Butov.az xəbər verir ki, Azərbaycan Gənclərinin Hüquqlarının Müdafiəsi Mərkəzi Azərbaycan Respublikasının Prezidenti yanında Qeyi-hökumət Təşkilatlarına Dövlət Dəstəyi Şurasının dəstəyi ilə “Ətraf mühitin qorunmasında uşaqların rolunun artırılması” layihəsini icra edir.

Layihənin əsas məqsədi ətraf mühitin mühafizəsində və ekologiyanın qorunmasında uşaqların məsuliyyətinin gücləndirilməsidir. Təşkilat bu məqsədlə layihə çərçivəsində uşaqların ekoloji sahədə maarifləndirilməsi və bu sahədə valideyn-müəllim əməkdaşlığının gücləndirilməsi, uşaqlarda ətraf mühitin mühafizəsi ilə bağlı vərdişlərin yaradılması, onların ekoloji sahədə ictimai fəallığının artırılması və sair bu kimi istiqamətlədə iş aparır.

İlk mərhələdə Azərbaycan Respublikası Təhsil Nazirliyinin təşkilati dəstəyilə Bakı şəhərində yerləşən 10 orta məktəbdə, ümumilikdə 400 uşaq üçün “Ətraf mühitin mühafizəsi” mövzusunda təlimlər keçirildi. Təcrübə göstərir ki, təbiətin qorunmasının hər bir şəxsin ən vacib borcu olduğunu uşaqlar kiçik yaşlarından başa düşməlidirlər. Məhz bu məqsədlə bu təlimlər vasitəsilə məktəblilər ətraf mühiti çirkləndirən, insan sağlamlığına mənfi təsir göstərən əsas mənbələr, ətraf mühitin çirklənməsi nəticəsində meydana gələn ekoloji problemlərin qarşısının alınması üçün vacib olan tədbirlər və sair bu kimi məsələlər haqqında məlumatlandırıldılar.
Layihəyə çərçivəsində həmçinin aktiv məktəblilərdən ibarət “Təbiətin dostları” adlı təşviqat qrupu da yaradılır. Bu məktəblilər həm oxuduqları məktəblərdə, həm də “Facebook” sosial şəbəkəsində yaradılmış “Təbiətin dostları” səhifəsi vasitəsilə uşaqların ekoloji maarifləndirilməsi işini davam etdirəcəklər.