5-07-2025, 00:45
Koronavirusun təhlükəli ştamı yayılıb
Böyük Britaniyanın Səhiyyə Təhlükəsizliyi Agentliyi ( UKHSA ) COVID-19-un yeni, daha yoluxucu ştammının yayıldığını təsdiqləyib.
XFG.3 və XFG virusları COVİD-19-un 40%-ni təşkil edirdisə, may ayında bu rəqəm təxminən 10%-dir.
Ekspertlər vurğulayıblar ki, hazırda Britaniyada COVID-19-a yoluxma halları azalır.
XFG ştammı Omicron ştammının nəslindəndir. Tədqiqatçılar xəbərdarlıq etdilər ki, Stratus əvvəlki COVID-19 variantlarından daha yoluxucu ola bilər, çünki virusun mutasiyaları ona immunitet müdafiəsindən yayınmaq üçün bir yol tapmağa kömək edir.
30-06-2025, 15:00
Dərmanların qiyməti ilə bağlı yeni qərar
Tarif (qiymət) Şurasının 30 iyun 2025-ci il tarixində növbəti iclası keçirilib və müvafiq qərar qəbul edilib.
İclasda yeni dövlət qeydiyyatına alınan 207 dərman vasitəsinin qiymətinin yuxarı həddi təsdiq edilib, 3 dərman vasitəsinin qiymətinin yuxarı həddi aşağı salınıb və etibarlı təchizatın təmin olunması məqsədilə 79 dərman vasitəsinin qiymətinin yuxarı həddində Nazirlər Kabinetinin 2015-ci il 3 iyun tarixli 209 nömrəli Qərarı ilə təsdiq olunmuş Qaydalara və Tarif (qiymət) Şurasının 2015-ci il 21 iyul tarixli Qərarı ilə təsdiq edilmiş Təlimata uyğun olaraq dəyişikliklər aparılıb.
Ticarət adı, farmasevtik forması, təsiredici maddəsinin adı, dozası, ticarət qablaşdırması, miqdarı, istehsal ölkəsi nəzərə alınmaqla, qiymətlərinin yuxarı həddi təsdiq edilmiş dərman vasitələrinin tam siyahısı Tarif (qiymət) Şurasının rəsmi internet saytının (www.tariff.gov.az) “Dərman vasitələri” bölməsində (//tariff.gov.az/documents/DVA.pdf) yerləşdirilib.
Qərar iyulun 7-dən qüvvəyə minir.
20-06-2025, 19:10
Burun əməliyyatından sonra ölən Nəzrinlə bağlı yeni DETALLAR
Burun əməliyyatından sonra komaya düşən Nəzrin Mansurlunun ölümü ilə bağlı təqsirləndirilən həkim Sənan Mehdiyevin cinayət işi üzrə məhkəmə prosesi keçirilib.
Nəsimi Rayon Məhkəməsində keçirilən prosesdə təqsirləndirilən Sənan Mehdiyev ifadə verib.
O bildirib ki, Nəzrin Mansurlu burun əməliyyatı üçün müraciət edən zaman ona burun çəpərinin əyriliyi diaqnozu qoyulub:
"Xəstəxanaya gələndə onun yanında heç kim yox idi. Əməliyyat bitəndə də xəstə yaxınlarından heç kimi görməmişəm. Əməliyyatdan sonra dəfələrlə onun yaxınları ilə danışmışam. Onlar mənə Nəzrinin baş ağrısı olduğunu və çox yatdığını demişdilər. Bunlar xəstədə çox rast gəlinən normal haldır. Mən də xəstənin yatıb dincəlməyini məsləhət gördüm. Əgər mənə başqa məqamların olduğunu desəydilər, mən ona evdə dincəlməyi məsləhət görməzdim. Mən Tibb Universitetini 2002-ci ildə bitirmişəm. Bununla yanaşı, İran, Türkiyə və Almaniyada ixtisas artırmaq üçün kurslar keçmişəm".
Sonra məhkəmə istintaqının başlanıldığı və ittiham aktı elan olunub.
İttihama görə, Sənan Mehdiyev 2025-ci ilin yanvar ayında Nəzrin Mansurlunu septoplastika əməliyyatı edən zaman onun alın, xəlbir və ön çənə sümüklərinə əlavə sınıq xəsarətləri yetirib.
İttihamda göstərilib ki, həkim apardığı vizual müayinənin nəticələrini yetərli hesab edərək əməliyyatın nəticələri haqqında mütləq tibbi tədbirlərin təyinatını dəqiqləşdirməyib və onun nəzarət altında qalmasını təmin etməyib.
Belə ki, N.Mansurlu 2025-ci ilin yanvarın 12-də vəziyyəti ağırlaşdığı üçün yerləşdirildiyi xəstəxanada həkim Sənan Mehdiyevin əməliyyat zamanı burun, alın, xəlbir sümüklərinin sındırması nəticəsində aldığı xəsarətlərdən ölüb.
Sənan Mehdiyev ittihama münasibət bildirərkən özünü təqsirli hesab etməyib.
Məhkəmənin növbəti iclası iyunun 30-na təyin edilib.
Xatırladaq ki, bu il yanvarın 12-də 1995-ci il təvəllüdlü Bakı şəhər sakini Nəzrin Aydın qızı Mansurlunun müalicə aldığı xəstəxanada ölməsi faktı ilə bağlı Nəsimi Rayon Prokurorluğunda araşdırma aparılıb.
İlkin araşdırma zamanı Nəzrin Mansurlunun yanvarın 3-də paytaxtın Nəsimi rayonu ərazisində yerləşən klinikalardan birində septoplastika əməliyyatı edilməsi, əməliyyatdan qısa müddət sonra vəziyyəti kəskin ağırlaşdığı üçün müalicə məqsədilə yerləşdirildiyi xəstəxanada ölməsi müəyyən edilib.
Sənan Mehdiyev Cinayət Məcəlləsinin 314.2-ci (səhlənkarlıq, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham
olunur.
20-06-2025, 18:35
Qobustan sakinləri tibbi xidmət üçün digər rayonlara üz tutmayacaq
“Qobustan Rayon Mərkəzi Xəstəxanasında (RMX) tibbi xidmətlərin həcmi genişləndirilib, xəstəxana ən müasir avadanlıqlarla təchiz edilib, kadr potensialı gücləndirilib”.
Bu barədə Qobustan RMX-da baş tutan mediatur çərçivəsində jurnalistlərlə müsahibəsində xəstəxananın direktoru Günay Muradova məlumat verib. O bildirib ki, regionlarda vətəndaşların tibbi xidmətlərə çıxış imkanlarının artırılması istiqamətində sistemli tədbirlər görülür:
“Bu məqsədlə 30-a yaxın Mərkəzi Rayon Xəstəxanası yenidən qurulub. Qobustan RMX-da da ftalmoloji, travmatoloji, uroloji, LOR, endokrinoloji cərrahiyyə xidmətləri yaradılıb. Artıq əhalinin bu xidmətlərdən yararlanmaq üçün digər şəhər və rayonlara üz tutmasına ehtiyac qalmayıb”
G.Muradovanın sözlərinə görə, son 1 il yarım ərzində xəstəxana ən müasir tibbi avadanlıqlarla təchiz olunub, laborator imkanları gücləndirilib:
“60-a yaxın laborator əməliyyat icra edilib. Cərrahi əməliyyatların əksəriyyəti minimal kəsiksiz üsullarla aparılır. Uroloji əməliyyatlardan biri 91 yaşlı xəstəyə, çanaq sümüyü əməliyyatı isə 94 yaşlı pasiyentə uğurla icra edilib. Bu faktlar TƏBİB-in və regionlardakı tibb müəssisələrinin imkanlarının artdığını göstərir”.
Günay Muradova həmçinin vurğulayıb ki, Qobustan RMX-da kadr məsələsi də diqqət mərkəzində saxlanılır. Son bir il yarımda 50 faizdən çox yeni tibb işçisi kollektivə cəlb olunub:
“25-dən artıq həkim işə qəbul edilib. Onların sırasında ixtisaslı cərrahlar da var. Eyni zamanda İcbari Tibbi Sığorta üzrə Dövlət Agentliyinin göndərişi ilə uzman cərrahlar, professor və tibb elmləri doktorları xəstəxanada fəaliyyət göstərir”.
Direktor əlavə edib ki, xəstəxana Azərbaycan Tibb Universitetinin tədris bazalarından biri kimi də fəaliyyət göstərir:
“Əvvəllər həkimlərin Bakıya gedib-gəlməsi tələb olunurdusa, artıq bu ehtiyac aradan qalxıb. Qobustan yerləşmə baxımından da paytaxta yaxın olduğu üçün kadr axını baxımından üstünlük təşkil edir. Hazırda xəstəxanada kadr çatışmazlığı yoxdur. Əksinə, yeni ixtisaslar - neyrocərrah, ürək-damar cərrahı üzrə vakansiyalar elan edilməsi planlaşdırılır”.
3-06-2025, 16:59
Səhiyyə Nazirliyi əhaliyə çağırış etdi
Havaların qeyri-sabit keçməsi səbəbindən respirator xəstəliklərə, o cümlədən hazırda ölkə ərazisində yayılmış mövsümi qrip infeksiyasına yoluxma hallarında artım müşahidə olunur.
Bununla bağlı Səhiyyə Nazirliyi sağlamlığının qorunması və yoluxma hallarının qarşısının alınması məqsədilə qarşıdan gələn Qurban bayramı və istirahət günlərində, xüsusilə risk qrupuna daxil olan şəxslərə müraciət edib.
Müraciətdə bildirilib ki, kütləvi tədbirlərdə və insanların sıx toplaşdığı məkanlarda tənəffüs yollarını qoruyan fərdi qoruyucu vasitələrdən (tibbi maskalardan) istifadə edin, əl gigiyenasına ciddi riayət edin, gündəlik qidalanmada vitaminlərlə zəngin ərzaqlara üstünlük verin, geyim seçimində mövsümü deyil, hava şəraitini nəzərə alın.
Səhiyyə Nazirliyi hər bir vətəndaşı sağlamlığına xüsusi diqqət və məsuliyyətlə yanaşmağa, həmçinin özünü və ətrafındakıları xəstəliklərdən qorumağa çağırır.
13-05-2025, 15:09
Aborta görə cəzalar sərtləşdirilir
Qanunsuz abort zamanı şəxsin sağlamlığına ehtiyatsızlıqdan az ağır ziyan vuranlar 1 ilədək həbs ediləcək.
Bu, Milli Məclisin mayın 16-da keçiriləcək iclasının gündəliyinə daxil edilən Cinayət Məcəlləsinə təklif edilən dəyişiklikdə əksini tapıb.
Layihəyə əsasən, həkim tərəfindən tibb müəssisələrindən kənarda abort etmə və müvafiq ali tibbi təhsili olmayan şəxs tərəfindən abort etmə nəticəsində zərərçəkmiş şəxsin sağlamlığına ehtiyatsızlıqdan az ağır ziyan vurulduqda iki ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə bir ilədək müddətə azadlığın məhdudlaşdırılması və ya bir ilədək müddətə azadlıqdan məhrum etmə ilə cəzalandırılacaq.
Eyni zamanda layihəyə əsasən, həmin əməllər nəticəsində zərərçəkmiş şəxsin sağlamlığına ehtiyatsızlıqdan ağır zərər vurulduqda üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə iki ilədək müddətə azadlığın məhdudlaşdırılması və ya iki ilədək müddətə azadlıqdan məhrum etmə ilə cəzalandırılacaq.
Qüvvədə olan Məcəlləyə əsasən, nəzərdə tutulmuş əməllər nəticəsində zərərçəkmiş şəxsin sağlamlığına ehtiyatsızlıqdan ağır zərər vurulduqda iki min manatdan üç min manatadək miqdarda cərimə və ya iki ilədək müddətə islah işləri və ya bir ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə bir ilədək müddətə azadlığın məhdudlaşdırılması və ya bir ilədək müddətə azadlıqdan məhrum etmə ilə cəzalandırılır.
9-05-2025, 16:24
Bu dərmanları pulsuz alacağıq[/size]
Azərbaycanda bir sıra dərman vasitələrinin icbari tibbi sığortaya daxil edilməsi gözlənilir.
Bu barədə İcbari Tibbi Sığorta Agentliyindən məlumat verilib.
Qurumdan bildirilib ki, ambulator şəraitdə resept əsasında istifadə olunan dərman vasitələrinin mərhələli qaydada icbari tibbi sığorta ilə qarşılanması nəzərdə tutulub. Lakin 2025-ci ilin ikinci yarısından ürək-damar sistemi xəstəlikləri, növbəti illərdə isə həzm və tənəffüs sistemi xəstəlikləri üçün dərman vasitələrinin sığortaya daxil edilməsi planlaşdırılır.
Bununla yanaşı, ürək-damar, neyrocərrahiyyə, ümumi cərrahiyyə, uroloji, oftalmoloji, travmatoloji və laborator xidmətlərlə bağlı Xidmətlər Zərfinin genişləndirilməsi, yeni tibbi xidmətlərin əlavə edilməsi, mövcud xidmətlərin çeşidinin artırılması nəzərdə tutulub.
7-05-2025, 18:30
Bakıda mühüm sənəd imzalandı
Azərbaycan Respublikasının Prezidenti İlham Əliyev və Vyetnam Sosialist Respublikası Kommunist Partiyasının Mərkəzi Komitəsinin Baş katibi To Lam mayuın 7-də “Azərbaycan Respublikası ilə Vyetnam Sosialist Respublikası arasında Strateji Tərəfdaşlığın qurulması haqqında Birgə Bəyanat”ı qəbul ediblər.
6-05-2025, 12:37
Azərbaycanda ilk - Canlıdan-canlıya qaraciyər köçürüldü
TƏBİB-in tabeli tibb müəssisələrində əhaliyə göstərilən xidmətlərin çeşidinin və keyfiyyətinin artırılması, o cümlədən infrastrukturunun müasirləşdirilməsi və tibdə dəyəri yüksək olan cərrahi əməliyyatların icrası istiqamətində tədbirlər davam etdirilir. Görülən işlərin nəticəsi olaraq, dövlət tibb müəssisəsində daha bir unikal cərrahi əməliyyatın icrasına başlanılıb.
TƏBİB-dən bildirilib ki, icbari tibbi sığortanın Xidmətlər Zərfi çərçivəsində dövlət tibb müəssisələri arasında ilk dəfə Yeni Klinikada canlıdan-canlıya qaraciyər transplantasiyası əməliyyatı icra olunub.
Dəyəri kifayət qədər yüksək olan əməliyyat zamanı 26 yaşlı qadına 30 yaşlı qardaşından qaraciyər köçürülüb. Əməliyyat tibb müəssisənin direktor müavini, Cərrahiyyə və transplantasiya mərkəzinin rəhbəri Eldar Əhmədovun rəhbərliyi, eyni zamanda, ümumi cərrahlar Ceyhun İsayev, Lalə İsmayılova, ümumi cərrah Günay Allahverdiyeva, ürək-damar cərrahları Mətin Hadizadə, Elgin Hacızadə, anestezioloq Mayıl Sədiyev, transplantasiya üzrə koordinator həkim İntizar Məmmədovanın iştirakı ilə uğurla icra olunub.
Əməliyyatdan sonra resipiyent və donorun vəziyyəti qənaətbəxş qiymətləndirilib. Hər ikisinin bir neçə gün sonra ambulator müalicə üçün evə buraxılması planlaşdırılır.
Cərrahiyyədə ən mürəkkəb müdaxilələrdən biri hesab edilən qaraciyər transplantasiyası yüksəksəviyyəli təcrübə tələb edən bir prosedurdur. Uğurlu nəticə üçün xəstənin dəqiq qiymətləndirilməsi, uyğun donor seçilməsi, cərrahiyyənin düzgün aparılması, reanimasiya dəstəyi və əməliyyatdan sonrakı təqib olduqca vacib hesab olunur.
Qeyd edək ki, 2 ay əvvəl Yeni Klinikada canlıdan-canlıya böyrək transplantasiyası da icra olunmuşdu və əməliyyat uğurla başa çatmışdı. Hazırda tibb müəssisəsində hər iki əməliyyatın icrası üçün bütün imkanlar mövcuddur.
Xatırladaq ki, Azərbaycan Respublikası Nazirlər Kabinetinin 2021-ci il avqustun 20-si tarixli 235 nömrəli Qərarı ilə təsdiq edilmiş “Donor orqanların götürülməsi, hazırlanması, saxlanması, daşınması, idxalı və ixracını həyata keçirən tibb müəssisələrinin Siyahısı”nda dəyişiklik edilib. Qərara əsasən, 2024-cü ildən “Yeni Klinika” Publik Hüquqi Şəxs (qaraciyər, böyrəklər) bu siyahıya əlavə edilib.
3-05-2025, 10:46
Abşeronda “Ümumdünya İmmunlaşdırma həftəsi” keçirilir
Azərbaycan Respublikasının Səhiyyə Nazirliyi aprelin 14-də Ümumdünya Səhiyyə Təşkilatının tövsiyyəsinə əsasən 27 aprel-3 may tarixlərində respublikanın bütün şəhər və rayonlarında “Ümumdünya İmmunlaşdırma həftəsi” keçirilməsi barədə əmr verib. Təşkilati-hüquqi formasından asılı olmayaraq respublikanın bütün tibb idarə və müəssisələrinin rəhbərlərinə hər hansı səbəblərə görə immunlaşdırmadan kənarda qalan uşaqların siyahısının hazırlanmasının və “Ümumdünya İmmunlaşdırma həftəsi” ərzində onların immunlaşdırmaya cəlb edilməsinin təmin olunması tapşırılıb.
Səhiyyə Nazirliyinin müvafiq əmrinə uyğun olaraq “Abşeron Rayon Mərkəzi Xəstəxanası” publik hüquqi şəxsin direktoru Səkinə Sadıxovanın rəhbərliyi ilə Abşeron rayonunun səhiyyə işçiləri də bu kampaniyada fəal iştirak edirlər.
Belə tədbirlər çərçivəsində mayın 2-də Mahdiabad Ailə Sağlamlıq Mərkəzində “Ümumdünya İmmunlaşdırma həftəsi” barədə əhali arasında maarifləndirmə işi aparılıb. Mehdiabad Ailə Sağlamlıq Mərkəzinin bölmə müdiri Qənitə İsmayılova maarifləndirmə tədbirinə qatılan valideynləri və uşaqları salamlayaraq immunlaşdırmanın mahiyyəti barədə məlumat verib. Onun uşaqların gələcək sağlamlığının qorunmasındakı rolundan danışıb. Qeyd edib ki, biz mütəmadi olaraq əhali arasında uşaqların icbari dispanserizasiyası və peyvəndlənməsi haqqında sanitar-maarifləndirmə işləri aparırıq. Bu dəfə isə çalışmışıq immunlaşdırmadan kənarda qalan uşaqlarımızı prosesə cəlb edək ki, balalarımızın sağlam gələcəyi təmin olunsun.
Odur ki, “Abşeron Rayon Mərkəzi Xəstəxanası” publik hüquqi şəxsin direktorunun İlkin Səhiyyə Xidməti üzrə müavini Kazım Məmmədov və “Abşeron Rayon Mərkəzi Xəstəxanası” publik hüquqi şəxsin İlkin Səhiyyə Xidməti şöbəsinin müdiri Faris Musayev də burda bizimlə birlikdədir. Sizi maraqlandıran suallara cavab verəcəklər.
Ailə həkimi-pediatr Arzu Əlicanova bildirib ki, immunlaşdırma hər il dünyada milyonlarla ölümün qarşısını alır. Ümumdünya Səhiyyə Təşkilatının təşəbbüsü ilə 2006-cı ildən Avropa ölkələrində keçirilən “Ümumdünya İmmunlaşdırma həftəsi”nin keçirilməsi artıq ölkəmizdə də ənənə halına çevrilib. Azərbaycan Dünya Səhiyyə Təşkilatının Avropa Regional Bürosunun “İmmunlaşdırma həftəsi” təşəbbüsünə 2007-ci ildə qoşulub.
Vətəndaşın immunlaşdırmaya cəlb olunmasının faydasını daha yaxşı anlamaq üçün düşünmək lazımdır ki, xəstəliyin profilaktikası onu müalicə etməkdən çox-çox asandır.
Peyvəndin gələcəkdə hər hansı bir fəsadının ola biləcəyindən narahat olan analara vaksinlərin sağlamlıq üçün insan orqanizminə ən faydalı müdaxilələrdən biri və hər kəs üçün əlçatan olduğu izah edilib. Əlavə olaraq valideynlərə uşaqların sağlamlığının qorunmasını təşviq edən bukletlər paylanıb. Maariflənmə mərhələsindən sonra uşaqların müayinəsinə və peyvənd olunmasına başlanıb.
Ailə Sağlamlıq Mərkəzində vaksinasiya günləri ərəfəsində uşaqlar üçün əyləncəli mühit yaradılıb. Belə bir şərait və xidmətdən razı qalan valideynlər gələcəyimiz olan uşaqların sağlamlığı keşiyində dayanan tibb işçilərinə minnətdarlıqlarını bildiriblər.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!