İşdən gələndən bəri paltarlarımı dəyişməmişəm. Süst şəkildə stulda oturub rəfimdəki kitablara baxıram. Soldan-sağa, sağdan-sola bir-bir adlarını oxuyuram-"Robinzon Kruzo", "Qraf Monte-Kristo", "Üç muşketyor", "Mauqli", "Balaca şahzadə"... Bəzilərini götürüb vərəqləyirəm. Amma səbrim çatmır, tez də yerinə qoyuram. Çünki istədiyim o deyil... Adətən kitablar çətin vaxtlarımda köməyimə çatırlar, axtardıqlarımı onlarda tapıram. Ancaq bu dəfə kitablar da acizdirlər. Bəlkə, indi ehtiyacım olan kitablar deyil. Hə, əminəm buna. İndi tək sənə ehtiyacım var. Həm də uzun müddətdən bəri...

Mən hələ təzə başa düşürəm ki, sevgidən, hörmətdən, ehtirasdan, nifrətdən başqa hisslər də var. Məsələn istək kimi. Ürəyimizdə xüsusi yeri olanlara "səni çox istəyirəm" deyirik azı. Lakin, həqiqətən bizim üçün özəl olanlara, daha hamıya yox. Hamıya, hər tanıdığına deyəndə artıq heç bir mənası olmur o sözün, qiymətdən düşür. Mən də səni çox istəyirəm. Səni istəyirəm...Mənə həyatın gözəl olduğunu, sadəcə anı yaşamağı, "kaş"larla, sabahlarla vaxtı, hər ötən saniyəni bada verməməyi başa salan qızı istəyirəm. Lazım gələndə məni yaxamdan tutub silkələyən, "Kənan, belə eləmə!" deyən, lazım gələndə xəsislik eləmədən qayğı göstərən qızı istəyirəm. Hardadı, görəsən? Hər gün universitetdə gördüyüm qızdır o qız? Tərəddüdlüyəm. Əgər o qız olsaydı indi yenə məni başa düşərdi amma anlamır. Bəlkə də, sadəcə bunu istəmir.

Darıxmışam, onun üçün darıxmışam. Sabah olmaya bilər axı. Ancaq bu gün var. Biz də bu günü yaşayaq, elə belə yox ha, doya-doya yaşayaq. Əgər hər səhər olduğu kimi sabah da güzgüdə saçını darayanda mənim tanıdığım və axtardığım o qızı görsən de ki, onu gözləyən var, qayıtsın. Düz gözlərinin içinə baxaraq de ki, Kənan səni nə sevir, nə də sənə bağlanıb. Sadəcə sənin yanında dinclik tapır. İstədiyi də əks-cins nümayəndəsi tərəfindən bir az qayğı və diqqətin göstərilməsi və, həqiqətən, onun üçün əziz olduğunu hiss etməkdir. Hə, bir də qorxduğu şey var-nə vaxtsa o qızın ürəyindəki mövqedə başqası ilə əvəz olunmaq. Və hansısa pis xislətli birinin "Kənanla yaxın olan, dostluq eləyən qız indi filankəslə dostlaşıb, Kənan heç yadına da düşmür" deməsidir. Bax, belə də de o qıza. Ona çatdır ki, elə bir şey olsa mən bu yükün altından qalxa bilmərəm. Hə, görsən bunları söyləyərsən. Əgər imkan olsa tanıdığım o qızın cavabını da çatdırarsan mənə. Düşünürəm ki, o qədər də əziyyət çəkməyəcəksən. Elə ilk cümlədən özü hər şeyi başa düşəcək...

Kənan Novruzov
Butov.az