İspaniyanın La Nusiya şəhərində Avropa ölkələrinin Triatlon federasiyaları prezidentlərinin konfransı keçirilib.

Butov.az "Report"-a istinadən xəbər verir ki, tədbirdə Azərbaycan Triatlon Federasiyasının prezidenti Elçin Əliyev də iştirak edib. İclasda Avropa Triatlon İttifaqının prezidenti Renato Bertrandi yaxın və uzunmüddətli planları, qarşıdan gələn yarışların təqvimi və iş strategiyası barədə hesabatı açıqlayıb.

Milli federasiyaların rəhbərləri triatlonun inkişafı, onun populyarlığının və kütləvi xarakterinin artırılması yollarını birlikdə müzakirə ediblər. Federasiyalar arasında sıx əməkdaşlığın, birgə tədbirlərin və yarışların keçirilməsinin zəruriliyi qeyd edilib.

İclasda virtual idman məsələlərinə də xüsusi diqqət yetirilib. Məhz, müxtəlif ölkələrin idmançılarının belə turnirlərdə uzaqdan iştirak etmək imkanı müzakirə olunub.

Sonra mövsümün təqvimi açıqlanıb. Burada triatlonun da təqdim olunacağı yay idman növləri üzrə birgə Avropa çempionatı xüsusi yer tutur. Yarış 12 - 14 avqustda Almaniyanın Münhen şəhərində təşkil olunacaq. 17 - 24 sentyabrda isə Bilbaoda triatlonun bütün növləri üzrə qitə çempionatı təşkil ediləcək.

E.Əliyev bir sıra federasiyaların rəhbərləri ilə danışıqlar aparıb. O, həmçinin Türkiyə Triatlon Federasiyasının prezidenti Bülent Çendiklə görüşüb. Onlar sıx əməkdaşlıq və birgə tədbirlərin keçirilməsi barədə razılığa gəliblər.