11 dekabr 2019-cu il tarixində Azərbaycan Dövlət Mədəniyyət və İncəsənət Universitetində Heydər Əliyevin siyasi hakimiyyətə gəlişinin 50 illiyinə həsr olunan “Ulu Öndər” sənədli filminin təqdimatı keçirilib. Butov.az-a verilən məlumata görə, ADMİU-nun professoru Rafiq Quliyevin quruluşçu rejissoru olduğu filmdə Heydər Əliyevin Azərbaycana rəhbərlik etdiyi 1969-cu ildən 2003-cü ilədək həyat və fəaliyyətinin müxtəlif dövrünü əhatə edən kadrlar öz əksini tapıb. Filmin redaktoru İradə Soltanova, prodüseri Üzlüfət Qasımovadır.
ADMİU-da Heydər Əliyev Mədəniyyət və İncəsənət Məktəbində baş tutan tədbiri giriş sözü ilə açan rektor professor Ceyran Mahmudova Universitetin Kino və televiziya sənətləri kafedrasının müdiri, professor Rafiq Quliyevin çəkdiyi filmin əhəmiyyətindən və bədii məziyyətlərindən danışıb. Rektor bildirib ki, Heydər Əliyev müdrik və uzaqgörən siyasəti, unikal liderlik qabiliyyəti, milli iradəsi, vətənpərvərliyi ilə Azərbaycan xalqına nümunə olan görkəmli siyasətçi və qüdrətli dövlət xadimidir. “Ulu öndərin həyatına və fəaliyyətinə həsr olunmuş incəsənət əsərlərinin hazırlanması olduqca əhəmiyyətlidir. Çünki o, öz istedadını, zəkasını, bacarığını Azərbaycan üçün sərf etmiş və milli dövlətçilik ideyalarının formalaşması üçün misilsiz xidmətlər göstərmiş tarixi şəxsiyyətdir”.
Heydər Əliyevin təhsilə, mədəniyyətə və incəsənətə xüsusi önəm verdiyini vurğulayan professor Ceyran Mahmudova deyib: “Ümummilli Liderin diqqət və qayğısı sayəsində Azərbaycan təhsili yeni inkişaf mərhələsinə qədəm qoyub. O, Azərbaycan mədəniyyətinin və incəsənətənin inkişafı və beynəlxalq miqyasda tanınması üçün böyük işlər görüb, milli-mənəvi dəyərlərin, adət-ənənələrin qorunması, milli elitanın formalaşdırılması, sağlam və intellektual gənc nəslin yetişdirilməsi istiqamətində misilsiz nailiyyətlər qazanıb".
Sonra çıxış edən rektorun humanitar məsələlər üzrə müşaviri, Əməkdar incəsənət xadimi, professor Aqşin Babayev və tarzən, Xalq artisti Zamiq Əliyev, Elm və yaradıcılıq işləri üzrə prorektor professor Məryəm Əlizadə çıxış edərək Azərbaycan tarixində misilsiz xidmətləri olan qüdrətli dövlət xadimi Heydər Əliyevin mədəniyyətimizə, milli-mənəvi dəyərlərimizə qayğısından söz açıblar. Qeyd edilib ki, ADMİU-da çalışan müəllimlərin əksəriyyəti Azərbaycanın görkəmli mədəniyyət və incəsənət xadimləridir və onlar Heydər Əliyevin mədəniyyətə göstərdiyi diqqət və qayğının canlı şahidləridir.
Tədbirdə ümummilli lider Heydər Əliyevin rəhbərliyi dövründə Azərbaycanın iqtisadi, sosial və mədəni tərəqqisi, dövlət quruculuğu, müstəqilliyin qorunub saxlanması və möhkəmləndirilməsi, dövlətimizin beynəlxalq nüfuzunun gücləndirilməsi sahəsində gördüyü işlərdən, xüsusən milli mədəniyyət və incəsənətin inkişafından və gənclər siyasətindən danışılıb.
Qeyd olunub ki, Heydər Əliyevin bizə qoyduğu ən böyük miras müstəqil Azərbaycandır. Bu gün onun varisi İlham Əliyev Heydər Əliyevin siyasi kursunu düzgün istiqamətdə davam etdirir.
Tədbirin sonunda ADMİU-nun əsas tədris binasının foyesində Ulu Öndərin büstü önünə əklil qoyulub, xatirəsi ehtiramla yad edilib.