Müslüm Maqomayev 1942-ci ilin avqustun 17-də Bakı şəhərində anadan olub. ilk çıxışı 14 yaşında dənizçilər klubuyla başlayır və 18 yaşında Helsinkidə gənclər festivalında iştirakıyla davam edir.

O, ilk rəsmi uğurunu 1962-ci ildə qazanır. Maestro Niyazinin tövsiyəsi ilə tələbə və gənclərin Helsinkidə keçirilən VIII Ümumdünya Festivalına göndərilən Müslüm Bakıya medalla qayıdır. Populyar "Oqonyok" jurnalı onun portretini və "Bakılı gənc dünyanı fəth edir" başlıqlı məqalə dərc edir.

1963-cü ildə Moskvada keçirilən Azərbaycan mədəniyyəti günlərində uğurlu çıxışları ilə şöhrət qazanmağa başlayıb. M.Maqomayev 1960-cı illərdə Azərbaycan Dövlət Opera və Balet Teatrının solisti olub, İtaliyanın Milan şəhərindəki “La Skala“ teatrında təcrübə keçib. Sonra o, Enriko Pyatsa ilə “Sevilya bərbəri“ operasından Fiqaronun, “Toska“ operasından Skarpianın partiyalarının hazırlanmasında iştirak edir. Sənətçimiz 1966-cı ildə Parisin “Olimpiya“ salonunda ilk konsertini verib.

O, 1968-ci ildə Azərbaycan Dövlət Konservatoriyasını bitirib və bir il sonra, 1969-cu ildə Sopotda (Polşa) keçirilən Beynəlxalq Mahnı Festivalında ilk mükafatını alıb. 1975-ci ildə isə “Azərbaycan Dövlət Estrada-Simfonik Orkestri“nin bədii rəhbəri təyin edilib.

M. Maqomayev 2008-ci il oktyabrın 25-də 66 yaşında Moskvada vəfat edib. Görkəmli sənətkarın cənazəsi Azərbaycana gətirilib və Fəxri Xiyabanda, babası Müslüm Maqomayevin yanında dəfn olunub.

Butov.az