Güney Azərbaycanda Azərbaycan ordusunun işğal altında olan torpaqlarımızın azad edilməsi uğrunda keçirdiyi əks-hücum əməliyyatlarına dəstək vermək üçün mitinqə çağırış olunub.
Milli fəallar tərəfindən yayılan çağırışda Güney Azərbaycan türk millətinin quzey azərbaycanlı soydaşlarına dəstək nümayiş etdirmək məqsədilə oktyabrın 1-də Təbriz və Tehran başda olmaqla bir neçə şəhərdə dinc yürüyüş keçirəcəyi bildirilib.
Mitinq yerli vaxtla saat 17:00-da (Bakı vaxtı ilə 17:30) aşağıda qeyd edilən məkanlarda keçiriləcək:

Təbriz: Şəhnaz qovşağı

Urmu: Ətai və İmam küçələrinin kəsişdiyi yer

Ərdəbil: Şəriəti qovşağı

Zəncan: Yaşıl Meydan (səbzə Meydan)

Tehran: İmam Hüseyni meydanı

Digər şəhərlərdə "əsas meydanlar və şəhər mərkəzləri" toplanış yeri elan edilib.

Qeyd edək ki, dünən Ərdəbil şəhərində Azərbaycanın işğal altında olan torpaqlarının azad edilməsi üçün dəstək aksiyası keçirmək istəyən onlarla milli fəal saxlanılıb.
Saxlanılan fəallardan hələlik Əsgər Əkbərzadə, Murtuza, Müctaba və Mustafa Pərvin, eləcə də Məhəmməd Colani, Mehdi Huşmənd, Pərviz Siyabi, Səccad Colani, Hüseyin Balaxani, Bəhmən Xeyrcu və Hamid Heydərinin adları bəlli olub.