2020 - Azərbaycan tarixində müstəsna il kimi yadda qalacaq. Bu il Azərbaycan Ordusu Ermənistanın təcavüzünə son qoydu.

Butov.az Teleqraf.com-a istinadən xəbər verir ki, bu sözləri Milli Məclisdə “Azərbaycan Respublikasının 2021-ci il dövlət büdcəsi haqqında” qanun layihəsini deputatlara təqdim edən Maliyyə naziri Samir Şərifov deyib.

Nazir bildirib ki, işğaldan azad edilən torpaqların yenidən qurulması qarşıdan duran ən vacib məsələdir:

“Bu məqsədlə gələn ilin dövlət büdcəsindən 2,2 milyard manat vəsait ayrılması nəzərdə tutulub. Eyni zamanda Azərbaycan Ordusuna əlavə vəsait də ayrılacaq. Ümumilikdə müdafiə xərcləri 4,6 milyard manata yaxınlaşıb.

2021-ci ildə də COVİD-19-la mübarizə tədbirləri davam etdiriləcək və büdcədən 261 milyon manat ayrılacaq.

35 milyon manat isə hərbi qulluqçuların mənzillə təmin edilməsi üün nəzərədə tutulub".

Samir Şərifov qeyd edib ki, 2021 və sonrakı 3 il üçün dövlət və icmal büdcə layihələri “Büdcə sistemi haqqında” qanuna uyğun şəkildə hazırlanıb:

“Prezidentin müəyyən etdiyi kimi, qeyri-neft sektorunun inkişafı əsas götürülüb. Növbəti ildə baş verəcək dəyişikliklər və bunun Azərbaycan iqtisadiyyatına təsirləri, ölkə iqtisadiyyatının makroiqtisadi reallıqları və iqtisadi inkişafın növbəti mərhələsinə keçidlə bağlı gözləntilər nəzərə alınıb. İlin sonu iqtisadiyyatımızın 4%-dək kiçilməsi gözlənilir. Hökumət tərəfindən iqtisadiyyatın canlandırılması üçün vacib tədbirlərin görülməsi nəzərdə tutulur. İqtisadi və sosial dəstək paketinin bir qismi reallaşıb, bir qisminin isə növbəti ildə reallaşması planlaşdırılır. Hökumətin əsas məqsədi odur ki, iqtisadi fəallıq bərpa olunsun".

Nazir əlavə edib ki, gələn ilin büdcəsində mənfəət vergisi üzrə daxilolmaların artması gözlənilir:

"Digər daxilolmalar isə 700 milyon manat nəzərdə tutulur. 2021-ci il dövlət büdcəsinin xərcləri 28 milyard 543 milyon manat (ÜDM-də xüsusi çəkisi 37,7 faiz) proqnozlaşdırılır ki, bu da 2020-ci ilə nisbətən 1 milyard 50,8 milyon manat və ya 3,8 faiz çoxdur. 2021-ci ilin dövlət büdcəsində müdafiə və təhsil xərcləri 5,1 faiz artımla nəzərdə tutulur. Prezident İlham Əliyev vətəndaşların rifahının daha da yaxşılaşdırılmasını daim diqqətdə saxlayır. Bu, gələn ilin büdcə layihəsində də öz əksini tapıb”.