23-11-2021, 18:22
K.T.Vəliyevə “general-polkovnik” ali hərbi rütbəsinin verilməsi haqqında Azərbaycan Respublikası Prezidentinin Sərəncamı
Azərbaycan Respublikası Konstitusiyasının 109-cu maddəsinin 24-cü bəndini rəhbər tutaraq qərara alıram:
General-leytenant Kərim Tofiq oğlu Vəliyevə “general-polkovnik” ali hərbi rütbəsi verilsin.
İlham Əliyev
Azərbaycan Respublikasının Prezidenti
Bakı şəhəri, 23 noyabr 2021-ci il
23-11-2021, 16:06
Sabah Azərbaycan Respublikası Mədəniyyət Nazirliyinin təşkilatçılığı və Bakı Şəhər İcra Hakimiyyətinin dəstəyi ilə Nizami Gəncəvi Beynəlxalq Forumu (NGBF) öz işinə başlayır.
Bütöv.az xəbər verir ki, bu barədə mədəniyyət nazirinin birinci müavini Elnur Əliyev Foruma həsr olunan brifinqdə məlumat verib.
Forumun mövzusu “Nizami Gəncəvi: Mədəniyyətlər Arasında Körpü” adlanır və şairin anadan olmasının 880 illiyinə həsr edilib.
24-26 noyabr tarixlərini əhatə edəcək NGBF dahi mütəfəkkirin zəngin ədəbi irsini araşdıran nüfuzlu beynəlxalq alim, tədqiqatçı və elm adamlarını bir araya gətirərək “Nizaminin Orta əsr Şərqində siyasi və ictimai ənənələrə təsiri”, “Nizami Gəncəvi: Müasir dünyaya baxış”, ”Nizami Xəmsəsinin dünya ədəbiyyatına və mədəniyyətinə təsiri”, “Xəmsə dialoqlarının didaktik rolu”, “Sovet dövründə Nizami tədqiqatları” mövzularına həsr edilmiş panel müzakirələri keçirilən platformadır.
Beynəlxalq Forumda 15 xarici ölkədən 40-dan çox alim, elm adamı və ekspertlərin, eləcə də dövlət rəsmiləri, ali təhsil müəssisələrinin rəhbərləri, beynəlxalq təşkilatlar və diplomatik korpusun nümayəndələrinin iştirakı nəzərdə tutulur.
Üç gün davam edəcək Forumda Türkiyə və Özbəkistanın mədəniyyət nazirləri də iştirak edəcək.
Forum çərçivəsində müxtəlif panel müzakirələr, təqdimatlar, ikitərəfli görüşlər, kitab təqdimatı, mədəni və digər tədbirlərin təşkili planlaşdırılır.
Elnur Əliyevin bildirdiyinə görə, məqsəd həm şair, həm də dahi Azərbaycan mütəfəkkiri olmuş Nizami Gəncəvinin əhatə dairəsini göstərməkdir.
Forumda müxtəlif ölkələrdən iştirak edəcək nümayəndələr Nizami Gəncəvinin ideyalarının onların coğrafiyasına, ölkədəki idarəçilik formasına və təbii ki, ədəbi janrlara təsirlərindən danışacaqlar.
23-11-2021, 15:57
23 noyabr 2021-ci ildə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının növbəti iclası keçirilib.
Bütöv.az xəbər verir ki, iclasda Agentliyin icraçı direktorunun təyinatı məsələsinə baxılıb və bu vəzifəyə Aygün Əliyevanın namizədliyi irəli sürülüb. Müşahidə Şurasının üzvləri məsələyə münasibət bildirərək A.Əliyevanın namizədliyini yekdilliklə dəstəkləyiblər.
Qeyd edək ki, Aygün Əliyeva 29 iyul 1988-ci ildə Bakı şəhərində anadan olmuş, 2010-cu ildə Azərbaycan Dillər Universitetinin Regionşünaslıq və Beynəlxalq Münasibətlər fakültəsini, 2012-ci ildə Azərbaycan Dillər Universitetinin müvafiq ixtisas üzrə magistratura pilləsini, 2015-ci ildə Azərbaycan Dövlət İqtisad Universitetinin Beynəlxalq İqtisadi Münasibətlər fakultəsini bitirib.
2010-cu ildən başlayaraq Azərbaycan Dillər Universitetində prorektor köməkçisi,
2012-2013-cü illərdə Yeni Azərbaycan Partiyasının Mərkəzi ofisində baş təlimatçı,
2013-2020-ci illərdə Binəqədi rayon İcra Hakimiyyətində başçısının müavini,
2020-ci ildən bu günədək isə TƏBİB- İctimaiyyətlə ələqələr, kargüzarlıq və vətəndaş müraciətləri ilə iş departamentinin rəhbəri vəzifəsində işləmişdir.
2007-ci ildən başlayaraq müxtəlif qeyri-hökumət təşkilatlarının sosial, iqtisadi, təhsil sahələrində olan layihə və proqramlarının icrasına cəlb olunub.
23-11-2021, 15:53
Noyabrın 23-də müdafiə naziri general-polkovnik Zakir Həsənov Türkiyənin ASELSAN şirkətinin idarə heyətinin sədri və baş direktoru cənab Haluk Görgünün rəhbərlik etdiyi nümayəndə heyəti ilə görüşüb.
Bu barədə Bütöv.az-a Müdafiə Nazirliyindən məlumat verilib.
Qonaqları salamlayan Müdafiə naziri ölkələrimiz arasında hərbi və hərbi-texniki əməkdaşlıq sahəsində müsbət addımlar atıldığını, hər iki ölkə başçılarının dostluq və qardaşlıq münasibətlərinin Azərbaycan-Türkiyə əlaqələrinin bütün istiqamətlərdə genişlənməsində mühüm əhəmiyyətə malik olduğunu qeyd edib. Nazir Vətən müharibəsində istifadə olunan ASELSAN şirkətinin istehsalı olan texniki avadanlıqların yüksək keyfiyyətə malik olduğunu xüsusi vurğulayıb.
Görüşdə müasir döyüş əməliyyatlarının aparılmasının yeni üsul və metodları, həmçinin qoşunlarımızın texniki təchizatının daha da gücləndirilməsi məqsədilə iki qardaş ölkənin həyata keçirdiyi birgə layihələr müzakirə edilib.
Bildirilib ki, Azərbaycan Ordusunun dünyanın ən müasir silah və hərbi texnikası, o cümlədən qabaqcıl informasiya texnologiyaları ilə təchiz edilmiş, geniş rabitə sistemlərinə malik peşəkar ordu kimi inkişaf etdirilməsi qoşunlarımızın gizli, operativ idarəolunmasını, onların manevr imkanlarının, ümumilikdə isə döyüş qabiliyyətinin artırılmasını təmin edəcək.
23-11-2021, 15:44
Noyabrın 26-da bütün müavinət, təqaüd, kompensasiya və ünvanlı dövlət sosial yardımının ödənilməsi nəzərdə tutulub.
Bu barədə "Unikal"a Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fondundan məlumat verilib.
Bütöv.az
23-11-2021, 15:38
Bakı Şəhər İcra Hakimiyyətinin başçısı Eldar Əzizov "Yeraltı Keçidlər üzrə Ticarət Birliyi”nə yeni rəis təyin edib.
Eldar Əzizovun müvafiq əmri ilə Bakı şəhər Ticarət və Xidmət Departamentinin "Yeraltı Keçidlər üzrə Ticarət Birliyi” MMC-yə Elşad Səfərov rəis təyin olunub.
Elşad Səfərov Bakının bir sıra rayonlarını əhatə edən "Kiosk Press” adlandırılan köşklərə də rəhbərlik edəcək.
O, bundan əvvəl Vergilər Xidmətində müxtəlif vəzifələrdə çalışıb.
Bakı şəhər Ticarət və Xidmət Departamentinin "Yeraltı Keçidlər üzrə Ticarət Birliyi” MMC-nin əvvəlki rəisi Seymur Mədətov isə vəzifəsindən kənarlaşdırılıb. (qaynarinfo.az)
Bütöv.az
23-11-2021, 15:28
“Qiymət artımı şirkətlərə yox, əhalinin alıcılıq qabiliyyətinə təsir edir. Ticari şəbəkədə böyük rol oynayan şirkətlər də bu hallara uyğun məhsulunu istehsal etdikdə, keyfiyyəti aşağı salırlar”.
Bu fikirləri Modern.az-a Azad İstehlakçılar Birliyinin rəhbəri Eyyub Hüseynov müşahidə olunan qiymət artımı fonunda məhsulların keyfiyyətinin aşağı düşməsindən danışarkən bildirib.
Onun sözlərinə görə, hər bir istehsalçı şirkət qiymət artımından istifadə edərək, çox pul qazanmaq üçün məhsulun keyfiyyətini aşağı salır:
“Bildiyimiz kimi, qiymət artıqca keyfiyyət aşağı düşür. Keyfiyyəti aşağı salan da istehsalçı şirkətdir. İstehsalçı şirkət ölkədə qiymət artımını müşahidə edir və öz məhsulunun da qiymətini qaldırır. Qiymətini qaldırdıqca keyfiyyətini aşağı endirir ki, gəliri daha çox olsun.
Onlar hər şeyi ölkənin iqtisadi durumuna uyğun tənzimləyirlər.
Bəzi şirkətlər var ki, özünün yararsız olan məhsulunu açıq şəkildə məhv edir. Mən bütün şirkətləri belə bir təşəbbüs etməyə çağırıram. Yalandan vaxtı keçmiş məhsulların üzərinin qabığını dəyişib, yenidən satışa qoymasınlar”.
Bütöv.az
23-11-2021, 12:31
“Azərbaycanda vaxtı keçmiş vaksin yoxdur”.
Bunu APA-ya səhiyyə nazirinin birinci müavini, səhiyyə nazirinin vəzifələrini icra edən Teymur Musayev deyib.
O bildirib ki, indiyə qədər ölkədə vaxtı keçmiş vaksin olmayıb.
“Bütün vaksinlər vaxtında istifadə edilib”, - deyə T. Musayev bildirib.
Bütöv.az
23-11-2021, 12:28
Milli Məclisin sədri Sahibə Qafarovanın başçılığı ilə parlament nümayəndə heyəti MDB PA-nın Şura və 53-cü plenar iclaslarında iştirak etmək üçün noyabrın 24-də Rusiya Federasiyasının Sankt-Peterburq şəhərinə səfər edəcək.
Bu barədə Bütöv.az-a Milli Məclisin Mətbuat və ictimaiyyətlə əlaqələr şöbəsindən məlumat verilib.
Nümayəndə heyətinin tərkibinə deputatlardan Nizami Səfərov, Anatoliy Rafailov, Rüfət Quliyev, Anar Məmmədov, Rasim Musabəyov, Tamam Cəfərova, Milli Məclis Aparatının rəhbəri Səfa Mirzəyev və digər rəsmi şəxslər daxildirlər.
Milli Məclisin sədri təşkilatın Şura və plenar iclaslarında gündəlikdəki məsələlərin müzakirəsində iştirak edəcək, Azərbaycan tərəfinin mövqeyini bildirəcək. Səfər çərçivəsində nümayəndə heyətimiz səhiyyə xidmətlərinin hamını əhatə etməsi və dayanıqlı inkişaf məsələlərinə həsr olunmuş beynəlxalq konfransda iştirak edəcək.
Burada parlament sədrinin tədbirdə iştirak edəcək nümayəndə heyətlərinin rəhbərləri ilə bir sıra görüşləri nəzərdə tutulub. Bu görüşlərdə təşkilatın gələcək fəaliyyəti, parlamentlərarası əlaqələrin inkişaf perspektivləri və tərəfləri maraqlandıran digər məsələlər müzakirə olunacaq.
Parlament nümayəndə heyətinin Sankt-Peterburqa səfəri noyabrın 26-da başa çatacaq.
23-11-2021, 12:20
ABŞ Ukraynaya hərbi müşavirlər və əlavə silah göndərmək ehtimalını nəzərdən keçirir.
Ovqat.com xəbər verir ki, məlumatı Bayden administrasiyasındakı mənbələrə istinad edərək CNN telekanalı yayıb.
Telekanalın iddiasını Ağ Evin sözçüsü Cen Psaki şərh etmək istəməyib və bu barədə hər hansı fikir “bəyan etməkdən” boyun qaçırıb.
CNN-in məlumatına görə, Ukraynaya əlavə Javelin zenit-raket kompleksləri və portativ zenit-raket kompleksləri göndərilə bilər, baxmayaraq ki, Ukraynanın özündə kifayət qədər MANPADS var.
CNN iddia edir ki, Pentaqonda bu “yardım” Moskvanın Ukraynaya hərbi müdaxiləyə hazırlığı fonunda Kiyevə əlavə dəstək kimi qiymətləndirilir.
Qeyd edək ki, Ukraynanın Müdafiə Nazirliyinin Hərbi Kəşfiyyat İdarəsinin rəisi Kirill Budanov iki gün öncə ABŞ-ın Military Times” nəşrinə müsahibəsində Vaşinqtonu Ukraynaya kifayət qədər hərbi dəstək verməməkdə ittiham etmişdi. Görünür, Vaşinqtonda bu gileyi “nəzərə alıb” Ukraynaya daha ciddi dəstək vermək qərarına gəliblər.
Bütöv.az
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!