Nuru Paşanın mənəvi varisi tapıldı

Paytaxtımızın uzaq guşələrindən birində, 8-ci kilometr adlanan ərazidə, "Xudafərin" şadlıq sarayı ilə üzbəüz sadə bir Azərbaycan vətəndaşı, tarix müəllimi Səxavət Hacı oğlu Hacıyev Bakının daşnak-rus birləşmələrinin işğalından azad edilməsində müstəsna xidməti olmuş Nuru Paşanın adını əbədiləşdirib. Elə bu münasibətlə də sentyabrın 15-də tədbir keçirib. Mərasimə toplaşanlara bildirib ki, bu ərazidə xidmət göstərən kafeyə “Xilaskar Nuru Paşa” nın adını verib: "Bu yer o boyda tarixi şəxsiyyətin adını daşımağa balaca olsa da, mənim olanım budur. Yetər ki ən dar məqamda Azərbaycanımızın dadına çatan Paşamızın ruhu şad olsun!".
Tədbirdə çıxış edən Hacı Nərimanoğlu, Tamxil Ziyəddinoğlu və başqaları Səxavət müəllimin təqdirəlayiq addımını alqışlayaraq belə bir təşəbbüsü Azərbaycan xalqının Nuru Paşaya olan sevgisinin ifadəsi kimi dəyərləndiriblər.
Nuru Paşanın məmləkətimizdə keçdiyi şərəfli döyüş yolundan danışan “Kredo” qəzetinin baş redaktoru, şair-publisist Əli Rza Xələfli Səxavət Hacıyevi Nuru Paşanın mənəvi oğlu, mənəvi varisi adlandırıb. Tədbir boyunca Nuru Paşanın adına ehsan süfrəsi açılıb. Sonda tədbir iştirakçılarına minnətdarlığını bildirən Səxavət Hacıyev qeyd edib ki, belə tədbirlər hər il bir ənənə kimi davam etdiriləcək.