AMEA Mərkəzi Elmi Kitabxanasına (MEK) Azərbaycan Respublikası Prezidenti Administrasiyasının rəhbəri, akademik Ramiz Mehdiyevin Livanda ərəb dilində işıq üzü görən “Dağlıq Qarabağ: Məxəzlərdən oxunmuş tarix” kitabı daxil olub.
Kitabda antik və orta əsrlər dövrünə aid çoxsaylı məxəzlər, yeni və müasir dövrün sənədləri əsasında Cənubi Qafqazın həqiqi tarixi, həmçinin ermənilərin XIX əsrin əvvəllərində bu ərazilərə köçürülməsi əksini tapıb. Əsərdə XIX əsrdən etibarən Dağlıq Qarabağda, eləcə də tarixi Azərbaycan ərazisi olan indiki Ermənistan Respublikasında ermənilərin sayca üstünlük təşkil etməyə başlamasının çar imperiyasının məqsədyönlü siyasətinin nəticəsi olduğu oxucuya çatdırılıb. Müəllif problemi tarixi mənbələr əsasında oxucuya izah etməklə bir çox qaranlıq məqamlara aydınlıq gətirib.
Vəsait Əlcəzair Milli Araşdırmalar Mərkəzinin professoru Zəim Xənişlavi tərəfindən fransız dilindən tərcümə olunub və Livanda “Delta” Dərin Araşdırmalar Mərkəzində işıq üzü görüb.Kitabın çapında və ölkəmizə gətirilməsində Azərbaycanın Livan və Əlcəzairdəki səfirliklərinin müstəsna xidmətləri olub. Kitab MEK tərəfindən Azərbaycan Respublikasının Prezidenti yanında Elmin İnkişafı Fondunun qrantı ilə həyata keçirilən “Milli Rəqəmsal Yaddaş (MRY) üçün ümummilli əhəmiyyət kəsb edən məlumatların toplanılması, ekspertizası və etibarlı saxlanılması” layihəsi əsasında MRY bazasına daxil edilib.
Qeyd edək ki, noyabrın 16-da Mərkəzi Elmi Kitabxananın təşkilati dəstəyilə kitabının təqdimat mərasimi keçirilib.