Mərkəzi Bank tərəfindən maliyyə savadlılığının artırılmasına yönəldilmiş təlim keçiriləcək.

Butov.az xəbər verir ki, qurumun mətbuat xidmətindən “Qafqazinfo”ya verilən məlumata görə, Mərkəzi Bank beynəlxalq maliyyə təşkilatları və digər dövlət orqanları ilə birgə həyata keçirilən “Maliyyə Savadlılığı” layihəsi çərçivəsində bir sıra bank və maliyyə qurumlarının iştirakı ilə 2015-2016-cı illərdə tələbələr üçün “Maliyyə Savadlılığı: Peşəkar karyeraya aparan yol” adlı müsabiqə xarakterli təlimlər keçirib.

Sözügedən təlimə tələbələrin böyük marağını və daxil olmuş çoxsaylı müraciətləri nəzərə alaraq, Mərkəzi Bank bu ilin noyabr-dekabr aylarında növbəti təlimlərin keçiriləcəyini elan edir.

Təlim 2 mərhələdən ibarət olacaq. Birinci mərhələdə tələbələrə Mərkəzi Bank tərəfindən maliyyə sisteminin fəaliyyətinə dair maarifləndirici seminar keçiriləcək. Bu mərhələdə seçilmiş tələbələr növbəti - ikinci mərhələdə iştirak hüququ əldə edəcəklər.

İkinci mərhələdə tələbələr Əmanətlərin Sığortalanması Fondu, Amrahbank, Bakı Sığorta, DəmirBank, “FINCA Azərbaycan”, AccessBank və Unibankda tədris səfərlərində olacaq və müxtəlif seminarlarda iştirak edəcəklər.

Layihəni uğurla başa vurmuş tələbələr adları qeyd olunan qurumlarda təcrübəçi olmaq imkanı qazanacaqlar.

Təlimdə III və IV kurs tələbələri iştirak edə bilər. Qeydiyyat üçün CV-ləri 21.11.2016-cı il, saat 18:00-dək Aydan_Aliyeva@cbar.az ünvanına göndərməyiniz xahiş olunur.

Daha ətraflı məlumat əldə etmək üçün +994 12 493 89 46 (daxili 101) nömrəsinə zəng edə bilərsiniz.