Bakı Qızlar Universiteti ilə Cənubi Koreyanın Dongıluk Qızlar Universiteti arasında qarşılıqlı əməkdaşlıqla bağlı müqavilə imzalanıb. Müqaviləni Bakı Qızlar Universitetinin rektoru, professor Ağarəhim Rəhimov və Dongıluk Qızlar Universitetinin rektorunun səlahiyyətli nümayəndəsi, doktor Eunkying Oh imzalayıblar.

İşgüzar şəraitdə keçən görüşdə Bakı Qızlar Universitetinin rektoru, professor Ağarəhim Rəhimov universitetin yaranmasını zəruri edən amillərdən və onun keçdiyi tarixi yoldan danışıb. Bakı Qızlar Universitetinin artıq Azərbaycan cəmiyyətində və elm-təhsil sferasında özünə layiqli yer tutduğunu bildirən rektor rəhbərlik etdiyi təhsil ocağının artıq özünün 25 ilik yubileyini qeyd etməyə hazırlaşdığını xatırladıb. Bu illər ərzində milli təhsilin ən qabaqcıl örnəklərindən faydalandıqlarını qeyd edərək qabaqcıl xarici təcrübəyə də hər zaman ciddi diqqət verdiklərini vurğulayıb. Dünyanın müxtəlif ölkələrində fəaliyyət göstərən bu yönümlü universitetlərin təcrübələrini mütəmadi olaraq öyrənərək onların müsbət tərəflərindən yararlandıqlarını bildirib. Bu günkü görüşün də yalnız iki universitet arasında deyil, ölkələrimizin və xalqlarımızın bir-birini daha yaxşı tanıması üçün faydalı olacağını diqqətə çatdırıb.

İxtisasca türkoloq olan koreyalı qonaq doktor Eunkying Oh bu sahədə ölkəsində tanınmış mütəxəssisdir. Uzun illər Türkiyədə yaşayıb tədqiqatlar aparan alim türk dilini və mədəniyyətini çox sevir. Əksər türkdilli ölkələrdə elmi ezamiyyətdə olub ciddi araşdırmalara aparan xanım Eunkying Oh vətəninə qayıtdıqdan sonra çalışdığı universitetin nəzdində türk dünyasını daha yaxşı öyrənmək üçün elmi mərkəz də yaradıb. Sabahın hazırlıqlı türkoloqlarını yetişdirmək üçün mərkəzdə ciddi tədqiqatlar aparılır.
Görüşdə bir daha vurğulanıb ki, hər iki universitet əməkdaşlığa yüksək önəm verir və gələcəkdə bu əməkdaşlığın daha da dərinləşməsi istiqamətində əllərindən gələni əsirgəməyəcəklər.
Butov.az