Azərbaycanda Avropa Pul Viktorinasının Milli Mərhələsi keçirilib.
Butov.az xəbər verir ki, Mərkəzi Bankdan AZƏRTAC-a bildirilib ki, bank ölkə başçısının 2016-cı il 6 dekabr tarixli Fərmanı ilə təsdiq edilmiş “Azərbaycan Respublikasında maliyyə xidmətlərinin inkişafına dair Strateji Yol Xəritəsi”, həmçinin Prezidentin 2018-ci il 26 sentyabr tarixli Sərəncamı ilə təsdiq edilmiş “2018–2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı” icrası ilə əlaqədar müxtəlif tədbirlər həyata keçirir. Bu tədbirlərdən biri də Qlobal Pul Həftəsi çərçivəsində Mərkəzi Bank və Azərbaycan Banklar Assosiasiyasının təşəbbüsü, Almaniya Beynəlxalq Əməkdaşlıq üzrə Əmanət Kassaları Fondunun və Təhsil Nazirliyinin birgə təşkilatçılığı ilə keçirilmiş Avropa Pul Viktorinasının (Europian Money Quiz) milli mərhələsi olub.
Otuz iki bank assosiasiyasını birləşdirən Avropa Banklar Federasiyasının üzv ölkələri arasında təşkil etdiyi Avropa Pul Viktorinası məktəblilərin maliyyə savadlılığının artırılmasını dəstəkləmək məqsədilə keçirilir. Məhz buna görə də viktorinada iştirak edən 13-15 yaşlı məktəblilərə əsasən bank-maliyyə xidmətləri, pul nişanlarının emissiyası və tədavülü, rəqəmsal ödənişlər və vergilər kimi iqtisadi mövzular üzrə suallar təqdim olunur. Qaydalara uyğun olaraq, viktorinanın milli mərhələləri iştirakçı ölkələrdə, final mərhələsi isə Brüsseldə təşkil edilir.
Layihənin əhəmiyyətini və yarışmada 30-a qədər ölkənin iştirak edəcəyini nəzərə alaraq, Azərbaycan məktəbliləri bu il ilk dəfə viktorinaya qoşulublar. Azərbaycanda təşkil olunan milli mərhələ 2 turda keçirilib. Birinci turda viktorinada iştirak etmək üçün müraciət etmiş 500-dən çox şagird arasında keçirilmiş ilkin test imtahanında onların bilikləri qiymətləndirilib və ən yüksək göstəriciləri olan 106 nəfər II turda iştirak hüququ qazanıb. Bu turda şagirdlərin seçimi yarışın formatına uyğun iqtisadi mövzuları əhatə edib. Hər 2 turun seçimləri Təhsil Nazirliyi, Bakı şəhəri üzrə Təhsil İdarəsinə tabe məktəblər və özəl təhsil müəssisələrinin şagirdləri arasında aparılıb.
Yekunda I, II və III yerləri bölüşmüş qaliblərə mükafatlar, digər iştirakçılara isə müxtəlif hədiyyələr və sertifikatlar təqdim olunub. Viktorinanın qaydalarına əsasən, I yerin qalibləri – 257 nömrəli məktəbin şagirdi Fərid Rəcəbov və 220 nömrəli məktəbin şagirdi Pərviz Fərzəliyev ölkəmizi cari il mayın 6-7-də Brüsseldə keçiriləcək Avropa Pul Viktorinasının final mərhələsində təmsil edəcək.
Mərkəzi Bank müxtəlif hədəf qrupların maliyyə savadlılığının artırılmasına yönəlmiş maarifləndirmə və təbliğat işlərini genişləndirərək müvafiq Strateji Yol Xəritəsi və Dövlət Proqramından irəli gələn tədbirləri icrasını davamlı həyata keçirəcək.