIL MƏRCANLI İMANZADƏNIN POEZIYASI
İmanzadə İsmayıl Səlim oğlu-Cəbrayıl rayonunun Böyük Mərcanlı kəndində anadan olub. 1993-cü ilin noyabr ayından müvəqqəti olaraq Mingəçevir şəhərində məskunlaşıb. 1980-cı ildən indiyə kimi 30 kitabı nəşr olunub. Əlliyə yaxın şeirinə Şəfiqə Axundova, Faiq Sücəddinov, Nadir Əzimov, Məlahət Həmidqızı, Razim Paşayev və Əfsanə Rəhbərqızı tərəfindən mahnı bəstələnib. Uşaqlar üçün yazdığı şeirlərin bir qismi orta məktəb dərsliklərində, uşaq şeirləri antalogiyasında dərc olunub. Şeirlərindən bir qismi xarici dillərə (rus, moldavan, türk, ingilis, serb...) tərcmə olunub. “Xocalı notları” adlı pyesi 1996-cı ildə Mingəçevir Dövlət Dram Teatrında tamaşaya qoyulub. Xeyli sayda nəsr əsərlərinin də (povest, hekayə, novella) müəllifidir.
1999-cu ildən Azərbaycan Yazıçılar Birliyi Mingəçevir bölməsinə rəhbərlik edir.
ŞƏHİDLİYİN ZƏFƏR NƏĞMƏSİ
Tanrı dəhgahınadır, Şəhidim, son səfərin,
Yadlara göz dağıdır, qazandığın Zəfərin.
Hamı sənə ürəkdən deyir, Əhsən, Afərin!
Vətən-yurd sevgisidir halal qazancın-varın –
Əbədi yolçususan nur saçan sabahların!
Qarı düşmən,- “Qarabağ-Azərbaycandır!”-dedin,
Torpağım, dağım-daşım ürəkdir-candır-dedin!
Şəhid ya Qazi olmaq, şərəfdir-şandır-dedin!
Nəqş elədin imzanı torpağa al qanınla –
Tanındın hər tərəfdə isminlə, ünvanınla!
Uğrunda can verdiyin bu ana torpaq sənin,
Döyüş günü səsini əks etdirən dağ sənin.
Bayraqdarı olduğun üçrəngli bayraq sənin,
Şəhid ucalığında vətən daşına döndün –
Azadlıq nəğməsinə, Zəfər marşına döndün!
Ünyetməyən məkana qalxıb ölümsüz oldun,
Andında, peymanında, ilqarında düz oldun.
Qarı düşmən önündə hər an yenilməz oldun,
Məzarın and yeridir, adın hər qəlbdə naxış –
Şəhidim, əhsən sənə, hünərinə min alqış!
31.10.2021
ARAZ NƏMLİ GÖZLƏRİMDƏN AXIRMIŞ...
Ürəyimdə sızıldayan dərd çayım,
Qismətindən hələ incik-pərt çayım.
Bakı-Təbriz qiyafəli mərd çayım,
Deyən varmı doluxsunub heç nədən,
Göz-göz olan yaraları qövr edən.
Qəm-qüssəsi gör necə də ağırmış -
Araz nəmli gözlərimdən axırmış!
Yaranışdan həm Sultandı, həm də Xan,
Bir düşməni gödənsökən, ev yıxan.
O birisi hürə-hürə vurnuxan,..
Bel sütunu Xoy, Ərdəbil, Qaradağ,
Qibləgahı Zəfər taclı Qarabağ...
İllər boyu bəxtinə qar yağırmış -
Araz nəmli gözlərimdən axırmış!
Xudafərin daş köynəkli dastanı,
Yağı bəlli, namərd aşkar, dost hanı...
Görən varmı heç möhləti-amanı,
“Gülüstan”da şux qaməti bükülən,
“Türkmənçay”da gözünə mil çəkilən.
Xəmirini kimlər dərddən yoğurmuş -
Araz nəmli gözlərimdən axırmış!
Həsrət yükü hələ o tay, bu taylı,
Bəd taleyi nə sovqatlı, nə paylı...
Hayqırtısı hərdən cəngli-haraylı,
Gorum çatlar qisas qalsa sabaha...
Gülsə üzü, deyərəmmi heç daha,
Tanrı ona gəc nəzərlə baxırmış -
Araz nəmli gözlərimdən axırmış!..
04.04.2023
GƏLMİŞƏM
Bir qalam kösövəm-odam,
Bükülmüş qolam-qanadam.
Çoxlarına hələ yadam,
Bir az uzaqdan gəlmişəm.
Tapdansam da torpaq kimi,
Dözdüm hər dərdə dağ kimi...
Yaşıl üzlü yarpaq kimi
Kökdən-budaqdan gəlmişəm.
Kürün avazı-səsiyəm,
Xan Arazın bəstəsiyəm.
“Qarabağ şikəstəsi”yəm,
Dildən-dodaqdan gəlmişəm.
Bələd olsam da “arxına”,
Qarışmamışam axına.
Əslim bəllidir çoxuna,
Halal torpaqdan gəlmişəm.
Alnım açıqdır, üzüm ağ,
Nə astaram, nə də yamaq...
Söz mülkünə min il qabaq,
Ya da lap çoxdan gəlmişəm.
Köhnə komayam, yuvayam,
Nə cəngəm, nə də davayam.
Bir udum suyam, havayam
Saflaşıb Haqdan gəlmişəm.
22.08.2023
OTUZ İL
Otuz il yanımdan yel kimi keçdi,
Əymədim qəddimi qərib eldə də.
Sandım dönük bəxtim yol azmış köçdü,
İşartı axtardım soyuq küldə də.
Hərdən yamanlıqla durdum üz-üzə,
Kölgəmi daşlayan çoxmuş heç demə!
Döndüm misra-misra kəlməyə-sözə,
Səsim bürünsə də qüssəyə, qəmə.
Otuz il boylandım Cəbrayıla mən,
Yuxumda dil açdı aranım, dağım.
Xəyalən adladım Xudafərindən,
Böyük Mərcanlıdan gəldi sorağım.
Otuz il səmtini itirdim köçün,
Heç demə içimdə boğulan səsmiş.
Bildim bu günlərə çatmağım üçün
Yurdumun bir udum havası bəsmiş!
Otuz il ələdim dostu, doğmamı,
Bildiyim çox şeyi üzə vurmadım.
Minnətsiz qazandım halal loxmamı,
Minnətli heç nəyə yaxın durmadım...
Düşmənlə savaşda zəfər müjdəli
Ərənlər yolların tilsimin qırdı.
Elə bil təzədən Tanrının əli,
Yaralı könlümdə toy-büsat qurdu...
O illər dönməyə geriyə bir də,
Mənim yurd həsrətim lal bir hənirmiş.
Hərdən sızlayanda Mingəçevirdə,
Qəlbim yurd yerimdə tüstülənirmiş...
29.02.2024
KAŞ, MƏNİM QARŞIMA HEÇ ÇIXMAYAYDIN...
(Uzun illərdən sonra təzədən qarşıma çıxan bir xanıma)
Dönük bəxtə əl açmağım əbəsdi,
Uğursuz bir sevgi boğulmuş səsdi...
Səni görən kimi ürəyim əsdi,
Kaş, mənim qarşıma heç çıxmayaydın!
Bəlkə baxışların qəfil tufanmış,
Ötəri istəyin ömrü bir anmış!
Deyim, deməyimmi, ay dili yanmış,
Kaş, mənim qarşıma heç çıxmayaydın!
Hara tələsirdin... bəs, niyə təkdin,
Dərə bilmədiyim güldün, çiçəkdin...
Səbrimi təzədən çarmıxa çəkdin,
Kaş, mənim qarşıma heç çıxmayaydın!
Yəqin mürgülüdür hələ qismətin,
Çöhrəndə iz salıb həyan, ismətin.
Səni ovundurmaq çətinmiş, çətin
Kaş, mənim qarşıma heç çıxmayaydın!
Nə şirin xəyalsan, nə röya-yuxu,
Daşa dəyibdimi eşqinin oxu?
De, niyə bu qədər gecikdin axı,
Kaş, mənim qarşıma heç çıxmayaydın!
Bilsən-bilməsən də istəyim laldı,
Hər anım cavabsız sorğu-sualdı.
Getdin... yenə könlüm yaralı qaldı,
Kaş, mənim qarşıma heç çıxmayaydın!
06.03.2024
YAŞDA NƏ GÜNAH VAR AXI ...
Böhtanın tez çıxır boyu,
Nə çoxmuş iblisin tayı...
Kəsək bulandırır suyu,
Daşda nə günah var axı?!
Yamanlıq duranda üzə,
Dərd qənim kəsilir bizə.
Dildi kül üfürən gözə,
Başda nə günah var axı?!
Qəlb ömrün acısın dadan,
Yamanca fəndgirmiş nadan...
Gözdür adamı aldadan,
Qaşda nə günah var axı?!
Haqsızlıq səbri daşdıran,
Yalan söz göz qamaşdıran...
Ağılmış başı çaşdıran,
Yaşda nə günah var axı?!
09.10.2023
ÇAYIN SAHİLİNDƏ BİR QIZ AĞLAYIR
Siyah saçlarını oynadır külək,
Qəmli sinəsindən asılıb bilək.
Sanki göydən enmiş mələkdir, mələk
Nədənsə dayanıb yalqız ağlayır -
Çayın sahilində bir qız ağlayır!
Nəmli gözləriylə baxır sulara,
Bilən yox fikrində üz tutub hara.
Dönüb sərt küləyə, çevrilib qara,
Göyərmiş əlləri bumbuz, ağlayır -
Çayın sahilində bir qız ağlayır!
Əsir yarpaq kimi sızladıqca can,
Qəfil bir ölümmü axtarır hər an?
Asılıb durubdu göz yaşlarından,
Elə bil bənövşə, nərgiz ağlayır -
Çayın sahilində bir qız ağlayır!
Qəlbindən keçəni suya danışmır,
Çöküb çöhrəsinə həya-danışmır.
Nisgili gəlməyir saya-danışmır,
Gah dodaq səyriyir, gah üz ağlayır -
Çayın sahilində bir qız ağlayır!
Bəlkə o, cavabsız eşqə əsirdir,
Bəlkə bir kimsəsiz yetim-yesirdir?
Anlamaq olmur ki bu necə sirdir,
Lal haray hıçqırır, avaz ağlayır -
Çayın sahilində bir qız ağlayır!
İndi dünya ona qəfəs kimi dar,
Halına acımır nə dost, nə də yar.
Allahım, gəl onu özünə qaytar,
Dil dönüb kösövə, ağız ağlayır -
Çayın sahilində bir qız ağlayır!..
04.01.2014
XATİRƏLƏR
Nahaq yerə tutdum dilə,
Geri dönməz ta vaxt-vədə.
Zülmətdə qərq olan anlar
Ya qorxuymuş, ya hədə.
Hər gizli işin öz səmti,
Elə dərdin də tamı var.
Sevincin qəfildən gələn
Zülmət donlu axşamı var...
Bir quş kimi uçub getdi,
Səsim çatmaz ötən günə.
Uzalı qalıbdı əlim,
İmdadıma çatan günə.
Mən lal-dinməz dayanmışam,
Anlardı salan hay-həşir.
Xatirələr hürkən kimi
Sürüşüb ovcuma düşür.
01.01.2024
YAŞADIM
Baxan kimi bəxt üzümə qıyqacı,
Bildim yoxdu tənhalığın əlacı.
Xatirələr həm şirinmiş, həm acı,
Hərdən dönüb ötən anda yaşadım.
Qoşa gördüm bəzən sevinclə qəmi,
Həzm elədim həm artığı, həm kəmi.
Haqlı-haqsız daşladılar kölgəmi,
Zülmət donlu bir ünvanda yaşadım.
Bələd oldum sərt üzünə möhnətin,
Halallıqla baş girləmək çox çətin...
Arxasınca sürünmədim şöhrətin,
Təkcə təmiz adda-sanda yaşadım.
Avazımdı vərəqlərdə əkdiyim,
İlk eşqimmiş göz yaşıma bükdüyüm.
Misra-misra şəkilini çəkdiyim
Ay-ulduzlu asimanda yaşadım.
22.03.2024
HALIYAM
Yüyəninə əl atsam da hər anın,
Nə ürəyin səsin duydum, nə qanın.
Necə deyim qana həris dünyanın,
Hər səmtindən, hər izindən halıyam?
Əllərimdən çıxdı əli ömrümün,
Cavanlıqmış “gəlhagəli” ömrümün...
Qürub çağlı səksəkəli ömrümün,
Öynəsindən, pəhrizindən halıyam.
Halallıqdı söz mülkündən dərdiyim,
Qismətimmiş... özgəsinə verdiyim.
Düz otuz il gözlərimlə gördüyüm
Cəhənnəmin hər üzündən halıyam!..
27.03.2024
4-05-2024, 07:32
GÜLNARIN RƏNGLƏR DÜNYASI
Şəkinin Baş Zəyzid kəndində yaradıcılıq ezamiyyətindəyəm. Hər gün onlarla sakinlə görüşür, milli adət-ənənələrimizlə bağlı söhbətlər aparır, qədim yurd yerlərimizin tarixi, folklor və etnoqrafiyamızla bağlı müəyyən məlumatlar toplamağa çalışıram. Deməliyəm ki, yaxın iki aydakı görüşlərimizdən, söhbətlərimizdən belə anlaşıldı ki, bu yerlərdə illərlə toplasan belə tükənməyəcək zəngin milli-mənəvi dəyərlər xəzinəsi yatır.
Kəndimizin Seyid dayı adlı məşhur bir zurna ustası olub. Başının dəstəsi ilə saysız-hesabsız toy və el şənliklərini idarə edib. Hətta 1991-ci ildə kənd fəallarının böyük fədakarlığı sayəsində kəndimizdə ilk dəfə baş tutan milli Novruz bayramı şənliyinin musiqi bəzəyi də Seyid dayının adı ilə bağlıdır.
“Gülnarın rənglər dünyası” sərlövhəli yazıma Seyid dayını xatırlamaqla başlamağım heç də səbəbsiz deyil. Çünki haqqında söhbət açacağım gənc rəssam qızımız məhz Seyid dayının nəticəsidir. Doğru deyiblər ki, həyatda heç nə təsadüfi olmur. Bizə təsadüf kimi görünən hadisələrin alt qatında əslində böyük həqiqətlər gizlənir. Belə ki, mən Seyid dayı haqqında məlumat toplamaq məqsədilə onun oğlu Cəlal müəllimlə görüşmək qərarına gəldim və bu ailənin qonağı olarkən də Gülnar qızımızın bir-birindən gözəl əl işləri ilə tanış oldum.
Gülnar Məmmədli ziyalı ailədə doğulub. Şəki rayon Baş Zəyzid kənd tam orta məktəbinin 9 “a” sinif şagirdidir. Gülnarın babası Cəlal Məmmədov, atası Səxavət Məmmədov da həmin məktəbin idman müəllimləridir. Nənəsi Rəfiqə Məmmədova ibtidai sinif müəllimi, anası Günel Məmmədova tibb bacısıdır.
Cəlal müəllim hazırda təqaüdçü olsa da, bütün ailə üzvləri kimi onun da diqqəti istedadlı nəvəsi Gülnarın gələcək həyat yolunda tutacağı istiqaməti müəyyənləşdirməyə, ona dəstək olmağa yönəlib. Bunu onunla söhbətimiz zamanı açıqca hiss etmək olur:
“Hələ üçüncü sinif şagirdi olduğu zamanlardan hiss etdik ki, Gülnar dərslərini yaxşı oxumaqla yanaşı, televizorda izlədiyi cizgi filmi qəhrəmanlarının rəngli qələmlərlə şəklini çəkir. Düzü, əvvəlcə bunu adi bir uşaq həvəsi hesab etdik. Sonradan onun fırçadan, rəngli qələmlərdən heç cür ayrılmadığını, rəsm sənətini qəlbən sevdiyini gördük. İstəyirdik ki, həkimliyi seçsin. Dərslərindən ancaq əla qiymətlər alırdı, biologiyaya isə xüsusi həvəsi vardı. Bu fənni çox yaxşı oxuyurdu. Bununla belə, Gülnarın get-gedə rənglərə daha dərindən bağlandığını gördük. Ev tapşırıqlarını yerinə yetirdikdən sonra, boş vaxtlarında ancaq şəkil çəkdiyini görüb ona mane olmamağı qərara aldıq. Şəkil çəkmək onda heç də pis alınmırdı. Düşündük ki, nəvəmin rəssamlıq sənətinə bağlılığı adicə həvəs çərçivəsindən çoxdan çıxıb. Soraqlaşıb Şəki Dövlət Dram Teatrının baş rəssamı Sahib Əhmədovu tapdıq. Onun kurslarına yazdırdıq Gülnarı. Sahib müəllimin yanına gedəndə Gülnarın abstrakt mövzularda işlədiyi şəkilləri də özümüzlə götürmüşdük. Müəllim həm onun çəkdiyi şəkillərə baxdı, həm də bu şəkillərin izahatına qulaq asdı və dedi ki, Gülnarı bu sənətdən ayırmaq günahdır...”
Öyrənirik ki, o vaxtdan etibarən – bir ildən çoxdur Gülnar davamlı olaraq Sahib müəllimin rəsm kurslarına gedir. Artıq Sahib müəllimin fikri qətiləşib ki, Gülnarın bügünəcən çəkdiyi əsərlərdən ibarət fərdi sərgisi təşkil olunmalıdır. Müəllimi düşünür ki, gənc bir rəssam kimi o öz yaradıcılıq fəaliyyətini daha da genişləndirməli, onun sənət uğurları ətrafdakı istedadlı uşaqlara da sirayət etməli, onları da sənət yollarında uğurlar qazanmağa ruhlandırmalıdır.
Gülnar barədə daha ətraflı məlumat əldə etmək üçün Baş Zəyzid kənd tam orta məktəbində olduq. İnformatika müəllimi Sevda Balənmədova Gülnar barədə yazmaq istədiyimizi eşidəndə çox sevindi. Bu cür istedadların həqiqətən xüsusi diqqət və qayğı ilə əhatə edilməsinin vacibliyindən danışdı. Məktəbin əlaçı şagirdi kimi Gülnarı digər şagirdlərdən fərqləndirən bacarıq və qabiliyyətlərə malik olmasını həm də bütövlükdə təhsil aldığı məktəbin və doğulub böyüdüyü kəndin uğuru kimi dəyərləndirdi.
Məktəbin rəsm müəllimi Gülxatın Məhərrəmova hələ aşağı siniflərdə Gülnarın istedadını büruzə verdiyini, onun digər uşaqlardan fərqləndiyini müşahidə etdiyini söylədi. Onu da qeyd etdi ki, məktəbdə hansısa əlamətdar günlər və bayramlarla əlaqədar təşkil olunan sərgilərdə Gülnarın işləri həmişə diqqəti cəlb edib.
Uşaqlarla məktəbdənkənar və sinifdənxaric işlər üzrə təşkilatçı Sahib Məhyəddinov, biologiya müəllimləri Aynur Qədirova, Sevinc Nəsrullayeva, sinif rəhbəri Aytəkin Həmidova da Gülnarın bütün dərslərdə xüsusi fəallıq göstərdiyindən böyük razılıq hissi ilə danışdılar.
Gülnar əlaçıdır, dərslərindən həmişə yüksək qiymətlər alır. Çünki elmin bütün sahələri ilə dərindən maraqlanır, dayanmadan, durmadan mütaliə edir. Mütaliəsinin zənginliyi elə çəkdiyi rəsmlərdən bəllidir.
“Əsərlərimin əksəriyyətini hiss edib duyduqlarımdan, oxuduğum əsərlərdən aldığım məlumat və enerjidən əxz eləmişəm. Eyni zamanda, bu əsərlərdə dünyanın yaranış, törəniş və gələcəyə doğru inkişafını, təkamül prosesini rənglərin dili ilə verməyə çalışmışam. İşlərimin bir çoxunu sürrealist əsərlər təşkil edir. Bunlar mənim duyğu və düşüncələrimin inikasıdır” – deyir Gülnar.
Əsərlərinin bəzilərinin adlarını çəkməklə bu işlərin mövzu müxtəlifliyinə və məzmun dərinliyinə diqqəti cəlb etmək istərdim: “Qaranlığın rəqsi”, “Yerin yaradılması”, “Qanadlı arzular”, “Bəyaz işıq” və s…
Həqiqətən də, Gülnarın düşüncələri kimi, düşüncə və istedadının, təxəyyül və idrakının ortaq məhsulu kimi ortaya çıxan əsərləri adamı dərindən düşünməyə vadar edir. Düşünür və deyirsən ki, nə yaxşı bu bozbulanıq dünyada Gülnar və onun istedadlı yoldaşları kimi bəşəri ideallarla yaşayıb gələcəyə doğru inamla addımlayan gənclərimiz var. Çünki gələcəyimizi məhz bu cür azadfikirli, açıqdüşüncəli istedad sahibləri olan gənclərimiz quracaqlar. Gələcək onlarındır!
Şəki Dövlət Dram Teatrının baş rəssamı Sahib Əhmədovun Gülnar barədə dediklərindən:
“İlk dəfə Gülnarın işlərinə baxdıqda onda bu sənətə böyük həvəs olduğunu hiss etdim. Bir müəllim kimi ona bu sənətdə təkan verdim. Dərsində hər zaman çalışqandır. Gülnar Məmmədlinin özünəməxsus kompozisiyaları var. Gələcəkdə onun ali təhsil alıb, sənətdə daha da yüksək nailiyyətlər qazanacağına inanıram. Bu yolda ona uğurlar arzulayıram”.
Biz də Gülnara (Gül Nar) sevib-seçdiyi rəssamlıq sənətinin çətin və rəngarəng yollarında saysız uğurlar arzulayırıq.
Qiymət MƏHƏRRƏMLİ,
AMEA Folklor İnstitutunun aparıcı elmi işçisi,
Filologiya üzrə fəlsəfə doktoru, şair.
3-05-2024, 22:50
Sudan Prezidentinin oğlu Ankarada öldü
Sudan Prezidenti Abdulfettah əl-Burhanın oğlu Məhəmməd Fəttah əl-Burhan Rahman vəfat edib.
O, iki ay əvvəl Ankarada motosikletlə qəzaya uğrayıb və xəstəxanaya yerləşdirilib.
Onun bu gün dünyasını dəyişdiyi bildirilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!